Sileletelo nya tshangano nya thumo ni mavbanyelo yathu nya Wukristo

Esi si gomogo ndrani

1. Si gomogo omu nya dhokumento yeyi si na phasa vatshavbo va girago sipandre mitshanganoni omu nya Thumo ni mavbanyelo yathu nya wuKristo. Na va si dongiseyi sipandre sawe, va yede gu pheya khu gu wona sileletelo si gomogo avba nya Gibhukwana nya Mitshangano nya Thumo ni Mavbanyelo ni avba nya dhokumento yeyi. Vahuweleyi vatshavbo va yede gu kutswa gu lovedzisa malina yawe gasi va feya gu ningwa sipandre nya sihevbuli. Ava va oloveyago guta mitshanganoni tepo yatshavbo, na va gu khodwa esi Bhibhiliya yi si hevbudzago ni gu vbanya khu guya khu matshina nya milayo nya wuKristo, va nga lovedzisa malina yawe gasi va feya gu gira navo sipandre. Muwoneleyi nya tshangano nya thumo ni mavbanyelo, a yede gu bhula ni wevbini muthu a gu siri muhuweleyi, ganiolu a tsakeyago gu gira sipandre khu sileletelo sesi nigu khu gu landreya a mu embeya gu khuye a ngu ninganedwa mwendro ne. Isoso si yede gu girwa na gu romo oyu a mu gimbidziseyago gihevbulo nya bhibhiliya (mwendro na gu romo moyo nya vavelegi waye nya Mukristo). Sileletelo sesi si ngu thuma gambe ga muthu a vbwetago gu khala muhuweleyi nya mba bhabhatiswa. — od gipi. 8 par. 8.

MALITO NYO TULE

2. Meneti mweyo. Semana ni semana, hwane nya ndzimo ni nombelo nyo pheye, muphari nya gikhalo nya Tshangano nya thumo ni mavbanyelo a na ninga magavbudzo nya longoloko nya litshigu lolo. Muphari nya gikhalo nya tshangano yede gu vega gupima avba nya mahungu ma na phasago ngudzu libandla.

DZITHOMBA NYA LITO LA NUNGUNGULU

3. Ganelo: 10 dzimeneti. Hungo nya mahungu wakona ni mitshamuselo yi wumbwago khu matshina mavili mwendro mararu somo avba nya Gibhukwana nya mitshangano nya thumo ni mavbanyelo. Ganelo yeyi gu vbwetega yi vegwa khu lidhota mwendro muphasedzeyi nya libandla a ninganedwago. Abari gu semana yoyo go phedwa libhuku nya liphya nya Bhibhiliya, gu na phedwa khu gu yeyedzwa vhidhiyu. Muganeyi a gu dzina, a nga yeyedza guyelana gu gomogo avba nya vhidhiyu ni ganelo. Ambari ulolo, a yede gu tiyisega gu khuye a ngu thumisa mitshamuselo yatshavbo yi gomogo avba nya gibhukwana nya mitshangano. Nigu, tepo ya gu mu dzumeleya, a na thumise gwadi sithombe, dzifoto ni Milowo yi gimbileyanago ni gipandre gegi.

4. Kemba dzithomba nya liphuvbo: 10 dzimeneti. Egi gipandre nya siwudziso ni milhamulo, gi gu mwalo malito nyo tule ambari nyo sege. Gi na girwe khu lidhota mwendro muphasedzeyi nya libandla a ninganedwago. Uye a girago gipandre gegi, a nga pima tepo nya giwudziso ni giwudziso khu guya khesi si lombago gu khathaledwa libandlani. Ambari ulolo, gu vbwetega a gira siwudziso satshavbo. Nigu a nga hunga gu khuye avba nya siwudziso sasivili nyo pheye, gu na lerwi mavhesi yatshavbo mwendro ne. Ava va hlamulago, va nga vbindrisi 30 dzisegundu.

5. Gulerwi nya Bhibhiliya: Gu nga vbindrisi 4 dzimeneti. Gipandre gegi gi yede gu girwa khu gihevbuli nya mwama. Ndriyathu yoyo gu vbwetega a leri gipandre a ningidwego, ganiolu nya mba ganeya malito nyo tule mwendro nyo sege khayo gipandre. Muphari nya gikhalo nya tshangano gu vbwetega a phasa sihevbuli gu leri gwadi, khu ndziya nyo pwisisege, a tshingisa omu gu lombago gu tshingiswa, guvbindrugedza-vbindrugedza lito, gu ema omu si lombegago, ni gu leri khu malerelo yaye nya tumbunugo. Kha nga omu dzimbe dzisemana gu gu na ni guleri nya Bhibhiliya nyo laphe, dzimbe kha gwa lapha, muwoneleyi nya Tshangano nya thumo ni mavbanyelo yede gu wona gu khuye khu mani a na mu ningago guleri gogo nya Bhibhiliya.

DZI GARADZE THUMONI NYO TSHUMAYELE

6. Gi nga vbindrisi 15 dzimeneti. Gipandre gegi gi giredwe gu ninga vatshavbo lithomo nyo dzi olovedze gu tshumayela ni gu tshukwadzisa makodzelo nya gupheye mabhulo, matshumayelelo ni mahevbudzelo yathu. Sa gu lombega, madhota ma nga ningwa nayo sipandre nya sihevbuli. Gihevbuli ni gihevbuli, gi yede gu thumeya avba nya pontu yi ningedzwago avba nya bruxura Gu hevbudzwa mwendro Haladza vathu. Gira vapizane yi gomogo omu nya dziparente dzi gu romo bambe nya gipandre ni gipandre omu nya Gibhukwana nya mitshangano nya thumo ni mavbanyelo. Dzimbe dzitepo, gu na girwa dziganelo dzi patago vaengiseyi. Gipandre gegi gi yedwi gu girwa khu lidhota mwendro muphasedzeyi nya madhota a ninganedwago. — Wona paragrafu 15 gasi uti edzi u nga girago khidzo dziganelo dzedzi.

7. Gupheya mabhulo: Gipandre gegi gi na girwe khu gihevbuli nya mwama mwendro nya nyamayi. Abari mwama a girago gipandre gegi, gu vbwetega a gira ni mwama-kwawe; abari nyamayi, gu vbwetega nari nyamayi-kwawe, mwendro vathu nya ndranga mweyo. Va gu dzina, va nga gira na va khade mwendro na va emide. — Gasi uti nya singi khu mahungo yaya wona paragrafu 12 ni 13.

8. Haguleya gutsakeya: Gipandre gegi gi na girwe khu ndriyathu nya mwama mwendro nya nyamayi. Abari mwama a girago gipandre gegi, gu vbwetega a gira ni mwama-kwawe; abari nyamayi, gu vbwetega nari nyamayi-kwawe, mwendro vathu nya ndranga mweyo. (km-T 5/97 paj. 3) Va gu dzina, va nga gira na va khade mwendro na va emide. Gihevbuli gu vbwetega gi ganeya malito ma na yeyedzago gu khayo gyo bweleleya muthu a yeyedzidego gutsakeya litshigu nyo pheye va nga bhula. — Gasi uti nya singi khu mahungo yaya wona paragrafu 12 ni 13.

9. Gira vapizane: Gipandre gegi gi na girwe khu ndriyathu nya mwama mwendro nya nyamayi. Abari mwama a girago gipandre gegi, gu vbwetega a gira ni mwama-kwawe; abari nyamayi, gu vbwetega nari nyamayi-kwawe, mwendro vathu nya ndranga mweyo. (km-T 5/97 paj. 3) Va gu dzina, va nga gira na va khade mwendro na va emide. Gipandre gegi gu vbwetega gi yeyedza gihevbulo nya Bhibhiliya gi phedego gu gimbiya. Kha si hungi gu oyu a girago gipandre gegi a ganeya malito nyo tule mwendro nyo sege, vbavbandze nyo ba a thumeya omu nya gihevbulo gi lombago isoso. Kha si gurumedzi gu leri dzindrimana dzatshavbo khu lito nyo khugege, ambari olu nya gu u nga gira isoso.

10. Tshamuseya esi u si khodwago: Gipandre gyegi gya gu ba giri ganelo gi yede gu girwa khu gihevbuli nya mwama. Ganiolu, abari gu dhemostrasawu gi yedwe gu girwa khu gihevbuli nya nyamayi mwendro nya mwama. Abari mwama a girago gipandre gegi, gu vbwetega a gira ni mwama-kwawe; abari nyamayi, gu vbwetega nari nyamayi-kwawe, mwendro vathu nya ndranga mweyo. Gihevbuli gi yede gu ningeya hlamulo nyo pwisisege nigu khu ndziya nya yadi na gi gu thumisa mahungu ma gomogo omu nya dzirefensiya dzi ningedzidwego. Igyo, gi yede gu hunga gu khigyo gi na khumbuga libhuko li gomogo omu nya referensiya tepo gi girago gipandre mwendro ne.

11. Ganelo: Gipandre gegi gu vbwetega gi girwa khu ndriyathu nya mwama kha nga ganelo a vegeyago libandla. Ganelo yeyi ya gu ba yi seketedwa avba nya pontu nya Apêndice A nya broxura Haladza Vathu, gihevbuli gi yede gu tshamuseya edzi hi nga thumisago khidzo mavhesi ma khumbugwago avba nya Apêndice A thumoni nyo tshumayele. Khu giyeyedzo, uye a nga tshamuseya gu ga tepo muni hi nga thumisago livhesi nyo khaguri, esi li tshamuseyago ni edzi hi nga bhuleyago khidzo vambe livhesi leli. Ganelo yeyi ya gu ba yi seketedwa avba nya gimwegyo nya sihevbulo nya broxura Haladza Vathu, gihevbuli gi yede gu vega gupima avba nya edzi gi nga thumisago khidzo gihevbulo gyogyo thumoni nya tshumayele. Sa gu ba si lombega, igyo gi nga tshingisa giyeyedzo gi khumbugwago avba nya pontu 1 mwendro gu tshingisa milowo yi gomogo nya gihevbulo gyogyo.

12. Mongo wakona: Esi si ganedwago avba nya paragrafu yeyi ni eyi yi landreyago sa gu thumiswa avba nya gipandre “Gupheya mabhulo” ni “Haguleya gutsakeya.”Makungo nya gihevbuli gu bhuleya lisine nya Bhibhiliya li gu na ni lisima ga muthu a bhulago naye, ni gu tshiya mahungo a na bweleyago a ya bhula naye abari gu kha embedwa avba a na thumeyago avbo. Gihevbuli gi yede gu hatha mahungo ma na kuhago vathu ni gu resa mihandro nya yadi gipandreni gwagyo. Igyo gi yede gu hunga gu khigyo gi na ningeya libhuko nyo khaguri mwendro vhidhyu ya omu nya dziferameta nyo hevbudze khidzo. Vbavbandze nya gu sihevbuli si dhekorari gipandre si yede gu trenari makodzelo yaso nya gu bhule, na si gu yeyedza gu tshulega ni gu khathala khu vambe.

13. Sipandre: Gihevbuli gi yede gu thumisa gipandre gi ningidwego gi bwe gi dzi pwananisa ni giemo gi thumeyago avbo. Khu giyeyedzo:

(1) Khu ndranga ni ndranga: Gipandre gegi gyo pata gu tshumayela khu ndranga ni ndranga, khu telefoni ni makarta. Sa gu pata gambe gu haguleya gu tsakeya ga vathu hi va manago ga siemo sesi sa siraru, si wumbago gipandre nya gu tshumayele khu ndranga ni ndranga.
(2) Gu tshumayela nya githugedza: Gipandre gegi gya gu yeyedza edzi hi nga londrolago khidzo mabhulu gasi gu tshumayela. Si nga pata gu bhuleya vathu mahungu nyo khaguri nya Bhibhiliya thumutuno, xikwatunu, omu hi vbanyago umo, xapani mwendro wumbe wulanga hi girago mithumo yathu ya tshigu ni tshigu.
(3) Gu tshumayela vba guagani: Gipandre gegi gya gu pata gu tshumayela khu sikarinyana ni gu bhula ni vathu omu va girago dzinogosi, ma dziruwani, dziparki, omu dzi emeyago umo dzimovha mwendro ga malanga gu manegago vathu.

14. Gu thumisa dzivhidhyu ni mabhuku: Gihevbuli gi nga hunga gu tshamuseya vhidhyu mwendro libhuku nyo khaguri, guya khu giemo gyi gu romo ga igyo. Abari gu gipandre gi ningidwego gya gu pata vhidhyu mwendro gya gu hunga gu tshingisa vhidhyu nyo khaguri, gi nga yi tshamuseya ganiolu gi si yi yeyedzi ndrani nya gipandre.

MAVBANYELO NYA WUKRISTO

15. Hwane nya ndzimo, gu na landreya gipandre nya 15 dzimeneti, gi wumbwago khu gipandre gimwegyo mwendro sivili si dongisedwego gu phasa vaengiseyi gu vbanya khesi va si hevbulago omu nya Lito la Nungungulu. Vbavbandze nya simbe sileletelo, sipandre sesi si na girwa khu madhota mwendro vaphasedzeyi nya libandla va ninganedwago. Ganiolu, gipandre gi ganeyago khesi si lombago gu khathaledwa libandlani, gu vbwetega gi girwa khu madhota basi. Abari gu gipandre gyogyo ganelo nya gu bhudzisani ni vaengiseyi, muvegi nya ganelo a nga gira siwudziso nyo engedzelege vbavbandze nya sile si gu romo avba nya gipandre gyaye. Gasi gu pheya gipandre gyaye a yede gu ganeya malito nyo role gasi gu tshingisa dzipontu nya litshina ni gu tshiya tepo nya gu bhudzisane ni vaengiseyi. Sa gu lombega gu gira entrevhista si na ba si ri tshukwana gu oyu a na entrevhistarwigo a hongola giluvelutunu, vbavbandze nya gu ninge mihlamulo na khade wulangani waye.

16. Gihevbulo nya Bhibhiliya nya libandla: Gi nga vbindri 30 dzimeneti. Gipandre gegi gi yede gu girwa khu lidhota li ninganedwago. (Omu nya mabandla gu gu mwalo madhota nya mangi, gipandre gegi gi nga girwa khu vaphasedzeyi nya libandla va ninganedwago.) Huwo nya madhota gu vbwetega yi hunga gu khiyo khu vamani va ninganedwago gu gimbidzisa Gihevbulo nya Bhibhiliya nya libandla. Ava va pasisidwego gu gira gipandre gegi, gu vbwetega va gi gimbidzisa khu ndziya nya yadi, va sayisa gwadi tepo, va tshingisa gwadi milowo nya litshina, va bwe va phasa vaengiseyi gu wona lisima nya gu thumise esi va si hevbudego. Va na wusedze sileletelo si ganeyago khu magimbidziselo nya sipandre si gu na ni siwudziso ni mihlamulo (w23.04 paj. 24, kwadro). Neti gu enedzwa gu bhudwa khu mahungu nya semana yoyo, kha si lombi gu khiso u engedzeya mambe mabhulo gasi gu laphisa gihevbulo. Sa gu kodzega, tshukwana semana ni semana gu thumiswa mumbe mugimbidzisi ni mumbe muleri nya dzindrimana. Ga gu tshuka muphari nya gikhalo nya Tshangano nya thumo ni mavbanyelo a lomba gu khuye gihevbulo gi rodziswa, oyu a gimbidzisago gu vbwetega a hunga gu khuye a na gira ginani gasi gu vbungula tepo. Adzina a nga hatha gu mba leri dzimbe dzindrimana.

MALITO NYO SEGE

17. Ma nga vbindrisi 3 dzimeneti. Muphari nya gikhalo nya Tshangano nya thumo ni mavbanyelo a na wusedzanyana esi si hevbudwego. A na bwe a ninga magavbudzo nya esi si na hevbudwago semana yi landreyago, adzina a khumbuga giwudziso gi na hlamudwago. Tepo ya gu mu dzumeleya, a na tivise malina nya sihevbuli si na girago sipandre semana yi landreyago. Vbavbandze nya simbe sileletelo, go ba guri ni sitiviso mwendro malangaliya ma yedego gu lerwi libandlani, muphari nya gikhalo gu vbwetega a dzegeya gu londrola tepo yeyi. Sitiviso sa tshigu ni tshigu, nya nga malulamiselo nya thumo nyo tshumayele ni aya nya guagise, si nga ningedwi vbagiluvelotunu, ganiolu si na namegwe avba nya kwadru nya sitiviso. Ahati go ba guri ni sitiviso mwendro malangaliya ma yedego gu lerwi, ganiolu muphari nya gikhalo a wona gu khuye satshavbo kha si na nga eneya avba nya dzimeneti dziraru nya malito nyo sege? Gu vbwetega a lomba vandriyathu va na girago sipandre avba nya Mavbanyelo nya wuKristo va rodzisa sipandre sawe. (Wona dziparagrafu 16 ni 19.) Tshangano wu na hegisa khu ndzimo ni nombelo.

GU ZUNDZA NI WUSINGALAGADZI

18. Hwane nya gu ba gihevbuli ni gihevbuli gi giride gipandre gyagyo, muphari nya gikhalo nya Tshangano nya thumo ni mavbanyelo a na thumise gipimo nya meneti mweyo gasi gu zundza mwendro gu ninga wusingalagadzi ga gihevbuli na gu dzi seketeya omu nya pontu a thumeyago ga iyo. Tepo muphari nya gikhalo a ranago gihevbuli gasi gu ta gira gipandre, a nga ganeyi gihevbulo gi na thumeyago umo. Ganiolu, hwane nyo ba gihevbuli gi giride gipandre gyagyo nigu muphari nya gikhalo na gi zundzide, gu vbwetega a ganeya omu gi nga ba gi thumeya umo, a bwe a ganeya khesi si giridego gu gihevbuli gyogyo gi dugeleya, mwendro gu ganeya khu ndziya nya yadi gu khuye khu ginani gihevbuli gyogyo gi yedego gu simama gu thumeya avba nya gihevbulo gyogyo. Muphari nya gikhalo a gu wona gambe gu khuye somo simbe silo si na phasago gihevbuli mwendro vaengiseyi, tshulegide gu si ganeya. Gihevbuli gi nga ningwa wumbe wusingalagadzi wu na gi phasago, wu seketedwago omu nya bruxura Haladza vathu, Gu hevbudza mwendro libhuku Escola do Ministério, ganiolu khu hwane nya mitshangano mwendro yimbe tepo; ambari nari wa gihevbulo gi thumedego avbo mwendro gimbe gihevbulo. — Gasi gu mana simbe sileletelo nya thumo wu girwago khu muphari nya gikhalo nya Tshangano nya thumo ni mavbanyelo ni singalagadzi nya guphasedzeye, wona dzindrimana 19, 24, ni 25.

TEPO

19. Gi mwalo gipandre gi yedego gu vbindrisa tepo, ambari muphari nya gikhalo nya Tshangano nya thumo ni mavbanyelo kha yeli gu vbindrisa tepo a ningidwego. Ambari olu Gibhukwana nya Mitshangano nya Thumo ni Mavbanyelo gi gu na ni tepo yi vegidwego nya gipandre ni gipandre, kha si vbweti gu gihevbuli gi engedzeya mahungo gasi gi thumisa tepo yatshavbo gi ningidwego. Go tshuka vambe va girago simbe sipandre va vbindrisa tepo, gu vbwetega va ningwa wusingalagadzi khu muphari nya gikhalo nya tshangano nya thumo ni mavbanyelo mwendro khu singalagadzi nya guphasedzeye, ganiolu na siri vathuni. (Wona paragrafu 24 ni 25.) Tshangano watshavbo, gupata ni dzindzimo ni milombelo, gu vbwetega wu girwa khu ora mweyo ni 45 dzimeneti.

SEMANA NYA LIENDRO LA MUWONELEYI NYA GIPANDRE

20. Abari gu libandla lanu li na endredwa khu muwoneleyi nya gipandre, mitshangano gu vbwetega yi gimbiya edzi yi sasamedzidwego khidzo avba nya Gibhukwana nya Mitshangano nya thumo ni mavbanyelo, ganiolu vbavbandze nya Gihevbulo nya Bhibhiliya nya libandla gya avba nya gipandre nya Mavbanyelo nya wuKristo, gi na tshikedzwa khu ganelo nya thumo ya muwoneleyi nya gipandre nya 30 dzimeneti. Na yi si pheyi ganelo ya muwoneleyi nya gipandre, muphari nya gikhalo nya Tshangano nya thumo ni mavbanyelo a na wusedze esi si hevbudwego, a bwe a ninga magavbudzo nya esi si na hevbudwago semana yi landreyago, a gira ni gevbini gitiviso gi gomogo, a leri malangaliya ma gu ba ma romo, khu hwane a rana muwoneleyi nya gipandre gasi a ta vega ganelo. Hwane nya ganelo nya thumo, muwoneleyi nya gipandre a na sega tshangano khu ndzimo a yi hathidego. A nga rana mumbe ndriyathu gasi gu ta sega khu nombelo. Semana mu endredwago khu muwoneleyi nya gipandre, mo ba muri ni tsawa nya lidimi mu li thumisago libandlani gwanu, wu na patane ni libandla. Go ba guri ni tsawa wu thumisago limbe lidimi wu na simame ni mitshangano yawo, ambari mo ba mu endredwe khu muwoneleyi nya gipandre. Ganiolu, tsawa wowo, gu vbwetega wu patana ni libandla latshavbo avba nya ganelo nya thumo yi na vegwago khu muwoneleyi nya gipandre.

SEMANA NYA ASEMBELEYA NI KONGRESO

21. Ndrani nya semana nya tshangano nya gipandre mwendro Kongreso, kha gu na nga girwa mitshangano nya libandla. Vatshavbo libandlani va yede gu dundrugiswa gu khavo mahungo ma nga hadzi hevbudwa khu semana yoyo mitshanganoni nya libandla, ma na hevbudwe khu muthu enga mwendro khu ndranga.

SEMANA NYA GIDUNDRUGISO

22. Litshigu nya Gidundrugiso la gu kotsana nari vbakari nya semana, gu na ba guri mwalo Tshangano nya Thumo ni mavbanyelo.

MUWONELEYI NYA TSHANGANO NYA THUMO NI MAVBANYELO

23. Lidhota li hathidwego khu huwo nya madhota nya libandla, li na thuma kha nga muwoneleyi nya Tshangano nya Thumo ni mavbanyelo. Thumo waye gu woneleya tshangano wowu gasi gu tiyisega gu khuye wu ngu gimbiya gwadi gani, nigu ava va girago sipandre va ngu landreya sileletelo sesi gani. Gu vbwetega a thumisana gwadi ni singalagadzi nya guphasedzeye. Gu vboha gi vbohago Gibhukwana nya Mitshangano nya thumo ni mavbanyelo nya ngima nyo khaguri, muwoneleyi nya Tshangano nya thumo ni mavbanyelo gu vbwetega a kabaniseya sipandre nya sihevbuli. Isoso so pata sipandre si si girwigo khu sihevbuli, sipandre nya muphari nya gikhalo nya tshangano wa vbakari nya semana (vandriyathu va hathidwego khu huwo nya madhota) ni sipandri nya sihevbuli. (Wona dziparagrafu 3-16 ni 24) Tepo muwoneleyi nya tshangano a kabanisago sipandre a yede gu vega gupima avba nya tanga ni makodzelo nya gihevbuli, mwendro gu tiyisega gu khuye gi na ganeya na gi tiyide. Uye a yede gu gira sasimweso tepo a kabanisago simbe sipandre nya tshangano. Gihevbuli ni gihevbuli gu vbwetega gi ningwa gipandre gyagyo na gu nga tshade dzisemana dziraru khu wudugwana wakone khu gu thumisa gidangaliyana nya Gipandre nya tshangano nya thumo ni mavbanyelo yathu nya wuKristo (S-89). Muwoneleyi nya Tshangano nya Thumo ni Mavbanyelo a yede gu tiyisega gu khuye kopiya nya sipandre nya tshangano watshavbo yi namegedzidwe avba nya kwadru nya sitiviso. Huwo nya madhota yi nga lomba giphaso ga limbi lidhota mwendro muphasedzeyi nya libandla. Ganiolu, madhota basi ma yedego gu kabanisa sipandre si si girwiro khu sihevbuli.

MUPHARI NYA GIKHALO NYA TSHANGANO NYA THUMO NI MAVBANYELO

24. Semana ni semana, lidhota limwedo li na thuma nga muphari nya gikhalo nya Tshangano nya thumo ni mavbanyelo. (Omu nya mabandla gu gu mwalo madhota nya mangi, gu nga thumiswa vaphasedzeyi nya libandla va ninganedwago.) Thumo waye gu dongiseya malito nyo tule ni gu sega khayo tshangano. Khuye a na ranago vandriyathu vatshavbo va gu na ni sipandre, nigu go ba gu ri mwalo madhota nya mangi, a na gira nuye sipandre nyo khaguri gambe. Hwane nya gipandre ni gipandre, a na ganeye malitwana basi, a nga ma laphisi. Huwo nya madhota yi na hunga gu khiyo khu yavbi madhota ma ninganedwago khu gu gira gipandre gegi. Madhota ma pasisidwego gu khala vaphari nya gikhalo, ma na ningedzana gipandre gegi. Khu gu khedza khedzi huwo nya madhota nya libandla yi khadego khidzo, gu nga thumiswa ngudzu muwoneleyi nya Tshangano nya thumo ni mavbanyelo kha nga muphari nya gikhalo guvbindra aya mambe madhota ma pasisidwego. Lidhota la gu ba li ninganedwa khu gu gimbidzisa Gihevbulo nya Bhibhiliya nya libandla, li ngu ninganedwa khu gu thuma gambe kha nga muphari nya gikhalo nya tshangano. Ganiolu, dundrugani gu khenu madhota ma na thumago kha nga vaphari nya gikhalo, gu vbwetega ma zundza ni gu ninga wusingalagadzi khu ndziya nya lihaladzo yi na phasago sihevbuli. Wumbe thumo wa muphari nya gikhalo gu woneleya tepo gasi gu tshangano wu vbeya khu tepo yi vegisidwego. (Wona dzindrimana 17 ni 19.) Muphari nya gikhalo a gu si tsakeya, na guri ni wulanga nyo eneye, gu nga vegwa mikrofoni khu bambe vbagiluvelotunu gasi a wu thumisa; ndriyathu a gu na ni gipandre a na ba a dzi dongiseya na emide avba nya wumbe mikrofoni wu gomogo vbagiluvelotunu. Khu gufana, avba nya gipandre nya gulerwi nya Bhibhiliya mwendro avba nya gipandre Dzi garadze thumoni nyo tshumayele, muphari nya gikhalo a gu si tsakeya, a nga khala vbakaderatunu yi gomogo vbagiluvelotunu. Isoso si nga phasa gu londrola gwadi tepo.

SINGALAGADZI NYA GUPHASEDZEYE

25. Sa gu kodzega, tshukwana gu thumiswa lidhota li vidzidwego avba nya gipandre gegi. Thumo wa singalagadzi nya guphasedzeye, gu ningeya wusingalagadzi, sa gu vbwetega, ga madhota ni vaphasedzeyi nya libandla, wu yelanago ni gipandre nyo khaguri va giridego, si patago sipandre nya Tshangano nya thumo ni mavbanyelo, dziganelo dza guagani, gu gimbidzisa mwendro gu leri Mukhedziseyi nya gihevbulo mwendro Gihevbulo nya Bhibhiliya nya libandla. (Wona ndrimana 19.) Go ba guri ni madhota nya mangi libandlani ma kodzago gu vega gwadi dziganelo ni gu hevbudza gwadi, ndriyathu a thumago kha nga singalagadzi nya guphasezeye gu vbwetega a vbindrugedzwa mwaga ni mwaga. Kha si lombi gu khiso singalagadzi nya guphasedzeye a ningeya wusingalagadzi hwane nya gipandre ni gipandre.

DZIMBE DZISALA

26. Omu nya mabandla gu gu na ni vandriyathu nya vangi va girago gipandre nya sihevbuli, gu nga thumiswa dzimbe dzisala gasi gu gira sipandre sesi. Sala ni sala, gu vbwetega na yiri ni singalagadzi a ninganedwago, sa gu kodzega tshukwana nari lidhota. Omu si lombegago, gu nga thumiswa muphasedzeyi nya libandla a ninganedwago. Huwo nya madhota yi yede gu hunga gu khiyo khu mani a na thumago omu nya dzisala dzodzo kha nga singalagadzi, nigu si na lomba gu va vbindrugedzana gani. Oyu a thumago kha nga singalagadzi, gu vbwetega a landra sileletelo si gomogo avba nya ndrimana 18. Go ba gu thumiswa nyimbe sala libandlani gwanu gasi gu gira sipandre nya sihevbuli, gyo vbeya gipandre gi gu khigyo Kemba dzithomba nya liphuvbo, gu na lombwe sihevbuli si hongola omu nya sala yoyo. Tepo gi na vbohago gipandre gi gu khigyo Dzi garadze thumoni nyo tshumayele, si na wuye si ta patana ni libandla.

DZIVHIDHYU

27. Gu na thumiswa dzivhidhiyu dzi dongisedwego tshangano nya semana yoyo. Dzivhidhiyu nya tshangano wa vbakari nya semana, dzi na manega omu nya JW Library®, nigu dzi nga tshiswa khu gu thumisa mitshini nyo hambanehambane.

S-38- GTN 11/23