Ina mahungu nya yadi ma guta khu ga Nungungulu furi?

1. Khu mani Mutumbunusi nya Bhibhiliya?

Mahungu nya yadi nya gu khayo vathu va na vbanya mafuni kala gupindruga ma lovidwe omu nya Bhibhiliya. (Ndzimo 37:29) Bhibhiliya ya gu wumbwa khu 66 nya dzilivru nya dzidugwana. Nungungulu thumiside vama va ninganago 40 gasi gu ma lova. Livbandre dzilivru nya gupheye dzi lovidwe khu Mosi. Gu ngu ningana 3500 nya myaga na ma lovidwe. Livru nya guhegise yi lovidwe khu mupostoli Johane. Gu ngu vbindra 1900 nya myaga na li lovidwe. Mapimo ya mani ma nga lowa khu valovi nya Bhibhiliya? Nungungulu thumiside liphuvbo nya guage gasi gu ganeya ni valovi nya Bhibhiliya. (2 Samuweli 23:2) Avo va lovide mapimo ya Nungungulu, nasiri mapimo yawe. Khu kharato, Jehovha khuye Mutumbunusi nya Bhibhiliya. — Hevbula 2 Thimoti 3:16; 2 Pedro 1:20, 21.

2. Hi nga tiyisega kharini gu khethu Bhibhiliya yo ganeya lisine?

Hi ngu dziti gu khethu Bhibhiliya khya Nungungulu kholu iyo ya gu ganeya khu guvbeleya khu silo si nga rigo mbeli yi bwe yi si phazami. Mwalo muthu a kodzago gu gira isoso. (Josuwa 23:14) Nungungulu nya Tshivba Yatshavbo khuye basi a kodzago gu wona nya mba phazama esi si na giregeyago vathu. — Hevbula Isaya 42:9; 46:10.

Khu lisine, livru yi tago khu ga Nungungulu yi hambane ni dzimbe dzilivru. Bhibhiliya yi ngu manega khu mazana nya malimi yi bwe yi ghandlwa khu dzibhiliyoni nya dzikopiya. Ambari olu yi gu ya gale, Bhibhiliya yi ngu pwanana ni sihevbudzo nya lisine nya siyensya. Vbavbandze nya isoso, valovi vayo nya 40 kha va ganedzani.a Guvbindra isoso, iyo ya gu ganeya khu lihaladzo nyo tiye la Nungungulu, nigu iyo yi na ni tshivba nya gu vbindrugedze guvbanya nya vathu gu gira tshukwana. Satshavbo soso sa gu gira mazanazana nya vathu va khodwa gu khavo Bhibhiliya Lito la Nungungulu. — Hevbula 1 Vatesalonika 2:13.

3. Bhibhiliya yo ganeya khu ginani?

Gilo gimwegyo nya gikhongolo gi ganedwago omu nya Bhibhiliya, mahungu nya yadi nya gu khayo Nungungulu vegede vathu silo nya sadi. Milowo ya gu tshamuseya edzi vathu va nga luza khidzo malungelo nya gu vbanye paradhesini mafuni gupheyani nya matimo yawe, ni edzi paradhesi khu guhegisa yi na wuyiswago khidzo mafuni. — Hevbula Gutuledwa 21:4, 5.

Lito la Nungungulu gambe li na ni milayo, matshina nya milayo ni wusingalagadzi. Vbavbandze nya isoso, Bhibhiliya yi na ni matimo nya edzi Nungungulu a thumisanago khidzo ni vathu — gu gu matimo ma yeyedzago makhalelo ya Nungungulu. Khu kharato, Bhibhiliya yi ngu kodza gu gu phasa guti Nungungulu. Ya gu tshamuseya ndziya nya gu u kodza gu khala pari ya Nungungulu. — Hevbula Ndzimo 19:8, 12; Jakobe 2:23; 4:8.

4. Khu yevbi ndziya nya gu u pwisisa Bhibhiliya?

Bruxura yeyi yi na gu phasa gu pwisisa Bhibhiliya khu gu thumisa ndziya yamweyo yi nga thumiswa khu Jesu. Uye gambe ni gambe khumbugide milowo a bwe a yi tshamuseya. — Hevbula Luka 24:27, 45.

Mahungu nya yadi ya Nungungulu ma ngu tsakisa ngudzu guvbindra silo nya singi. Ambari ulolo, vomo vathu va si ma khathaleyigo, ni vambe va khunguvanyegago khayo. Uwe u nga vbeyi tshivba. Guti Nungungulu khugo gu na gu girago u vbanya kala gupindruga. — Hevbula Johane 17:3.