Tiyisa gukhodwa gwago avba nya gitumbiso gya Jehovha gi ganeyago khu mafu nya maphya

1-2. Ginani hi yedego gu gira na hi ngo vireya mafu nya maphya?

ETHU hi ngu ninga ngudzu lisima gitumbiso gya Jehovha nyo fuvise litigo leli nyo hini a hi ninga litigo nya liphya. (2 Ped. 3:13) Ambari olu hi gu mba dziti gu khethu lini si na giregago isoso, esi hi si wonago na si gu dugeleya muhuno watshigu so yeyedza gu khiso si mwalo hwindzo gasi Jehovha a tadzisa gitumbiso gyaye. — Mat. 24:32-34, 36; Mith. 1:7.

² Gani hi na ni tepo nyo laphe na hi gu tumeya Jehovha, hatshavbo hi yede gu simama gu tiyisa gukhodwa gwathu avbo nya gitumbiso gegi. Khu ginani? Kholu ambari ha gu ba hiri ni gukhodwa nyo tiye gu nga vbola. Khiso si giridego mupostoli Pawulo a ganeya gu khuye: Gu mba na gukhodwa “gighoho gi hi namarelago khu tshivba.” (Hebh. 12:1) Gasi gu gukhodwa gwathu gu si vboli, ethu tshigu ni tshigu hi yede gu dundrugeya gwadi khesi si yeyedzago gu khiso mafu nya maphya momo vbafuvbi. — Hebh. 11:1.

3. Ginani hi na bhulago khigyo avba nya ndrima yeyi?

³ Avba nya ndrima yeyi, hi na bhula khu dzindziya dziraru hi nga dzi thumisago gasi gu tiyisa gukhodwa gwathu ga gitumbiso gya Jehovha nya mafu nya maphya: 1) gu dundrugeya khu dzegiso, 2) gu dundrugeya khu tshivba eyi Jehovha a gu nayo, nigu nya 3) gu gira silo si na gu phasago gu hidzimeya ga Jehovha. Khu gu landreya, hi na wona esi Jehovha a embedego Habhakuka si tiyisago khidzo gukhodwa gwathu muhuno. Gupheya, hi na wona siemo nyo khaguri adzina hi tshanganago naso muhuno si lomgago gu hi tiyisa gukhodwa gwathu avbo nya gitumbiso nya mafu nya maphya ma ngo gutago.

SIEMO SI LOMBAGO GU HI MANEGA NI GUKHODWA NYO TIYE

4. Silo muni hi yedego gu hunga si lombago na hiri ni gukhodwa nyo tiye?

⁴ Tshigu ni tshigu, si ngu lomba na hiri ni gukhodwa nyo tiye gasi gu hunga silo nyo khaguri. Khu giyeyedzo, tepo hi hungago silo si patago dzipari, sivbungadzo, sihevbulo, gu tshadha, sanana ni thumo nyo dzi vbanyise. Hi na ba hi gira gwadi a gu dzi wudzisa gu khethu: ‘Ina esi nyi hathago gu gira sa gu yeyedza gu khiso eni nyi gu tiyisega gu kheni litigo leli nyo hine lomo vbafuvbi ni gu fuviswa, nigu Nungungulu a hi ninga mafu nya maphya? Mwendro nya gu gira esi si girwago khu vale va gu mba khodwa gu khavo va na tshuka va vbanya kala gupindruga?’ (Mat. 6:19, 20; Luka 12:16-21) Ethu hi na si kodza gu hunga makungu nya yadi ha gu tiyisa gukhodwa gwathu avba nya gu khethu mafu nya maphya momo vbafuvbi.

5-6. Khu ginani hi yedego gu manega ni gukhodwa no tiye tepo hi tshanganago ni sigaradzo? Tshamuseya.

⁵ Ethu gambe hi ngu tshangana ni sigaradzo si lombago na hiri ni gukhodwa nyo tiye gasi gu si timiseya. Adzina hi ngu emisana ni gu wugedwa, madwali nya makhongolo mwendro simbe silo si nga hi vbedzago tshivba. Gupheyani adzina saye hi nga si kodza gu timiseya sigaradzo sathu. Ganiolu, sigaradzo nya nga esi si ngu oloveya gu dzega tepo nyo laphe. Khu kharato, hi yede gu tiyisa gukhodwa gwathu gasi hi timiseya hi bwe hi thumeya Jehovha na hi tsakide. — Rom. 12:12; 1 Ped. 1:6, 7.

⁶ Tepo hi tshanganago ni sigaradzo, adzina hi ga pimisa gu khethu mafu nya maphya gima kha ma na nga vboha. Ina isoso so thula gu khiso gukhodwa gwathu kha gwa tiya? Khu lisine ahihi. Wona giyeyedzo gegi. Yo ba yi khade tepo nya yingi nya mbawa ndzadzi adzina hi nga pimisa gu khethu gima kha yi na ngawa gambe, ganiolu iyo khu mahegiso yi nguwa. Khu ndziya nyo fane, ha gu ba hi tshangana ni sigaradzo ethu adzina hi nga pimisa gu khethu mafu nya maphya gima kha ma na nga vboha. Abari gu gukhodwa gwathu gu tiyide, ethu hi na tiyisega gu khethu situmbiso sa Nungungulu si na tadzisega. (Ndzi. 94:3, 14, 15; Hebh. 6:17-19) Ha gu ba hi tiyisega khu gitumbiso gegi, hi na simama gu thangisa wukhozeyi wa Jehovha womini gwathu.

7. Mhango muni hi yedego gu yi potsa?

⁷ Ethu gambe hi yede gu manega ni gukhodwa nyo tiye gasi gu gira thumo nyo tshumayele. Vathu nya vangi kha va khodwe ga “mahungu yaya nya yadi” ya Nungungulu ma ganeyago khu guta nya mafu nya maphya. (Mat. 24:14; Ezek. 33:32) Ethu hi yede gu dzi woneya gasi hi si kanakaneyi esi Jehovha a hi hevbudzago kha nga edzi va girago khidzo vathu nya vangi. Gasi gu dzi woneya ga mhango yeyi, hi yede gu simama gu tiyisa gukhodwa gwathu. Hongoleni hi wona dzindziya dziraru dzi nga hi phasago gu gira isoso.

DUNDRUGEYA KHU DZEGISO

8-9. Gu dundrugeya khu dzegiso si nga tiyisa kharini gukhodwa gwathu?

⁸ Mweyo nya dzindziya hi nga tiyisa khiyo gukhodwa gwathu khu gu hi dundrugeya khu dzegiso. Dzegiso wa gu hi tiyisegisa gu khuwo situmbiso sa Nungungulu si na tadzisega khu lisine. Tepo hi dundrugeyago gwadi gu khethu khu ginani hi nga dzegiswa ni esi si nga patega, isoso si na hi phasa gu tiyisega gu khethu gitumbiso nya mafu nya maphya gi na tadzisega. Khu ginani hi ganeyago isoso?

⁹ Ginani gi nga patega avbo nya dzegiso? Jehovha a di rumeya gyanana gyaye nyo gigole, egi a nga ba a vbanya nagyo ndzadzini gasi gita velegwa omu mafuni kha nga muthu nyo vbeleye. Tepo a nga ba a romo mafuni, Jesu tshanganide ni sigaradzo nya singi. Uye tshanisekide ngudzu a bwe afa khu ndziya nya xapi. Khu lisine, Jehovha a livbide tengo nya wukhongolo ngudzu. Nungungulu wathu nya lihaladzo, gima na sa dzumeleya gu khuye gyanana gyaye gi tshaniseka ni gufa gasi ethu hi mana womi nya wadi, ganiolu khu tepo nyo role. (Joh. 3:16; 1 Ped. 1:18, 19) Khu kotani nya olu a nga ningeya gyanana gyaye gasi gu hi phasa, Uye a na gira satshavbo a si kodzago gasi hi vbanya mafuni nya maphya kala gupindruga.

DUNDRUGEYA KHU TSHIVBA EYI JEHOVHA A GU NAYO

10. Guya khu Vaefeso 3:20, Jehovha a na ni tshivba nyo giri ginani?

¹⁰ Ndziya nya wuvili nyo tiyise gukhodwa gwathu khu gu dundrugeya khu tshivba ya Jehovha. Uye a na ni tshiva nyo tadzise satshavbo a si tumbisago. Vathu nya vangi muhuno, kha va khodwe gu khavo si ngu kodzega gu vbanya mafuni nya maphya kala gupindruga. Ganiolu, Jehovha dzitepo nya dzingi a ngu tumbisa silo nya singi esi vathu va gu ba si kodza gu si tadzisa. Uye a ngu si kodza gu gira isoso, kholu Nungungulu nya tshivba yatshavbo. (Joba 42:2; Marko 10:27) Khu kharato, kha hi hlamadziswe tepo a hi tumbisago silo soso nyo tsakise. — Leri Vaefeso 3:20.

11. Ninga giyeyedzo nya gitumbiso gimwegyo nyo hlamadzise. (Wona kwadru yi gu khiyo: “Situmbiso nyo khaguri nyo hlamadzise si tadzesigidego.”)

¹¹ Wona silo nyo khaguri esi Jehovha a tumbisedego vathu vaye gale si nga ba si wonega gu khatsi kha si na nga girega. Uye a di embeya Abrahama ni Sara gu khuye va di hadzi gu velega gyanana ga tanga va nga vari ga iyo. (Gen. 17:15-17) Embede gambe Abrahama gu khuye situgulwana saye si di hadzi gu vbanya Khanani. Khu myaga nya yingi, situgulwana sa Abrahama si diri dzigumbi Egipito. Khu kharato, gitumbiso gile Jehovha a embedego Abrahama gi di wonega gu khatsi gima kha gi na nga tadzisega. Ganiolu igyo gi tadzisegide. Khu gu landreya, Jehovha a ganede gu khuye Elizabheti a nga ba a dandride gu tanga a di hadzi gu velega gyanana. Jehovha a embede gambe Mariya gu khuye a di hadzi gu velega gyanana gyaye, a gu gitumbiso a ganedego thembweni ga Edheni likhumi mazana myaga hwane. — Gen. 3:15.

12. Libhuku la Josuwa 23:14 ni Isaya 55:10, 11, ma gu hi tiyisegisa ginani maningano ni tshivba ya Jehovha?

¹² Tepo hi dundrugeyago khu satshavbo situmbiso esi Jehovha a si tadzisidego ni edzi a nga si tadzisa khidzo, ho pwisisa gu khethu Uye a na ni tshivba nya yikhongolo. Khu kharato, gukhodwa hi gu nago avbo nya gitumbiso gi ganeyago khu mafu nya maphya gu na engedzeya gu tiya. (Leri Josuwa 23:14; Isaya 55:10, 11.) Nigu isoso si na hi dongiseya gasi gu phasa vambe gu pwisisa gu khavo gitumbiso gi ganeyago khu mafu nya maphya khadri loro. Jehovha a ganede khu ndzadzi nya yiphya ni mafu nya maphya. Uye a di khuye: “Magana yaya ma tumbegide, gambe khya lisine.” — Gutu. 21:1, 5.

GIRA SILO SI NA GU PHASAGO GU HIDZIMEYA VBAFUVBI GA JEHOVHA

13. Mitshangano nya libandla yi nga tiyisa kharini gukhodwa gwathu? Tshamuseya.

¹³ Ndziya nya wuraru hi nga yi thumisago gasi gu tiyisa gukhodwa gwathu khu gu vbedza tepo na hi gu gira silo sa liphuvboni. Khu giyeyedzo, nga dundrugeya khedzi u wuyedwago khidzo khu mitshangano yathu nya libandla. Ana, a giridego mithumo nya yingi thumoni ga Jehovha khu myaga nya yingi wari khuye: “Mitshangano yi ngu nyi phasa gu simama gu tiyisa gukhodwa gwangu. Abari gu muvegi nya ganelo khandri muhevbudzi nya wadi mwendro avbo nya ganelo yaye kha khumbugi silo nya siphya, dzitepo nya dzingi eni nyi ngu engiseya silo si na nyi phasago gu pwisisa gwadi Bhibhiliya, nigu isoso si ngu tiyisa gukhodwa gwangu.”b Nya mba kanakana, ethu hi ngu phaswa gambe khu mihlamulo yi ningedwago khu vandriyathu mitshanganoni. — Rom. 1:11, 12; 10:17.

14. Thumo nyo tshumayele wo tiyisa kharini gukhodwa gwathu?

¹⁴ Ethu gambe hi nga tiyisa gukhodwa gwathu tepo hi pategago thumoni nyo tshumayele. (Hebh. 10:23) Barbara a thumedego Jehovha khu 70 myaga wari khuye: “Eni tepo yatshavbo nyi di gu dziti gu kheni gu tshumayela si ngu tiyisa gukhodwa gwangu. Tepo yatshavbo nyi bhuleyago vambe khu situmbiso nyo hlamadzise sa Jehovha, gukhodwa gwangu gwa gu engedzeya gu tiya.”

15. Gu gira gihevbulo nya muthu enga gu nga tiyisa kharini gukhodwa gwathu? (Wona dzifotu.)

¹⁵ Gimbe gilo gi nga phasago gasi gu tiyisa gukhodwa gwathu gu gira gihevbulo nya muthu enga. Susan wari khuye igyo gi mu phasago khu gu gira longoloko nya gihevbulo. Uye wari khuye: “Khu Dhomingu, nya gu dongiseya gihevbulo nya Mukhedziseyi hi na hevbulago ga semana yi landreyago. Nigu khu Muvhulo ni Mavili nya gu dongiseya mitshangano ya vbakari nya semana. Ga mambe matshigu nya gu gira gihevbulo nya muthu enga.” Khu kotani nya olu uye tepo yatshavbo a landrisago longoloko waye nya gihevbulo, Susan a ngu simama gu tiyisa gukhodwa gwaye. Irene a thumidego khu myaga nya yingi Tsindza gwathu nya mafu yatshavbo, wari khuye a tiyiside gukhodwa gwaye khu gu hevbula giprofeto nya Bhibhiliya. Uye wari khuye: “Eni nyi ngu hlamadziswa khedzi siprofeto sa Jehovha si tadzisegago khidzo.”c

SITUMBISO SA JEHOVHA SI NA TADZISEGA

16. Esi Jehovha a embedego Habhakuka sa gu hi phasa kharini muhuno? (Vahebheru 10:36, 37)

¹⁶ Simbe sithumi nyo tumbege sa Jehovha si ngu vireya mahegiso nya litigo leli khu tepo nyo laphe. Vambe vathu vo pimisa gu khavo mahegiso ma ngu hweya ngudzu gu vboha. Ganiolu, Jehovha a ngu dziti edzi sithumi saye si dzipwago khidzo. Uye a tiyisegiside muprofeti Habhakuka gu khuye: “Giwoniso gi na vbedza gikhati nya gukari, gya gu ganela khu matshigu nya guhegise, gima kha gi na lipha; ambari gya gu hwela, gi lindrele, kholu gi nata, kha gi na hwela.” (Habh. 2:3) Ina esi Nungungulu a embedego Habhakuka si di gu phasa uye basi? Mwendro si ngu hi phasa nethu muhuno? Jehovha leletede mupostoli Pawulo gu embeya makristo ma nga ba ma vireya mafu nya maphya malito yaya. (Leri Vahebheru 10:36, 37.) Khu kharato, hi nga tiyisega gu khethu gitumbiso gya Jehovha nyo vbulugise sithumi saye gi na tadzisega ambari gyo dzega tepo nyo laphe, nigu “ambari gya gu hwela, gi lindrele. Kholu kha gi na hwela.”

17. Louise a thumiside kharini wusingalagadzi owu Jehovha a ningidego Habhakuka?

¹⁷ Khu myaga nya yingi, sithumi nya singi sa Jehovha si ngu thumisa wusingalagadzi wu ganeyago khu gu ‘simama gu virela.’ Khu giyeyedzo, Louise a phedego gu thumeya Jehovha khu 1939 wari khuye: “Ga tepo yoyo, eni nyi di gu pimisa gu kheni Harimagedhoni yi di hadzi gi vboha na nyi nga si vbedzi gu hevbula primária. Ganiolu, khandriso si nga girega. Gu leri matimo nya Bhibhiliya ma ganeyago khu vathu va nga vireya gu tadzisega nya situmbiso sa Jehovha, si nyi phaside gu vireya Jehovha a tadzisa situmbiso saye. Nyi hevbude khu Nowa, Abrahama, Josefa ni vambe vathu va nga vireya khu tepo nyo laphe gasi Jehovha a tadzisa situmbiso saye. Gu khodwa gu khethu situmbiso sa Jehovha si na tadzisega, si phaside eni ni vambe vathu gu tiyisega gu khethu mafu nya maphya momo vbafuvbi.” Nya vangi va nga thumeya Jehovha khu tepo nyo laphe va ngu dzumeya isoso.

18. Gu khedziseya sivangwa gu nga tiyisa kharini gukhodwa gwathu avbo nya gitumbiso nya mafu nya maphya?

¹⁸ Lisine gu mafu nya maphya ma nga si gu vbohi. Ganiolu, dundrugeya khu silo nya nga dzinyeledzi, misimbo, sirengo ni vathu. Mwalo ni moyo a nga hadzi gu kanakana gu khuye silo sesi somo, ambari olu si nga ba siri mwalo gale. Olu silo soso somo, kholu Jehovha khuye a si vangidego. (Gen. 1:1, 26, 27) Nungungulu wathu a hi tumbiside gu khuye a na hi ninga mafu nya maphya, nigu uye a tadzisa gitumbiso gyogyo. Mafuni nya maphya vathu va na dzi buza khu womi nya mba vbeya. Ethu hi nga tiyisega gu khethu mafu nya maphya ma na vboha khu tepo eyi Nungungulu a yi emisidego. — Isa. 65:17; Gutu. 21:3, 4.

19. U nga tiyisa kharini gukhodwa gwago?

¹⁹ Na ma si gu vbohi mafu nya maphya, gira satshavbo u si khodzago gasi gu tiyisa gukhodwa gwago. Dundrugeya khu tshivba eyi Jehovha a gu nayo. Gira silo si na gu phasago gu hidzimeya vbafuvbi gwaye. Tepo u girago isoso, u na ba uri ni “vale va khodwago, va timiselago gasi va fela gu hakha esi va tumbisidwego khu Nungungulu.” — Hebh. 6:11, 12; Rom. 5:5.