Vavelegi, phasani sanana sanu gu haladza Jehovha

1-2. Khu ginani milowo nyo khaguri yi khalago nya lisima ngudzu gwathu tepo gilo nyo khaguri gi vbindrugedzago womini gwathu? Tshamuseya.

TEPO patwa wu tshadhago, uwo wa gu engiseya ganelo yi seketedwago umo nya Bhibhiliya yi ganeyago khu mutshadho. Milowo yi gomogo omu nya ganelo yoyo, khandri yiphya gwawe. Ganiolu, Milowo yoyo olu ya gu khala nya lisima ngudzu gwawe. Khu ginani? Kholu avo va na yi thumisa kha nga patwa wu tshadhidego.

² Khiso sasimweso si giregago tepo patwa nya Makristo wu khalago vavelegi. Khu myaga nya yingi avo adzina va engisede dziganelo nya dzingi dzi ganeyago khu gu sayisa sanana. Ganiolu, olu wusingalagadzi wu gomogo omu nya dziganelo dzodzo wa gu khala nya lisima ngudzu gwawe, kholu si na vbwetega gu va dandrisa gyanana gyawe. Uwowo i thumo nya wu khongolo ngudzu. Khu kharato, tepo silo si vbindrugedzago womini gwathu, khu lisine Milowo yi ngu khala nya lisima ngudzu gwathu. Egi khigyo gimwegyo nya gighelo gi girago vakhozeyi va Jehovha va leri Milowo, nigu kha nga dzipfhumu dza Israyeli dzi hevbudzidwego khidzo gu gira, dundrugeya khiyo “matshigu yatshavbo” nya gu vbanye gwago. — Dhet. 17:19.

3. Ginani hi na bhulago khigyo avba nya ndrima yeyi?

³ Vavelegi, mu na ni limwedo nya mathomo nya makhongolo aya Makristo ma nga manegago nawo, a gu gu hevbudza sanana sanu khu Jehovha. Ganiolu, uwe wa gu vbweta gu gira nya singi guvbindra gu hevbudza sanana sago khu Nungungulu basi. Uwe wa gu vbweta gu phasa sanana sago gu mu haladza. Ginani u nga girago gasi gu phasa sanana sago gu haladza Jehovha? Avba nya ndrima yeyi, hi na bhula khu 4 matshina nya Milawo nya Bhibhiliya ma nga phasago vavelegi. (2 Thim. 3:16) Hi na wona gambe edzi vavelegi nyo khaguri nya Makristo va wuyedwago khidzo khu gu thumisa wusingalagadzi nya Bhibhiliya.

4 MATSHINA MA NGA PHASAGO VAVELEGI

4. Khu levbini limwedo nya litshina li nga phasago vavelegi gu phasa sanana sawe gu haladza Jehovha? (Jakobe 1:5)

⁴ Litshina 1: Vbwetedzeya wusingalagadzi wa Jehovha. Lomba Jehovha gasi a gu ninga guti u gu vbwetago gasi gu phasa sanana sago gu haguleya lihaladzo khuye. (Leri Jakobe 1:5.) Uye khuye muthu nya wadi a nga gu ningago wusingalagadzi. Khu sighelo nya singi. Hongole hi bhula khu sivili. Nyo pheye, Jehovha khuye Papayi nya khongolo ga vatshavbo. (Ndzi. 36:9) Nigu nya wuvili, wusingalagadzi a hi ningago tepo yatshavbo wu ngu phasa. — Isa. 48:17.

5. a) Ginani hengeledzano ya Jehovha yi ningago gasi gu phasa vavelegi? b) Kha nga si yeyedzidwego avba nya vhidhiyu, ginani u gi hevbudego khu ndziya eyi ndriyathu Amorim ni mwangadzi waye va dandrisidego khidzo sanana sawe?

⁵ Khu gu thumisa Lito laye ni hengeledzano yaye, Jehovha a ngu ninga vavelegi mahungu nya mangi ma seketedwago umo nya Bhibhiliya ma na va phasago gu dandrisa sanana sawe ni gu si phasa gu haladza Jehovha. (Mat. 24:45) Khu giyeyedzo, u nga mana wusingalagadzi nya wadi wu gomogo umo nya dzindrima “Ajuda para a Família,” dzi dusidwego khu myaga nya yingi omu nya Khendzugani! a gu revhista yi gomogo umo nya sayiti yathu. Wulangani nya isoso, dzivhidhiyu nya dzingi dzi gomogo umo nya jw.org dzi nga phasa vavelegi gu thumisa wusingalagadzi wa Jehovha tepo va dandrisago sanana sawe.b — Mav. 2:4-6.

6. Papayi nyo khaguri o dzipwa kharini uye ni mwangadzi waye khu sileletelo va ningwago khu hengeledzano ya Jehovha?

⁶ Vavelegi nya vangi va ngu bonga khu giphaso va ningwago khu Jehovha khu thumisa hengeledzano yaye. Papayi moyo nyo pwani khu Joe a gu na ni sanana siraru a gu ganela gu khuye: “Gu dandrisa sanana lisineni kha si vbevbugi. Mwangadzi wangu ni eni tepo yatshavbo hi ngu gombeya ga Jehovha gasi a hi phasa. Nigu dzitepo nya dzingi hi ngu wona gu khethu ndrima nyo khaguri mwendro vhidhiyu dzi vbohide khu tepo yakone, gasi dzi hi phasa gu emisana ni giemo hi tshanganago nagyo. Ethu tepo yatshavbo a gu tumba wusingalagadzi wa Jehovha.” Joe ni mwangadzi waye va ngu wona edzi malulamiselo yoyo ma va phasago khidzo gu phasa sanana sawe gu hidzimeya ga Jehovha.

7. Khu ginani si gu na ni lisima gu vavelegi va gira satshavbo va si kodzago gasi gu vegeya giyeyedzo nya gyadi sanana sawe? (Varoma 2:21)

⁷ Litshina 2: Khala giyeyedzo nya gyadi. Sanana si ngu wona khu vbafuvbi esi vavelegi vaso va girago nigu gutala nya dzitepo si ngu va pimedzeya. Lisine gu vavelegi kha va vbeleya. (Rom. 3:23) Ambari ulolo, vavelegi nya guti va ngu gira satshavbo va si kodzago gasi gu vegeya giyeyedzo nya gyadi sanana sawe. (Leri Varoma 2:21.) Na hi gu ganeya khu sanana, papayi moyo wari khuye: “Iso sa gu fana ni xiponja yi ndrindrago satshavbo si gu romo matini.” Uye a gu engedza khuye: “Iso si na hi embeya tepo ethu hi girago silo si hambanago ni esi hi si hevbudzago.” Khu kharato, ha gu vbweta gu khethu sanana sathu si haladza Jehovha, lihaladzo lathu khuye li yede gu tiya nigu hi yede gu li yeyedza khu mithumo.

8-9. Ginani u gi hevbulago khesi si ganedwego khu Andrew ni Emma?

⁸ Gu na ni dzindziya nya dzingi edzi vavelegi va nga dzi thumisago gasi gu hevbudza sanana sawe gu haladza Jehovha. Ndriyathu moyo nya mwama a gu na ni 17 myaga nyo pwani khu Andrew wari khuye: “Vavelegi vangu tepo yatshavbo va di gu nyi hevbudza gu khavo si na ni lisima ngudzu gu gombeya. Matshigu yatshavbo ni wutshigu, papayi wangu a di gu gombeya gumogo ni eni ambari na nyi gombede nyenga. Vavelegi vathu tepo yatshavbo va di gu dundrugisa eni ni ndriyangu gu khavo: ‘U nga ganeya ni Jehovha ni yevbini tepo.’ Khu kotani nya isoso, nombelo gilo nya lisima gwangu. Olu si ngu nyi vbevbugeya gu gombeya nigu nya gu wona Jehovha kha nga Papayi nya lihaladzo.” Vavelegi, tepo yatshavbo dundrugani gu khenu lihaladzo lanu khu Jehovha li nga phasa sanana sanu gu haladza niso Jehovha.

⁹ Wona gambe giyeyedzo gya Emma. Tepo papayi wa Emma a nga va diga, uye a di tshiya mamayi waye ni mangava nya mangi ngudzu. Emma wari khuye: “Tepo mamayi a nga ba ari mwalo dzitsapawu nya gu eneye, uye tepo yatshabo a di gu ganeya khedzi Jehovha a nga ba a khathaleya khidzo sithumi saye. Edzi a nga ba a vbanya khidzo, nyi si wonide kamo gu kheni uye a di gu khodwa gu khuye Jehovha a ngu khathaleya sithumi saye. Mamayi wangu a di gu gira esi a nga ba a nyi hevbudza.” Ginani hi gi hevbulago? Vavelegi mu nga hevbudza sanana sanu khu siyeyedzo sanu ambari ga dzitepo nyo garadze. — Gal. 6:9.

10. Khu yavbini mathomo aya vavelegi nya vangi nya Vaisrayeli va nga ba va nawo nya gu hevbudze sanana sawe khu Jehovha? (Dhewuteronome 6:6, 7)

¹⁰ Litshina 3: Ganeya ni sanana sago tshigu ni tshigu. Jehovha hevbudzide Vaisrayeli va gale gu hevbudza sanana sawe khuye tshigu ni tshigu. (Leri Dhewuteronome 6:6, 7.) Vavelegi vovo, va diri ni mathomo nya mangi tshigu ni tshigu gasi gu bhula ni sanana sawe va bwe va phasa sanana sawe gu haladza Jehovha khu monyo waso watshavbo. Khu giyeyedzo, muphya nyo khaguri nya Muisrayeli adzina a di gu vbedza dziora nya dzingi na gu phasa papayi waye gu yala mwendro gu vbwera mihandro nyo khaguri. Ndriyaye nya nyamayi adzina a di gu vbedza tepo nya yingi na gu phasa mamayi waye gu sona sombo, gu gira mirava ni yimbe mithumo ya ndrangani. Vavelegi ni sanana va di gu thuma gumogo. Avo va di gu bhula khu silo nya singi nya lisima. Khu giyeyedzo, avo va di gu bhula khu makhalelo ya Jehovha ni edzi a nga ba a phasa khidzo ndranga yawe.

11. Khu levbini lithomo Makristo muhuno ma nga li londrolago gasi gu bhula ni sanana sawe?

¹¹ Muhuno womi wu hambanide ni owu wa gale. Ga mayigo nya mangi vavelegi ni sanana kha va vbedzi tepo nya yingi gumogo tshigu ni tshigu. Vavelegi adzina vomo thumothunu nigu sanana somo xikwatunu. Khu kharato, vavelegi va yede gu zama gu vbwetedzeya tepo nya gu bhule ni sanana sawe. (Efes. 5:15, 16; Filp. 1:10) Wukhozeyi nya ndranga limwedo nya mathomo gasi gu gira isoso. Ndriyathu moyo nya muphya nyo pwani khu Alexander wari khuye: “Papayi wangu tepo yatshavbo a gu gira malulamiselo nya gu gire wukhozeyi nya ndranga, nigu kha dzumeleyi gilo gi tsolopeteya tepo hi gu romo gumogo. Hwane nya gihevbulo, ethu ha gu bhula khu silo nya lisima gwathu.”

12. Ginani egi hungo nya ndranga a yedego gu gi dundrugeya tepo va girago wukhozeyi nya ndranga?

¹² Abari gu u hungo nya ndranga, ginani u nga girago gasi gu gira wukhozeyi nya ndranga wu tsakisa sanana sago? U nga hevbula ni sanana sago libhuku nya liphya li gu khilo Vbanya kala Gupindruga! Libhuku leli li ngu phasa gu manega ni mabhulo nya yadi. Wa gu ba u vbweta gu khuwe sanana sago si ganeya edzi si dzipwago khidzo, u nga thumisi malulamiselo nya wukhozeyi nya ndranga gasi gu si konaniseya mwendro gu si kawuka. Zama gu mba goroga dzimbe dzitepo sa gu ganeya silo nya mba iso. Wulangani nya isoso, bonga tepo iso si ganeyago edzi si dzipwago khidzo u bwe u si kutsa gu ganeya na si tshulegide. Ndziya nya yadi ngudzu nya gu phase sanana sago khu guti edzi si dzipwago khidzo.

13. Khu yavbini mambe mathomo aya vavelegi va gu nawo gasi gu phasa sanana sawe gu hidzimeya ga Jehovha?

¹³ Vavelegi, vbwetedzeyani mathomo nya gu phase sanana sanu gu hidzimeya ga Jehovha. Mu nga vireyi basi tepo nya gihevbulo nya Bhibhiliya gasi mu si hevbudza maningano ni Nungungulu wathu nya lihaladzo. Wona esi mamayi moyo nyo pwani khu Lisa a ganeyago: “Ethu ha gu thumisa satshavbo si hi randredego gasi gu hevbudza sanana sathu khu Jehovha. Khu giyeyedzo, tepo yimbwa yathu yi nga gira silo si nga hegisa sanana sathu, ethu hi di si embeya gu khethu isoso sa gu yeyedza gu khiso Jehovha, Nungungulu nya gu tsake, uye a ngu gira gu si kodzega gu hi tsaka ni gu hi tsakiswa gambe khu silo nya sidugwana.”

14. Khu ginani si gu na ni lisima gu vavelegi va phasa sanana sawe gu hatha dzipari khu wugengeyi? (Mavingu 13:20.)

¹⁴ Litshina 4: Phasa sanana sago gu hatha dzipari nya dzadi. Lito la Nungungulu li ngu vega guagani gu khilo dzipari dzi nga hi kutsedzeya gu gira silo nya sadi mwendro nyo vivbe. (Leri Mavingu 13:20.) Vavelegi, ina mu ngu dziti dzipari dza sanana sanu? U ngu dziti mwendro u di nga vbedza tepo nyo khaguri nadzo? Ginani u nga girago gasi gu phasa sanana sago gu gira dzipari ni vale va haladzago Jehovha? (1 Kor. 15:33) U nga phasa sanana sago gu gira dzipari nya dzadi khu gu rana vathu va gu na ni wupari nya wadi ni Jehovha gasi guta gira silo nago ni sanana sago. — Ndzi. 119:63.

15. Ginani egi vavelegi va nga girago gasi gu phasa sanana sawe gu manega ni dzipari nya dzadi?

¹⁵ Wona giyeyedzo gya papayi moyo nyo pwani khu Tony. Tony a gu tshamuseya gu khuye, uye ni mwangadzi waye va ngu gira satshavbo va si kodzago gasi gu phasa sanana sawe gu mana dzipari nya dzadi. Uye wari khuye: “Khu myaga nya yingi eni ni mwangadzi wangu, hi ranide vathu nya vangi nyo hambanehambane ni dzitanga nyo hambane gasi vata gaya gwathu. Avo va gu hodza gumogo ni ethu nigu hi ngu gira hatshavbo wukhozeyi nya ndranga. Eyi ndziya nya yadi ngudzu nya guti vathu vale va haladzago ni gu thumeya Jehovha na va tsakide. Ethu hi ngu wuyedwa ngudzu khu gu manega ni vawoneleyi nya sipandre, vamisiyonariyu ni vambe vatago gaya gwathu. Sanana sathu si hevbude nya singi khu matshangu va hi bhuledego, sighingi va si yeyedzidego ni thumo va wu giridego khu gu dzi garadza thumoni ga Jehovha. Silo sesi, si phaside sanana sathu gu hidzimeya ga Jehovha.” Vavelegi, dzi emiseyeni gu phasa sanana sanu gu manega ni dzipari nya dzadi.

U NGA DIGI GUTUMBA!

16. Ginani u yedego gu gi dundrugeya gimwegyo nya gyanana gyago gya gu ganeya gu khigyo kha gi vbweti gambe Jehovha?

¹⁶ Ahati hwane nyo gu ba u dzi garadzide ngudzu, ganiolu gimwegyo nya gyanana gyago gi ganeya gu khigyo kha gi vbweti gambe gu thumeya Jehovha ke? U nga pimisi gu khuwe u na ni nandru kha nga muvelegi. Jehovha ningide vatshavbo gupata ni sanana sago giningwa nya gu dzi hatheye a gu makhodzelo nya gu hathe gu khethu hi na thumeya Nungungulu mwendro ne. Abari gu gyanana gyago gi di hunga gu diga Jehovha, u nga digi gutumba gu khuwe litshigu limwedo gi na wuya. Dundrugeya khu gipimaniso nya gyanana gi dzimedego. (Luka 15:11-19, 22-24) Muphya yoyo a di gu giride silo nya singi nyo vivbe, ganiolu khu hegisa uye a di wuya. Vathu nyo khaguri va nga ganeya gu khavo: “Igyogyo gi diri gi pimaniso. Ina isoso si nga girega kamo khu lisine?” Ina si nga girega! Khu lisine, aya matshangu ya muphya moyo nyo pwani khu Elie.

17. Matshangu ya Elie ma gu gu tiyisa kharini?

¹⁷ Na gu ganeya khu vavelegi vaye Elie wari khuye: “Avo va giride satshavbo va nga si kodza gasi gu nyi phasa gu haladza Jehovha ni Lito laye Bhibhiliya. Tepo nyi nga ba nyiri ni 15 myaga, eni nyi di pheya gu mba va engisa.” Elie a di pheya gu gira silo nya gu vivbe magusihalani. Vavalegi vaye va zamide gu mu phasa gu simama vbafuvbi ni Jehovha, ganiolu uye kha va nga engisa. Hwane nya tepo nyo khaguri uye a di khuga khu ndrangani aya dzi bedzedzeya umo nya mavbanyelo nya gu vivbe. Ambari ulolo, dzimbe dzitepo uye a di gu bhula ni mweyo nya dzipari dzaye khu Bhibhiliya. Elie wari khuye: “Tepo nyi ngaya nyi bhula khu Jehovha ni pari yangu eni nyi diya nyi dundrungeya ngudzu khu Jehovha. Vbadugwanavbadugwana, mbewu nya lisine eyi yi nga ba yi si dandri monyoni gwangu, a gu mbewu vavelegi vangu va giridego satshavbo gasi gu yi yala, yi di pheya gu dandra.” Khu gu gimbiya nya tepo uye a di wuya lisineni.c Nga dudrugeya khedzi vavelegi vaye va tsakidego khidzo khu gu ba va zamide gu mu hevbudza gukhugeya wananani waye gu haladza Jehovha. — 2 Thim. 3:14, 15.

18. Wa gu dzipwa kharini khu dzi garadza ogu vavelegi va girago gasi gu hevbudza sanana sawe gu haladza Jehovha?

¹⁸ Vavelegi, Jehovha a mu ningide giningwa nyo hlamadzise ngudzu, a gu gu dandrisa sanana sanu kha nga vakhozeyi Vaye. (Ndzi. 78:4-6) Isoso kha si vbevbugi, ganiolu ethu hi ngu bonga khu gu dzi garadza mu gu girago gasi gu phasa sanana sanu. Mwa gu simama gu gira satshavbo gasi gu phasa sanana sanu gu haladza Jehovha ni gu si hevbudza gu mu engisa, tiyisegani gu khenu Papayi wathu wa ndzadzini nya lihaladzo a na tsaka. — Efes. 6:4.