Sithumi na si emide vbafuvbi ni mitshini ndrani nya fábrica
1922 100 Myaga Hwane
‘NUNGUNGULU. . .hi ningide gupala khu ga. . .Jesu Kristo.’ (1 Kor. 15:57) Malito yaya, ma hathidwe kha nga lowo nya mwaga nya 1922 gasi gu dundrugisa Sihevbuli nya Bhibhiliya gu khiso Jehovha a ngu si tshatshazeya khu gu tumbega gwaso. Ndrani nya mwaga wowo, Jehovha tshatshazede vatshumayele vale nya sighinghi. Uye a va kategiside tepo avo va nga pheya gu ghandla mabhuku yawe va bwe va thumisa radhiyu gasi gu huweleya lisine nya Mufumo. Khavbovbo, khu hwane nya mwaga nya 1922, isoso si yeyedzide guagani gu khiso Jehovha a ngu kategisa vathu vaye. Sihevbuli nya Bhibhiliya si si kodzide gu gira kongresu nya lisima ngudzu Cedar Point dhoropani ga Ohio, Estados Unidos da América. Esi si giregidego avba nya kongresu yeyi si kuhide thumo nya hengeledzano ya Jehovha kala muhuno.
“MAWONELO NYO TSAKISE”
Tepo hi nga ya hi tshumayela, vandriyathu va di gu vbweta ngudzu mabhuku. Vandriyathu va Bheteli ya Brooklyn, va di gu ghandla mabhuku, ganiolu va di gu thumisa dziempreza gasi gu ghandla mabhuku nya dzikapa nyo tiye. Khu kharato, khu myaga nya yingi empreza yi di gu si kodza gu ghandla mabhuku nyo eneye gasi gu ma thumisa thumoni nyo tshumayele. Khu kharato, ndriyathu Rutherford a di wudzisa Robert Martin, oyu a nga ba ari muthangeyi nya empreza gu khuye si nga kodzega gu gandla gambe mabhuku nya mangi gani.
Fábrica yi gomogo avbo nya Ruwa Concord Brooklyn, Nova Iorque
Ndriyathu Martin a gu ganeya gu khuye: “A yoyo ma diri mawonelo nyo tsakise kholu isoso si di gu thula gu khiso nyi di yede gu tula yimbe empreza nyo ghandle mabhuku.” Vandriyathu va di vbweta Concord Street 18, Brooklyn nigu va vbwetedzede satshavbo si nga ba si vbwetega gasi gu ghandla mabhuku.
Khandri vatshavbo va nga tsaka kholu vandriyathu va nga ba va ghandla vabune mabhuku yathu. Presidhenti nya empreza ya avba hi nga ba hi ghandla mabhuku yathu a di ta hi wuseya avba nya nyumba nya yiphya hi nga ba hi ghandla avbo mabhuku yathu. Uye a di khuye: “Mu na ni mitshini nya yadi nya gu ghandle khiyo mabhuku, ganiolu vbakari gwanu mwalo a kodzago gu yi thumisa. Khu 6 migima basi mitshini yatshavbo yeyi yi na ba yi ghohekede.”
Ndriyathu Martin a di khuye: “Isoso si di gu pwisisega, ganiolu ethu hi di gu dziti gu khethu Jehovha a di hadzi gu hi phasa gu gira thumo wowo.” Ndriyathu Martin a di gu ganeya lisine, nya mba hweya mutshini nya wuphya wu di pheya gu dusa 2000 mabhuku khu litshigu.
Panu yi lovidwego malito nyo khaguri yi gomogo khu vbatshani umo nya sala
GU HUWELEDWA NYA MUFUMO GA DZIMILIYONI NYA VATHU KHU GU THUMISA RADHIYU
Vbavbandze basi nyo ghandle mabhuku yawe, vathu va Jehovha va di pheya gu thumisa dzimbe ndzidziya gasi gu huweleya mahungu nya yadi khu gu thumisa radhiyu Broadcasting. Khu Dhomingu ni siyambo, 26 nya Fevereiro nya 1922, ndriyathu Rutherford a di vega ganelo umo nya radhiyu khu tepo nyo pheye. Uye a di vega ganelo yi nga ba yi ganeya gu khiyo: “Olu, dzimiliyoni nya vathu va vbanyago gima kha va na ngafa” umo nya radhiyu KOG Los Angeles, Califórnia, Estados Unidos da América.
Tanga nya 25 000 vathu, va engisede tshangano wowo. Vambe va rumede malangaliya ga ndriyathu Rutherford na va gu bonga khu malulamiselo yoyo. Limwedo nya malangaliya lolo li diri la ndriyathu Willard Ashford, a nga ba a vbanya Santa Ana Califórnia. Uye a di bonga ndriyathu Rutherford khu ganelo yaye “nyo tsakise nigu nya lisima.” Uye gambe a di bwe a ganeya gambe gu khuye: “Gaya gwangu gu diri ni vathu vararu va nga ba va dwala, va nga ba va si yeli duga khu ndrangani, khu kharato na va sa si khodza guta mitshanganoni va ta engiseya ganelo yeyi ambari kamo nari khatsi yi di hadzi vegwa vbafuvbi ni gaya gwathu.”
Ganiolu, ga dzisemana dzi nga landreya yi giridwe gambe yimbe mitshangano khu radhiyu. Khu 1922 Mukhedziyesi wu ganede gu khuwo: “Tanga nya 300 000 nya vathu va di gu hakhide muhungu khu radhiyu.
Khu gu tiyiswa khu malangaliya ni matshango, Sihevbuli nya Bhibhiliya si di hunga gu vbaha Estação nya radhiyu ga ndraga nyo khaguri Gidwani gya Staten vbafuvbini Bheteli ya Brooklyn. Ga myaga yi nga landreya, Sihevbuli nya Bhibhiliya si di hadzi gu thumisa estação yoyo, WBBR gasi gu huweleya mahungu nya yadi ga vathu vatshavbo ni malanga yatshavbo.
“ADV”
Khu 15 nya Junho nya 1922, Mukhedziseyi wu tiviside tshangano wu nga hadzi gu girega Cedar Point, Ohio, khu 5 kala 13 nya Setembro nya 1922. Sihevbuli nya Bhibhiliya si di tsakide ngudzu tepo si nga vboha Cedar Point.
Avbo nya ganelo yaye nyo pheye, ndriyathu Rutherford a di embeya va engiseyi khuye: “Eni nyi ngu tiyisega gu kheni Pfhumu . . . yi na kategisa kongresu yeyi nigu iyo yi na ningeya wufakazi nya gu gima wu si giregi omu mafuni.” Vavegi nya dziganelo nya kongresu yeyi va kutside vandriyathu gu gira thumo nyo tshumayele.
Gidzemo na gi romo Kongresu khu 1922 Cedar Point, Ohio
Khu Sexta-feira, 8 nya Setembro, 8000 nya vathu va di tshangana nigu va di virede khu maho nyo fuviye gu engiseya ganelo ya ndriyathu Rutherford. Avo va di gu vireya gu khavo ndriyathu Rutherford a tshamuseya esi si thulago “ADV” yi nga ba yi ghandlidwe ni dzikonvhiti dzawe. Tepo vambe va nga ba va khade, nya vangi va di wona tela, plataforma. Arthur Claus a nga ba endride gasi guya patega avba nya kongresu ya Tulsa, Oklahoma, Estados Unidos da América, a di mana wulanga a nga ba a si kodza gupwa satshavbo. Isoso si di gu garadza kholu ga tepo yoyo gu diri mwalo mikrofoni gasi gu engedzeya vholume.
“Ethu hi di gu engiseya gwadi malito yatshavbo”
Gasi gu tiyisega gu khavo ganelo kha yi na nga tsolopetedwa, muphari nya gikhalo, a di tivisa gu khuye kha na nga dzumeleya gu khuye ni wevbini muthu a beya umo nya sala tepo ganelo ya ndriyathu Rutherford yi gimbiyago. Khu dzi 9:30 ni dzimindru a di pheya gu ganeya malito ya Jesu ma gomogo umo ga Matewu 4:17 ma gu kayo: “Mufumo wa ndzadzini womo vbafuvbi.” Tepo a nga ba a ganeya khedzi vathu va nga hadzi gu hakha khidzo Mufumo, uye a di pheya gu ganeya malito yaya: “Jesu ganede gu khuye ga tepo yaye a di hadzi gu gimbidzisa vathu vaye ni gu a di hadzi gu tshaganisa vathu nya lisine ni ava nyo tumbege.”
Ndriyathu Claus a nga ba a khade avba nya sala a di dundruga gu khuye: “Ethu hi di gu engiseya gwadi malito yatshavbo.” Ganiolu, nya mba hweya uye a di dwala nigu a di yede gu duga khumo nya sala yile. Arthur a di duga khumo nya sala yile ambari olu uye a nga ba si vbweti gu duga kholu a di gu dziti gu khuye kha na nga dzumeledwa gu bweleya avba a nga ba a khade tepo ganelo ya ndriyathu yi gimbiyago.
Hwane nya dzimeneti nyo khaguri uye a di pheya gu dzipwa gwadi. Uye a di ganeya gu khuye, tepo nyi nga ba nyi bweleya salani mule eni nyi dipwa mandza na ma gu vetwa. Eni nyi di goroga! Uye a di hunga gu khuye a di hadzi gu engiseya gwadi gipandre nyo hegise nya ganelo ambari gu lita vbatshani nya teliyado, kholu a di gu dziti. Ndriyathu Claus, muphya a nga ba ari ni 23 myaga tepo yile, a di vbwetedzeya dzindziya nya gu lite vbatshani nya teliyado. Sijanelana si di gu tudwe nigu tepo a nga ba a hidzimeya vbafuvbi uye a di gu si kodza gu “engiseya gwadi.”
Ganiolu, Arthur a di siri uye enga, dzipari dzaye nyo khaguri dzi diri nidzo vbatshani nya nyumba. Moyo vawe a diri Frank Johnson, a di mu yela a ya mu wudzisa gu khuye: “U na ni gigalana avbovbo?”
Arthur a di hakha khuye: “Ina, nyi nagyo.”
Frank a di hlamula khuye: “Uwe u hlamulo nya milombelo yathu. U ngu yi wona rolo yeyi nya yi khongolo, sinali yi nga hungeledwa avba nya dzikhogo dzedzi. Engiseya gwadi mulamuli.a Tepo a na ganeyago gu khuye: ‘Nigu mu yede gu huweleya, huweleyani’ piya 4 dzingodzi dzedzi.”
Arthur a di gu pharide ngala waye, na gu vireya ni dzipari dzaye gasi gupwa ndriyathu Rutherford na gu ganeya malito ma nga hadzi gu khala sinali gasi va piya dzinghodzi. Ndriyathu Rutherford a di tsakide ngudzu nigu adzina a ganede khu lito nyo khugege tepo a nga khuye: “Khalani dzifakazi nya lisine nya gu tumbege dza Pfhumu. Simamani gu dwana kala Bhabhiloni a fuviswa khu gu vbeleya. Tshumayelani mahungu yaya ga vatshavbo. Litigo li yede gu dziti gu khilo Jehovha khuye Nungungulu nigu Jesu Kristo khuye Pfhumu nya Dzifhumu. Eyi tepo nya lisima ngudzu nya matimo. Kholu Pfhumu yi ngu fuma! Mu yede gu embeya vathu vatshavbo silo sesi. Khu kharato, huweleyani, huweleyani, huweleyani, Pfhumu ni Mufumo waye!”
Arthur a di ganeya gu khuye uye ni vambe vandriyathu va di piya dzinghodzi, nigu rolo nya panu yi nga ba yiri ni sinali yi di tshiga vbadugwana-vbadugwana. ‘ADV’ ma diri malito nya gu piye khu ginghiza nya lito “Advertise” ma tshamuseyago “gu tshumayela” mwendro gu ‘fakaza.’
“THUMO NYA LISIMA”
Kongresu yi nga girega Cedar Point yi phaside vandriyathu gu vega gupima avbo nya thumo nya lisima nya gu tshumayele Mufumo nigu vale va nga dzi ningedzeya va tsakide khu gu patega avba nya thumo wowo. Colportor (muhuno gu thulago Piyoneru) atago khu Oklahoma, Estados Unidos da América, uye lovide gu khuye: “Hi tshumayede ga sipandre nya singi omu vathu va nga ba va thuma umo nya dzimina de carvão, nigu avo va diri ngudzu sisuwana.” Uye a di khuye dzitepo nya dzingi tepo vathu va nga ba vapwa mahungu hi nga ma mana umo nya revhista Idade de Ouro, “avo va di gu liya.” Uye a di khuye: “Ethu hi tsakide ngudzu kholu hi nga va tiyisa.”
Sihevbuli nya Bhibhiliya si di gu liti lisima nya malito ya Jesu, hi ma manago umo ga libhuku la Luka 10:2 ma gu khayo: “Dzimbewu dzingi, aholu vavbweri vadugwana.” Guvbeyani nya mwaga, avo va di gu dzi emisede gu huweleya mahungu nya mufumo ga vatshavbo.
a Ndriyathu Rutherford ga dzitepo nyo khaguri a di gu ranwa pwane “Mulamuli” kholu uye a di gu thumide ga siemo nyo khaguri kha nga mulamuli Missouri Estados Unidos da América.