Jakobe a di mana thomba

Tepo Isaki a nga ba ari ni 40 myaga, a di tshadha ni Rabheka. Isaki a di gu mu haladza ngudzu Rabheka. Khu gu gimbiya nya tepo, va di velega mavbaha — sikhwathana sivili.

Egi nya koma gi diri Esawu, egi nya nandra gi diri Jakobe. Esawu a di gu gola ngudzu gu khala khabini a sota sirengo. Ganiolu, Jakobe a di gu gola gu khala gaya.

Matshiguni yoyo, gyanana nya koma khigyo gi nga ba gi ningwa gipeto ni dzitsapawu nya dzingi tepo a fago papayi wagyo. Isoso si di gu ranwa gu pwani thomba. Ndrangani ga va Isaki, thomba yoyo yi di gu pata gu muthu a patega avba nya situmbiso sa Jehovha a nga ba a giride ga Abrahama. Esawu a diri mwalo tepo naso situmbiso soso, ganiolu Jakobe a di gu si ninga ngudzu lisima.

Litshigu limwedo, Esawu a di wuya khu gusotani na gupwa ndzala nya yikhongolo. Tepo a ngapwa mahema nya yadi nya guhodza ogu Jakobe a nga ba a phula, a di khuye: ‘Nyi ngufa khu ndzala! Nyi theleye guhodza gogo nyi hodza!’ Jakobe a di mu embeya gu khuye: ‘Nyi na gu ninga. Ganiolu pheya khu gu nyi tumbisa gu nyi ninga thomba yago.’ Esawu a di mu hlamula khuye: ‘Nyi mwalo tepo nayo thomba yangu! Nyi nga gu ninga. Eni nyo vbweta guhodza basi.’ Khu mawonelo yago, ina Esawu giride silo nya sadi? Ahihi. Esawu ningede gilo nya lisima ngudzu, satshavbo soso khu kotani nya parato nya guhodza basi.

Tepo Isaki a nga gumba, yi di vboha tepo nyo kategise gyanana gyaye nya koma. Ganiolu, Rabheka a di phasa Jakobe, gyanana gyaye nya nandra, gu mana makategwa. Tepo Esawu a nga si tugula, a di goroga ngudzu a luga ni makungo nyo songe nandra waye. Isaki ni Rabheka va di gu vbweta gu vhikeya Jakobe. Khavbovbo, va di mu embeya gu khavo: ‘Tutuma u ya khala ga tiyu wago Laboni, ndriye wa mamayi, kala Esawu a bosa zanga yaye.’ Jakobe a di engisa esi a nga embedwa khu papayi ni mamayi waye, a tutuma gasi gu vbulugisa womi waye.