Dzi nogise u bwe u dundruga gu khuwe khandri satshavbo u si kodzago gu gira

1. Ginani egi Dhavhidhe a ganedego maningano ni gudzinogisa ga Jehovha?

INA kamo Jehovha a ngu dzi nogisa? Ina. Dhavhidhe a di khuye: “U nyi ningide gambe gitshangu gyago nya guvbanyise, [gudzinogisa gwago gu, NM] nyi khusedzide.” (2 Sam. 22:36; Ndzi. 18:35) Si nga gira Dhavhidhe na ganede malito yaya na dundruga tepo muprofeti Samuweli a nga hongola gaya gwawe gasi guya hatha oyu a nga hadzi khala pfhumu ya Israyeli. Dhavhidhe khuye a nga ba ari nandra ga sanana satshavbo nya sikhwathana ganiolu khuye a hathidwego khu Jehovha gasi gu khala pfhumu. — 1 Sam. 16:1, 10-13.

2. Ginani hi na ganeyago khigyo avba nya ndrima yeyi?

² Dhavhidhe a di gu ma pwisisa gwadi malito ma lovidwego khu mulovi moyo nya dzindzimo a nga khuye: Jehovha “a ngu phasa gisiwana gu duga wumbwani, a khusa vbatatuni nya nguma, oyu a hamugago, gasi gu mu khadzisa ni vafumeli.” (Ndzi. 113:6-8) Avba nya ndrima yeyi hi na wona sihevbudzo nya lisima hi si hevbulago ga Jehovha maningano ni gudzinogisa. Khu gu landreya hi na hevbula khu giyeyedzo gya Pfhumu Sawule, muprofeti Dhaniyeli ni Jesu maningano ni gudzinogisa.

GINANI HI GI HEVBULAGO KHU GUDZINOGISA GA JEHOVHA?

3. Jehovha a gu thumisana kharini ni sithumi saye nya mba vbeleya nigu isoso so yeyedza ginani?

³ Jehovha a gu yeyedza gu khuye a ngu dzinogisa khedzi a thumisanago khidzo ni sithumi saye nya mba vbeleya. Uye kha hi woni nga sithumi saye basi ganiolu a gu hi wona nga dzipari dzaye. (Ndzi. 25:14) Gasi gu hi kodza gu khala dzipari dzaye, Jehovha phede khuye a hi hidzimeleya khu gu hi ninga Gyanana gyaye gasi gi hi handza sighoho sathu. Isoso so yeyedza gu khiso Jehovha na ni wuhindzi ni pweya-wusiwana.

4. Jehovha a hi giride ni makodzelo muni nigu khu ginani?

⁴ Hongoleni hi ganeya khu yimbe ndziya eyi Jehovha a yeyedzago khiyo gudzinogisa. Kha nga olu a gu uye a hi giridego, nari khatshi a di dzinide, Jehovha na hi giride na hiri mwalo makodzelo nyo dzi hatheye esi hi si vbwetago gu vbanyani. Ganiolu uye kha gira isoso. A hi giride hi fana naye a bwe a hi ninga gutshulega nyo dzihatheye esi hi si vbwetago. Ambari olu hi gu vadugwana ngudzu gwaye esi hi hathago womini gwathu si na ni lisima ga Jehovha. Uye o vbweta gu khuye hi mu khozeya khu lihaladzo na siri khu gurumedzwa hi bwe hiti gu khethu gu mu engisa gu na hi reseya makategwa. (Dhet. 10:12; Isa. 48:17, 18) Hi ngu tsaka ngudzu kholu Jehovha a gu Nungungulu nyo dzi nogise.

5. Jehovha a gu hi hevbudza kharini gu dzi nogisa? (Wona foto yi gomogo avba nya kapa.)

⁵ Jehovha a gu hi hevbudza gu dzi nogisa khedzi a hi pharago khidzo. Mwalo mumbe muthu a tigo guvbindra Jehovha mafuni ni ndzadzini. Ambari ulolo, uye a ngu dzumeya mawonelo ya vambe. Khu giyeyedzo, dzumede gu phasedzedwa khu Gyanana gyaye tepo a nga ba a gira silo satshavbo. (Mav. 8:27-30; Kol. 1:15, 16) Ambari olu Jehovha a gu Nungungulu nya Tshivba Yatshavbo uye a ngu dzumeya gu yimbe mithumo yi girwa khu vambe. Khu giyeyedzo giride gu Jesu a khala Pfhumu nya Mufumo wa Nungungulu a bwe a ninga wumbe thumo 144 000 vathu va na fumago ni Jesu. (Luka 12:32) Jehovha hevbudzide Jesu gasi a khala Pfhumu ni Muphasi nya Khongolo nya Mhamba. (Hebh. 5:8, 9) Uye gambe a ngu hevbudza vale va na fumago ni Jesu gasi va kodza gu gira thumo wowu ganiolu kha vbedzi a landriseya khu hwane gasi gu wona edzi va thumago khidzo. Wulangani nya isoso uye a ngu va tumba gu khuye avo va na gira gugola gwaye. — Gutu. 5:10.

6-7. Ginani hi gi hevbulago ga Jehovha maningano ni gu diga vambe va gira yimbe mithumo?

⁶ Kha si lombi gu khiso Jehovha a phaswa khu muthu, ambari ulolo, uye a ngu dzumeleya yimbe mithumo yi girwa khu vambe vathu. Anethu gu vbwetega hi gira sasimweso. Khu giyeyedzo, wa gu ba uri hungo nya ndranga mwendro lidhota libandlani pimedzeya giyeyedzo gya Jehovha khu gu dzumeleya gu khuwe yimbe mithumo yi girwa khu vambe u bwe u si va landriseyi khu hwane gasi gu wona edzi va thumago khidzo. Wa gu gira isoso thumo wu na gimbiya gwadi nigu u na ba u hevbudza vambe gu gira gwadi thumo wowo. (Isa. 41:10) Khu gevbini gimbe gilo egi ava va thangeyago va gi hevbulago ga Jehovha?

⁷ Bhibhiliya ya gu yeyedza gu khiyo Jehovha a ngu ninga lisima mawonelo a ningwago khu dzingilozi. (1 Dzipf. 22:19-22) Ahati enu vavelegi mu nga pimedzeya kharini Jehovha? So ba si kodzega lomba mawonelo ga sanana sago tepo u vbwetago gu gira thumo nyo khaguri. Wa gu ma wona na ma gu khade ma thumise.

8. Jehovha laphisede kharini monyo Abrahama ni Sara?

⁸ Yimbe ndziya eyi Jehovha a yeyedzago khiyo gudzinogisa khu gu laphisa monyo. Khu giyeyedzo, Jehovha a ngu laphiseya monyo sithumi saye tepo si kanakaneyago esi a hungidego gu si gira. Uye engisede gwadi Abrahama tepo a nga ba a garadzega khu kotani nya olu Jehovha a nga a vbweta gu fuvisa Sodhoma ni Ghomora. (Gen. 18:22-33) Nga dundrugeya gambe khesi Jehovha a giridego tepo Sara, ngadza Abrahama, a nga hega tepo Jehovha a nga mu tumbisa gu khuye a di hadzi mana mimba a velega gyanana na gumbide. Uye kha goroga mwendro gu mu vbenyeya. (Gen. 18:10-14) Wulangani nya isoso, Jehovha mu pharide khu ndziya nya githawo.

9. Ginani egi madhota ni mihungo nya dzindranga va gi hevbulago avba nya giyeyedzo gya Jehovha?

⁹ Vavelegi ni madhota mu nga pimedzeya kharini giyeyedzo gya Jehovha? Ginani u girago gya gu tshuka gyanana gyago mwendro ndriyathu libandlani a kanakaneya esi u si hungidego? Ina u ngu oloveya gu dzi emeleya? Mwendro u ngu zama gu pwisisa mawonelo yawe? Mihungo nya dzindranga ya gu pimedzeya Jehovha dzindranga dzawe dzi na mana gu tsaka. Madhota nayo ma gu pimedzeya Jehovha libandlani gu na manega gu tsaka. Kala avba hi hevbude edzi hi nga pimedzeyago khidzo gudzinogisa ga Jehovha. Olu hongoleni hi ganeya khu siyeyedzo sa omu nya Bhibhiliya si na hi phasago gu haguleya gudzinogisa.

GINANI HI GI HEVBULAGO GA PFHUMU SAWULE, MUPROFETI DHANIYELI NI JESU?

10. Jehovha a gu thumisa kharini siyeyedzo sa vambe gasi gu hi hevbudza?

¹⁰ Kha nga Muhevbudzi wathu nya Khongolo, Jehovha a hi ningide siyeyedzo omu nya Bhibhiliya gasi hi hevbula khiso. (Isa. 30:20, 21) Tepo hi lerigo Bhibhiliya hi ngu hevbula khu siyeyedzo sa vale va yeyedzidego gudzinogisa, hi hevbula gambe khu siyeyedzo sa vale va nya mba dzinogisa. — Ndzi. 37:37; 1 Kor. 10:11.

11. Ginani hi gi hevbulago avba nya giyeyedzo nyo vivbe gya Sawule?

¹¹ Nga dundrugeya khesi si dugeledego Pfhumu Sawule. Na ngari lidzhaha a di gu dziti gu khuye khandri satshavbo a si kodzago gu gira nyo bwe a bomba gu hakha mithumo nyo khaguri. (1 Sam. 9:21; 10:20-22) Khu gu gimbiya nya tepo Sawule a di pheya gu dzi khusedza nyo bwe a gira silo si nga ba si si mu lumbi. Uye phede gu manega ni makhalelo yoyo tepo a nga khala pfhumu. Litshigu limwedo uye a di tandrega gu laphisa monyo tepo a nga ba a vireya muprofeti Samuweli. Wulangani nyo tumbe gu khuye Jehovha a na gira gilogyo khu vathu vaye Sawule a di manega ni makolo a ningeya muphaso nyo vbiswe a gu thumo wu nga ba wu si mu lumbi. Jehovha a di pheya gu mba tsakiswa khu Sawule khu gu gimbiya nya tepo a dzegedwa wufumu. (1 Sam. 13:8-14) Gu vbwetega hi si pimedzeyi giyeyedzo gya Sawule khu gu hi si giri silo si gu mba hi lumba.

12. Dhaniyeli yeyedzide kharini gudzinogisa?

¹² Gu hambana ni giyeyedzo nyo vivbe gya Sawule, hongoleni hi wona giyeyedzo nya gyadi gya muprofeti Dhaniyeli. Muprofeti Dhaniyeli simamide gu dzi nogisa womi waye watshavbo nigu a di gu tumba Jehovha gasi gu thangedwa khuye. Khu giyeyedzo tepo a nga thumiswa khu Jehovha gasi gu tshamuseya ndroro ya Nabhukodhonosori, Dhaniyeli kha dzi khusedza ganiolu a di dzi nogisa a yeyedza gu khuye guti gule gu di guta khiyo ga Jehovha. (Dhan. 2:26-28) Ginani hi gi hevbulago? Tepo vandriyathu va hi zundzago va ganeya gu khavo hi ngu vega dziganelo nyo tshambe gu vbwetega hi yisa wuzundzo watshavbo ga Jehovha. Tepo hi manago mihandro nya yadi thumoni nyo tshumayele gu vbwetega hi dundruga gambe gu khethu wuzundzo watshavbo wo hongola ga Jehovha. Gu vbwetega hi dundruga gu khethu silo sesi khandri ha gu si kodza khu tshivba yathu ganiolu ha gu si kodza khu gu phaswa ku Jehovha. (Filp. 4:13) Ha gu gira isoso hi na ba hi pimedzeya gambe giyeyedzo nya gyadi gya Jesu. Khu ndziya muni?

13. Ginani hi gi hevbulago maningano ni gudzinogisa avba nya malito ya Jesu ma gomogo omu ga Johane 5:19, 30?

¹³ Ambari olu a nga ba ari Gyanana gya Nungungulu nya guvbeleye, Jesu a di gu tumba Jehovha tepo yatshavbo. (Leri Johane 5:19, 30.) Uye kha zama gu wandra wufumu ga Papayi waye wa ndzadzini. Vafilipi 2:6 o ganeya gu khuye Jesu “gima kha dzina gu hengula wurendra waye nya gukhale idzosaye ni Nungungulu.” Jesu a diri Gyanana nyo dzi nogise a nga ba a dziti gu khuye khandri satshavbo a si kodzago gu gira nigu a di gu ninga githawo Papayi waye.

14. Ginani egi Jesu a giridego tepo a nga lombwa gu gira silo si nga ba siri mwalo tshivbani gwaye gu si gira?

¹⁴ Nga dundrugeya khesi Jesu a giridego tepo Jakobe ni Johane gumogo ni mamayi wawe va nga mu lomba gu gira gilo gi nga ba giri mwalo tshivbani gwaye. Jesu a di dzegeya gu va embeya gu khuye Papayi waye khuye a yedego gu hunga gu khuye khu mani a yedego gu khala khu nyamudye ni nyambade ga Jesu Mufumoni wa Nungungulu. (Mat. 20:20-23) Jesu yeyedzide gu khuye khandri satshavbo si nga ba si romo tshivbani gwaye gu si gira, uye a di gu dzinogisa. Uye gima kha beleya silo si nga ba si si mu lumbi. (Joh. 12:49) Hi nga pimedzeya kharini giyeyedzo nya gyadi gya Jesu?

15-16. Hi nga wu thumisa kharini wusingalagadzi wu gomogo omu ga 1 Vakorinto 4:6?

¹⁵ Ha gu landreya wusingalagadzi wu gomogo omu ga 1 Vakorinto 4:6, hi na ba hi pimedzeya giyeyedzo gya Jesu nya gudzinogise. Lowo wowu wari khuwo: “U nga vbindrisi avba gu lovidwego khu Nungungulu.” Khu kharato ha gu lombwa wusingalagadzi khu muthu kha hi yeli gu mu embeya silo guya khu mawonelo yathu mwendro esi hi na si pimisago khu tepo yoyo. Wulangani nya isoso, gu vbwetega hi mu embeya wusingalagadzi wu gomogo omu nya Bhibhiliya mwendro wu gomogo omu nya mabhuku yathu ma seketedwago omu nya Bhibhiliya. Ha gu gira isoso ha gu yeyedza gu khethu khandri satshavbo hi sitigo. Nigu hi na ba hi yeyedza gudzinogisa hi bwe hi yisa wuzundzu watshavbo ga Jehovha. — Gutu. 15:3, 4.

¹⁶ Wulangani nya gu zundze Jehovha basi hi na ni simbe sighelo nya gu dzi nogise. Hongoleni hi wona edzi gudzinogisa gu nga hi reseyago khidzo gutsaka gu bwe gu hi phasa gu pwana ni vambe.

KHU GINANI SI GU NA NI LISIMA GU DZI NOGISA NI GU DUNDRUGA GU KHETHU KHANDRI SATSHAVBO HI SI KODZAGO GU GIRA

17. Khu ginani vathu nya gudzinogise va tsakago?

¹⁷ Gudzinogisa gu na hi gira hi mana gutsaka. Khu ndziya muni? Gudzinogisa gu na gira hi dundruga gu khethu khandri satshavbo hi si kodzago gu gira nigu isoso si na hi gira hi dzumeya ni gu bonga giphaso hi ningwago khu vambe. Khu giyeyedzo, nga dundrugeya tepo Jesu a nga hawulugisa 10 vama va nga ba va dwala khu sokonho. Mwama moyo basi a nga bweleya a ya bonga khu gu ba Jesu a mu hawulugiside madwali yaye kholu a di gu dziti gu khuye gima na sa si kodza gu dzi hawulugisa abune madwali yaye. Mwama yoyu nya gudzinogise bongide giphaso a ningidwego a bwe a zundza Nungungulu khu isoso. — Luka 17:11-19.

18. Gudzinogisa gu nga hi phasa kharini gu pwana ni vambe? (Varoma 12:10)

¹⁸ Vathu nya gudzinogise va ngu pwana ni vambe nigu va na ni dzipari. Khu ginani? Kholu avo va ngu dzumeya gu khavo vambe vathu va ni makhalelo nya yadi guvbindra avo nigu va ngu va tumba. Vathu nya gudzinogise va ngu tsaka tepo vambe va girago gwadi mithumo va ningidwego nigu va ngu bwe va va zundza. — Leri Varoma 12:10.

19. Khu ginani hi gu mba yela gu dzi khusedza?

¹⁹ Gu hambana ni vathu nya gudzinogise, vathu nya gudzikhusedze kha va kodzi gu zundza vambe nigu vo vbweta gu khavo gu zundzwa avo basi. Avo vo zama gu dzi fananisa ni vambe va bwe va zama gu va pala. Vathu nya gudzikhusedze kha va goli gu hevbudza vambe mithumo. Avo vo tala gu ganeya gu khavo, “wo vbweta gu khuwe silo si gimbiya gwadi si phare khu wabune; nilo nyo rumise wo tshimega khu ndziya.” Muthu nya gudzikhusedze gu tala nya dzitepo o vbweta gu wonwa nari ni lisima guvbindra vambe nigu tepo vambe va zundzwago a ngupwa lidiwo. (Gal. 5:26) Si ngu kala gu vathu nya nga a vovo va manega ni dzipari. Ha gu tugula gu khethu hi ngu dzi khusedza gu vbwetega hi gombeya ga Jehovha hi lomba gu khethu ‘a vbindrugedza mapimo yathu’ gasi gudzikhusedza gu si tsitsi mikhamba myonyoni yathu. — Rom. 12:2.

20. Khu ginani hi yedego gu dzi nogisa hi bwe hiti gu khethu khandri satshavbo hi si kodzago gu gira.

²⁰ Hi ngu mu bonga ngudzu Jehovha khu giyeyedzo a hi ningidego. Hi ngu wona gu khethu a ngu dzi nogisa khedzi a thumisanago khidzo ni sithumi saye nigu anethu ha gu vbweta gu mu pimedzeya. Nigu ha gu vbweta gambe gu pimedzeya vale va thumedego Jehovha khu gutumbega ni gudzinogisa. Hongoleni hi yisa watshavbo wuzundzo wu mu yelago. (Gutu. 4:11) Ha gu gira isoso hi na khala dzipari dza Jehovha kala gupindruga kholu uye a gu haladza vathu vale va dzi nogisago va bwe vati gu khavo khandri satshavbo va si kodzago gu gira.