Ginani Mufumo wa Nungungulu?

1. Ginani Mufumo wa Nungungulu?

Mufumo wa Nungungulu mufumo wu fumago gukhugeya ndzadzini. Wu na tshikedza mifumo yatshavbo gasi gugola ga Nungungulu gu girega ndzadzini ni mafuni. Mahungu ma yelanago ni Mufumo wa Nungungulu khyadi ngudzu. Nugunugu Mufumo wa Nungungulu wu na vbedza guliya ga vathu va vbwetago mufumo nya wadi. Wu na tshanganisa vathu vatshavbo va na vbanyago mafuni tepo yoyo. — Hevbula Dhaniyeli 2:44; Matewu 6:9, 10; 24:14.

Mufumo wu yede gu manega ni pfhumu. Jehovha emiside Gyanana gyaye, Jesu Kristo, gasi gu gira Pfhumu ya Mufumo Waye. — Hevbula Gutuledwa 11:15.

2. Khu ginani Jesu a gu uye Pfhumu nya yadi?

Gyanana gya Nungungulu khiyo Pfhumu hi yi vbwetago kholu uye muthu nya wadi nigu a ngu vhikeya gululama. (Johane 1:14) Vbavbandze nya isoso, uye na ni tshivba nya gu phase vathu kholu a na fumeya mafu gukhugeya ndzadzini. Hwane nya guwuge gwaye khu gufani, uye gwede ndzadzini a ya khala a vireya nyamudye ga Jehovha. (Vahebheru 10:12, 13) Khu guhegisa, Nungungulu mu ningide tshivba gasi a pheya gu fuma. — Hevbula Dhaniyeli 7:13, 14.

3. Khu vamani va na fumago ni Jesu?

Tsawa wu ranwago pwani ‘ava nya guage’ wu na fuma ni Jesu ndzadzini. (Dhaniyeli 7:27) Vapostoli nya gutumbege va Jesu khavo ava nya guage va nga pheya khavo gu hathwa. Jehovha a ngu gu simama gu hatha vama ni vanyamayi nya gutumbege kala muhuno. Gu fana ni Jesu, avo va gu wuswa khu gufani kha nga vathu nya liphuvbo. — Hevbula Johane 14:1-3; 1 Vakorinto 15:42-44.

Vathu vangani va hongolago ndzadzini? Jesu va ranide khuye “tshambi dugwana.” (Luka 12:32) Khu guhegisa tengo wawe wu na gira 144 000. Avo va na fumeya mafu gu mogo ni Jesu. — Hevbula Gutuledwa 14:1.

4. Ginani gi nga girega tepo Jesu a nga pheya gu fuma?

Mufumo wa Nungungulu wu phede gu fuma khu 1914.a Gilo nya gu pheye a nga gira Jesu kha nga Pfhumu khu gu rinya Sathane ni madhimoni yaye mafuni. Sathane a di tala khu likhulo a pheya gu resa sigaradzo mafuni gwatshavbo. (Gutuledwa 12:7-10, 12) Gukhugeya avbovbo, sigaradzo sa vathu sa guta na si gu engedzeya ngudzu. Dzinyimbi, dzindzala, sirevareva, satshavbo soso “giwonegiso” mwendro giyeyedzo nya gu khigyo Mufumo womo vbafuvbi ni gu fumeya mafu khu guvbeleya. — Hevbula Luka 21:7, 10, 11, 31.

5. Ginani gi girwago khu Mufumo wa Nungungulu?

Khu thumo nya gutshumayele wu girwago mafuni gwatshavbo, Mufumo wa Nungungulu wu ngu tshanganisa gidzemo nya gikhongolo nya vathu va mayigoni yatshavbo. Mazanazana nya vathu nya gurule myonyo va ngu fumedwa khu Jesu. Mufumo wa Nungungulu wu na va vhikeya tepo wu na fuvisago makhalelo yaya nya silo nya guvivbe mafuni. Khu kharato, vatshavbo va vbwetago gu phasega khu Mufumo wa Nungungulu va yede gu hevbula gu gira vathu nya guengise va fumedwago khu Jesu. — Hevbula Gutuledwa 7:9, 14, 16, 17.

Ndrani nya 1000 nya myaga, Mufumo wu na tadzisa makungo nya gupheye ya Nungungulu khu vathu. Mafu yatshavbo ma na vbindrugedza ma khala paradhesi. Khu guhegisa, Jesu a na bweledza Mufumo ga Babe waye. (1 Vakorinto 15:24-26) U ngu dundrugeya muthu u dogoreyago gu mu bhuleya khu Mufumo wa Nungungulu? — Hevbula Ndzimo 37:10, 11, 29.