Gighoho gya Pfhumu Dhavhidhe

Tepo a ngafa Sawule, Dhavhidhe a di khala pfhumu. Khu tepo yoyo, a diri ni 30 myaga. Hwane nya gu ba gu vbindride myaga nyo khaguri na fuma, a di gira gighoho nya gikhongolo ngudzu. Ga wutshigu nyo khaguri, na ari vbatshani nya nyumba yaye nya wufumu, a di wona nyamayi nyo mbure ngudzu. A di dziti gu khuye lina laye gu diri Bheti-Sebha nigu a diri ngadza lisotshwa nyo pwani khu Uriya. Dhavhidhe a di ranisa Bheti-Sebha nyumbani gwaye. A di lala naye, khavbovbo a khura mimba. Dhavhidhe a di zama gu siha esi a nga ba a giride. A di ya embeya muthangeyi nya masotshwa yaye gu khuye a thangisa Uriya mbeli nya mambe masotshwa tepo va dwanago, va vbedza va bweleya hwane va mu tshiya enga gasi Uriya a songwa khu valala. Hwane nya gu ba Uriya a fude nyimbini, Dhavhidhe a di dzega Bheti-Sebha a khala mwangadzi waye.

Ganiolu, Jehovha a si wonide satshavbo silo nyo vivbe esi Dhavhidhe a nga gira. Ginani egi Jehovha a giridego? A di rumeya muprofeti Natane a hongola ga Dhavhidhe. Tepo a nga vboha a di pheya gu mu embedzeya esi: ‘Gu diri ni mwama moyo nya gighanyi a nga ba ari ni dzinvuta nya dzingi, ni mumbe nya gisiwana a nga ba ari ni ginvutana gimwegyo a nga ba a gi gola ngudzu. Oyu nya gighanyi a di dzega ginvutana gyagimwegyo a nga ba ari nagyo oyu nya gisiwana.’ Dhavhidhe a di goroga ngudzu, khuye: ‘Mwama yoyo nya gighanyi gu vbwetega a songwa!’ Khavbovbo, Natane a di embeya Dhavhidhe khuye: ‘Mwama yoyo khuwe kamo!’ Dhavhidhe a di vbeya tshivba, a hegisa a dzumeya gighoho gyaye ga Natane, khuye: ‘Nyi ghohede Jehovha.’ Dhavhidhe ni ndranga yaye va tshanisekide ngudzu khu kotani nya gighoho gegi. Jehovha a di tsayisa Dhavhidhe. Ganiolu, a di mu diga a vbanya kholu a diri muthu nyo tumbege ni gu dzi nogisa.

Dhavhidhe a di gu vbweta gu vbaheya tempele Jehovha. Ganiolu, Jehovha a di hatha gyanana gyaye Solomoni gasi gi mu vbaheya. Dhavhidhe a di pheya gu dongiseya satshavbo si nga ba si vbwetega gasi Solomoni a vbaha, a bwe khuye: ‘Tempele ya Jehovha gu vbwetega yi mbura ni gu hlamadzisa ngudzu. Solomoni a ngari gyanana, ganiolu nyi na mu phasa gu dongiseya esi si vbwetegago.’ Dhavhidhe a di dusa dzitsapawu nya dzingi ngudzu gasi gu seketeya thumo nyo vbahe tempele, a bwe a vbweta vathu va wu tigo gwadi thumo. A di hengeledzeya ouro, prata, ni misimbo nya yikhongolo nya misedhari yi nga ba yita khu tigoni ga Sidhoni. Tepo Dhavhidhe a nga ba ari vbafuvbi ni gufa, a di ninga lidangaliya nya planta nya tempele Solomoni. A di mu embeya khuye: ‘Jehovha a di nyi rumide gu lova silo sesi gasi nyi gu ninga. Jehovha a na gu phasa. U nga thavi. Tiya u pheya gu thuma.’