Phasega khu gihevbulo gyago nya muthu enga

KHU GINANI SI GU SA LISIMA: Gu gira gihevbulo nya muthu enga nya Lito la Nungungulu si na hi phasa gu kodza “gupima wukhongolo ni gulapha ni gueta” nya lisine. (Ef 3:18) Si ngu hi phasa gambe gu khala na hi agide nya mba na gihoso tigoni momu nyo tale khu wuvivbi, nigu si na hi phasa gu phareleya “mahungu nya guvbanyise.” (Flp 2:15, 16) Gihevbulo nya muthu enga nya Lito la Nungungulu gi ngu hi dzumeleya gu hatha esi hi vbwetago gu hevbula khiso. Hi nga yi londrola gwadi kharini tepo hi yi vbedzago na hi leri ni gu hevbula Bhibhiliya?

MAGIRELO YAKONE:

• Funga mavhesi u bwe u lova dzinota avba nya Bhibhiliya yago nya gihevbulo, gani khya gu ghandlwa mwendro khomu nya mutshini

• Tepo u lerigo Bhibhiliya, dzi gire siwudziso sesi: ‘Khu mani? Ginani? Hayini? Khu ginani? Kharini?’

• Guti satshavbo si pategago. Thumisa dziferameta dzi gomogo gasi gu gevisisa khidzo; u nga gevisisa khu mahungu nyo khaguri mwendro livhesi nyo khaguri nya Bhibhiliya

• Dundrugeya khesi u lerigu gasi gu tugula edzi u nga si thumisago khidzo

• Tshigu ni tshigu thumisa esi u leridego — Lu 6:47, 48

WONA VHIDHIYU YI GU KHIYO: MANEGA NI GIHEVBULO NYO ETE NYA BHIBHILIYA, KHU GULANDREYA, HLAMULA SIWUDZISO SESI:

• Ginani esi vambe va ganedego maningano ni gihevbulo nya muthu enga?

• Khu ginani hi yedego gu pheya khu gu gira nombelo gasi gu gira gihevbulo gyathu nya muthu enga?

• Ginani gi nga hi phasago gu pwisisa gwadi gipandre nyo khaguri gya omu nya Bhibhiliya?

• Sifungo muni hi nga si theyago omu nya dziBhibhiliya dzathu nya gihevbulo?

• Khu ginani si gu sa lisima gu dundrugeya khesi hi si hevbulago omu nya Lito la Nungungulu?

• Ginani hi yedego gu gira khesi hi si hevbulago?