MAVBANYELO NYA WUKRISTO
Jehovha a ngu hi phasa gu timiseya sigaradzo sathu
Ndrani nya matshigu yaya nyo hegise, ethu hi ngu emisana ni sigaradzo nya singi. Dzimbe dzitepo, hi nga dzipwa gu khatshi kha hi na nga si kodza gu si timiseya. Ambari ulolo, ha gu simama gu hidzimeya ga Jehovha, uye a na hi phasa gu timiseya ni gevbini gigaradzo gi hi vbisago monyo. (Isa 43:2, 4) Hi nga hidzimeya kharini ga Jehovha tepo hi tshanganago ni sigaradzo?
Nombelo. Tepo hi tuleyago monyo wathu Jehovha, uye a na hi ninga gurula ni gu hi ninga tshivba gasi gu timiseya. — Flp 4:6, 7; 1Tes 5:17.
Mitshangano. Olu guvbindra gale, ethu ha gu vbweta ngudzu guhodza gwa liphuvboni ni gu tshangana ni vandriyathu mitshanganoni. (Heb 10:24, 25) Tepo hi dongiseyago, hi hongola mitshanganoni hi bwe hi patega omu nya mitshangano nya libandla, ethu ha gu wuyedwa khu giphaso hi gi manago khu liphuvbo la Jehovha. — Gut 2:29.
Thumo nyo tshumayele. Si na hi vbevbugeya gu vega gupima avba nya silo nya sadi ha gu gira satshavbo gasi gu simama na hi pharegide thumoni nyo tshumayele. Ethu gambe hi na tiyisa wupari wathu ni Jehovha ni vandriyathu. — 1Ko 3:5-10.
WONA VHIDHYU JEHOVHA KHA NA NGA GU DIGA, KHU GU LANDREYA GIRA SIWUDZISO SESI:
Ginani gi phasidego Malu gu simama vbafuvbi ga Jehovha tepo a nga tshangana ni sigaradzo?
Gufana ni Malu, malito hi ma manago umo ga Ndzimo 34:18 ma nga hi thaveleya kharini tepo hi tshanganago ni sigaradzo?
Esi si dugeledego Malu sa gu yeyedza kharini gu khiso Jehovha a ngu hi ninga “tshivba . . . nya yikhongolo,” tepo hi tshanganago ni sigaradzo? — 2Ko 4:7