MAVBANYELO NYA WUKRISTO
Pwisisa edzi Nungungulu a pimisago khidzo
Ethu a gu vbweta gu tsakisa Jehovha ga satshavbo hi girago. (Mav 27:11) Gasi gu gira isoso, ethu hi yede gu hunga gwadi makungo ma yeyedzago edzi uye a pimisago khidzo ambari nayo wa gu mba yeyedza esi hi yedego gu gira khu gu kongoma. Ginani gi na hi phasago gu gira isoso?
Simama gu manega ni longoloko nya gu hevbule Bhibhiliya tshigu ni tshigu. Tepo hi lerigo Bhibhiliya, isoso sa gu fana ni gu vbedza tepo ni Jehovha. Hi nga hevbula maningano ni ndziya eyi Jehovha a pimisago khiyo khu gu hi khedziseya edzi uye a pharidego khidzo vathu vaye ni gu hevbula khu siyeyedzo sa vale va giridego silo nya sadi mwendro nyo vivbe khu mawonelo ya Jehovha. Tepo hi hungago makungo, liphuvbo nya guage li nga hi phasa gu dundrugeya khu sihevbudzo ni matshina nya lisima hi ma hevbudego umo nya Lito la Nungungulu. — Joh 14:26.
Gira wugevesisi. Tepo u hungago makungo nyo khaguri, u nga dzi wudzisa gu khuwe: ‘Livhesi muni mwendro matimo muni nya Bhibhiliya ma nga nyi phasago gu pwisisa edzi Jehvoha a dzipwago khidzo khu mahungu yaya?’ Gombeya u lomba giphaso gya Jehovha, u bwe u thumisa dziferameta nya wugevesisi dzi gomogo khu lidimi lago gasi dzi gu phasa gu mana ni gu thumisa matshina nya Bhibhiliya ga giemo u gu romo ga igyo. — Dzm 25:4.
WONA VHIDHYU GU VBWETEGA HI “TUTUMA NYA MBA VBELA TSHIVBA” — HODZA GUHODZA NYA GUTIYE, KHU GU LANDREYA GIRA SIWUDZISO SESI:
Gu garadzega muni ndriyathu nya muphya wa avba nya vhidhyu a tshanganidego nago?
U nga thumisa kharini dziferameta nya wugevesisi gasi si gu phasa gu emisana ni gu garadzega nyo fane?
Hi nga wuyedwa kharini tepo hi dzi vegeyago tepo gasi gu gevesisa ni gu dzi gireya gihevbulo nya muthu enga iso si na hi phasago gu hunga gwadi makungo? — Heb 5:13, 14