BHIBHILIYA YI NGU VBINDRUGEDZA WOMI
Gu mwalo wulanga nyi nga ba nyi hongola nya mba na giphisa
MWAGA NYA GU VELEGWE: 1958
LITIGU NYA MAVELEGO: ITÀLIA
WOMI WAYE A DI GU: LUMBA TSAWA NYA SIGHEVENGA
WOMI WANGU WA GALE:
Nyi velegidwe nyi bwe nyi dandriswa Roma, ga wulanga va nga ba vari sisiwana ngudzu. Womi wu di gu garadza ngudzu. Eni kha nya muti mamayi wangu nigu eni ni papayi wangu kha hi pwani. Nyi dandride na nyi gu vbanya dziruwani.
Tepo nyi nga ba nyiri ni 10 myaga nyi di guba nigu na nyiri ni 12 myaga nyi di tutuma khu gaya khu tepo nya gu pheye. Dzitepo nya dzingi si gu lombega gu papayi wangu a nyi landra pasoni kholu nyi di gu khaleya gu dwanisana ni vathu, nyi diri gighevenga nigu nyi di gu zangareya vathu vatshavbo. Tepo nyi tshanganisa 14 myaga nyi tutuma gambe khu gaya, nyi pheya gu daha mbange, nyi vbanya gambe dziruwani. Kha nga olu nya gu nyi diri mwalo wulanga nya gu lale nyi di gu gwandra malimba nya dzimovha gasi nyi lala. Nyi di gu hamba ni ga wevbini Popi nyi nga ba nyi wu mana.
Nyi di khala mbafa nya yikhongolo, nyi di guba omu nya dzipaxita nya vathu, omu nya dzipredhiyu ni mu dzindrangani vbawutshigutunu. Tepo nyi nga ba nyiri ni ndruma nya yikhongolo, va nyi kovhidharide gasi nyi thangeya simbe sighevenga si nga ba siba omu nya dzibhanku. Va di gu nyi ninga githawo kholu nyi di gu garadza ngudzu, nyi di si dugi nya mbana giphisa nyi di gu lala nagyo vbavbatshi nya gikhuledzo. Dzihanyi, gu daha, guba, gu ganeya malito nya mba handzega ni mavbanyelo nya gu vivbe si di khala mavbanyelo yangu. Nyi di gu khaleya gu vbwetedzedwa khu Maphoyisa. Nyi khotedwe pasoni khu dzitepo nya dzingi nigu khu myaga nya yingi nyi di beya di gu duga khu pasoni.
BHIBHILIYA YI VBINDRUGEDZIDE KHARINI WOMI WANGU:
Litshigu limwedo hwane nya gu ba nyi dugide khu pasoni nyi diya wuseya tiya wangu, nyi di si dziti gu kheni tiya wangu ni sanana saye va diri Dzifakazi dza Jehovha. Va di nyi kovhidhari gasi nyi hongola mitshanganoni eni nyi di dzumeya. Tepo hi nga vboha Salawuni nya Mufumo, nyi di hatha gu khala khu vbamwanya gasi nyi si kodza gu wona ava va nga ba na va gu beya ni gu duga nigu kha nga giolovedzo nyi di gu dzegide giphisa gyangu.
Tshangano wule wu vbindrugedzide womi wangu, nyi di gu dzipwa nga khatshi nyo va romo ga limbe litigo, kholu vathu nya vangi va di guta va ta nyi losa khu lihaladzo na va gu tshulegide. Nyi si kodzide gu wona wuhindzi ni gu tumbega ga Dzifakazi dza Jehovha, isoso si di gu hambanide ngudzu ni esi nyi nga ba nyi si vbanya!
Nyi di pheya gu hevbula Bhibhiliya nyi Dzifakazi dza Jehovha, khavbovbo nyi di si wona gu kheni nyi di yede gu vbindrugedza mavbanyelo yangu. Nyi wonide lisima nya malito ma gomogo ga Mavingu 13:20 ma gu khayo: “Wule a gimbiyago ni va nya mapimo, a na mana mapimo, aholu wule a gimbiyago ni sipumbu a na thegedwa khu libango.” Nyi si wonide gu kheni nyi di yede gu dzi hambanisa ni tsawa wule nya sighevenga. Isoso kha sa nyi vbevbugeya, Ganiolu, Jehovha a nyi phaside nigu nyi si kodzide gu vbindrugedza.
Khu tepo nyo pheye womini gwangu nyi phede gu dziphara
Nyi di pheya gu manega ni mavbanyelo ma agidego. Khu kotani nya gu dzigaradze nya gu khongolo nyi digide gu daha dzisigaru ni mbange, nyi piya ndzudzu wu nga ba wuri wukhongolo ngudzu, nyi ema gu ambala dziphera, gu ganeya malito ya mba handzega nigu nyi di pheya gu hevbuleya gu dzi phara.
Eni nyi di si goli gu leri ni gu hevbula khu kharato si nyi garadzede ngudzu gu nyi vega gupima avbo nya gihevbulo nya Bhibhiliya. Ganiolu, nyi dzi garadzide ngudzu nigu khu gu gimbiya nya tepo nyi di pheya gu mu gola ngudzu Jehovha, khu kotani nya isoso nyi di pheya gu thumisa livhalo langu. Gu tala nya dzitepo nyi di gu dzipwa nandru nigu nyi di gu pimisa gu kheni Jehovha khana nga nyi divaleya khu kotani nya silo nya singi nyo vivbe nyi giridego gale. Ga tepo yoyo, nyi phasegide ngudzu khu gu leri edzi Jehovha a divaledego khidzo Dhavhidhe tepo a nga gira sighoho nya sikhongolo. — 2 Samuweli 11:1–12:13.
Gimbe gigaradzo gu diri gu thava gu ganeya khu gu khodwa gwangu thumoni nyo tshumayele khu ndranga ni ndranga. (Matewu 28:19, 20) Nigu nyi di gu thava gu manana ni muthu nyi nga mu gireya silo nyo vivbe! Ganiolu, vbadugwana vbadugwana nyi si kodzide gu pala hwanga wowu, nyi di pheya gu mana litsako nya lisine, khu gu nyi phasa vathu gu hevbula khu papayi wathu wa ndzadzini, nya lihaladzo oyu a kodzago gu divaleya.
EDZI NYI NGA PHASEGA KHIDZO:
Gu hevbula ni guti Jehovha si vbulugiside womi wangu! Gu tala nya dzipari dzangu nyi nga ba nyi hagana nadzo dzi fude nigu dzimbe dza kona dzi khotedwe pasoni. Ganiolu eni nyi na ni womi nya gu tsakise muhuno nigu nyi na simama gu tsaka gambe ga tepo yitago. Nyi hevbulede gu dzinogisa, gu engisa ni gu dziphara. Isoso si nyi phaside ngudzu gasi nyi si kodza gu pwanana ni vathu. Nyi tsakide ni mwangadzi wangu Carmen nigu hi ngu simama gu tsaka kholu hi si kodzago gu phasa vambe vathu gu hevbula Bhibhiliya.
Khu lisine olu nyi ngu tumbega ga thumo wangu, dzimbe dzitepo nyi ngu thuma omu nya dzibhanku, vbavbandze nya gu yabe nya guya agisa!▪