Guti gwa gu khusa lito

1. Vathu nya vangi va gu wona kharini guti wu gomogo umo nya Bhibhiliya? (Mavingu 1:20, 21)

MAYIGONI nya mangi, dzitepo nya dzingi hi ngu wona vandriyathu na va emide malangani va vbindrago vathu nya vangi. Avo va gu va hegeya va bwe va va ninga gilo nyo khaguri gasi gu leri. Adzina u di nga patega avba nya thumo wowo nyo tsakise nigu adzina u dundrugede khu lowo wu gomogo omu ga Mavingu wu ganeyago khu guti wu ranago vathu madhoropani gasi guta engiseya wusingalagadzi. (Leri Mavingu 1:20, 21, NM.) Bhibhiliya ni mabhuku yathu ma na ni “guti nya lisine” a gu guti wa Jehovha. Guti wowo khuwo wu vbwetegago gasi vathu va si kodza gu mana womi nya mba vbeya. Ethu hi ngu tsaka tepo muthu nyo khaguri a dzumeyago mabhuku yathu. Ganiolu, khandri vatshavbo va dzumeyago. Vathu nyo khaguri kha va dzini guti esi Bhibhiliya yi ganeyago. Vambe va gu hi hega. Avo vo pimisa gu khavo Bhibhiliya libhuku li nga vbindredwa. Avo vo pimisa gu khavo ava va landrisago esi Bhibhiliya yi si ganeyago va ngu garadza nigu kha dzi veti gwadi. Ambari ulolo, Jehovha khu lihaladzo a ngu simama gu ninga guti waye vatshavbo. Khu dzindziya muni?

2. Muhuno hi nga gu mana hayi guti, nigu ginani egi vathu nya vangi va hathago gu gira?

² Mweyo nya ndziya eyi Jehovha a yi thumisago gasi gu hi mana guti nya lisine a gu thumisa lito laye Bhibhiliya. Libhuku lolo li nga manwa khu vathu vatshavbo. Ahati mabhuku yathu ma seketedwago umo nya Bhibhiliya? Khu kotani nya makategwa ya Jehovha ayo momo khu 1 000 malimi ni guvbindra. Ava va engisago khu gu leri nigu thumisa esi va si hevbulago va na wuyedwa. Ambari ulolo, khandri vatshavbo vathu va hathago gu engisa Jehovha. Tepo avo va vbwetago gu hunga makungu va gu hatha gu dzi tumba mwendro gu engisa vambe vathu. Avo adzina va nga hi woneya vbavbatsi kholu hi hathidego gu landreya esi Bhibhiliya yi ganeya. Avba nya ndrima yeyi, hi na bhula gu khethu khu ginani vathu va girago isoso. Gupheya, hongoleni hi wona edzi ethu hi nga manegago ni guti wutago khiyo ga Jehovha.

GUTI NYA LISINE GWA GUTA KHIYO GA JEHOVHA

3. Guti nya lisine gwa gu pata ginani?

³ Guti gu nga thula makodzelo nya gu thumise esi hi sitigo gasi gu hunga silo nya sadi. Ambari ulolo, guti nya lisine gu nga pata nya singi. Bhibhiliya yo ganeya gu khiyo: “Litshina nya guti, khu gu thava PFHUMU Nungungulu, wugengeli ni mapimo khu guti uye a Agidego.” (Mav. 9:10) Khu kharato, tepo hi vbwetago gu hunga silo nya lisima hi yede gu tugula esi Jehovha a si pimisago khu isoso. Hi nga gira isoso khu gu hevbula Bhibhiliya ni mabhuku ma seketedwago umo nya Bhibhiliya. Tepo hi girago isoso, hi na yeyedza gu khethu hi na ni guti nya lisine. — Mav. 2:5-7.

4. Khu ginani Jehovha a gu uye basi a nga hi ningago guti nya lisine?

⁴ Jehovha khuye basi a nga hi ningago guti nya lisine. (Rom. 16:27) Khu ginani hi ganeyago gu khethu Jehovha gifefe nya guti? Gupheya, khu gu Jehovha Muvangi nigu a ngu siti satshavbo a si vangidego. (Ndzi. 104:24) Nya wuvili, satshavbo esi Jehovha a girago sa gu yeyedza gu khiso uye a na ni guti. (Rom. 11:33) Nya wuraru, wusingalagadzi wu yeyedzago guti wa Jehovha tepo yatshavbo wu ngu phasa vale va wu thumisago. (Mav. 2:10-12) Ha gu ba hi vbweta gu manega ni guti nya lisine, hi yede gu dzumeya litshina leli nya lisine hi bwe hi dzumeya gu thangedwa khilo tepo hi hungago silo nigu gira silo nyo khaguri.

5. Khu yevbini mihandro yi manegago tepo vathu va bombago gu khavo Jehovha khuye gifefe nya guti nya lisine?

⁵ Vathu nya vangi hi va manago thumoni nyo tshumayele, va ngu dzumeya gu khavo esi si va randredego si giridwe khu ndziya nyo mburi. Ganiolu, avo kha va dzumeyi gu khavo esi si hi randredego si di vangwa. Vambe hi mananago navo va ngu khodwa ga Nungungulu, ganiolu avo va gu wona milayo nya Bhibhiliya na yi gu vbindredwe ni gu avo va gu hatha gu vbanya khedzi va dzinago khidzo. Khu wevbini handro nya isoso? Ina litigo lomo gwadi kholu vathu va tumbago wugengeyi wawe vbavbandze nya gu tumbe guti ga Nungungulu? Ina avo va ngu mana litsako mwendro va na ni gutumba khu wumindru? Esi si hi randredego si ngu hi tiyisegisa gu khiso: “Mwalo muthu a gengedego ni mapimo ambari wusingalagadzi, a vbindrago PFHUMU Nungungulu.” (Mav. 21:30) Isoso si ngu hi kutsa gu simama gu lomba Jehovha gasi a hi ninga guti nya lisine. Nya mba tsakisa, khu gu vathu nya vangi kha va giri isoso. Khu ginani?

KHU GINANI VATHU VA BOMBAGO GUTI NYA LISINE

6. Guya khu Mavingu 1:22-25, khu va mani va bombago guti gwa Jehovha?

⁶ Nya vangi va ngu dzi gira sivbwiri tepo guti nya lisine ‘gu khusago lito li pwala mudzindzilani.’ Guya khu Bhibhliya, gu na ni ni mitsawa miraru nya vathu va bombago guti, a gu va nya mbati gilo “vatseketseli” ni “sipumbu.” (Leri Mavingu 1:22-25.) Olu hongoleni hi wona sighelo si girago vathu vovo va bomba guti gwa Nungungulu, nigu hongoleni hi wona edzi ethu hi yedego gu potsa gufana navo.

7. Khu ginani vathu nyo khaguri va hathago gu simama nya mbati gilo?

⁷ ‘Va nya mbati gilo’ vathu va khodwago satshavbo va sipwago nigu si ngu vbevbuga gu va liphedwa. (Mav. 14:15.) Dzitepo nya dzingi, ethu hi ngu mana vathu nya nga vovo thumoni nyo tshumayele. Khu giyeyedzo, nga dundrugeya khu dzimiliyoni nya vathu va liphedwago khu dzitshetshe mwendro vathangeyi nya politika. Vathu nyo khaguri va ngu vbeya tshivba tepo va tugulago gu khavo vathangeyi vawe va di gu va lipheya. Ganiolu, vale va khumbugidwego omu ga Mavingu 1:22 va gu hatha gu simama nya mbati gilo kholu avo va gu gola gu vbanya khu ndziya yeyi. (Jer. 5:31) Avo va gu gira esi va si vbwetago nigu kha va vbweti gu hevbula esi Bhibhiliya yi ganeyago mwendro gu engisa milayo nya Bhibhiliya. Vathu nya vangi, va ngu dzipwa nga nyamayi moyo wa Canadá a nga ba a gola gu hongola tshetsheni, a nga embeya ndriyathu moyo nya Fakazi gu khuye: “Paderi wathu a gu hi lipheya nandru wu na bari wuri waye nasiri wathu.” Ethu khu lisine kha hi vbweti gu pimedzeya vathu vovo va dzumeyago satshavbo. — Mav. 1:32; 27:12.

8. Ginani gi na hi phasago gasi hi mana guti nyo khaguri?

⁸ Na yiri ni gighelo nya gyadi, Bhibhiliya ya gu hi kutsa gu mba khala vathu nya mbati gilo, ganiolu hi “khala vagulu nya vathu khu gu pima.” (1 Kor. 14:20) Ethu ha gu mana guti nyo khaguri tepo hi thumisago matshina nya Bhibhiliya womini gwathu. Ha gu gira isoso, hi na wona edzi Bhibhiliya yi phasago khidzo gu potsa sigaradzo ni gu hunga silo khu wugengeyi. Khyadi ngudzu gu dundrugeya khesi hi hungago. Khu giyeyedzo, wa gu ba u hevbula Bhibhiliya ni gu hongola mitshanganoni, ganiolu nu nga si hendzeledzi womi wago ga Jehovha ni gu bhabhatiswa, u nga dundrugeya khesi u nga girago gasi gu tadzisa makungo yago. Wa gu ba u bhabhatisidwe, ina u mu tshumayele nya wadi mwendro u muhevbudzi nya wadi nya mahungu nya yadi? Ina esi u hungago gu gira so yeyedza gu khiso wa gu thangedwa khu matshina nya Bhibhiliya? Ina u ngu phara vambe nga edzi Jesu a nga hadzi gu va phara khidzo? Ha gu ba hi vbweta gu vbindrugedza silo nyo khaguri, ethu hi yede gu dundrugeya gu khethu Jehovha “gihevbudzo ga oyu nyambati gilo.” — Ndzi. 19:7.

9. “Vatseketseli” va gu yeyedza kharini gu khavo va ngu bomba guti?

⁹ Tsawa nya wuvili nya vathu va bombago guti gwa Nungungulu wa gu wumbwa khu “vatseketseli.” Dzimbe dzitepo, ethu hi ngu ganeya ni vathu nya nga vovo thumoni nyo tshumayele. Avo va gu tsakiswa khu gu poyila vambe. (Ndzi. 123:4) Bhibhiliya yi ganede gu khiyo matshigoni nya gu hegise, vathu nya vangi va na khala vatseketseli. (2 Ped. 3:3, 4) Gufana ni vamwane va Loti, muhuno vathu nyo khaguri va ngu bomba gu engisa sigengedzo sa Nungungulu. (Gen. 19:14) Nya vangi va ngu gola gu hega vale va vbanyago khu matshina nya Bhibhiliya. Vatseketseli, va gu kutswa khu “gudogorela gwawe nyamba khodwa.” (Judha 7, 17, 18) Bhibhiliya ya gu tshamuseya vatseketseli vovo na vari ni mavbanyelo nya nga ya vawugeyi ni gu vambe va ngu bomba gu engisa Jehovha.

10. Kha nga si ganedwego ga Ndzimo 1:1, hi nga potsa kharini gu khala vatseketseli?

¹⁰ Hi nga potsa kharini gu khala vatseketseli? Mweyo nya ndziya nya gu giri isoso khu gu potsa gu gira wupari ni vale va gu na ni makhalelo nya vatseketseli. (Leri Ndzimo 1:1.) Isoso so thula gu mba engiseya ni gumba leri ni gevbini gi ganedwago khu vawugeyi. Hi yede gu dzi woneya gasi hi si pheye gu ngurangureya satshavbo ni gu kanakaneya Jehovha ni sileletelo hi ningwago khu hengeledzano yaye. Gasi gu potsa isoso, hi nga dzi wudzisa gu khethu: ‘Ina nyi ngu khaleya gu solasola tepo nyi hakhago sileletelo nya siphya ni mapwisiselo nya maphya? Ina nyi ngu solasola ava va hi thangeyago? Tepo hi dzegeyago gu ema gu gira silo soso Jehovha a na hi tsakeya. — Mav. 3:34, 35.

11. “Sipumbu” sa gu wona kharini milayo nya mavbanyelo ya Jehovha?

¹¹ Tsawa nya wuraru nya ava va bombago guti “sipumbu.” Avo sipumbu kholu va gu bomba gu vbanya khu milayo nya mavbanyelo ya Nungungulu. Avo va gu gira esi va si wonago na siri sadi mahoni gwawe. (Mav. 12:15) Avo va gu bomba Jehovha oyu a gu gifefe nya guti. (Ndzi. 53:1) Tepo hi mananago ni vathu vovo thumoni nyo tshumayele, avo dzitepo nya dzingi va gu hi wugeya kholu hi ningago githawo milayo nya Bhibhiliya. Ganiolu, avo va mwalo gilo nya gyadi gasi gu ningeya. Bhibhiliya ya gu ganeya gu khiyo: “Gipumbu kha gi maneli avbo gu guromo guti litshigu nya gulamudwe gi na tandrega ni gutula likana.” (Mav. 24:7) Sipumbu si mwalo wusingalagadzi nya wadi gasi gu ningeya. Khu kharato, Jehovha a gu hi gengedza gasi hi si “hengeli ni muthu nya guvivbedwe khu monyo.” — Mav. 14:7.

12. Ginani gi nga hi phasago gu mba fana ni sipumbu?

¹² Ethu kha hi dzini gu fana ni vale va vengago milayo ya Nungungulu. Wulangani nya isoso, ethu a gu hevbula gu haladza edzi Nungungulu a pimisago khidzo gupata ni milayo. Ethu hi nga tiyisa lihaladzo lathu khu gu hambanisa mihandro nya gu engise ni eyi ya ava nya mba engisa. Wona sigaradzo esi vathu va dzi vangeyago khu gu bomba gu engisa wusingalagadzi nya guti gwa Jehovha. Wona edzi womi wago wu gu tshukwana khidzo kholu u engisago Nungungulu. — Ndzi. 32:8, 10.

13. Ina Jehovha a ngu hi gurumedza gu engisa wusingalagadzi waye nya guti?

¹³ Jehovha a ngu ninga guti waye vathu vatshavbo, ganiolu uye kha gurumedzi muthu gu gu dzumeya. Ganiolu, Uye a ngu ganeya khesi si giregeyago vathu va gu mba engisa guti waye. (Mav. 1:29-32) Avo va hathago gu mba engisa Jehovha “va na hodza handro nya mithumo yawe.” Wulangani nya isoso, avo va napwa guvbisa nya gukhongolo ni ngu tshaniseka khu kotani nya edzi va vbanyago khidzo nigu khu gu hegisa Jehovha a na va fuviswa. Ganiolu, vale va engisago milayo nya guti ya Jehovha ni gu thumisa esi yi ganeyago, avo va ngu tumbiswa gupwani: “Uye a nyi yingisago, a na vbanya gurulani na tiyide nyambana hwanga, a si thavi gilo.” — Mav. 1:33.

GUTI NYA LISINE GU NGU HI PHASA

14-15. Ginani hi gi hevbulago avba nya libhuku la Mavingu 4:23?

¹⁴ Tepo hi thumisago guti gwa Nungungulu, ethu tepo yatshavbo a gu wuyedwa. Kha nga hi si wonidego, Jehovha a ngu hi ninga wusingalagadzi wu gu na ni guti. Khu giyeyedzo, umo nya libhuku la Mavingu, Jehovha a ngu hi ninga wusingalagadzi nya wadi wu na hi phasago tepo yatshavbo gu tshukwadzisa womi wathu ha gu wu thumisa. Olu hongoleni hi wona 4 siyeyedzo nya wusingalagadzi wu gu na ni guti.

¹⁵ Vhikeya monyo wago nya gu fananise. Bhibhiliya ya gu ganeya gu khiyo: “Guvbindra silo satshavbo, vegedza monyo wago, kholu khumo gu guromo guvbanya gwago.” (Mav. 4:23) Dundrugeya khu satshavbo hi yedego gu gira gasi gu vhikeya monyo vathu. Ethu hi yede gu hodza guhodza nya gwadi, hi gira mihagano nya gu tiyise givili, hi bwe hi potsa mavbanyelo nya gu vivbe. Khu ndziya nyo fane, ethu hi nga gira gilo nyo khaguri gasi gu vhikeya monyo wathu nya gu fananise. Hi nga hevbula Lito la Nungungulu tshigu ni tshigu, hi dzi dongiseya gasi gu hongola mitshanganoni ni gu patega mitshanganoni. Ethu ho simama ni sighingi khu gu gira thumo nyo tshumayele tepo yatshavbo. Nigu ethu ha gu potsa mavbanyelo nya gu vivbe khu gu hi simama gu potsa silo si na ghohago mapimo yathu, nya nga gu wona sivbungadzo nya mba handzega ni gu gira dzipari nya mba dzadi.

16. Khu ginani libhuku la Mavingu 23:4, 5 li hi phasago muhuno?

¹⁶ Tsaka khesi u gu naso. Bhibhiliya yi ngu hi ninga wusingalagadzi wowu: “U nga dzi garadzi khu gu vbweta gu ghanya . . . U nga vegi maho yago ga thomba u si yeligo gu yi mana, kholu iyo yi na mana mambapi kha nga lighama, yi vbuvba yiya damboni.” (Mav. 23:4, 5) Si nga vbevbugeya vathu gu luza dzitsapawu ni dzithomba dzawe. Ganiolu, nya vangi va ghanyidego ni sisiwana va ngu dzi garadzeya gu mana dzitsapawu. Khiso si va girago dzitepo nya dzingi va gira silo si vegago mhangoni wuzundzo wawe, wupari wawe ni womi wawe. (Mav. 28:20; 1 Thim. 6:9, 10) Vbavbandzi nya isoso, guti gu ngu hi phasa gu manega ni mawonelo nya yadi khu dzitsapawu. Nigu isoso si ngu hi phasa gu mba khala vathu nya makolo, ganiolu hi tsaka khesi hi gu naso.— Muh. 7:12.

17. Kha nga gu khumbugidwego omu ga Mavingu 12:18, hi nga mana kharini “lidimi la va nya guti”?

¹⁷ Pimisa nu si ganeye. Ha gu mba dzi woneya hi nga vanga gigaradzo khu malito yathu. Bhibhiliya yo ganeya gu khiyo: “Vomo va dusago magana nya gupaye kha nga litshari, aholu lidimi la va nya guti, la gu ninga womi.” (Mav. 12:18) Ethu hi nga andrisa gurula tepo hi potsago gulemba vambe. (Mav. 20:19) Ha gu ba hi vbweta gu khethu malito yathu ma thaveleya vathu nigu ma si va payi, ethu tepo yatshavbo hi yede gu leri ni gu dundrugeya khu Lito la Nungungulu. (Luka 6:45) Tepo hi dundrugeyago khesi Bhibhiliya yi ganeyago malito yathu ma nga fana ni “gifefe nya guti” ma thaveleyago vambe. — Mav. 18:4.

18. Gu thumisa esi si gomogo ga Mavingu 24:6 si nga hi phasa kharini thumoni nyo tshumayele?

¹⁸ Engisa sileletelo nya hengeledzano ya Jehovha. Bhibhiliya yi ngu hi ninga wusingalagadzi wowu nya gu phase: “Kholu u na wusa nyimbi khu wugengeli nya wusingalagadzi, u mana hure khu gu bani nuri ni vasingalagadzi nya vangi.” (Mav. 24:6) Livhesi leli li nga hi phasa kharini gu khala vatshumayele ni vahevbudzi nya vadi? Vbavbandze nya gu thumise mawonelo yathu gasi gu tshumayela ni gu hevbudza, ethu ha gu zama gu landrisa mawonelo hi ningwago. Ethu hi ngu ningwa sileletelo omu nya mitshangano yathu nya Wukristo ni gu hevbula khedzi vambe va hevbudzago khidzo Bhibhiliya. Khu gu engedzeya, hengeledzano ya Jehovha yi ngu hi ninga dziferameta, a gu mabhuku ni dzivhidhiyu edzi dzi nga phasago vathu gu pwisisa Bhibhiliya. Ina u ngu hevbuleya gu thumisa dziferameta dzodzo?

19. Wa gu wu wona kharini wusingalagadzi Jehovha a hi ningago? (Mavingu 3:13-18)

¹⁹ Leri Mavingu 3:13-18. Ethu hi ngu bonga ngudzu khu wusingalagadzi hi wu manago umo nya Lito la Nungungulu. Hi di hadzi vbanya kharini nari khatsi hi di gu mwalo wusingalagadzi nya Bhibhiliya? Avba nya ndrima yeyi, ethu hi wonide siyeyedzo nyo khaguri nya wusingalagadzi nya wadi hi nga wu manago umo nya libhuku la Mavingu. Khu lisine, Bhibhiliya yatshavbo yi tade khu wusingalagadzi nya guti wa Jehovha. Ethu hi yede gu thumisa wusingalagadzi waye womini gwathu. Vathu nya vangi kha va ninge lisima guti gwa Nungungulu, ganiolu ethu hi ngu tiyisega gu khethu ‘vale va manago [guti] va kategide vatshavbo va gu sayisago.’