Khu mani a nga vanga Nungungulu?

Nga dundrugeya papayi nyo khaguri a ganeyago ni gyanana gyaye nya 7 myaga. Uye a gyi embeya gu khuye: “Nungungulu vangide lidambo, mwedzi, dzinyeledzi, mafu ni satshavbo si gomogo khu tshivba yaye.” Hwane nya gu ba gyanana gyaye gyi dundrugede khu satshavbo a nga gi embeya, igyo gya gu mu wudzisa gu khigyo: “Papayi, khu mani a nga vanga Nungungulu?”

Uye a gi hlamula gu khuye: “Nungungulu kha vangwa khu muthu, Uye womo gu khugeya gale.” Hlamulo wowu wu vbevbugide nigu gyanana gile gi wu pwisiside khu tepo yile kamo. Ambari ulolo, igyo gi nga dzi gira giwudziso gegi tepo gi yago gyi dandra. Si gi garadzede gu pwisisa gu khigyo si nga kodzega kharini gu muthu a ri mwalo maphelo. Ambari mafu ni ndzadzi si na ni maphelo. ‘Nungungulu a guta khu hayi?’

Khu wevbini hlamulo nya Bhibhiliya? Nya mba kanakana, khuwo hlamulo wawumowo owu papayi a ningidego gyanana gyaye. Mosi lovide gu khuye: “Pfhumu Nungungulu . . . Khu gale, sigomo na si ngari mwalo, na wu si gu vangi litigo ni mafu, uwe u Nungungulu kala gupindruga!” (Ndzimo 90:1, 2) Khu ndziya nyo fane, muprofeti Isaya ganede gu khuye: “Ina kamwe khu dziti mwendro gupwa gilo, gani? Nya gupwani Nungungulu, Pfhumu nya gupindruge!” (Isaya 40:28) Lidangaliya la Judha nilo la gu ganeya khu Nungungulu kha nga muthu “gukhugeya gale.” — Judha 25.

Kha nga a lovidego mupostoli Pawulo, malito yaya ma gu yeyedza gu khayo Nungungulu “Pfhumu nya kala gupindruga ni gupindruga.” (1 Thimoti 1:17) Isoso sa gu thula ginani? Ambari na wu dundrugeya khu tepo ya gale ngudzu, Nungungulu a di romo nigu womo matshigu yatshavbo. (Gutuledwa 1:8) Khu ndziya yoyo, khu gu ba Nungungulu a romo tepo yatshavbo, so yeyedza gu khiso uye a na ni tshivba ngudzu.

Khu ginani si garadzago gu si pwisisa isoso? Kha nga olu matshigu yathu ma nga rola, si ngu hi garadzeya gu wona tepo nga edzi Jehovha a yi wonago khidzo. Kha nga olu Jehovha a gu romo khu tepo nyo laphe ngudzu, gwaye mwaga moyo wa gu fana ni litshigu limwedo. (2 Pedro 3:8) Khu giyeyedzo: “Ina u nga si kodza gu pwisisa gu khuwe khu ginani vathu va vbanyago tanga nya 70 mwedro 80 myaga nigu dzighafanyoto dzi vbanya 50 matshigu basi? Khu lisine na si gu garadza. Bhibhiliya ya gu ganeya gu khiyo, ethu ha gu fana ni dzighafanyoto ha gu fananiswa ni Jehovha. Ambari mapimiselo yathu kha ma fani ni aya ya Jehovha. (Isaya 40:22; 55:8, 9) Khu gighelo gyogyo, kha si hlamadzisi gu mba si kodza gu pwisisa gu khethu Jehovha a giriside kharini mafu.

Ambari olu si garadzago gu si pwisisa, si ngu pwisisega gu khiso Nungungulu a vangidego silo satshavbo womo matshigu yatshavbo. Nari khatshi womo a vanga Nungungulu, muthu yoyo nari uye a nga vanga silo satshavbo. Bhibhiliya ya gu ganeya gu khiyo, Jehovha “giride silo satshavbo.” (Gutuledwa 4:11) Vbavbandze nya isoso, hi ngu dziti gu khethu mafu ni ndzadzi si na ni maphelo. (Genesi 1:1, 2) Sa guta khu hayi? Oyu a nga si vanga phede khuye a manega na si vangi Jesu ni dzingilozi. (Joba 38:4, 7; Vakolosi 1:15) Khu kharato, si ngu pwisisega gu khethu Nungungulu na si gu vangi silo satshavbo a di gu vbanya enga.

Khu gu ba gu vangidwe ethu vathu ni satshavbo si gomogo, so yeyedza gu khiso womo Nungungulu nya kala gupindruga. Gasi si kodzega gu manega milayo yi thangeyago mafu ni ndzadzi, si di gu vbwetega gu oyu a si vangidego a vbanya kala gupindruga. Nigu khuye a si kodzago gu ninga womi satshavbo si vbanyago. — Joba 33:4.