Dhavhidhe ni Sawule

Hwane nya gu ba Dhavhidhe a songide Gholiya, Pfhumu Sawule a di mu hatha gasi a thangeya masotshwa yaye. Dhavhidhe a di pala dzinyimbi nya dzingi, a bwe a manega ni ndruma nya yikhongolo. Tepo ni tepo Dhavhidhe a nga ba a wuya khu nyimbini, vanyamayi va di gu hana ni gu embeleya khavo: ‘Sawule songide 1000. Ganiolu Dhavhidhe songide 10 000!’ Sawule a di pheya gu nyenya Dhavhidhe, a zama gu mu songa.

Dhavhidhe a di gu kodza gu womba gwadi arpa. Litshigu limwedo, Dhavhidhe na gu dzi wombeya arpa yaye, pfhumu Sawule a di rinya litshari gasi gu songa Dhavhidhe. Dhavhidhe a di dzegeya gu vhika, khavbovbo litshari li ya pola paredhi. Hwane nya isoso, Sawule a di simama gu vbwetedzeya dzindziya nyo songe Dhavhidhe. Dhavhidhe a di hegisa khu gu tutuma a ya sihala giwulani.

Sawule a di dzega 3000 vama va gimbiya va vbwetedzeya Dhavhidhe. Si di kotsana ni gu a beya omu nya liphala eli Dhavhidhe ni vama vaye va nga ba va sihade umo. Masotswa ya Dhavhidhe ma di mu lembeya khayo: ‘Oyu Sawule, u mu mane. Dzegeya gu mu songa.’ Dhavhidhe a di hongola khu gwadi a ya piya tshoka nya libhadzi la pfhumu Sawule. Ambari ulolo, Sawule kha tugula gilo. Dhavhidhe a di vbedza a dzipwa nandru kholu a nga mba yeyedza githawo pfhumu yi todzidwego ya Jehovha. Kha dzumeleya gukhuye masotswa yaye ma songa Sawule. Hwane nya gu ba Sawule a dugide, Dhavhidhe a di rana Sawule khu hwindzo a mu embeya khuye, nari khatsi nyi di dzinide na nyi gu songide tepo nyi nga piya tshoka nya libhadzi lago. Ina Sawule vbindrugedzide edzi a nga ba a mu wona khidzo Dhavhidhe?

Ahihi, kha vbindrugedza. A di simama gu vbwetedzeya Dhavhidhe gasi a mu songa. Ga wutshigu nyo khaguri, Dhavhidhe ni tugulu waye Abhisayi va di beya omu Sawule a nga ba a lade. Va ya mana gu ambari Abhineri nuye, gwardha ya Sawule, a di gu lade. Abhisayi a di khuye: ‘Oyu avba Sawule! Gwadi nyi dzegeya gu mu songa.’ Dhavhidhe a di khuye: ‘Jehovha khuye a na lamulago mahungu yangu ni Sawule. Uwe hongole hi dzega litshari laye ni liboteri laye nya mati basi hi hongola.’

Dhavhidhe a di hongola vbatshani nya gigomo gi nga ba giri vbafuvbi ni avba a nga ba a lade avbo Sawule. Khavbovbo, a di ganeya khu lito nyo khugege khuye: ‘Abhineri, khu ginani u nga ne gu vhikeya pfhumu yago? Lomo hayi litshari ni liboteri nya mati la Sawule?’ Sawule a di dzegeya gu tugula gu khuye khu Dhavhidhe a nga ba a ganeya, a vbedza khuye: ‘Nyi ngu si wona gu kheni na u nyi songide. Ganiolu, kha wa nyi songa. Khu lisine, u na khala pfhumu ya Israyeli.’ Sawule a di bweleya ndrangani gwaye nya wufumu. Ganiolu, khandri vatshavbo va ndrangani ga Sawule va nga ba va nyenya Dhavhidhe.