Nyi di wona gidzemo nya gikhongolo

1. Khu gevbini giemo a nga ba ari ga igyo Johane guvbeyani nya lizana myaga nyo pheye?

GUVBEYANI nya lizana myaga nyo pheye, mupostoli Johane a diri ga giemo nyo garadze ngudzu. A di dandride khu tanga, nigu a diri gidwane gya Patimosi, adzina a diri uye enga mupostoli a nga ba a ngo vbanya. (Gutu. 1:9) A di gu dziti gu khuye vawugeyi va di kanganyiside nya vangi libandlani va bwe va vanga guhambana. Si di gu wonegisa gu khatshi tsawa wule nya wudugwana nya maKristo wu di hadzi tshungunuga, gu si manegi gambe maKristo nya lisine. — Judha 4; Gutu. 2:15, 20; 3:1, 17.

2. Khu guya khu Gutuledwa 7:9-14, giwoniso muni nyo samadzise gi wonidwego khu Johane? (Wona foto yi gomogo avba nya kapa.)

² Tepo Johane a nga ba ari giemoni gegi nyo garadze, Nungungulu a di mu ninga giwoniso nyo tsakise maningano ni wumindru. Omu nya giwoniso gyogyo, dzingilozi dzi di gu leletedwa gu mba digeledza dziphuvbo dzile nya tshivba nya tshanisa nya yikhongolo kala tsawa nya sithumi wu hakha gifungo nyo hegise. (Gutu. 7:1-3) Sithumi soso sa Nungungulu go thudwa ava va wumbago tsawa nya 144 000 nya vathu, a gu avo va na fumago ni Jesu ndzadzini. (Luka 12:32; Gutu. 7:4) Khavbovbo Johane a di khumbuga gambe wumbe tsawa nya wukhongolo ngudzu, wu mu giridego a ganeya, esi: “Hwane nya isoso nyi di wona mwandra nya wungi ngudzu nya vathu nya mayigo, mahundzu, mafumbu, malimi yatshavbo, a gu mwalo muthu a dzi kodzago gu wu saya. Va di emide mbeli nya gikhalo nya wufumu ni mbeli nya Nvutana.” (Leri Gutuledwa 7:9-14.) Si nga gira Johane na tsakide khu guti gu khuye mindru ga tshigu gu di hadzi manega vathu nya vangi ngudzu va nga hadzi khozeya Jehovha khedzi si vbwetegago khidzo!

3. a) Khu ginani giwoniso gya Johane gi tiyisago gukhodwa gwathu? b) Ginani hi na gi hevbulago avba nya ndrima yeyi?

³ Nya mba kanakana giwoniso gyogyo gi tiyiside gukhodwa ga Johane. Nigu ethu muhuno hi ngu tiyiswa ngudzu gukhodwa gwathu khu giwoniso gegi, ngudzungudzu kholu hi vbanyago teponi eyi igyo gi tadzisegago. Hi ngu wona vathu nya vangi va dzi patago gasi gu khozeya Jehovha, na vari ni gutumba nyo vbuluge gutshanisekani nya gukhongolo va bwe va mana womi nya pindrugedwa mafuni. Avba nya ndrima yeyi, hi na hevbula khedzi Jehovha a tivegisidego khidzo ava khu lisine va girago gipandre nya gidzemo nya gikhongolo ga vathu vaye guvbindra 8 myaga hwane. Khu gulandreya hi na bhula khu silo sivili nya gidzemo gyogyo: 1) wukhongolo wagyo ni 2) olu gi wumbwago khu vathu va mafuni gwatshavbo. Silo sesi sa sivili si na tiyisa gukhodwa ga vatshavbo vale va vireyago gu gira gipandre nya tsawa wowu nyo katege nya vathu.

GIDZEMO NYA GIKHONGOLO GI NA VBANYA HAYI?

4. Lisine muni nya Bhibhiliya eli dzitshetshe nya wuKristo dzi si li pwisisigo, nigu Sihevbuli nya Bhibhiliya si di hambanide kharini navo?

⁴ Wukristo kha wu hevbudzi lisine nya milowo nyo khilo litshigu limwedo vathu va engisago Nungungulu va na vbanya mafuni kala gupindruga. (2 Kor. 4:3, 4) Muhuno, dzitshetshe nya dzingi nya wuKristo dza gu hevbudza gu khidzo vatshavbo nya vadi va gu hongola ndzadzini tepo va fago. Ganiolu isoso si di gu hambana ni esi si nga ba si khodwa khu tsawa moyo nya wudugwana nya Sihevbuli nya Bhibhiliya esi si dusidego Mukhedziseyi khu va 1879. Va pwisiside gu khavo Nungungulu a na wusedza Paradhesi mafuni nigu dzimiliyoni nya vathu nyo engise va di hadzi vbanya omu mafuni nasiri ndzadzini. Ambari ulolo, si dzegide tepo gasi va si kodza gu tugula gu khavo khu vamani gwadi gwadi vathu vovo nyo engise va nga hadzi vbanya mafuni. — Mat. 6:10.

5. Ginani egi Sihevbuli nya Bhibihliya va si khodwago khu ava va wumbago tsawa nya 144 000?

⁵ Khu lisine, Sihevbuli nya Bhibhiliya si di tugula gambe omu nya milowo gu khiso, vambe va di hadzi ‘dzegiswa’ mafuni vaya fuma ni Jesu ndzadzini. (Gutu. 14:3) Tsawa wowo wu di hadzi wumbwa khu 144 000 maKristo nya sighingi nyo dzihendzeledze va nga hadzi thumeya Nungungulu khu gutumbega na va ngari mafuni. Ahati gidzemo nya gikhongolo ke?

6. Khu sevbini esi si nga ba si khodwa khu Sihevbuli nya Bhibhiliya maningano ni gidzemo nya gikhongolo?

⁶ Avba nya giwoniso gyaye, Johane a di wona tsawa wowo na wu “emide mbeli nya gikhalo nya wufumu ni mbeli nya Nvutana.” (Gutu. 7:9) Malito yaya ma giride Sihevbuli nya Bhibhiliya si khodwa gu khiso gu fana ava nya 144 000, gidzemo nya gikhongolo gi di hadzi ya vbanya ndzadzini. Nari khatshi tsawa nya wudugwana ni gidzemo nya gikhongolo yi diri ni gutumba nyo vbanye ndzadzini, yi di hadzi hambanisa kharini mitsawa yeyi ya mivili? Sihevbuli nya Bhibhiliya si tugude gu khiso gidzemo nya gikhongolo gi di yede gu wumbwa khu maKristo ma nga hadzi engisa khu gu vbeleya Nungungulu mafuni. Ambari olu va engisago milayo nya Bhibhiliya nya mavbanyelo, vambe vbakari gwawe adzina va di ngo simama dzitshetsheni gwawe. Khavbovbo Sihevbuli nya Bhibhiliya si di hegisa khu gu wona gu khiso, vathu vovo va diri ni lihaladzo nyo khaguri khu Nungungulu, ganiolu kha la nga ba li eneya gasi gu fuma ni Jesu ndzadzini. Kha nga olu lihaladzo lawe khu Nungungulu li nga ba li si eneyi, gidzemo nya gikhongolo gi di hadzi ninganedwa khu gu hongola ndzadzini gi ya ema mbeli nya gikhalo nya wufumu nasiri gu khala sikhaloni nya wufumu.

7. Khu guya khu Sihevbuli nya Bhibhiliya, khu vamani va nga hadzi vbanya mafuni ndrani nya Mufumo wa Jesu nya 1000 myaga, nigu iso si di gu khodwa ginani maningano ni vama nyo tumbege va gale yoyo?

⁷ Ina ka, khu vamani va nga hadzi vbanya mafuni? Sihevbuli nya Bhibhiliya si di gu khodwa gu khiso hwane nya gu ava nya 144 000 gumogo ni gidzemo nya gikhongolo va hongode ndzadzini, dzimiliyoni nya ava vambe va di hadzi mana guvbanya mafuni gasi gu hakha makategwa ndrani nya mufumo wa Jesu nya 1000 myaga. Sihevbuli nya Bhibhiliya kha sa nga ba si vireya gu khiso dzimiliyoni dzodzo nya vathu dzi na thumeya Jehovha na gu ngasi pheyi mufumo wa Kristo nya 1000 myaga. Vbavbandze nya isoso, avo va di gu pimisa gu khavo vathu vovo va di hadzi hevbula khu Jehovha ndrani nya mufumo wa Jesu nya 1000 myaga. Hwane nya isoso, ava va dzumeyago gu vbanya khu milayo ya Jehovha va di hadzi kategiswa khu womi nya gupindruge mafuni, nigu ava va nga hadzi bomba va di hadzi tshungunudwa. Sihevbuli nya Bhibhiliya si di gu khodwa gambe gu khiso ava va na thumago kha nga vafumeli ndrani nya Mufumo wa Jesu nya 1000 myaga, va di hadzi hongola ndzadzini guvbeyani nya Mufumo waye. Si di gu khodwa gambe gu khiso vafumeli vovo gu di gu patwa vama nyo thumbege va fudego Jesu na si gufi, va nga hadzi wuswa ndrani nya Mufumo wa Jesu nya 1000 myaga. — Ndzi. 45:16.

8. Khu yevbini mitsawa nya miraru yi nga ba yi wonegisa gu khatshi yi di gu gira gipandre nya makungo ya Nungungulu?

⁸ Khu kharato, Sihevbuli nya Bhibhiliya si di gu khodwa gu khiso gu diri ni mitsawa miraru: 1) ava nya 144 000, va nga hadzi fuma ni Jesu ndzadzini; 2) gidzemo nya gikhongolo nya maKristo nya sighingi, ma nga hadzi ema mbeli nya gikhalo nya wufumu gya Jesu ndzadzini; ni nya 3) dzimiliyoni nya vathu va nga hadzi hevbudzwa dzindziya dza Jehovha ndrani nya 1000 myaga nya Mufumo wa Kristo.b Ganiolu khu hwane nya tepo, Jehovha va phaside gu pwisisa gwadi mahungu yaya. — Mav. 4:18.

GUWONEGEYA NYA LISINE GU PHEYA GU WENENGEDZA

9. a) Gidzemo nya gikhongolo gi di hadzi ema “mbeli nya gikhalo nya wufumu gya Jesu” khu ndziya muni? b) Khu ginani mapwisiselo ma gomogo omu ga Gutuledwa 7:9 ma pwalago?

⁹ Khu 1935, Dzifakazi dza Jehovha dzi pwisiside gwadi gu khidzo khu vamani va nga va ba va wumba gidzemo nya gikhongolo nya giwoniso gya Johane. Va di tugula gu khavo gidzemo nya gikhongolo khu lisine-sine kha gi na nga hongola ndzadzini gasi guya ema “mbeli nya gikhalo nya wufumu ni mbeli nya Nvutana.” Wulangani nya isoso, avba nya giwoniso gya Johane go ganedwa khu ndziya nyo fananise. Ambari olu gi nga hadzi vbanya mafuni, gidzemo nya gikhongolo gi di hadzi ema “mbeli nya gikhalo nya wufumu” khu guti gu khavo Jehovha khuye Pfhumu nya mafu ni ndzadzi va bwe va mu engisa. (Isa. 66:1) Avo va di hadzi yeyedza gu khavo va ngu gira isoso khu gu khodwa avba nya muphaso nya gudzegiswa wa Jesu. Khu gu fana, omu ga Matewu 25:31, 32, “mayigo yatshavbo” gupata ni ava va girago silo nyo vivbe, va na ranwa gasi gu “tshangana mbeli” ga Jesu gikhaloni gyaye nya wuzundzo. Gwadi-gwadi, yatshavbo mayigo yoyo momo mafuni nasiri ndzadzini. Nya mba kanakana, mapwisiselo yaya ma ngu pwala. Esi sa gu tshamuseya gighelo gi girago Bhibhiliya yi si ganeyi gu khiyo gidzemo nya gikhongolo gi na ya vbanya ndzadzini. Tsawa moyo basi wu gu na ni gutumba nyo mane womi nya pindrugedwa ndzadzini, gu gu tsawa nya 144 000, ‘avo va na fumago mafu’ ni Jesu. — Gutu. 5:10.

10. Khu ginani si vbwetegago gu ava va girago gipandre nya gidzemo nya gikhongolo va hevbudzwa dzindziya dza Jehovha na gu nga si pheyi Mufumo wa Jesu nya 1000 myaga?

¹⁰ Gu khugeya khu 1935, Dzifakazi dza Jehovha dzi pwisiside gu khidzo gidzemo nya gikhongolo nya giwoniso gya Johane gyo wumbwa khu tsawa nya maKristo nyo tumbege va gu na ni gutumba nyo vbanye mafuni kala gupindruga. Nigu, gasi gu vbuluga gutshanisekani nya gukhongolo, gidzemo nya yikhongolo gu vbwetega gi hevbudzwa dzindziya dza Jehovha na wu nga si pheyi Mufumo nya 1000 myaga wa Jesu. Va yede gu yeyedza gukhodwa nyo tiye “gasi [va] mane tshivba nya guvbuluge ga satshavbo si na gu dugelelago” na wu ngasi pheyi Mufumo wa Jesu. — Luka 21:34-36.

11. Khu ginani adzina simbe Sihevbuli nya Bhibhiliya si pimisidego gu khiso adzina vambe va di hadzi hongola ndzadzini hwane nya Mufumo wa Jesu nya 1000 myaga?

¹¹ Ahati giwoniso gi yeyedzago gu khigyo vathu nyo khaguri mafuni va na dzegwa va hongola ndzadzini hwane nya Mufumo nya 1000 myaga, ke? Mukhedziseyi nya 15 nya Fevereiro nya 1913, wu ganede khiso isoso. Adzina moyo wawe pimiside esi, ‘Khu ginani sithumi sa Nungungulu sa gale yoyo si na dzumeledwago basi gu vbanya mafuni, ganiolu maKristo ma nga ne tumbega gwadi ma tshatshazedwa khu guvbanya ndzadzini?’ Khu lisine, avo va pimiside khu ndziya yeyi khu kotani nya olu va nga ba va khodwa gu khavo: 1) gidzemo nya gikhongolo gi di hadzi guya vbanya ndzadzini ni gu khavo 2) igyo gi di hadzi wumbwa khu maKristo nyo mba tumbega gwadi.

12-13. Ginani egi gi dundrugwago khu mitsawa ya mivili?

¹² Kha nga hi si wonidego, gu khugeya khu 1935, Dzifakazi dza Jehovha dzi ngu si pwisisa gu khidzo avo va na vbulugago nyimbini nya Harimagedhoni khu tsawa wu wumbago gidzemo nya gikhongolo nya giwoniso gya Johane. Avo “khu vale va tago khu musigaradzoni nya sikhongolo” si na giregago mafuni, nigu avo va na “huwelela khu tshivba, khavo: ‘Guvbanyisa ga gu lumba Nungungulu wathu, a khadego vbagikhalotunu nya wufumu, gambe gwa gu lumba Nvutana.’” (Gutu. 7:10, 14) Nigu, milowo ya gu hevbudza gu khiyo ava va na wuswago gasi vaya vbanya ndzadzini va na hakha “gilo nya gyadi ngudzu” guvbindra vathu nyo tumbege va gale yoyo. (Hebh. 11:40) Khu kharato, vandriyathu va di pheya gu rana vathu khu sighingi gasi gu ta thumeya Jehovha, na vari ni gutumba nyo vbanye mafuni kala gupindruga.

¹³ Ava nya gidzemo nya gikhongolo va ngu tsaka ngudzu khu gutumba va gu nago. Va ngu pwisisa gu khavo Jehovha hathide omu sithumi saye nyo tumbege si na mu thumeyago umo, gani ndzadzini gani mafuni. Mitsawa yatshavbo ya mivili yi ngu si wona gu khiyo gutshatshazedwa gwawe go kodzega basi khu kotani nya wuhigo wu si hi faneyigo wa Jehovha, a wu yeyedzidego khu muphaso nya gudzegiswe wa Jesu Kristo. — Rom. 3:24.

WUKHONGOLO WAGYO

14. Hwane nya 1935, khu ginani nya vangi va nga ba va dzi wudzisa gu khavo giprofeto gi ganeyago khu gidzemo nya gikhongolo gi na tadzisega kharini?

¹⁴ Hwane nyo ba Dzifakadzi dza Jehovha dzi manide gu wonegeya nya lisine khu 1935, nya vangi va di ngo simama gu dzi wudzisa gu khavo wu na engedzeya gu dandra kharini tengo nya vathu va na vbanyago mafuni. Khu giyeyedzo, Ronald Parkin a diri ni 12 myaga tepo si nga vegwago guagani ava va wumbago gidzemo nya gikhongolo. Wari khuye: “Teponi yoyo, gu diri ni 56,000 vahuweleyi mafuni gwatshavbo, nigu vbakari gwawe nya vangi va di todzidwe. Khu kharato, gidzemo nya gikhongolo gi di gu wonegisa gu khatshi gidugwana.”

15. Tengo nya gidzemo nya gikhongolo wa gu engedzeya gu dandra khu ndziya muni?

¹⁵ Ga myaga yi nga landreya, vamisiyonariyo nya vangi va di rumedwa guya thumeya mayigoni nya mangi, nigu tengo nya Dzifakazi dza Jehovha wu di pheya gu dandra. Khavbovbo, khu 1968, sihevbuloni nya Bhibhiliya gu di pheya gu thumiswa libhuku A Verdade Que Conduz à Vida Eterna. Ndziya eyi libhuku leli li tshamuseyago khidzo lisine yi ndrindride vathu nya vangi ngudzu vata lisineni. Ndrani nya 4 myaga, metadu nya miliyoni mweyo nya vapizane nya vaphya va di bhapatiswa. Tepo tshetshe nya Katolika yi nga ba yi pheya gu vbeya tshivba tigoni ga América Latina ni mambe mayigo, ni tepo thumo wathu wu nga pheya gu dzumeledwa Europa Oriental ni sipandre sa Afrika, dzimiliyoni nya vathu va di bhapatiswa. (Isa. 60:22) Nigu matshiguni yathu, hengeledzano ya Jehovha yi ngu dusa mambe mabhuku nya mangi ma phasago vathu gu hevbula esi Bhibhiliya yi si hevbudzago. Somo guagani gu khiso gidzemo nya gikhongolo muhuno gya gu wumbwa khu vathu va vbindrago 8 dzimiliyoni.

GIDZEMO NYA VATHU NYA MAYIGO YATSHAVBO

16. Ava va wumbago gidzemo nya gikhongolo va guta khu hayini?

¹⁶ Tepo Johane a nga lova giwoniso gyaye, a di khuye gidzemo nya gikhongolo gi di hadzi wumbwa khu “vathu nya mayigo, mahundzu, mafumbu, malimi yatshavbo.” Muprofeti Zakariya a di profetide silo nyo fane. A di lova esi: “Ga matshigu yoyo, likhumi vama nya gute khu mafumbu yatshavbo nya malimi ma ganedwago khu vathu nya mayigo, va na phara tshoka nya mwendra wa moyo nya Mujudha nya gukari, va mu embela, khavo: ‘Ethu ha guvbweta gu hongola gumogo nanu, kholu hi pwide gupwani Nungungulu womo gwanu.’” — Zak. 8:23.

17. Ginani gi girwago gasi gu phasa vathu nya malimi ni mayigo yatshavbo?

¹⁷ Dzifakazi dza Jehovha dzi ngu si wona gu khidzo kha nga olu gidzemo nya gikhongolo gi wumbwago khu vathu va mayigoni gwatshavbo, mahungu nya yadi ma ngu tshumayedwa khu malimi nya mangi. Gale yoyo hi di gu vbindrugedzeya mabhuku ma hi phasago gu hevbula Bhibhiliya khu 130 malimi ni guvbindra, ganiolu olu ha gu vbindrugedzeya mabhuku yathu khu malimi nya mangi ngudzu. Nya mba kanakana, Jehovha a gu gira giliwugiso matshiguni yathu, gu gu gutshanganisa gidzemo nya gikhongolo nya vathu nya mayigo yatshavbo. Khu kotani nya olu Bhibhiliya ni mabhuku ma seketedwago avba nya Bhibhiliya si gomogo khu malimi nya mangi, tsawa wowu nya vakhozeyi va Jehovha wu ngu simama gu pwanana, ambari olu vatago khu malangani nyo hambanehambane. Nigu Dzifakazi dza Jehovha dza gu tidwa khu sighingi sawe thumoni nyo tshumayele ni lihaladzo lawe nya wundruye. Khu lisine gukhodwa gwathu gu ngu tiyiswa ngudzu. — Mat. 24:14; Joh. 13:35.

GIWONISO GEGI GO TSHAMUSEYA GINANI GWATHU?

18. a) Khu guya khu Isaya 46:10, 11, khu ginani hi si samadziswigo kholu Jehovha a tadzisago gitumbiso gyaye maningano ni gidzemo nya gikhongolo? b) Khu ginani ava va gu ni gutumba nyo vbanye mafuni va si dzipwigo nga khatshi va gu midwa gilogyo?

¹⁸ Hi na ni sighelo nya singi nyo tsake ngudzu khu giprofeto nya gidzemo nya gikhongolo! Kha hi samali kholu Jehovha a tadzisago giprofeto gyaye khu ndziya yeyi nyo samadzise. (Leri Isaya 46:10, 11.) Ava va girago gipandre nya gidzemo nya gikhongolo va ngu tsaka ngudzu khu gutumba va ningidwego khu Jehovha. Avo kha va dzipwi nari va gu midwa silo nyo khaguri kholu va si todzwigo khu liphuvbo nya guage gasi gu ya fuma ni Jesu ndzadzini. Ndrani nya milowo, hi ngu hevbula khu vama ni vanyamayi va yeyedzidego gu khodwa va nga ba va thangedwa khu liphuvbo nya guage, ambari ulolo avo kha va giri gipandre nya ava nya 144 000. Johane Mubhapatisi gimwegyo nya siyeyedzo soso. (Mat. 11:11) Dhavhidhe nuye. (Mith. 2:34) Avo gumogo ni vambe nya vangivangi va na wuswa gasi gu vbanya paradhesini mafuni. Vatshavbo, gupata ni gidzemo nya gikhongolo, va na manega ni lithomo nyo yeyedze gutumbega gwawe ga Jehovha ni Mufumo waye.

19. Ha gu dziti kharini gu khethu ha gu vbanya matshiguni nyo hegise tepo hi wonago gutadzisega nya giwoniso gya Johane?

¹⁹ Eyi khiyo tepo nyo pheye eyi Nungungulu a tshanganisago vathu nya dzimiliyoni va mayigoni yatshavbo gasi gu khozeya gumogo. Gani gutumba gwathu khogu ga ndzadzini gani khogu ga mafuni, hi yede gu phasa nya vangi khavba hi si kodzago khavbo gasi va gira gipandre nya gidzemo nya yikhongolo nya “dzimbe dzinvuta.” (Joh. 10:16) Nya mba hweya Jehovha a na resa tshanisa nya yikhongolo eyi yi na tshungunulago mifumo nya vathu ni wukhongeyi wu vangeyago sigaradzo vathu. Ava va girago gipandre nya gidzemo nya gikhongolo va na ni lithomo nyo samadzise ngudzu. Avo va na dzumeledwa gu thumeya Jehovha mafuni kala gupindruga. — Gutu. 7:14.