“Khalani valandrisi nya mahungu”

1-2. Ginani gi girago sithumi sa Nungungulu si tsaka? (Jakobe 1:22-25)

JEHOVHA ni Gyanana gyaye nyo golege, vo vbweta gu khavo ethu hi tsaka. Mulovi nya Ndzimo 119:2 a lovide gu khuye: “Va kategide avo va girago guhaladza gwaye, avo va mu vbwetago khu monyo wawe watshavbo.” Jesu tumbiside gu khuye: “Va ngu tsaka vale va pwago lito la Nungungulu va li landrisa!” — Luka 11:28.

² Kha nga vakhozeyi va Jehovha hi vathu va tsakidego. Khu ginani? Ethu hi na ni sighelo nya singi, ganiolu egi nya lisima ngudzu khu gu ha gu leri Lito la Nungungulu tshigu ni tshigu hi bwe hi dzi garadzeya gasi gu thumisa esi hi si hevbulago. — Leri Jakobe 1:22-25.

3. Ha gu wuyedwa kharini khu gu thumisa esi hi si lerigo umo nya Lito la Nungungulu?

³ Gu na ni dzindziya nya dzingi hi wuyedwago khidzo khu gu khala “valandrisi nya mahungu.” Khu giyeyedzo, tepo hi thumisago esi hi si hevbulago umo nya Lito la Nungungulu, ethu ho tsakisa Jehovha nigu anethu ho tsaka. (Muh. 12:13) Tepo hi thumisago esi hi si hevbulago umo nya Lito la Nungungulu, ho tshukwadzisa womi wathu kha nga ndranga ni gu manega ni wupari nyo tiye ni vandriyathu. Khu lisine, isoso si yeyedzide gu khiso lisine womini gwago. Gu diga isoso, ethu gambe ha gu potsa sigaradzo si manwago khu vale va gu mba engisa milayo ya Jehovha. Khu lisine, ethu hi ngu dzumeleyana ni esi Pfhumu Dhavhidhe a ganedego hwane nya gu ba a khumbugide nayo, sileletelo ni gu lamula ga Jehovha omu nya dzindzimo. Uye a di hegisa khu gu ganeya gu khuye: “Oyu a ma landrisago, a na mana tshatshazelo.” — Ndzi. 19:7-11.

4. Khu ginani si ngu mba vbevbuga tepo yatshavbo gu thumisa esi hi lerigo umo nya Lito la Nungungulu?

⁴ Khu lisine, kha si vbevbugi gu leri ni gu thumisa esi hi si hevbulago umo nya Lito la Nungungulu. Ambari hi gu na ni silo nya singi womini gwathu, hi yede gu dzi ninga tepo gasi gu leri ni gu hevbula Bhibhiliya, khiso si na hi phasago gu pwisisa esi Jehovha a vbwetago gu khuye hi gira. Khu kharato, olu hongoleni hi wona mawonelo nyo khaguri ma nga hi phasago gu leri Bhibhiliya tshigu ni tshigu. Hi na wona gambe esi si na hi phasago gu dundrugeya khesi hi lerigo ni dzindziya dzi na hi phasago gu thumisa esi hi hevbulago womini gwathu.

DZI VEGEYE TEPO GASI U HEVBULA LITO LA NUNGUNGULU

5. Silo muni si hi girago hi khala na hi pharegide?

⁵ Sithumi nya singi sa Jehovha si ngu khala na si pharegide womini gwaso. Ha gu vbedza tepo nya yingi na hi gu gira mithumo nya lisima ngudzu. Khu giyeyedzo, nya vangi gwathu va ngu gira mithumo nya gu dzi vbanyisi gasi gu dzi sayisa avo vamune ni gu sayisa dzindranga dzawe. (1 Thim. 5:8) Makristo nya mangi ma ngu khathaleya valongo vawe va dwalago mwendro va dandridego khu tanga. Nigu hatshavbo hi yede gu khathaleya womi wathu a gu gilo gi dzegago tepo. Gu diga mithumo yoyo, hi na ni mithumo libandlani. Mowo nya thumo nya lisima hi yedego gu gira, gu tshumayela mahungu nya yadi. Ga yatshavbo mithumo hi yedego gu yi gira, hi nga yi mana kharini tepo nya gu leri Bhibhiliya tshigu ni tshigu, hi dundrugeya khesi hi lerigo ni gu thumisa esi hi si hevbudego?

6. U nga hevbula kharini Bhibhiliya tshigu ni tshigu? (Wona fotu.)

⁶ Gu hevbula Bhibhiliya gilo “nya lisima ngudzu” ga yatshavbo Makristo. Khu kharato, hi yede gu gu thangisa. (Filp. 1:10) Bhibhiliya na yi gu ganeya khu muthu a tsakago, ndzimo nya gu pheye yari khiyo: “Gutsaka gwaye [gomo] nayoni wa Pfhumu Nungungulu, a wu alakanyela wutshigu ni mihani.” (Ndzi. 1:1, 2) Khu lisine, isoso sa gu thula gu khiso hi yede gu vbedza tepo nyo khaguri na hi gu leri Bhibhiliya. Khu yevbini tepo nya yadi gasi gu hevbula Bhibhiliya? Moyo ni moyo wathu a nga dzi hatheya tepo yaye, ganiolu esi si gu na ni lisima gu hatha tepo yi na hi phasago gu leri Bhibhiliya tshigu ni tshigu. Ndriyathu moyo nyo pwani khu Victor wari, khuye: “Nyi ngu gola ngudzu gu leri Bhibhiliya vbadzimindrutuno. Ambari olu si nyi garadzeyago gu wuga dzimindrudzile, eyi tepo nya yadi gasi nyi si tsolopetedwi khu gilo. Si ngu nyi vbevbugeya gu vega gupima.” Ina esi si ngu gu giregeya? Dzi wudzise gu khuye: ‘Khu yevbini tepo nya yadi gwangu gasi gu hevbula Bhibhiliya?’

DUNDRUGEYA KHESI U LERIGO

7-8. Ginani gi nga hi himbedzeyago gu mba wuyedwa khesi hi si hevbulago? Tshamuseya.

⁷ Tepo u vegago ora gasi gu leri Bhibhiliya, gyomo gimbe u yedego gu gi vegeya gupima. Ina u di nga leri libhuku nyo khaguri u bwe u si si kodzi gu dundruga esi u si leridego? Isoso si nga dugeleya ni wevbini muthu. Nya mba tsakisa, khu gu isoso si nga hi giregeya tepo hi hevbulago Bhibhiliya. Adzina saye hi nga dzi vegeya misuwo nya gu leri sipimo nyo khaguri nya Bhibhiliya tshigu ni tshigu. Isoso si ngu zundzega. Hi yede gu dzi vegeya misuwo hi bwe hi dzi garadzeya gu yi vboheya. (1 Kor. 9:26) Ganiolu, hi yede gu gira nya singi guvbindra gu leri Bhibhiliya basi ha gu ba hi vbweta gu wuyedwa khesi hi hevbulago.

⁸ Dundrugeya khu giyeyedzo gegi: Misimbo yi ngu vbweta mati gasi yi vbanya. Ganiolu, ya guwa ndzadzi nya yingi khu tepo nya yidugwana mafu ma nga tala khu mati, sa gu girega isoso ndzadzi kha yi na nga phasa gilo. Mafu ma gu vbweta tepo gasi gu ndrindra mati nya ndzadzi, a gu iso si na phasago misimbo gu dandra. Khu ndziya nyo fane, kha hi yeli gu leri Bhibhiliya khu gu vbiredza, iso si thulago gu khiso kha hi yeli gu leri Bhibhiliya hi bwe hi si si kodzi gu dundruga mwendro gu thumisa esi hi si hevbudego.— Jak. 1:24.

9. Ginani hi yedego gu gira ha gu tugula gu khethu hi ngu leri Bhibhiliya khu gu vbiredza?

⁹ Ina u di nga tugula ga giemo nyo khaguri gu khuwe wo leri Bhibhiliya khu gu vbiredza? Ginani u yedego gu gira? Leri vbadugwana-vbadugwana, dzi garadzeyi gu dundrugeya khesi u hevbudego mwendro esi u hevbulago. Isoso kha si na nga gu garadzeya. Tepo u hevbulago, u nga hunga gu vbedza tepo nya yingi gasi u si kodza gu dundrugeya. Mwendro u nga hatha gu leri mavhesi nya madugwana gasi u tshaledwa khu tepo nya gu dundrugeyi khesi u nga leri. Victor hi mu khumbugidego gupheyani wari, khuye: “Avbo nya gihevbulo gyangu nya Bhibhiliya, eni nya gu leri gipimo gimwego khu litshigu. Khu kotani nya olu nyi lerigo Bhibhiliya vbadzimindrutunu nyi ngu si kodza gu dundrugeya khesi nyi si hevbudego litshigu latshavbo.” Na yi si khathadzisegi ndziya u yi thumisago, si na ni lisima gu u leri nya mba vbiredza gasi u si kodza gu dundrugeya khesi u si hevbulago. — Ndzi. 119:97; wona kwadru yi gu khiyo: “Siwudziso hi yedego gu dzi gira.”

10. Ninga giyeyedzo nya edzi hi nga thumisago khidzo esi hi lerigo. (1 Vatesalonika 5:17, 18)

¹⁰ Nya mba khathadzisega edzi u lerigo khidzo Bhibhiliya mwendro tepo u yi vbedzago na wu gu yi leri, vbwetedzeya dzindziya nya gu thumise esi u si lerigo. Tepo u lerigo gipandre nyo khaguri umo nya Lito la Nungungulu dzi wudzise gu khuwe: ‘Nyi nga si thumisa kharini esi nyi si hevbulago muhuno ni mindru watshigu?’ Khu giyeyedzo, dzi dundrugeye na wu gu leri 1 Vatesalonika 5:17, 18. (Leri.) Hwane nya gu ba u leride mavhesi yaya ya mavili, u nga ema u dundrugeya khu dzitepo ni edzi u gombeyago khidzo. Nigu gambe, u nga dundrugeya khesi u vbwetago gu bonga Jehovha. Adzina saye, u dzi emisede gu bonga Jehovha khu silo siraru nya gu kongome. Wa gu vbedza dzimeneti nyo khaguri na wu gu dundrugeya khu sihevbudzo nya Bhibhiliya, isoso si na gu phasa gu pwisisa Lito la Nungungulu ni gu gira esi li ganeyago. Dundrugeya khedzi u na wuyedwago khidzo khu gu hevbula Bhibhiliya khu ndziya yoyo. Khu lisine, u na khala githumi nya gyadi gya Jehovha. Ganiolu, ginani u yedego gu gira wa gu ba uri ni silo nya singi gasi gu gira?

DZI VEGEYE MISUWO U NA YI KODZAGO GU YI VBOHEYA

11. Khu ginani dzimbe dzitepo u nga dzipwago na wu gu vbede tshivba? Ninga giyeyedzo.

¹¹ Tepo u lerigo Bhibhiliya u nga vbeya tshivba dzimbe dzitepo wa gu tugula gu khuwe somo silo nya singi u yedego gu vbindrugedza womini wago. Khu giyeyedzo, dundrugeya litshigu limwedo avbo nya gu leri gwago nya Bhibhiliya u mana wusingalagadzi wu ganeyago khu gu mba yela gu yeyedza gihatheya. (Jak. 2:1-8) U wona gu khuwe u yede gu vbindrugedza edzi u pharago khidzo vambe, khu kharato u hunga gu vbindrugedza silo nyo khaguri. Isoso khyadi! Khavbovbo, ga litshigu nya wuvili u leri lowo wu tshingisago lisima nya gu woneleyi esi u ganeyago. (Jak. 3:1-12) U tugula gu khuwe dzimbe dzitepo u ngu ganeya khu ndziya nya mba yadi, khu kharato u hunga gu khuwe u na tiyisa vambe tepo u ganeyago navo. Ga litshigu nya wuraru, avbo nya gu lerwi gwago nya Bhibhiliya u gengedzwa gu mba gira wupari ni litigo. (Jak. 4:4-12) U tugula gu khuwe u yede gu dzi woneya ni esi u lerigo, u sixitirigo ni gu engiseya. Ganiolu, ga litshigu li landreyago adzina saye u na dzipwa na si gu garadzeya gu gira gwatshavbo gu vbindrugedza gogo.

12. Khu ginani u gu mba yela gu vbeya tshivba wa gu tugula gu khuwe u yede gu tshukwadzisa silo nyo khaguri? (Tshamuselo wa vbavbatshi.)

¹² Wa gu ba u vbweta gu vbindrugedza silo nyo khaguri mwendro gu si tshukwadzisa, u nga vbeyi tshivba. Isoso so yeyedza gu khiso u ngu dzi nogisa nigu u na ni gu dzi emiseya nya gwadi. Ha gu ba hiri vathu nya gu dzi nogise, hi na leri Milowo hi bwe hi dzi emiseya gu tshukwadzisa silo nyo khaguri.a Dundruga gu khuwe gasi gu ambala “muthu muphya” si ngu dzega tepo. (Kol. 3:10) Ginani gi na hi phasago gu gira esi Lito la Nungungulu li hi embeyago?

13. Khu yevbini ndziya nya yadi nya gu gire esi hi hevbudego? (Wona fotu.)

¹³ Wulangani nya gu zame gu gira satshavbo esi u lerigo khu gumogo, u nga zama gu gira gimwegyo mwendro sivili. (Mav. 11:2) Zama gu gira esi: Gira sasamedzo nya esi u vbwetago gu tshukwadzisa, khu gu landreya hatha gilo gimwegyo mwendro sivili u vbwetago gu pheya khiso gu tshukwadzisa. Simbe u si diga gasi gu si tshukwadzisa khu gu gimbiya nya tepo. U nga pheya khu hayi?

14. U nga pheya khu gu vboheya yevbini misuwo?

¹⁴ U nga hunga gu pheya khu misuwo yi na gu vbevbugeyago gu yi vboheya. Mwendro u nga hatha gu tshukwadzisa gilo gi gu na ni lisima ngudzu. Wa gu hunga egi u vbwetago gu tshukwadzisa, gira wugevisisi umo nya mabhuku yathu, adzina saye khu gu thumisa Índice das publicações da Torre de Vigia mwendro Libhuku nyo peskizari khilo nya Dzifakazi dza Jehovha. Gombeya ga Jehovha u bwe u mu lomba gasi a gu ninga “gudogoreya ni tshivba nya gu gire isoso.” (Filp. 2:13) Khavbovbo, zama gu thumisa esi u si hevbudego. Wa gu wona gu khuwe u si kodzide gu vboheya misuwo yago nya gu pheye, khu lisine isoso si na gu kutsa gu tshukwadzisa gimbe gilo. Nigu tepo u wonago gu khuwe u si kodzide gu vbindrugedza mwendro gu tshukwadzisa likhalelo nyo khaguri li vbwetegago ga Mukristo, isoso si na gu kutsa gu simama gu gira guvbindrugedza, nigu adzina saye si na gu vbevbugeya gu gira gumbe guvbindrugedza gu vbwetegago.

DZI GARADZEYE GASI GU THUMISA WUSINGALAGADZI NYA BHIBHILIYA

15. Khu ginani vathu va Nungungulu va hambanidego ni vathu nya vangi va lerigo Bhibhiliya? (1 Vatesalonika 2:13)

¹⁵ Vathu nyo khaguri va leride Bhibhiliya dzitepo nya dzingi. Ganiolu, ina avo va ngu khodwa esi Bhibhiliya yi si ganeyago? Ina avo va ngu zama gu vbanya khesi Bhibhiliya yi si hevbudzago ni gu gira guvbindrugedza womini gwawe? Ahihi, vathu nya vangi kha va landrisi wusingalagadzi nya Bhibhiliya. Ganiolu, sithumi sa Jehovha sa gu wona Bhibhiliya khu ndziya nya gu hambane. Gufana ni Makristo nya gupheye, ethu ha gu wona Bhibhiliya “kha nga edzi [yi] gu idzo, kha nga mahungu ma tago khiyo ga Nungungulu.” Gu diga isoso, ethu ha gu gira satshavbo hi si kodzago gasi gu thumisa wusingalagadzi nya Bhibhiliya womini wathu. — Leri 1 Vatesalonika 2:13.

16. Ginani gi na hi phasago gu khala valandrisi nya Mahungu?

¹⁶ Khandri tepo yatshavbo si vbevbugago gu leri ni gu thumisa esi hi hevbulago umo nya Lito la Nungungulu. Dzimbe dzitepo, si nga hi garadzeya gu mana tepo gasi gu leri Bhibhiliya. Adzina saye hi nga leri Bhibhiliya khu gu vbiredza nyo bwe hi si si kodzi gu dundruga esi hi leridego mwendro kamwe gu vbeya tshivba khu gu wona esi hi yedego gu tshukwadzisa. Ambari na wu gu tshangana ni gevbini gigaradzo, si ngu kodzega gu gi pala. Khu gu phaswa khu Jehovha u na gi pala. Hongoleni hi dzi emiseya gu dzumeya giphaso gyaye hi bwe hi khala valandrisi nya mahungu nasiri gu khala vaengiseyi basi. Nya mba kanakana, ha gu simama gu leri Lito la Nungungulu hi bwe hi li thumisa womini gwathu, hi na tsaka.— Jak. 1:25.