Jesu a bweleya ndzadzini

Jesu a di tshangana ni valandreyi vaye Galileya. A di va ruma gu gira thumo nya lisima ngudzu, khuye: ‘Gimbiyani mu gira vapizane vathu nya mayigo yatshavbo. Mu va hevbudza esi nyi mi hevbudzidego mu bwe mu va bhabhatisa.’ A di bwe a va tumbisa gu khuye: ‘Nyi na ba nyiri ni enu tepo yatshavbo.’

Ndrani nya 40 matshigu hwane nyo ba a wusidwe, Jesu a di wonega ga vapizane vaye nya vangi Galileya ni Jerusalema. A di va hevbudza silo nya lisima a bwe a va gira siwudziso nya singi. Khavbovbo, Jesu a di tshangana ni vapostoli vaye khu tepo nyo hegise Gigomoni nya Miolivha. A di va embeya khuye: ‘Mu nga khugi khu Jerusalema. Khalani mu vireya esi Papayi a tumbisidego.’

Ganiolu, vapostoli vaye kha va si pwisisa gu khavo a di gu thula ginani. Khavbovbo, va di mu wudzisa khavo: ‘Wo hadzi pheya olu gu fumeya litigo la Israyeli?’ Jesu khuye: ‘Yi si vbohi tepo eyi Jehovha a vbwetago gu khuye nyi khala Pfhumu. Nugunugu, mu na ningwa tshivba khu liphuvbo nya guage, mu khala dzifakazi dzangu. Gimbiyani mu tshumayela omu Jerusalema, Judhiya, Samariya ni malangani ya hwindzo.’

Jesu a di pheya gu khusega a bweleya ndzadzini, khavbovbo gu di duga lipfhi li mu fenengedza. Vapizane vaye va di simama gu khedza vbatshani, ganiolu Jesu a di hongode.

Vapizane va di khuga khu Gigomoni nya Miolivha va bweleya Jerusalema. Tepo yatshavbo va di gu tshangana salani ya vbatshani va gombeya, na va vireya gu khavo Jesu a va ninga simbe sileletelo.