Jesu a gira silewugiso nya singi

Jesu dzude mafuni gasi a ta tshumayela mahungu nya yadi nya Mufumo wa Nungungulu. Gasi gu yeyedza esi Jesu a na girago tepo a na fumago, Jehovha a di mu ninga liphuvbo nya guage gasi a gira silewugiso. Jesu a di gu kodza gu hawulugisa vathu va nga ba va dwala. Gwatshavbo omu a nga ba a hongola, gu di guta vathu nyo dwale va ta lomba gu vbanyiswa, uye a va vbanyisa. Ava va nga ba va si woni, va di gu hawulugiswa va pheya gu wona, ava nya gufe dzindzeve va pheya gupwa, silima si pheya gu gimbiya, ava va nga ba va tshaniswa khu madhemoni, ma di gu tutumiswa. Muthu khu gu khuha basi tshoka nya tshalu yaye a di gu vbanyiswa madwali yaye. Vathu va di gu landreya Jesu ni hayini omu a nga ba a hongola. Ambari a gu ba a vbweta gu dzi khaleya enga, vathu va di gu mu landra.

Litshigu limwedo, vathu va di khusa mwama moyo a nga ba a bangide sivbango va hongola naye omu nya nyumba eyi Jesu a nga ba ari ga iyo. Ganiolu, gu di tade khu vathu nyo bwe ava va nga ba vari ni oyu a nga ba a dwala va tandrega gu beya. Khu kharato, va di pola khu vbatshani nya nyumba, va reledza mwama yoyo ga Jesu. Jesu a di embeya mwama yoyo a nga ba a dwala, khuye: ‘Khuga u ema, u hongola.’ Tepo a nga khuga a hongola, vathu va di hlamala ngudzu.

Ga yimbe tepo gambe, Jesu na beya omu nya gidhoropana nyo khaguri, a di wonwa khu 10 vama va nga ba va dwala khu sokono, khavbovbo va di ema khu hwindzo va ganeya khu lito nyo khugege, khavo: ‘Jesu, ho lomba gu khethu u hi phasa!’ Matshiguni yoyo, muthu a gu ba ari ni sokono kha nga ba a dzumeledwa gu hidzimeya vbafuvbi ga vambe. Jesu a di embeya vama vovo gu khuye va hongola tempeleni, kha nga olu Nayo wa Jehovha wu nga ba wu khuwo muthu a gu ba a hawulugisidwe sokono gu vbwetega a hongola tempeleni. Na vari ndziyani nyo hongole tempeleni, va di hawulugiswa. Tepo moyo wawe a nga si wona gu khuye a di hawulugisidwe, a di wuya ga Jesu a ta mu bonga ngudzu a bwe a zundza Nungungulu. Ga vatshavbo vama vale nya 10, moyo basi a nga wuya a ta bonga Jesu.

Nyamayi nyo khaguri a nga ba a vbedzide 12 myaga na dwala, a di gu gimbiyagimbiya gwatshavbo na vbweta gu hawulugiswa. A di vandrameya khu vbakari nya vathu a ya mola tshoka nya tshalu ya Jesu. A di dzegeya gu hawulugiswa. Tepo si nga girega isoso, Jesu a di wudzisa khuye: ‘Khu mani a nga nyi khuha?’ Nyamayi yoyo a di thava ngudzu, ganiolu a di hidzimeya ga Jesu a ya ganeya lisine laye. Jesu a di mu thaveleya khu gu mu embeya, khuye: ‘Mwanangu, gimbiya khu gurula.’

Mwama moyo nyo pwani khu Jayiro, a nga ba ari muthangeyi nya sinagoga, a di khongoteya Jesu khuye: ‘Hongole gaya gwangu! Nyamahegyane wangu a ngu dwala ngudzu.’ Ganiolu, Jesu na si gu vbohi gaya ga Jayiro, nyamahegyane wa Jayiro a difa. Tepo Jesu a nga vboha, a di wona vathu nya vangi va nga ba va dzude gasi gu ta thaveleya ndranga ya Jayiro. Jesu a di va embeya khuye: ‘Mu nga liyi, gyanana gegi gi di lala.’ Khavbovbo, a di mola libogo la gyanana gile, khuye: ‘Mwanangu, wuga!’ Nyamahegyane a di dzegeya gu wuga a khala, khavbovbo Jesu a embeya vavelegi va gyanana gile gu khuye va gi ninga gilo nyo hodze. Nga dundrugeya khedzi vavelegi vakona va nga tsaka khidzo!