HUNGU NYA MAHUNGU NYA KAPA
Khu ginani hi yedego gu leri Bhibhiliya?
“Nyi di gu pimisa gu kheni si na nyi garadzeya gu pwisisa Bhibhiliya.” — Jovy
“Nyi di gu pimisa gu kheni si na nyi lemeleya gu yi pwisisa Bhibhiliya.” — Qeennie
Edzi Bhibhiliya yi gu yi khongolo khidzo, nyi di si yi dogoreyi ni gu yi leri — Ezekiel
U di nga tshuka u dogoreya gu leri Bhibhiliya, ganiolu, u dzipwa nga Jovy, Qeennie ni Ezekiel? Vathu nya vangi vo pimisa gu khavo gima kha va na nga si kodza gu leri Bhibhiliya. Ahati wa gu tugula gu khuwe Bhibhiliya yi nga phasa gu mana womi nya gu tsakise? Ahati wa gu mana dzindziya dzi na gu phasago gasi u si tsakeya gwadi gu leri Bhibhiliya ke? Ina u nga dzi emiseya gu wona edzi Bhibhiliya yi nga gu phasago khidzo?
Vathu nya vangi va dzumede gu leri Bhibhiliya nigu si va tsakiside. Wona esi vambe vathu va ganeyago.
Ezekiel, a gu na ni tanga nya 20 myaga ni guvbindra a di khuye: “Gale nyi di si giti egi nyi gi vbanyeyago, si di gu gira nga khatsi nyo gimbidzisa movha, ganiolu, na nyi si guti omu nyi hongolago. Gu leri Bhibhiliya gu nyi phaside gu nyi giti egi nyi gi vbanyeyago. Wusingalagadzi nya Bhibhiliya wu ngu nyi phasa tshigu ni tshigu.”
Frieda a gu na ni tanga nya 20 myaga ni guvbindra a di khuye: “Eni nyi di guvbiredzeya gu goroga. Ganiolu, tepo nyi nga pheya gu leri Bhibhiliya nyi di hevbuleya gu dzi phara, yi nyi phaside gambe gu si kodza gu vbanyisana ni vambe vathu nigu olu nyi na ni dzipari nya dzingi.”
Eunice a gu na ni tanga nya 50 myaga ni gu vbindra o ganeya esi khu Bhibhiliya: “Iyo yi ngu nyi phasa gu khala muthu nya tshukwana, si di gu lomba gu vbindrugedza silo nyo khaguri womini gwangu nigu gasi gu ganeya lisine muhuno nyi ngu si kodza.”
Gu leri Bhibhiliya gu vbindrugedzide womi nya vathu nya vangi, iyo yi nga gu phasa gu anuwe u vbindrugedza womi wago. (Isaya 48:17, 18) Khu giyeyedzo, iyo yi nga gu phasa gu hunga makungo nya yadi, gu manega ni dzipari nya lisine, gu mba garadzega nigu nya lisima ga satshavbo u na hevbula lisine khu Nungungulu. Wusingalagadzi nya Bhibhiliya wo guta khiyo ga Nungungulu, wa gu gira esi Bhibhiliya yi hevbudzago womi wago wu na gimbiya gwadi. Khu lisine Nungungulu gima kha na nga hi ninga wusingalagadzi nya ba wadi.
Khu kharato nya lisima u nga girago gu pheya gu hevbula Bhibhiliya. Ginani gi nga gu phasago gasi u pheya gu leri Bhibhiliya? Wona siyeyedzo nyo khaguri si na phasago gu guleri gwago nya Bhibhiliya gu tsakisa.