MAVBANYELO NYA WUKRISTO

Phasa vathu va gu mba khongeya guti Muvangi wawe

U di nga potsa gu tshumayela vathu nyo khaguri, va gu mba khongeya na wu pimisa gu khuwe kha va na nga gu engiseya? Abari gu ina, dundruga gu khuwe vale va nga ba va si khongeyi gupata ni vale va nga ba va si khodwi ga Nungungulu, va khade Dzifakazi dza Jehovha. Avo va di gu vbweta giphaso gasi gu khodwa gu khavo Nungungulu womo. — Ro 1:20; 10:14.

YEYEDZA VHIDHYU YI GU KHIYO: DUNDRUGA GU KHUWE VATHU VA GU MWALO GUKHODWA VA NGA TSHUKA VA MANEGA NI GUKHODWA! — VATHU VA GU MBA KHONGEYA, KHU GU LANDREYA GIRA GIWUDZISO GEGI:

Matshango ya Tommaso ma gu gu phasa kharini gu manega ni mawonelo nya yadi khu gu tshumayela vathu va gu mba khongeya?

Hlamulo wago

Hi nga si gira kharini?

Muthu nyo khaguri a gu ganeya gu khuye kha khodwi ga Nungungulu, mu yeyedze wuwadi, u ganeya gwadi, nigu yeyedza gu khuwe u ngu dzina guti esi a si pimisago khu mahungu yoyo. (2Tm 2:24) Ganeya khu mahungu ma mu tsakisago. Ina uye a ngu dzina gu bhula khesi si nga gira gu vathu nya vangi va khodwa ga Muvangi? Abari gu ina, thumisa mabhuku ni dzivhidhyu dzi ganeyago khu mahungu yoyo. Dzibroxura Será Que a Vida Teve Um Criador? ni A Origem da Vida — Cinco Perguntas Que Merecem Resposta, dzi patidwe omu nya dziferameta nya gu hevbudze khidzo gasi si vbevbuga gu dzi mana.

Gupheyani adzina u nga thava gu bhula ni muthu a gu mba khodwa ga Nungungulu maningano khu lisine. Khu ginani u gu mba lomba giphaso ga muhuweleyi a vidzidwego? Dundruga gambe gu khuwe Jehovha a nga hi phasa gu kuha myonyo ya vale va yeyedzago gu tsakeya ambari gupheyani va gu mba khodwa gukhavo womo Nungungulu. — Mth 13:48.