Pawulo a rumedwa Roma

Tepo Pawulo a nga ba a endra khu tepo nya wuraru, liendro laye li di ya hegiseya Jerusalema. Khiyoyo, a di modwa a khotedwa pasoni. Jesu a di wonega ga Pawulo khu giwoniso ni wutshigu, a mu embeya, khuye: ‘U na hongola Roma u ya tshumayela iyo.’ Va di dusa Pawulo khu pasoni va mu yisa Sezareya, avbo a nga ya khala myaga mivili pasoni. Tepo a nga ba a thethisedwa mbeli ga Ghovhernadhori Festo, a di khuye: ‘Nyi rumeyeni nyi hongola Roma nyi ya thethisedwa khu Sezari.’ Festo khuye: ‘U lombide gu hongola ga Sezari, hi na gu rumeya ga Sezari.’ Va di dzega Pawulo va hongola naye Roma khu ngalava. A di hongola ni vandriyathu vavili nya Makristo, a gu Luka ni Arisitariko.

Na va hongola, gu di veta phuvbo nya yikhongolo khu matshigu nya mangi omu nya yiphwa. Vatshavbo va di pimisa gu khavo va nafa. Ganiolu, Pawulo a di va embeya, khuye: ‘Vama, nyi loride ngilozi nyo khaguri na yi nyi embeya, khiyo: “U nga thavi Pawulo. U na vboha Roma. Vatshavbo va gomogo omu nya ngalava va na vboha na va nga gu vbanya.” Khu kharato, mu nga thavi. Kha hi na ngafa!’

Gingulu gile gi di simama gu veta khu 14 matshigu. Khu guhegisa, va di wona mafu. Va diri tigoni ga Malita. Ngalava yi di ya veta mafu, yi pandrega. Ganiolu, vatshavbo nya 276 va nga ba vari ngalavani kha vafa. Vambe va di hambeya kala vbavbandze, vambe va di duga khu gu thumisa sipandre nya ngalava si nga ba si tshade.

Hwane nya migima miraru, masotshwa ma di dzega Pawulo ma hongola naye Roma khu yimbe ngalava. Tepo va nga vboha, vandriyathu va di ta tshangana naye. Tepo Pawulo a nga va wona, a di bonga Jehovha a tiya hwambo. Ambari olu Pawulo a nga ba ari gibotshwa, va di mu dzumeleya gu lugari nyumba a khala umo na ghadhwa khu lisotshwa nyo khaguri. Vbedzide myaga mivili na khala avbo. Va di guta vathu va ta mu wona, a dzegeya gu va tshumayela khu Mufumo wa Nungungulu a bwe a va hevbudza khu Jesu. Pawulo a di bwe a lova malangaliya ma hongola mabandlani nyo khaguri ma nga ba mari ya Aziya nya Mudugwana ni Judhiya. Kha hi kanakani gu khethu Jehovha thumiside Pawulo gasi gu andrisa mahungu nya yadi ga vathu nya mambe mayigo.