U ngu ma wona makhalelo nya mba wonega ya Nungungulu?

Tepo u wonago senge nya dzikori nyo hambanehambane, ni dzinyeledzi mwendro ndzadzi nya mabara, ina u ngu kodza gu wona mithumo nya mandza ya Muvangi? Sivangwa si hi randredego sa gu yeyedza makhalelo nya mba wonega ya Jehovha. (Ro 1:20) Ha gu ema hi dundrugeya khesi hi si wonago, ha gu dzegeya gu tugula tshivba ya Nungungulu, lihaladzo, guti, gululama ni wuhindzi waye. — Ndz 104:24.

Khu sevbini simbe sivangwa sa Jehovha u si wonago tshigu ni tshigu? Ambari wa gu ba u vbanya dhoropani, si ngu kodzega gu wona sinyoni ni misimbo. Ha gu khedza gwadi sivangwa sa Jehovha, si na hi phasa gu vbungula gugaradzega, hi vega sigaradzo wulangani gwaso, hi bwe hi engedzeya gu tumba gu khethu Jehovha a ni makodzelo nya gu hi khathaleye kala gupindruga. (Mt 6:25-32) Wa gu ba uri ni sanana, si phase gu wona makhalelo nyo samadzise ya Jehovha. Gambe ni gambe hi na wonago sivangwa si hi randredego, hi na engedzeya gu hidzimeya vbafuvbi ga Muvangi. — Ndz 8:3, 4.

WONA VHIDHIYU YI GU KHIYO GUSAMADZISA NYA SIVANGWA SA GU YEYEDZA RUNGUDZU WA NUNGUNGULU — WENENGEDZO NI DZIKORI, KHU GULANDREYA HLAMULA SIWUDZISO SESI:

• Dzi pigmento dza gu hi phasa kharini gu wona dzikori?

• Ginani gi vangago dzikori nya dzingidzingi avba nya gilo gimwegyo?

• Khu ginani gu gu ni dzikori nyo hambanehambane ndzadzini?

• Dzikori muni nyo samadzise u nga nga dziwona vbafuvbi ni gaya gwago?

• Khu ginani hi yedego gu dzi ninga tepo nyo wone sivangwa?