Olu aneni nyi nga si kodza gu phasa vambe

WOMI WANGU WA GALE:

Nyi velegedwe ga gidhoropana nyo khaguri gya Guatemala. Vbavbandze nyo ganeye giespanhol gu khugeya na nyi gari dugwana nyo ganeya gixil a gu lidimi nya lihundzu lathu. Nyi velegidwe khu tepo nya nyimbi nya 36 myaga Guatemala. Khu tepo yoyo, gu fude vathu nya vangi Ixil.

Tepo nyi ga ba nyiri ni 4 myaga, ndriyangu nari nyi 7 myaga a di vbophogedwa khu mina a ga ba a hagana nayo. Uye a difa, nigu eni nyi difa maho. Khu hwane, nyi diya khala ga wulaga gu nga ba si khala sanana si fudego maho dhoropani ga Guatemala avba nyi nga hevbuleya gibraille. Va di gu nyi himbedzeya gu bhula ni simbe sanana, nigu iso kha sa ba si vbweta gu bhula ni eni, kha nya nga ba nyi si pwisisa gu kheni khu ginani, nyi di gu dzipwa na nyiri nyonga. Nigu tepo yatsavbo nyi di gu vireya migima mivili ndrani nya mwaga gasi nyi ya wuseya mamayi wangu, a nga ba a nyi khataleya gwadi. Uye fude na nyiri ni 10 myaga. Tepo si nga girega isoso nyi garadzegide ngudzu, kholu khuye basi a nga ba a nyi haladza ngudzu.

Tepo nyi nga tsanganisa 11 myaga, nyi bwelede dhoropani nyi nga dandreya umo, nyi khade ni ndriyagu ni ndranga yaye. Avo va nyi sayiside, ganiolu mwalo a nga hadzi gu nyi phasa, ga edzi nyi ga ba nyi garadzegide khidzo. Dzimbe dzitepo, nyi di gu wudzisa Nungungulu gu kheni: “Khu ginani mamayi wangu a fudego? Khu ginani nyi ngafa maho?’’ Vathu va di nyi embeya gu khavo isoso si giregide kholu gu diri gu gola ga Nungungulu. Isoso si nyi giride nyi pimisa gu kheni Nungungulu kha theyi kota khu muthu. Nyi vbwetide ni gu dzi tshwedza, ganiolu kha nya nga ba nyi dziti gu nyi nga si gira kharini.

Khu gu ba nyi fude maho nya gu dzipwa na nya sa vikeledwa. Tepo nyi nga ba nyiri mudugwana, nyi pfinyidwe khu dzitepo nya dzingi. Ganiolu kha nya embeya muthu, kholu nyi di gu pimisa gu kheni mwalo a nga ba a theya kota kheni. Kha nya nga ba nyi bhula ni muthu, nigu si di gu garadza gu mana muthu nya gu bhule ni eni. Isoso si nyi garadzide ngudzu, khu lisine nyi di gu dzipwa nyonga, nigu kha nya nga ba nyi tumba muthu.

BHIBHILIYA YI VBINDRUGEDZIDE WOMI WANGU:

Tepo nyi ngaya nyi dandra, patwa nyo khaguri nya dzifakazi dza Jehovha, wu dzude xikwatunu wuta bhula ni eni. Wu di lobwa khu muhevbudzi wangu, oyu a nga ba a nyi haladza ni gu nyi pweya wusiwana. Avo va nyi bhulede khu situmbiso nya Bhibhiliya nya gu ava va fudego va na wuga, nigu ava fudego maho va na wona gambe. (Isaya 35:5; Johane 5:28, 29) Nyi si gode esi a nga nyi bhuleya, ganiolu si nyi garadzede gu bhula navo, kholu kha nya nga ba nyi olovede gu bhula ni muthu. Ambari ulolo, avo kha va diga guta nyi hevbudza Bhibhiliya khu lihaladzo. Gasi gu patwa wowu wu vboha dhoropani hi nga ba hi vbanya umu wu di gu gimbiya tanga nya dez dzikilometru (10 km) na va gu vbindra khavba nya sigomo.

Ndriyangu a nyi embede gu khuye patwa wowu wu di gu ambala gwadi basi, ganiolu kha wa ghanya. Ambari ulolo, tepo yatshavbo va di gu nyi yeyedza gu khavo va ngu khatala kheni, nigu va di gu nyi teya ni silo vata nyi ninga. Ganiolu, nyi si wone gu kheni gu diri makristo nya lisine basi, ma nga ba ma dzigaradzeya gu nyi phasa.

Nyi hevbude Bhibhiliya khu gu phaswa khu mabhuku nya gibraille. Ambari olu nyi nga ba nyi pwisisa esi nyi nga ba nyi si hevbula, monyoni gwangu si di gu nyi garadzeya gu khodwa ga sisiwana. Khu giyeyedzo, si di gu nyi garadzeya gu khodwa gu kheni Nungungulu a ngu khathala kheni khu lisine, nigu vambe va ga nyi haladza kha nga edzi Nungungulu a nyi haladzago khidzo. Nyi pwisiside gu kheni khu ginani Jehovha dzimbe dzitepo a dzumeleyago wuvivbi, ganiolu si nyi garadzede gu mu wona kha nga papayi nya lihaladzo.

Khu gu gimbiya nya tepo, esi nyi nga si hevbula omu nya Bhibhiliya si nyi phaside gu vbindrugedza mapimiselo yangu. Khu giyeyedzo, nyi hevbude gu kheni Nungungulu a ngu khathala khu sisiwana. Nigu a gu embeya vathu va tshanisekago khuye: “Khu lisine nyi wonide gutshaniseka ga vathu vangu . . . nyi ngu wuti wuvi wawe.” (Ekisodha 3:7) Tepo nyi nga pheya guti edzi Jehovha a khadego khidzo, nyi dzi hendzeledzide gwaye, nyi bhabhatiswa khu 1998.

Hwane nya gu ba gu vbindride mwanga moyo na nyi bhabhatisidwe, nyi hongode xikwatunu ga vathu nya gufe maho, dhoropani ga Escuintla. Lidhota nyo khaguri li nga ba li vbanya vbafuvbi ni xikola yoyo, li diti gu khilo si di gu nyi garadzeya gu hongola mitshanganoni omu nyi ga ba nyi khala umo. Libandla li ga ba li romo vbafuvbi li di gu manega omu nya sigomo, avba vahevbudzi vangu va ga ba va vbindra khavbo, si di gu nyi garadzeya gu gimbiya ga wulanga wowo. Gasi gu nyi phasa, lidhota lolo li di ganeya ni vandriyathu va dhoropani ga Escuintla ava va ga nyi ninga wulanga nyo khale, gasi nyi kodza gu hongola mitshanganoni. Gu khugeya litshigu lolo kala muhuno, nya gu khala ni vandriyathu vava, avo va gu nyi sayisa nga khatshi nyi givbango nya ndranga yawe.

Nyi na ni siyeyedzo nya singi nya lihaladzo nya lisine esi vandriyathu va libandlani va ga nyi yeyedza. Satshavbo soso so nyi tiyisegisa gu khiso, kha ga fakazi ya Jehovha nyo gira gipandre nya Makristo nya lisine. — Johane 13:34, 35.

EDZI NYI NGA PHASEGA KHIDZO:

Kha nyi ngu gu dzipwa na nyiri mwalo lisima, nigu nyi ngu siti esi si na giregago mindru wa tshigu. Olu nyi ngu dziti gu kheni nya gu vbanyeya ginani. Nya gu thuma tepo yatshavbo gu hevbudza vathu lisine nya Bhibhiliya, ganiolu kha nyi ngu khaleya gu pimisa khu sigaradzo sangu. Olu nya gu thuma kha nga lidhota, nigu nyi ngu vega dziganelo ga mabandla ya vbafuvbi ni omu nya dzikongresu.

Khu 2010, nyi hongode ga xikola nya vavhangeli nya mufumu. Xikola yeyi, yi nyi phaside gu gira gwadi thumo wangu libandlani. Esi nyi nga si hevbula, si nyi phaside gu wona gu kheni nyi na ni lisima ga Jehovha, nigu a ngu nyi haladza, kholu uye a ngu phasa moyo ni moyo wathu gasi gu gira thumo waye.

Jesu a di khuye: “Kategide ngudzu oyu a ningago guvbindra oyu a hakhago.’’ (Mithumo 20:35) Olu nyi nga ganeya gu kheni nyi tsakide khu lisine, nigu nyi nga gira silo nya gu gima nyi di si giri, olu nyi nga si khodza gu phasa vambe.