Tepo mwama mwendro mwangadzi a girago wubhayi

“Nyi pimiside ni gu dzi songa tepo mwama wangu a nga nyi embeya gu khuye a gu haladzana ni gyagadzyana nyo khaguri. Gwangu si di si pwisisegi, ngudzungudzu tepo nyi nga dundrugeya khu silo nyi si digidego khu kotani yaye.” — Maria wa Espanha.

Tepo mwangadzi wangu a nga dzina a nyi diga khu githugedza, si di gira nga khatshi gipandre nyo khaguri nya givili gyangu gi ngafa. Makungo yathu, esi hi nga ba hi si vireya, ni satshavbo hi nga ba hi hungide gu gira hatshavbo, si di hiso bhi. Mambe matshigu nyi di gu pimisa gu kheni si vbindride, ganiolu si di ngo nyi garadza. — Bill wa Espanha.

PARI yago nya wugadzi ya gu tshuka yi gira wubhayi, si ngu vbedzana ngudzu tshivba. Lisine gu vambe va ngu hunga gu divaleyana tepo mwama mwendro mwangadzi a dzi layago khesi a giridego, khavbovbo va wusedza lipango lawe.a Ganiolu gudivaleyana ni gu mba divaleyana, mwama mwendro nyamayi a gu tugula gu khuye pari yaye nya wugadzi yi giride wubhayi, wuvi wakona wukhongolo ngudzu. Va nga gira ginani gasi gu pala wuvi wowo?

MAVHESI NYA BHIBHILIYA MA NGA PHASAGO

Ambari na va gu vbisega, mwama mwendro nyamayi a ghohedwego a ngu thaveledwa khu Bhibhiliya. Yi ngu mu phasa gu wona gu khuye Nungungulu a ngu wona guliya gwaye nigu a ngu liya naye. — Malakiya 2:13-16.

“Vbakari nya sigaradzo si tadego monyoni gwangu, uwe, U ngu tangadzisa hefemulo wangu.” — Ndzimo 94:19.

Bill a gu dundruga esi: “Tepo nyi nga leri livhesi lolo, nyi di wona Jehovha na gu vbodziseya wuvi wangu khu ndziya nya lihaladzo, nga edzi a nga hadzi gira khidzo papayi nya lihaladzo.”

“Ga oyu a tumbegidego, Uwe u tumbegide.” — Ndzimo 18:25.

Carmen, oyu mwama waye a nga ba a haladzana ni mumbe nyamayi khu migima nyo khaguri, a gu tshamuseya esi: “Mwama wangu a di nyi diga, a ya haladzana ni mumbe. Ganiolu, nyi di gu dziti gu kheni Jehovha a na tumbega gwangu. Kha na nga tshuka a nyi diga.”

“Mu nga garadzegi khu gilo. Omu nya milombelo yanu lombani esi mu si vbwetago ga Nungungulu, khu monyo nya gubonge. Gurula ga Nungungulu gu dzi kodzago gu vboha ni omu hi si gu alakanyigo, gu na sayise myonyo [yanu].” — Vafilipi 4:6, 7.

Sasha wari khuye: “Nyi di leri lowo wowu gunganigungani. Kha nga nyi nga ba nyi gombeya ngudzu, Nungungulu a di nyi ninga gurula guvbanyani gwangu.”

Vatshavbo vava va khumbugidwego vbatshani vbavba, yomo tepo va pimisidego gu dzi songa. Ganiolu va di tumba Jehovha Nungungulu va bwe va tiyiswa khu Lito laye. Bill wari khuye: “Gukhodwa gwangu gu nyi giride nyi vbanyeya gilo nyo giti tepo silo si nga ba si wonega nga khatshi si tshungunugide. Ambari olu nyi nga ba nyiri ‘kovani nya gidema’ khu tepo nyo khaguri, Nungungulu a diri vbafuvbi gwangu.” — Ndzimo 23:4.

a Gasi gu mana mahungu ma ganeyago khu gu divaleya mwendro ne oyu a giridego wubhayi, wona Khendzugani! nya 22 nya Abril nya 1999, “Quando o cônjuje é infiel”, khu giPutukezi.

Esi si phasidego vambe

Leri ni gu drundrugeya khu milowo yi tiyisago.

Bill a gu tshamuseya khuye: “Nyi di leri libhuku la Joba ni la Dzindzimo, nyi bwe nyi funga dzindrimana dzi nga ba dzi gimbileyana ni giemo gyangu. Nyi wonide gu kheni valovi vava nya Bhibhiliya va pwide guvbisa nya nga gwangu, va bwe va garadzega nga eni.”

Engiseya muzika wu na gu thaveleyago.

Carmen a gu dundruga esi: “Tepo nyi nga ba nyi hamuga ligovbe ni wutshigu, nyi di gu engiseya muzika. Isoso si nyi thavelede ngudzu.” Daniel wari khuye: “Nyi di hevbuleya gu womba vhiyola. Muzika yi di gu nyi ninga gurula.”

Dzi phofule.

Daniel wari khuye: “Nyi di si oloveyi gu bhuleya silo sangu vambe. Ganiolu, nyi diri ni dzipari nya dzadi nyi nga ba nyi bhula nadzo tshigu ni tshigu. Nyi di gu phofula satshavbo si nga ba si nyi garadza gwawe, khu gu bhula navo ni gu va loveya. Isoso si nyi phaside ngudzu.” Sasha wari khuye: “Valongo vangu va nyi phaside ngudzu. Mamayi wangu a di dzi emisede gu nyi phasa tepo yatshavbo. Nyo vbweta muthu nyo bhule naye, a di gu dzi ninga tepo nyo nyi engiseye. Papayi wangu nuye nyi giride nyi dzipwa na nyi godwa ni gu vhikedwa, a bwe a nyi phasa gu wuyisa gurula gwangu.”

U nga digi gu gombeya.

Carmen wari khuye: “Nyi di gombeya ngudzu. Nyi dzipwa kheni Nungungulu womo vbafuvbi gwangu, a nyi engiseya, ni gu nyi phasa. Ndrani nya tepo yoyo nyo garadze, nyi di hidzimeya ga Nungungulu.”