Va di diga gu engisa Jehovha

Hwane nya gu ba Vaisrayeli va khade tepo nyo khaguri giwulani, Kora, Dhatani, Abhiramo, ni vambe nya 250, va di wugeya Mosi ni Aroni. Va di va embeya khavo: ‘Hi garade khenu! Khu ginani uwe Mosi u dzi girago pfhumu yathu, Aroni a dzi gira mupristi nya khongolo? Jehovha na ni ethu hatshavbo. A mwalo nago ni Aroni basi.’ Isoso kha sa mu tsakisa Jehovha. A di si wona na va gu diga gu mu engisa!

Mosi a di embeya Kora ni ava va nga ba va mu seketeya gu khuye: ‘Mindru deluni avba nya tabhernakeli ni sombo sanu nyo vbale khiso nilo na siri ni libani. Jehovha a na yeyedza oyu a mu hathidego.’

Khu mindru wakone, Kora ni 250 vama va di hongola va ya tshangana ni Mosi avba nya tabhernakeli. Va di ya vbisa libani nga khatshi vapristi. Jehovha a di embeya Mosi ni Aroni gu khuye: ‘Dzi hambaniseni ni Kora ni vathu vaye.’

Ambari olu Kora a nga hongola ga Mosi eyi nya tabhernakeli, Dhatani, Abhiramo ni valongo vaye kha va dzumeya gu hongola. Jehovha a di embeya Vaisrayeli gu khuye va nga hidzimeyi vbafuvbi nya matendra ya Kora, Dhatani ni Abhiramo. Vaisrayeli va di dzegeya gu khuga. Dhatani, Abhiramo ni valongo vaye va di ema khu vbavbandze nya matendra yawe. Nya mba si vireya mafu ma di kabanega, ma midza vatshavbo havo bhi! Omu nya tabhernakeli, gu dita nilo khu ndzadzini wu ta vbisa Kora ni vama vaye nya 250.

Jehovha a di vbedza a embeya Mosi khuye: ‘Dzega ndronga ya muthangeyi moyo ni moyo nya lihundzu la na Israyeli, u lova lina laye gwayo. Ganiolu, avba nya ndronga nya ndranga ya na Levhi, lova lina la Aroni. Wo vbedza, dzi vege omu nya tabhernakeli. Ndronga ya oyu nyi mu hathidego yi na duga sifilori.’

Khu mindru wakone, Mosi a dita ni dzindronga dzatshavbo a ta yeyedza vathangeyi. Ndronga ya Aroni yi diri ni sifilori, nigu yi diri ni mihandro nyo vidzwe. Isoso si di gu yeyedza gu khiso Jehovha hathide Aroni gasi a khala mupristi nya khongolo.