Kha nya nga ba nyi khodwa gu kheni Nungungulu womo

WOMI WAYE WA GALE

Nyi velegedwe República Democrática Alemã, ga gidhoropana nya gidugwana gi ranwago gu pwani Saxónia. Hi diri ni womi nya gu tsakise drangani gwathu, nigu vavelegi vangu tepo yatshavbo va di gu nyi hevbudza gu manega ni mavbanyelo nya yadi. Litigo lathu li di gu fumedwa khu politika Comunista, khu kharato vathu nya vangi kha va nga ba va ninga lisima wukhongeyi. Isoso si nyi giride nyi si khodwi ga Nungungulu. Tepo nyi ba nyi ri ni 18 myaga, nyi di gu khodwa ga sihevbudzo si nga ba si ganeya gu khiso Nungungulu mwalo ni ga esi si nga ba si ganeya khu wu comunismo.

Khu ginani wu comunismo wu nga ba wu nyi drindra gupima? Kholu, wu di gu hevbudza gu khuwo vathu vatshavbo va ngu fana nigu nyi di gu si gola ngudzu isoso. Nyi di gu pimisa gu kheni vatshavbo va di yede gu pharwa khu ndziya nyo fane. Khu kharato, mwalo a nga hadzi gu ghaya ngudzu ambari gu khala gisiwana. Khu gighelo gyogyo, nyi di pheya gu gira satshavbo nyi nga si kodza gasi gu phasedzeya dzihengeledzano nya vaphya nya wu comonista. Tepo nyi nga ba nyi ni 14 myaga nyi di pheya gu phasedzeya avba nya thumo nya gu vbindrugedzeye malangaliya ya gale ma khala nya maphya. Vathangeyi va dhoropani ga Aue va tsakide khu thumo nyi nga ba nyi wu gira va bwe va nyi ninga premiyo. Ambari olu nyi nga ba nyiri muphya, nyi di guti dzipolitika nya wu comunismo nya gu hambane-hambane. Gwangu nyi di gu dzi wona na nyi gira silo nya sadi.

Khu githugedza, satshavbo si di vbindrugedza. Khu 1989 muru wa Berlin wu di khungumuga nigu mifumu nya yingi nya wu comunista ya Europa aniyo yi di fuviswa. Isoso si nyi kuhide ngudzu, ganiolu kha sa hegeya avbovbo. Khu gu landreya, nyi tugude gu kheni mufumu wa tigoni gwangu wu di gu gira silo nya singi nya gu vivbe. Khu giyeyedzo, oyu a nga ba a si seketeyi wu comunismo a diri mwalo dzifanelo edzi vambe va nga ba va ri nadzo. Nyi di gu dzi wudzisa gu kheni: “Sa gu kodzega kharini isoso? Va comunista khandri avo va ganeyago gu khavo vatshavbo va ngu fana? Ina wu comunismo khandri malipha?” Satshavbo isoso si di gu nyi gira nyi garadzega.

Khu kharato, nyi di hunga gu vega gupima avba nya gu embeleye ni gu pintari. Ga tepo yile, nyi di gu hevbula ga xikola yi nga ba yi hevbudza gu embeleya nigu nyi di gu vbweta gu simama gu hevbula gu embeleya ga Univherisidhadhi nyo khaguri. Nyi di gu vbweta gu khala pintori ni muembeleyi, ganiolu nyi di hegisa khu gu diga khu gu vbeleya satshavbo esi vavelegi vangu va nyi hevbudzidego. Egi basi nyi nga ba nyi gi vbweta gu hagana, gu nga ba gu pata gu namorari ni sagadzyana nya singi khu tepo ya yimweyo. Ambari olu nyi nga ba nyi vbanya nya muvbanye, gu embeleya ni gu pintari, nyi di gu thava esi si na giregago mindru watshigu. Esi nyi nga nyi pintari si di gu yeyedza gu khiso nyi di gu thava ngudzu. Nyi di gu dzi wudzisa gu kheni: “Ginani gi na giregago mindru watshigu? Khu yavbini makungo nya womi?”

Tepo nyi nga mana mihlamulo nya siwudziso sangu, nyi di hlamala ngudzu. Litshigu limwedo xikwatuno, eni ni sihevbulo kwathu hi di gu bhula khedzi wu na khalago khidzo womi mindru watshigu. Gimwegyo nya sihevbuli kwathu nyo pwani khu Mandya a diri Fakazi ya Jehovha. Uye a di nyi embeya gu khuye: “Wa gu ba u vbweta gu mana mihlamulo nya siwudziso u gu naso khu womi ni wumindru, u yede gu wona esi Bhibhiliya yi si ganeyago”.

Kha nya khodwa ga esi a nga nyi embeya, ganiolu nyi di hunga gu wona esi Bhibhiliya yi si ganeyago. Mandy a di nyi yeyedza Dhaniyeli gipimu 2 nigu nyi hlamadzisidwe khesi nyi nga leri. Gipimu gegi gyo ganeya khu mifumu nya gu hambane-hambane yi nga hadzi manega kala matshigoni yathu. Uye gambe a nyi yeyedzide simbe sipandre nya Bhibhiliya si ganeyago khu wumindru wathu. Khavbo nyi nga mana mihlamulo nya siwudziso sangu. Nyi di dzi wudzisa gu kheni: ‘ina siprofeto sesi so yeyedza gu khiso Nungungulu womo khu lisine? Khu mani a gu na ni makodzelo nya gu ganeye esi si na giregago mindru watshigu?’

EDZI BHIBHILIYA YI VBiNDRUGEDZIDEGO KHIDZO WOMI WANGU

Mandy a di nyi ningeya ga Horst ni Angelika, patwa nyo khaguri nya Dzifakazi dza Jehovha gasi va nyi hevbudza Bhibhiliya. Nyi dzegede gu pwisisa gu kheni Dzifakazi dza Jehovha khidzo basi dzi hevbudzago lina la Nungungulu, Jehovha. (Ndzimo 83:18; Matewu 6:9) Nyi hevbude gambe gu kheni Jehovha a ngu hi ninga gutumba nya gu vbanye kala gupindruga paradhesini mafuni. Ndzimo 37:9 yo ganeya gu khiyo: “Oyu a tumbago [Jehovha] a na fumela litigo.” Nyi tsakide ngudzu khu guti gu kheni ava va engisago Nungungulu va na vbanya kala gupindruga.

Ambari ulolo, kha sa nyi vbevbugeya gu gira esi Bhibhiliya yi si ganeyago. Nyi di yede gu dzi garadza ngudzu. Nyi di yede gu hevbuleya gudzinogisa kholu guembeleya ni gu pintari si nyi giride nyi khala muthu nya gu dzikhusedze, nigu si nyi garadzede ngudzu gu diga silo nya mba handzega nyi nga ba nyi gira. Nyi ngu mu bonga ngudzu Jehovha kholu a gu muthu nya gu laphise monyo ni gu divaleya, a bwe a wona gudzigaradza gwathu gasi gu gira gu gola gwaye.

Kala ga tepo nyi nga ba nyi ri ni 18 myaga, gu mba khodwa ga Nungungulu ni wu comunismo, si kuhide ngudzu womi wangu. Ganiolu, khu gu gimbiya nya tepo nyi di pheya gu landrisa esi Bhibhiliya yi ganeyago. Esi nyi si hevbudego, si nyi phaside gu mba thava esi si na giregago mindru wa tshigu ni gu manega ni makungo womini wangu. Khu 1993, nyi di bhabhatiswa kha nga Fakazi ya Jehovha nigu hwane nya 7 myaga nyi di tshadha ni Tabitha, nyamayi nya sighinghi ngudzu. Muhuno hi ngu thumisa tepo yathu gasi gu phasa vambe gu pwisisa Bhibhiliya. Gu fana ni eni, nya vangi gwawe va kuhidwe ngudzu khu gu mba khodwa ga Nungungulu ni wu comunismo. Nyi ngu tsaka khu gu va phasa guti gwadi Jehovha.

EDZI NYI PHASEGIDEGO KHIDZO

Tepo nyi nga pheya gu hevbula Bhibhiliya ni Dzifakazi dza Jehovha, vavelegi vangu va di vbeya tshivba. Ganiolu, khu gu gimbiya nya tepo va wonide gu khavo gu hevbula Bhibhiliya si vbindrugedzide womi wangu khu gu vbeleya. Egi gi nyi tsakisago khu gu olu avo va ngu hevbula Bhibhiliya ni gu wona mitshangano nya Dzifakazi dza Jehovha.

Eni ni Tabitha hi na ni mutshadho nya gu tsakise ngudzu kholu hi engisago wusingalagadzi nya Bhibhiliya. Khu giyeyedzo, Bhibhiliya yo kutsa mipatwa gutumbega. Gu engisa wusingalagadzi wowu sa gu gira gu mutshadho wathu wu tiya ngudzu. — Vahebheru 13:4.

Muhuno, kha nyi ngu thava esi si na giregago mindru wa tshigu. Nya gu dzipwa na nyi gu gira gipandre nya dranga nya yi khongolo yi wubwago khu dzifakazi dza Jehovha dza mafuni gwatshavbo. Ethu hi na ni gurula, gupwana ni gu mba na gihatheya, a gu silo nyi nga ba nyi si vbweta ngudzu gu khugeya gale. Olu nya gu si vbanya.