Gitumbiso muni gi gomogo khava va fudego?

1. Mahungu muni nya yadi ma gomogo khava va fudego?

Tepo Jesu a nga vboha Bhetaniya, vbafuvbi ni Jerusalema, gu di gu gira matshigu mana pari yaye Lazaro na fude. Jesu a di hongola gumogo ni Marta ni Mariya, vandriyi va mufi, avba a nga ba a dzingidwe avbo. Khu gitepwana gu di tala vathu. U ngu kodza gu dundrugeya gutsaka ga Marta ni Mariya tepo Jesu a nga wusa Lazaro khu gufani? — Hevbula Johane 11:21-24, 38-44.

Marta a di gu mati mahungu nya yadi khu ava va fudego. Uye a di gu dziti gu khuye Jehovha a na wusa ava va fudego gasi va vbanya gambe mafuni. — Hevbula Joba 14:14, 15.

2. Khu yavbi makhalelo ya ava va fudego?

Vathu va wumbidwe khu kudzudzwane. (Genesi 2:7; 3:19) Ethu kha hiri liphuvbo li vbanyago milini nya nyama. Hova sivangwa nya mili nya nyama furi, nigu hi mwalo gipandre gi vbulugano gufani. Ha gufa, wongo wathu wa gufa, mapimo yathu nayo ma gufa. Khu kharato, Lazaro kha ganeya gilo khu gufa gwaye kholu ava va fudego kha va pimisi gilo. — Hevbula Ndzimo 146:4; Muhevbudzi 9:5, 6, 10.

Nungungulu a ngu vbisa vathu va gufa? Olu Bhibhiliya yi yeyedzago gu khiyo ava va fudego kha va pimisi gilo, guvbya ndzadzini gihevbudzo nya malipha gi valeteyago Nungungulu. Ambari ayo mapimo yakona nya gu tshanise vathu niloni ma ngu mu nyenyeza Nungungulu. — Hevbula Jeremiya 7:31.

3. Ava va fudego va ngu kodza gu ganeya ni ethu?

Ava va fudego kha va ganeyi ambari gupwa. (Ndzimo 115:17) Ganiolu dzomo dzingilozi nya guvivbe dzi ganeyago ni vathu dzi gira khatshi khu vale va fudego. (2 Pedro 2:4) Jehovha a ngu himbedzeya gu zama gu ganeya ni ava va fudego. — Hevbula Dhewuteronome 18:10, 11.

4. Khu vamani va na wuswago khu gufani?

Mazanazana nya vathu va fudego va gu romo marowoni va na wuswa gasi va vbanya mafuni. Ambari ava va nga gira silo nya guvivbe khu gu mba muti Nungungulu va na wuswa khu gufani. — Hevbula Luka 23:43, Tradução do Novo Mundo; Mithumo 24:15.

Ava va na wuswago khu gufani va na hevbula lisine khu Nungungulu va yeyedza gukhodwa gwawe ga Jesu khu gu mu engisa. (Gutuledwa 20:11-13) Ava va na wuswago khu gufani va ta gira silo nya sadi va na vbanya mafuni kala gupindruga. — Hevbula Johane 5:28, 29.

5. Guwuga ga ava va fudego ga gu hi yeyedza ginani khu Jehovha?

Nungungulu rumede Gyanana gyaye gu ta hi feya gasi ava va fudego va kodza gu wuga va vbanya. Khu kharato, guwuga ga ava va fudego ga gu hi yeyedza lihaladzo la Jehovha ni wuwadi waye wu si hi ninganeyigo. Ava va fudego va gu wuswa, khu vamani ngudzungudzu u vbwetago gu va wona? — Hevbula Johane 3:16; Varoma 6:23.