Esi Vambe Va Si Khodwago:

Vahindu

Va gu khodwa gu khavo muthu a gu tshaniseka khu kotani nya mithumo yaye a giridego guvbanyani momu mwendro ogu ga gale. Egi va gi vbwetago gu vboheya giemo gi ranwago pwani mocsa gasi gu vbuluga gu velegwa nyaluphya. Gasi gu muthu a vboheya giemo gyogyo, gu vbwetega a si pfangeyi gupima gwaye ni silo nya litigo.

Vamwenyi

Vo khodwa gu khavo muthu a gu tshaniseka o tsayiswa khu sighoho saye, mwendro gulingwa gukhodwa gwaye. Dr. Sayyid Syeed, muthangeyi nya vaMwenyi va Wuronga ga América wari khuye tepo dzi giregago dzimhango dzo hi dundrugisa gu khidzo gu vbwetega hi dundruga “gu simama hi bonga Nungungulu khu makategwa yatshavbo a hi ningago dzi bwe dzi hi dundrugisa gu phasa ava va hamugago.”

Vajudha

Vo khodwa gu khavo muthu o tshaniseka khu kotani nya mithumo yaye. Vambe vaJudha vo khodwa gu khavo gu na ba guri ni guwuswa ga vafudego, nigu vathu nya vadi va tshanisekago va na giredwa gululama. Vajudha va tidwago kha nga místico mwendro cabala va gu hevbudza gu khavo muthu a ngu velegwa nyaluphya, esi si mu tuleyago mathomo nya mangi nyo dzi laye ga sihoso saye.

Vabhudha

Vo khodwa gu khavo muthu a gu tshaniseka na nga romo omu nya gu velegwe nyaluphya kala a diga gu gira silo nyo vivbe, ni gu dogoreya ni gu pimisa silo nyo vivbe. Muthu a gu ba ari ni wugengeyi, ni mithumo nya yadi, ni gupima nya gwadi a gu hongola ga wulanga wu ranwago pwani nirvana, a gu wulanga wu gu mwalo gutshaniseka.

Vakonfusiyonista

Khu guya khu libhuku nyo khaguri nya wukhongeyia, vaKonfusiyonista vo khodwa gu khavo gutshaniseka go vangwa khu “sihoso nya vathu.” Vo khodwa gambe gu khavo gutala nya dzitepo gutshaniseka go vangwa khu “sivangwa nya liphuvbo si gu na ni tshivba ngudzu guvbindra vathu. Khu kharato, igyo gi gu igyo khu gu hi dzumeya ni gevbini gi girwago mwendro gi ganedwago khu sivangwa sesi,” va bwe khavo gasi gu vbungula gutshaniseka gu vbwetega vathu va manega ni mavbanyelo nya yadi.

Wukhongeyi nya mahundzu

Vo khodwa gu khavo gutshaniseka go vangwa khu wuloyi. Dzitshetshe dzedzi dzari khidzo dzindroyi dzi ngu kodza gu gira muthu a dugeleya guvbanyani mwendro gu mu gira a thegedwa khu sigaradzo, nigu gasi gu vbungula gutshaniseka gogo gu vbwetega gu girwa sipfhitshapfhitshana nyo khaguri. Khu giyeyedzo, muthu a gu dwala a gu tutumeya dzinyangani na gu tumba gu khuye a na ya duswa wuloyi wowo.

Makristo

Mo khodwa gu khayo gutshaniseka gu vangidwe khu mwama ni nyamayi nyo pheye, kha nga edzi Bhibhiliya yi ganeyago khidzo ga libhuku la Genesi. Ganiolu, dzitshetshe nya dzingi dzi engedzede mawonelo yadzo ga gihevbudzo gyogyo. Khu giyeyedzo, vaKatolika nyo khaguri vari khavo gutshaniseka nya vathu go ‘vangwa khu Nungungulu’. Uye o gira isoso gasi gu phasa tshetshe mwendro a tshanisa muthu gasi gu vbulugisa mumbe muthu.