1. Ina Nungungulu Na Ni Nandru Khu Gutshaniseka Gwathu?

Khu ginani si gu sa lisima guti hlamulo nya giwudziso gegi?

Vathu nya vangi va gu bomba gu thumeya Nungungulu kholu va pimisago gu khavo, Nungungulu khuye a vangago gutshaniseka.

Nga dundrugeya khesi

Vathangeyi nya vangi nya dzitshetshe va gu hevbudza gu khavo Nungungulu khuye a vangago gutshaniseka gwathu. Khu giyeyedzo, vambe vari khavo:

• Go dugeleya dzimhango nya tumbunugo khu Nungungulu a hi tsayisago.

• Sanana sa gufa kholu Nungungulu a gu vbweta dzingilozi nya dzingi ndzadzini.

• Nungungulu a ngu ema ni dzinyimbi dzedzi dzi vangago gutshaniseka nya gukhongolo.

Ina si ngu kodzega gu vathangeyi nya dzitshetshe va hevbudza malipha khu Nungungulu? Ina si ngu ningana gu hi khodwa esi vathangeyi vava va ganeyago nyo pwani Nungungulu khuye a hi tshanisago?

Wona esi Bhibhiliya yi si ganeyago:

Nungungulu khandruye a vangago gutshaniseka gwathu.

Kholu na ri khatshi Nungungulu khuye a vangago gutshaniseka, isoso si di hadzi hambana ngudzu ni makhalelo yaye ma tshamusedwago omu nya Bhibhiliya. Khu giyeyedzo:

“Dzindzila dza [Nungungulu] dzatshavbo dzi lulamide! . . . Uye khwa lisine ni gululama.” — DHEWUTERONOME 32:4.

“Nungungulu kha tshuki a gira ugo guvivbidego, mwendro Nyadzitshivbe gu gira sighoho.” — JOBA 34:10.

“Uye nya Tshivba Yatshavbo kha tshuki a hambana ni lisine.” — JOBA 34:12.

Nungungulu a ngu nyenya wukhongeli wu hevbudzago malipha khuye.

Uye a ngu nyenya gambe wukhongeli wu hevbudzago gu khuwo Nungungulu khuye a vangago gutshaniseka gwathu gumogo ni vale va dzi bedzedzeyago omu nya dzinyimbi ni mayunga.

“Vaprofeti va gu profeta malipha khu lina [la Nungungulu]; khandri eni nyi va rumedego, ambari gu leletela ni gu va embela; va gu profeta avbo gwanu khu siwoniso nya malipha ni misihalo nya gu pfhadzwe khu guwegela nya myonyo yawe.” — JEREMIYA 14:14.

Jesu yeyedzide gu khuye a ngu wu nyenya wukhongeyi nya gupfhadzedzeye.

“Khandri watshavbo wule a gukhuye: Pfhumu, Pfhumu, a na belago Mufumoni wa Ndzadzini. Aholu a na bela basi uye a girago gugola ga Babe wangu a guromo Ndzadzini. Nya vangi va na nyi embela litshigu lolo, khavo: ‘Ama Pfhumu, ina kamwe kha ha profeta khu lina Iago, hi tutumisa maphuvbo nya guvivbe, gumogo ni gu gira siliwugiso nya singi khu lina Iago, gani?’ Khavbo avbo, eni nyi na va hakha, kheni: Kha nyi mutini ne vbadugwana. Leyani mbeli gwangu, enu mwatshavbo mu girago guvivba.” — MATEWU 7:21-23.