Jehovha a ngu khathaleya vathu vaye

1. Khu ginani Jesu a nga lomba Jehovha gasi a khathaleya valandreyi vaye?

GA WUTSHIGU waye nyo hegise na si gufi, Jesu lombide gilo nyo khaguri ga Papayi waye wa ndzadzini. Uye a di lomba Jehovha gasi a khathaleya valandreyi vaye.(Joh. 17:15, 20) Khu lisine, Jehovha tepo yatshavbo a ngu vega gupima, si thulago gu khathaleya ni gu vhikeya vathu vaye. Ambari ulolo, Jesu a di gu dziti gu khuye Sathane a di hadzi wugeya valandreyi vaye khu tshivba. Jesu gambe a di gu dziti gu khuye avo va di hadzi vbweta giphaso gya Jehovha gasi gu pala milaphwi ya Dhiyabhulosi.

2. Guya khu Ndzimo 33:18-20, khu ginani hi gu mba yela gu thava tepo hi tshanganago ni sigaradzo?

² Mafu yaya ma fumwago khu Sathane, ma ngu reseya sigaradzo nya singi Makristo nya lisine muhuno. Ethu hi ngu tshangana ni sigaradzo nya singi si nga hi vbedzago tshivba si bwe si linga gutumbega gwathu ga Jehovha. Ganiolu, avba nya ndrima yeyi hi na wona gu khethu kha hi yeli gu thava. Kholu Jehovha a ngu hi khathaleya si thulago gu khiso, a ngu wona sigaradzo hi gu naso nigu uye adzi emisede gu hi phasa. Hongoleni hi bhula khu siyeyedzo sivili nya Bhibhiliya si yeyedzago edzi Jehovha a khedzago khidzo “vale va mu ningago githawo”. — Leri Ndzimo 33:18-20.

JEHOVHA A NGU HI PHASA TEPO HI DZIPWAGO HONGA

3. Ga siemo muni adzina hi nga dzipwago honga?

³ Ambari olu hi gu na ni vandriyathu libandlani, ethu adzina dzimbe dzitepo hi nga dzipwa honga. Khu giyeyedzo, vaphya va nga dzipwa na va ri vonga tepo khiyo va tshamuseyago esi va si khodwago xikwatunu mwendro tepo va vbindrugedzago libandla. Vambe adzina va nga vbeledwa khu gu tsaka mwendro gu vbeledwa khu tshivba tepo va dundrugago gu khavo va yede gu emisana ni gu dzipwa gwawe vonga. Ethu adzina hi nga thava gu embeya vambe edzi hi dzipwago khidzo khu gu khethu kha va na nga hi pwisisa. Dzimbe dzitepo, adzina hi nga dzi wudzisa gu khethu, ina womo muthu a khathalago khethu gani. Gu dzipwa honga khu kotani nya sigaradzo hi tshanganago naso, si nga hi gira hi dzipwa na ha sa vhikelega ni gu garadzega. Jehovha kha vbweti gu khuye hi dzipwa khu ndziya yoyo. Khu ginani hi ganeyago isoso?

4. Khu ginani muprofeti Eliya a nga khuye: “Kheni nyenga basi nyi vbulugidego”?

⁴ Wona giyeyedzo gya mwama moyo nyo tumbege nyo pwani khu Eliya. Jezabheli, a di embeya Eliya gu khuye a gu vbweta gu mu songa, khu kharato uye a di thava khu 40 matshigu ni gu vbindra. (1 Dzipf. 19:1-9) Khu gu hegisa, na romo enga phalani, a di embeya Jehovha khuye: “Kheni nyenga basi [muprofeti] a vbulugidego.”(1 Dzipf. 19:10) Gu diri ni vambe vaprofeti tigoni, khu giyeyedzo Obhadhiya a vbulugiside 100 vaprofeti va nga ba vbwetwa gu songwa khu Jezabheli. (1 Dzipf. 18:7, 13) Khu ginani Eliya a nga ba a dzipwa enga? Ina a di gu pimisa gu khuye vaprofeti va nga vbulugiswa khu Obhadhiya va di gu fude? Ina a di dzipwa kharato khu kotani nya vambe va nga ba va ri mwalo naye tepo a nga pheya gu thumeya Jehovha hwane nya gu ba Jehovha a yeyedzide gu khuye a diri Nungungulu nya lisine gigomoni gya Karimelo? Adzina uye a di dzipwa kharato kholu a di gu dziti gu khuye valala vaye va di zama gu mu songa mwendro a mwalo muthu a nga ba a khathala khuye? Matimo yaya, kha matshamuseyi khu gu vbeleya edzi a nga ba a dzipwa khidzo Eliya. Ganiolu, igyo gi hi tiyisegisago khu gu Jehovha a di gu pwisisa gwadi gu khuye khu ginani Eliya a nga ba a dzipwa enga nigu a di gu dziti edzi a nga ba a vbweta gu mu phasa khidzo.

5. Ginani Jehovha a giridego gasi gu tiyisegisa Eliya gu khuye a diri mwalo enga?

⁵ Jehovha giride silo nya singi gasi gu phasa Eliya. Uye kutside Eliya gu ganeya. Uye wudziside Eliya guvili khuye: “Ginani u thumago avba?” (1 Dzipf. 19:9, 13) Ga tepo yayimweyo, Jehovha a engisede Eliya tepo a nga ba ganeya edzi a nga ba dzipwa khidzo. Jehovha hlamude Eliya khu gu mu yeyedza gu khuye a diri vbale ni gu a diri ni tshivba nya yikhongolo. Uye gambe tiyisegiside Eliya gu khuye va di romo Vaisrayeli nya vangi va nga ba va mu khozeya. (1 Dzipf. 19:11, 12, 18) Nya mba kanakana, Eliya a dzipwide na tshulegide hwane nyo ba a tulede monyo waye Jehovha ni gupwa hlamulo waye. Jehovha ningide mithumo nya lisima Eliya. Jehovha mu lombide gasi gu todza Hazayeli kha nga pfhumu ya Asiriya, Jewudhi kha nga pfhumu ya Israyeli ni Elizewu kha nga muprofeti. (1 Dzipf. 19:15, 16) Jehovha a ningide mithumo yeyi Eliya gasi gu mu phasa gu vega gupima avbo nya silo nya sadi. Nungungulu gambe, mu ningide Elizewu gasi a thuma naye. U nga hakha kharini giphaso gya Jehovha tepo u dzi pwago wenga?

6. U nga gombeya khu ginani tepo u dzipwago wenga? (Ndzimo 62:8)

⁶ Jehovha a ngu gu rana gasi gu gombeya gwaye. Uye a ngu wona sigaradzo u gu naso, ni gu a ngu gu tiyisegisa gu khuye a na engiseya milombelo yago ni ga yevbini tepo. (1 Tes. 5:17) Uye a ngu tsaka khu gu engiseya vakhozeyi vaye. (Mav. 15:8) U nga gombeya khu ginani tepo u dzipwago na wuri wenga? Tuleya monyo wago Jehovha gufana ni esi Eliya a giridego. (Leri Ndzimo 62:8.) Mu bhuleye khu sigaradzo sago ni edzi iso si gu girago u dzipwa khidzo. Lomba Jehovha gasi a gu phasa gu emisana ni gu dzipwa gwago. Khu giyeyedzo, abari gu wa gu dzipwa wenga ni gu thava gu ningeya wufakazi xikwatunu, lomba Jehovha gasi a gu ninga gutiya-hwambo u gu vbwetago gasi u ganeya esi u si khodwago. Uwe gambe u nga mu lomba guti gasi u tshamuseya gwadi esi u si khodwago. (Luka 21:14, 15) Abari gu wo garadzega mwendro u vbede tshivba, lomba Jehovha gasi a gu phasa gu ganeya ni Mukristo a vidzidwego khu isoso. Lomba Jehovha gasi a phasa wule u hongolago uya bhula naye gasi a gu engiseya ni gu gupwisisa. Tuleya monyo wago Jehovha, u bwe u wona edzi uye a hlamulago khidzo milombelo yago u bwe u dzumeya giphaso gya vambe. Wa gu gira isoso, khu na nga dzipwa wenga.

7. Ginani u gi hevbulago khu giyeyedzo gya Mauricio?

⁷ Jehovha a ngu ninga vatshavbo thumo nya lisima gasi gu wu gira. U nga tiyisega gu khuwe a ngu wona ni gu ninga lisima satshavbo u girago libandlani ni thumoni nya gu tshumayele. (Ndzi. 110:3) Wa gu gira thumo wowu si na gu phasa kharini wa gu ba u dzipwa wenga? Wona giyeyedzo gya muphya moyo nya gupwani khu Mauricio.b Hwanenyana nya gu ba Mauricio a bhabhatisidwe, pari yaye nya yikhongolo yi di pheya gu diga lisine, Mauricio wari khuye: “Tepo nyi nga mu wona na gu diga lisine eni nyi di ema gu dzi tumba, nyi khaleya gu dziwudzisa gu kheni ina nyi na si kodza gu thumeya Jehovha nyi bwe nyi gira gipandre nya ndranga yaye. Eni gambe nyi di dzipwa nyonga ni gu kheni a mwalo muthu a na pwisisago edzi nyi dzipwago khidzo.” Ginani gi phasidego Mauricio? Uye wari khuye: “Nyi di tshumayela khu sighingi, isoso si nyi phaside gu ema gu pimisa kheni tepo yatshavbo ni edzi nyi nga ba nyi dzipwa khidzo. Eni nyi di dzipwa na nyi tsakide, nigu kha nya nga ba nyi dzipwa ngudzu nyonga tepo nyi nga ba nyi duga ni vambe thumoni nyo tshumayele.” Khu lisine, ambari olu hi gu mba manana ni vandriyathu gasi gu tshumayela, ethu hi ngu tiyiswa tepo hi tsumayelago ni vandriyathu khu gu thumisa malangaliya ni telefoni. Ginani gambe gi phasidego Mauricio? Uye a gu engedza gu khuye: “Eni gambe nyi di gu khala na nyi pharegide khu gu gira mithumo nya yingi libandlani. Eni nyi di gu gira satshavbo nyi si kodzago gasi gu dongiseya ni gu ninga sipandre vandriyathu mitshanganoni. Mithumo yeyi, yi nyi phaside gu dzipwa na nyiri ni lisima ga Jehovha ni ga vambe.”

JEHOVHA A NGU HI PHASA TEPO HI TSHANGANAGO NI SIGARADZO

8. Hi nga kuhwa kharini khu sigaradzo hi tshanaganago naso?

⁸ Ethu hi virede gu emisana ni sigaradzo nya singi matshigoni yaya nyo hegise. (2 Thim. 3:1) Ganiolu, sigaradzo soso si nga vboha ni gu dugeleya khu tepo hi nga mba yi vireya. Khu githugedza adzina saye hi nga manega ni gigaradzo nyo hamuge dzitsapawu, adzina saye dhogodheya a nga hi embeya gu khuye hi na ni madwali nya makhongolo mwendro gu fedwa khu muthu hi mu golago ngudzu. Ethu adzina hi nga garadzega ni gupwa wuvi nya wukhongolo gudzungudzu abari gu ha gu tshangana naso khu tepo yayimweyo. Ambari ulolo, dundruga gu khuwe Jehovha a ngu wona siemo hi tshanganago naso nigu khu gu phaswa khuye hi na si kodza gu timiseya ni gevbini gigaradzo.

9. Tshamuseya sigaradzo nyo khaguri esi Joba a emisanidego naso.

⁹ Nga dundrugeya khedzi Jehovha a phasidego khidzo mwama nyo tumbege Joba. Uye a emisanide ni sigaradzo nya singi khu tepo yayimweyo. Litshigu limwedo a ganede gu khuye, sirengo saye si di gu bidwe ni gu songwa nigu sithumi saye ni sanana saye si di gu fude. (Joba 1:13-19) Hwane nya isoso, na ngo gu emisana ni gu vbisa nya gu khongolo, Joba a di dwala khu madwali nya makhongolo ni gu thisa. (Joba 2:7) Giemo gyaye gi di gu garadza ngudzu nyo bwe a ganeya khuye: “Nyi garade. Kha nyi nga gu khathala gambe khu womi wangu.” —  Joba 7:16.

10. Silo muni esi Jehovha a ningidego Joba gasi gu timiseya sigaradzo saye? (Wona fotu avba nya kapa.)

¹⁰ Jehovha a di gu khathala khu Joba. Khu kotani nya olu Jehovha a nga ba a gola Joba, uye a mu ningide esi a nga ba a si vbweta gasi a timiseya sigaradzo saye gasi a simama na tumbegide. Jehovha a embede Joba a bwe a mu dundrugisa gu khuye Uye a diri ni guti nya mba vbeya ni gu Uye a di gu khathaleya sivangwa saye. Uye a di ganeya khu sirengo nya gu samadzise. (Joba 38:1, 2; 39:9, 13, 19, 27; 40:15; 41:1, 2) Jehovha thumiside gambe muphya moyo nyo pwani khu Eliyu gasi gu tiyisa ni gu thaveleya Joba. Eliyu a tiyisegiside Joba gu khuye Jehovha tepo yatshavbo a ngu tshatshazeya vakhozeyi vaye khu gu timiseya gwawe. Jehovha gambe kutside Eliyu gasi gu ninga wusingalagadzi nyo khaguri Joba. Eliyu phaside Joba gu ema gu pimisa khuye abune khu gu mu dundrugisa gu khuye ethu hi vadugwana ha gu dzi fananisa ni Jehovha, Muvangi nya mafu ni ndzadzi. (Joba 37:14) Jehovha gambe ningide gilo Joba gasi gu gira, a di mu embeya gasi gu gombeya khu dzipari dzaye dzadziraru dzi nga ba dzi ghohide. (Joba 42:8-10) Jehovha a gu hi seketeya kharini muhuno tepo hi tshanganago ni sigaradzo?

11. Bhibhiliya yi nga hi phasa kharini tepo khiyo hi tshanganago ni sigaradzo?

¹¹ Jehovha kha ganeyi ni ethu khu gu kongoma gu fana ni edzi a giridego ga Joba, ganiolu a ngu ganeya ni ethu khu gu thumisa Lito laye Bhibhiliya. (Rom. 15:4) Uye a ngu hi thaveleya khu gu hi ninga gutumba nya wumindru. Wona mahungu nyo khaguri ma gomogo umo nya Bhibhiliya ma nga hi thaveleyago tepo hi tshangango ni sigaradzo. Omu nya Milowo Jehovha a ngu hi tiyisegisa gu khuye gu mwalo gilo gu pata ni sigaradzo si na ‘hi hambanisago ni li haladzo la Nungungulu’. (Rom. 8:38, 39) Uye gambe a ngu hi tiyisegisa gu khuye uye “womo vbafuvbi ni vatshavbo va mu ranago” khu nombelo. (Ndzi. 145:18) Jehovha a gu hi embeya gu khuye ha gu mu tumba, hi nga timiseya ni gevbini gigaradzo hi bwe hi tsaka ambari na hi gu tshaniseka. (1 Kor. 10:13; Jak. 1:2, 12) Lito la Nungungulu gambe, li ngu hi dundrugisa gu khilo sigaradzo khya gitepwana ni gu si na vbindra nugunugu gu hambana ni womi nyo mba vbeya Jehovha a hi tumbisago. (2 Kor. 4:16-18) Jehovha a ngu hi tiyisegisa gu khuye a na fuvisa oyu a vangago sigaradzo hi tshanaganago naso a gu Sathane Dhiyabhulosi ni vale va mu landreyago. (Ndzi. 37:10) Ina u vegiside mavhesi nyo khaguri nya Bhibhiliya mapimoni gwago gasi ma gu phasa gu timiseya sigaradzo mindru wa tshigu?

12. Gasi gu hi phasega gwadi khu Lito laye, Jehovha a gu vireya gu khuye hi gira ginani?

¹² Jehovha o vireya gu khuye hi dzi vegeya tepo gasi gu hevbula Bhibhiliya tshigu ni tshigu hi bwe dundrugeya khesi hi si hevbulago. Tepo hi thumisago esi hi si hevbulago gukhodwa gwathu go engedzeya gu tiya nigu ho hidzimeya vbafuvbi ga Papayi wathu wa ndzadzini. Kha nga handro wakone, hi na ba hi tiyide gasi gu timiseya sigaradzo. Jehovha gambe a ngu ninga liphuvbo laye nya guage vale va tumbago Lito laye. Ni gu liphuvbo lolo li ngu hi ninga “tshivba nya yikhongolo” gasi gu timiseya ni gevbini gigaradzo. — 2 Kor. 4:7-10.

13. Guhodza ga maliphuvboni gu dongisedwago khu “githumi nya gutumbege ni nya gugengeye” gu nga hi phasa kharini gu timiseya sigaradzo?

¹³ Khu gu phaswa khu Jehovha, “githumi nya gutumbege ni nya gugengeye” gi ngu dongiseya dzindrima nya dzingi nya dzivhidhyu ni dzindzimo dzi hi phasago gu tiyisa gukhodwa gwathu hi bwe khala na hi gu khendzugide khu maliphuvboni. (Mat. 24:45) Ethu hi yede gu thumisa gwadi satshavbo esi Jehovha a hi ningago. Ndriyathu moyo nya nyamayi wa Estados Unidos a ngu bonga ngudzu khu guhodza ga maliphuvboni. Uye wari khuye: “Ndrani nya 40 myaga nyi gu nayo na nyi gu thumeya Jehovha, gutumbega gwangu gu lingidwe ngudzu.” Uye a emisanide ni sigaradzo nya singi, vhovho waye a di songwa khu mwama moyo a nga ba a gimbidzisa movha na levide, vavelegi vaye va di dwala ngudzu va bwe vafa ni gu uye a emisanide ni Câncer guvili. Ginani gi mu phasidego gu timiseya? Uye a gu tshamuseya gu khuye: “Jehovha tepo yatshavbo a nyi khathalede. Guhodza ga maliphuvboni a hi ningago khu gu thumisa githumi nya gutumbege ni nya gugengeye gu nyi phasidego gu timiseya. Khu kotani nya isoso, eni nya gu dzipwa nga Joba a nga khuye: ‘Nyi na kala nyifa na nyi gukheni, nyi mwalo nandru!’” — Joba 27:5.

14. Jehovha a gu thumisa kharini vandriyathu gasi gu hi phasa dziteponi nya sigaradzo? (1 Vatesalonika 4:9)

¹⁴ Jehovha a ngu hevbudza vathu vaye ni gu thaveleya vambe dziteponi nya sigaradzo. (2 Kor. 1:3, 4; leri 1 Vatesalonika 4:9.) Khu gu pimedzeya giyeyedzo gya Eliyu, vandriyathu va ngu dzina gu hi phasa gu simama na hi tumbegide tepo hi tshanaganago ni sigaradzo. (Mith. 14:22) Khu giyeyedzo, wona edzi libandla la Diane li mu tiyisidego khidzo ni gu mu phasa gasi gu simama vbafuvbi ni Jehovha hwane nya gu ba mwama waye a vetidwe khu madwali nya makhongolo. Uye wari khuye: “Isoso si garadzide, ganiolu hi pwide tshivba ya Jehovha ni lihaladzo ndrani nya migima yeyi nyo garadze. Libandla lathu li giride nya singi gasi gu hi phasa. Vandriyathu vatshavbo va hi phaside gu timiseya khu gu hi endreya, gu hi ligareya ni gu hi abharasari. Khu kotani nya olu nyi nga ba nyi si gimbidzise movha, vandriyathu va di gu tiyisega gu khavo nyi na si kodza gu hongola mitshanganoni mwendro thumoni nya gu tshumayele.” Ethu hi ngu tsaka ngudzu kholu hi gu na ni vandriyathu libandlani va hi haladzago.

BONGA KHU GU BA JEHOVHA A GU KHATHALEYA

15. Khu ginani hi nga tiyisegago gu khethu hi nga si kodza gu timiseya sigaradzo?

¹⁵ Hatshavbo hi na tshangana ni sigaradzo nyo khaguri. Ganiolu, gima kha wu na nga timiseya sigaradzo sesi wenga. Gufana ni papayi nya lihaladzo, Jehovha tepo yatshavbo a ngu hi khathaleya. Uye a na ni ethu, a dzi emisede gu hipwa nigu a ngu dzina gu hi phasa. (Isa. 43:2) Ethu hi ngu tiyisega gu khethu hi nga si kodza gu emisana ni sigaradzo kholu uye a hi ningide satshavbo hi si vbwetago gasi gu timiseya. Uye a hi ningide giningwa nya nombelo, Bhibhiliya, guhodza nya gungi ga liphuvboni ni lihaladzo la vandriyathu gasi li hi phasa dziteponi nya sigaradzo.

16. Ginani hi yedego gu gira gasi Jehovha a simama gu hi khathaleya?

¹⁶ Ethu hi ngu bonga ngudzu kholu Papayi wathu wa ndzadzini a hi khathaleyago! “Khuye a gu gunengela gwathu.” (Ndzi. 33:21) Ethu hi nga yeyedza gu khethu hi ngu bonga Jehovha khu lihaladzo laye khu gu thumisa satshavbo esi uye a hi ningago gasi gu hi phasa. Nigu gambe hi nga gira gipandre gyathu gasi gu Jehovha a simama gu hi khathaleya. Khu mambe malito a gu gira satshavbo hi si kodzago gasi gu engisa Jehovha ni gu gira esi si gu sadi mahoni gwaye, uye a na hi khathaleya kala gupindruga. — 1 Ped. 3:12.