Ina hi ngu vega gupima avba nya sigengedzo?

1. Ginani egi Jesu a na girago nugunugu?

ETHU ho vbanya ga tepo silo si vbindrugedzago khavba ni avba. Nya mba hweya, Jesu a na lamula vathu vatshavbo va vbanyago mafuni. Jesu a tshamusede tepo yi nga hadzi gu landredwa khu gu lamudwa, khu gu ninga “giwoniso” gi nga profeta gu wuya gwaye ni gu “hegisa nya litigo leli”. (Mat. 24:3) Giprofeto gegi, gi lovidwe ga ylibhuku la Matewu gipimo 24 ni 25, Marko gipimo 13 ni Luka gipimo 21.

2. Hi yede gu vega gupima ga ginani, nigu isoso si na hi phasa kharini?

² Jesu thumiside sipimaniso siraru si hi phasago gu khala na hi dongide. Sipimaniso sesi sigengedzo avbo gwathu. A gu gipimaniso nya dzinvuta ni dziphongo, gipimaniso nya sagadzyana nya gu gengeye ni esi nya sipumbu ni gipimaniso nya dzitalenta. Sipimaniso sesi si ngu hi phasa gu pwisisa gu khethu muthu a na lamudwa guya khu mavbanyelo yaye. Avba nya ndrima yeyi, hi na bhula khu matimo yaya ni gu wona esi hi nga si hevbulago.

DZINVUTA NI DZIPHONGO

3. Lini Jesu a na lamulago vathu?

³ Jesu ganede gu khuye uye a na lamula vathu guya khedzi va na hakhago ni gu phara khidzo mahungu nya yadi. (Mat. 25:31-46) Hwane nya tshanisa nya yikhongolo, uye a na gira gulamula gogu na gu tshala vbadugwana gasi Arimagedhoni yi pheya. (Mat. 24:21) Kha nga muhavisi a hambanisago dzinvuta ga dziphongo, Jesu a na hambanisa vale va seketeyago khu gutumbega ava va nga todzwa ga vale va ngu mba gira isoso.

4. Guya khu Isaya 11:3, 4, khu ginani hi nga tiyisegago gu khethu Jesu a na lamula vathu khu gu lulama? (Wona fotu nya kapa.)

⁴ Siprofeto nya Bhibhiliya sa gu yeyedza gu khiso Jehovha hathide Jesu kha nga mulamuli, nigu Jesu a na khala mulamuli nya gululame. (Leri Isaya 11:3, 4.) Uye a na khedzisa sigiro, mavbanyelo ni esi vathu va ganeyago — gupata ni edzi va pharago khidzo vandriyathu va todzidwego. (Mat. 12:36, 37; 25:40) Jesu a na vati vale va phasidego vandriyaye va todzidwego ni thumo waye.a Mweyo nya dzindziya edzi dzinvuta dzi phasedzeyago khidzo vandriye va Kristo, khu gu va phasedzeya avba nya thumo nya gu tshumayele. Jesu a na va lamula kha nga “va nya gululama” nigu avo va na mana lithomo nyo vbanye kala gupindruga mafuni. (Mat. 25:46; Gutu. 7:16, 17) Owu tshatshazelo nya gu tsakise ngudzu! Va gu simama na va tumbegide ndrani ni hwane nya tshanisa nya yikhongolo, malina yawe ma na simama omu nya “libhuku nya womi.” — Gutu. 20:15.

5. Ginani hi gi hevbulago avba nya gipimaniso nya dzinvuta ni dziphongo, nigu khu mani a phasegago khigyo?

⁵ Khala muthu nya gutumbege ni gu lulama. Gipimaniso gya Jesu gi ganeyago khu dzinvuta ni dziphongo, gya gu ganeya ngudzu-ngudzu khava va gu na ni gutumba nyo vbanye mafuni kala gupindruga. Avo va gu yeyedza gu khavo va ngu khodwa, khu gu phasedzeya vandriye va Kristo thumoni nya gu tshumayele ni gu landrisa khu gu vbeleya sileletelo hi ningwago khu githumi nya gutumbege ni nya gugengeye gi hathidwego khu Jesu. (Mat. 24:45) Ganiolu, ava va gu na ni gutumba nya gu vbanye ndzadzini anavo va yede gu vega gupima ga gipimaniso gegi. Khu ginani? Kholu Jesu a ngu khedzisa gwadi mavbanyelo, sigiro ni maganelelo yawe. Avo navo va yede gu yeyedza gutumbega. Khu lisine, Jesu ganede khu sipimaniso sivili si gengedzago khu gu kongoma Makristo ma nga todzwa. Hi nga mana gambe sipimaniso sesi omu ga Matewu gipimo 25. Olu hi na bhula khu gipimaniso nya sagadzyana nya gugengeye ni esi nya sipumbu.

SAGADZYANA NYA GU GENGEYE NI SAGADZYANA NYA SIPUMBU

6. Sagadzyana sile nya 5 si yeyedzide khu ndziya muni gu khiso si di gu gengede? (Matewu 25:6-10)

⁶ Ga gipimaniso nya sagadzyana, Jesu ganede khu 10 sagadzyana si nga hongola si ya khinga noivhu. (Mat. 25:1-4) Iso si diri ni gutumba nya gu bangaladze noivhu festatunu nya mutshadho. Jesu tshamusede gu khuye 5 nya sagadzyana soso si di gu “gengede,” nigu esi simbe nya 5 si diri “sipumbu.” Sagadzyana nya gugengeye si di gu dongide nigu si di gu khedziseya. Iso si di dzi emisede gu vireya noivhu khu tepo nya gu laphe ambari gwa gu pfhola. Si di dongide mafura nya dzikandriya gasi si kodza gu wona vbawutshigutuno. Si di dongide gambe mambe mafura gasi gu ma thumisa ya gu tshuka noivhu yi hweya gu vboha. Khu kharato, si di gu dongide gasi gu dzikandriya dzaso dzi simama gu khondra. (Leri Matewu 25:6-10.) Tepo noivhu yi nga vboha, sagadzyana nya gu gengeye si di hongola nayo festatunu nya mutshadho. Khu ndziya nya gu fane, Makristo matodzidwego ma yeyedzago gu khayo ma dzi emisede gu vireya ni gu tumbega kala Kristo a wuya, ma na lamudwa nga vathu nya gululame ma bwe ma dzi pata ni noivhu, a gu Jesu, ga Mufumo waye wa ndzadzini.b (Gutu. 7:1-3) Ganiolu, ginani gi nga giregeya 5 sagadzyana nya sipumbu?

7. Ginani gi dugeledego 5 sagadzyana nya sipumbu, nigu khu ginani?

⁷ Gu hambana ni sagadzyana sesi nya gu gengeye, 5 sagadzyana nya sipumbu kha sa nga ba si dongide gu vireya noivhu. Dzikandriya dzaso dzi di tshimega, nigu iso si diri mwalo mambe mafura gasi gu ma thumisa. Tepo si nga tugula gu khiso noivhu yi na hweya gu vboha, iso si di hongola si ya vbweta mafura. Iso si diri mwalo tepo khiyo noivhu yi nga vboha. Khu tepo yoyo, “sagadzyana si nga ba si dongide si di beya ni noivhu festatunu nya mutshadho, lidimba li segwa.” (Mat. 25:10) Khu gu landreya, tepo sagadzyana nya sipumbu si nga wuya si ta zama gu beya, noivhu yi di ganeya gu khiyo: “Khu lisine, eni kha nyi miti.” (Mat. 25:11, 12) Sagadzyana sesi kha sa nga ba si dongide gu vireya noivhu khu tepo nya gu laphe. Avo va todzidwego va gu hevbula ginani?

8-9. Ava va todzidwego va nga hevbula ginani khu gipimaniso nya sagadzyana? (Wona fotu.)

⁸ Khala nu dongide ni gu vireya. Jesu kha ganeya gu khuye gu na manega mitsawa mivili nya ava vatodzidwego — tsawa moyo nya ava va nga donga gu vireya ni owu wa ava va nga mba donga. Vbavbandze nya isoso, uye a di gu tshamuseya esi si na giregeyago ava va todzidwego va gu mba donga gu timiseya khu gu tumbega kala mahegiso. Avo va gu mba donga, kha va na nga hakha tshatshazelo wawe. (Joh. 14:3, 4) Khu lisine, gani hi na ni gutumba nya gu vbanye ndzadzini mwendro mafuni, hatshavbo hi yede gu vega gupima avba nya gipimaniso gya Jesu nya sagadzyana nya gugengeye ni esi nya sipumbu. Moyo ni moyo wathu a yede gu simama gu vireya ni gu khala na dongide gasi gu timiseya kala mahegiso. — Mat. 24:13.

⁹ Hwane nya gu ba Jesu a tshamusede gipimaniso nya sagadzyana gasi gu tshingisa lisima nya gu khale na hi dongide ni gu vireya, Jesu ganede gambe khu gipimaniso nya dzitalenta. Gipimaniso gegi gya gu tshamuseya lisima nya thume khu sighingi ni gu gira satshavbo hi si kodzago.

DZITALENTA

10. Sithumi sivili si yeyedzide kharini gu khiso si ngu tumbega? (Matewu 25:19-23)

¹⁰ Ga gipimaniso nya dzitalenta, Jesu ganede khu sithumi sivili si nga ba si tumbegide ga mune waso ni gimwegyo gi nga mba tumbega. (Mat. 25:14-18) Sithumi sivili si yeyedzide gu khiso si ngu tumbega khu gu thuma khu gu dzigaradza gasi gu velegisa dzitsapawu dza mune waso. Na nga si endri, uye a di si ninga dzitalenta nyo khaguri, a gu dzitsapawu nya dzingi ngudzu. Sithumi sivili si nga ba si romo avba nya thumo, si di thumiside dzitsapawu khu wugengeyi. Khu wevbini handro wakone? Tepo mune waso a nga wuya, a di ta si mana na si velegiside guvili dzitsapawu si nga ningwa. Mune waso a di si zundza, nigu iso si di tsaka ni mune waso. (Leri Matewu 25:19-23.) Ganiolu, ginani gi nga giregeya githumi gile nya wuraru? Gi di thumisa kharini dzitsapawu gi nga ningwa khu muni wagyo?

11. Ginani gi nga giregeya githumi gile “nya ngara”, nigu khu ginani?

¹¹ Githumi nya wuraru gi di ningwa talenta mweyo, ganiolu igyo gi diri ‘ngara.’ Mune wagyo a di virede gu khuye gi thumisa talenta yile khu wugengeyi. Vbavbandze nya isoso, gi di yi kembeya. Tepo mune wagyo a nga wuya, igyo gi di mu ninga talenta mweyo gi nga ba giri nagyo. Githumi gile gi diri mwalo sighingi. Vbavbandze nya gu gi lomba divalelo khu kotani nya olu gi nga mba velegisa dzitsapawu dza mune wagyo, igyo gi di embeya mune wagyo gu khigyo uye “muthu nya gugaradze.” Igyo kha gya tsakedwa khu mune wagyo. Vbavbandze nya isoso, gi di dzegedwa talenta gi nga ba giri nayo gi bwe gi tutumiswa ndrangani ga mune wagyo. — Mat. 25:24, 26-30.

12. Sithumi sesi nya gutumbege sa gu emeya va mani muhuno?

¹² Sithumi sesi nya sivili nya gu tumbege sa gu emeya ava va nga todzwa. Pfhumu yawe Jesu, ya gu va kovhidhari gasi va ta ‘tsaka ni pfhumu yawe.’ Avo va na hakha tshatshazelo wawe wa ndzadzini a gu guwuswa nya gu pheye. (Mat. 25:21, 23; Gutu. 20:5b) Ganiolu, giyeyedzo nya mba gyadi nya githumi nya ngara, gya gu gengedza Makristo ma todzidwego. Khu ndziya muni?

13-14. Ava va todzidwego va gu hevbula ginani ga gipimaniso nya dzitalenta? (Wona fotu.)

¹³ Khala muthu nya sighingi. Ga gipimaniso nya dzitalenta ni gipimaniso nya sagadzyana, Jesu kha nga ba a vbweta gu ganeya gu khuye ava va todzidwego va di hadzi gu khala migara. Wulangani nya isoso, uye a di gu tshamuseya esi si na giregago va gu tshuka va si manegi ni sighingi. Va di hadzi gu mba “engedzeya gutiya guranwani ni guhathwani [gwawe]”, nigu va di hadzi gu mba dzumeledwa gu beya Mufumoni wa ndzadzini. — 2 Ped. 1:10.

¹⁴ Sipimaniso sa Jesu si ganeyago khu sagadzyana ni dzitalenta, sa gu vega guagani gu khiso Makristo yatshavbo nya gu todzwe ma yede gu khala na ma dongide ni gu vireya ma bwe ma manega ni sighingi. Ina gyomo gimbe gilo Jesu a ganedego gi gengedzago ava vatodzidwego? Ina. Hi nga mana gigengedzo gyogyo ga esi a ganedego omu ga Matewu 24:40, 41.

KHU MANI ‘A NA DZEGWAGO’

15-16. Matewu 24:40, 41 wu nga phasa kharini ava va todzidwego gu simama na va gengede?

¹⁵ Jesu na si ganeyi khu sipimaniso sesi sa siraru, a tshamusede gulamudwa nya gu hegise ga ava va todzidwego gu na yeyedzago oyu a nga dzumeledwa ni oyu a nga mba dzumeledwa. Uye ganede khu vama vavili va nga ba va thuma umo nya lithembwe ni vanyamayi vavili va nga ba va thumisa gitshindro. So wonegisa gu khatshi vatshavbo va di gu gira thumo wa moyo, ganiolu Jesu ganede gu khuye “moyo a na dzegwa, mumbe a tshidwa.” (Leri Matewu 24:40, 41.) Khu gu landreya, uye a di kutsa valandreyi vaye gu khuye: “Khalani na mu virede, kholu kha mu liti litshigu yi na tago khilo Pfhumu yanu.” (Mat. 24:42) Jesu ganede sasimweso hwane nya gu ba a tshamusede gipimaniso nya sagadzyana. (Mat. 25:13) Ina mahungu yoyo ma ngu pwanana? So wonegisa gu khatsi ina. Ava va todzidwego khu lisine ni gu tumbega ‘va na dzegwa’ khu Jesu va hongola Mufumoni wa ndzadzini. — Joh. 14:3.

¹⁶ Khala nu gengede. Ava va todzidwego va na gu mba simama na va gengede lisineni, kha va na nga dzi tshanganisa “ni sihathwa saye.” (Mat. 24:31) Khu lisine, vathu vatshavbo va Nungungulu nya mba khatadzisega gutumba va gu navo, va yede gu wona malito ya Jesu kha nga gigengedzo gasi va simama na va virede nigu tumbega.

17. Khu ginani hi gu mba yela gu garadzega tepo Jehovha a hathago muthu khu gu thumisa liphuvbo nya guage matshigoni yathu?

¹⁷ Ethu hi ngu muti gwadi Jehovha, nigu hi ngu dziti gu khethu satshavbo a girago si lulamide. Khu kharato, kha hi garadzegi tepo khiyo Jehovha a todzago muthu matshigoni yathu.c Jesu a hi dundrugiside khu sithumi si nga pheya gu thuma khu dzi 17 ora ga gipimaniso nya lithembwe nya miuvha. (Mat. 20:1-16) Ava va nga hegisa khavo gu ranwa gasi vata thuma, va di hakha gu fana ni ava va nga pheya khavo gu ranwa gasi va ta thuma. Khu ndziya nya gu fane, nya mba khatadzisega gu lini va nga todzwa, ava va todzidwego va na hakha tshatshazelo wawe wa ndzadzini, va gu simama na va tumbegide.

VEGA GUPIMA GA SIGENGEDZO

18-19. Ginani hi gi hevbudego ga sipimaniso sesi?

¹⁸ Ginani hi gi hevbudego? Vale va gu na ni gutumba nya guvbanye kala gupindruga mafuni, gipimaniso gya Jesu gi ganeyago khu dzinvuta ni dziphongo, gya gu tshamuseya lisima nya gu va simama na va tumbegide ni gu lulama mahoni ga Jehovha olu ni ga tepo tshanisa nya yi khongolo yi na pheyago. Ga tepo yoyo, Jesu a na lamula va nya gu lulama gasi va ninganedwa khu gu “hongola guvbanyani nya gupindruge.”— Mat. 25:46.

¹⁹ Hi wonide gambe sipimaniso sivili si gengedzago ava vatodzidwego. Ga gipimaniso gya Jesu nya sagadzyana nya gu gengeye ni esi nya sipumbu, 5 nya iso si yeyedzide gu khiso si diri ni guti. Iso si di gu dongide ni gu vireya gasi gu vireya noivhu ambari ya gu hweya gu vboha. Ganiolu, sagadzyana nya sipumbu kha sa nga ba si dongide. Khu kharato, noivhu kha ya dzumeya gu iso si beya avba nya festa yaye nya mutshadho. Anethu hi yede gu khala na hi dongide gasi gu vireya nya mba khatadzisega gu tepo muni si na dzegago kala Jesu ata fuvisa silo satshavbo nyo vivbe mafuni momu. Vbavbandzi nya isoso, ga gipimaniso gya Jesu nya dzitalenta hi hevbude khu sithumi sivili nya gu tumbege si nga thuma khu sighingi ni wugengeyi. Khu kotani nya olu va thumidego khu gu dzi garadza, va di tsakedwa khu pfhumu yawe. Ambari ulolo, githumi nya ngara gi di tutumiswa. Ginani hi gi hevbulago? Hi yede gu khala na hi pharegide thumoni ga Jehovha kala mahegiso. Khu gu hegisa, hi wonide edzi ava va todzidwego va yedego gu simama khidzo na va gengede gasi ‘gu dzegwa’ vaya hakha tshatshazelo wawe ndzadzini. Avo va gu vireya khu maho nya gu fuviye gasi guya ‘tshangana’ ni Jesu ndzadzini. Hwane nya nyimbi nya Arimagedhoni, avo va na khala noivha ya Jesu ga mutshadho nya Nvutana. — 2 Tes. 2:1; Gutu. 19:9.

20. Ginani egi Jehovha a na gireyago vale va vegago gupima ga sigengedzo saye?

²⁰ Ambari olu gu lamula gu yago gu hidzimeya, hi mwalo gighelo nya gu thave. Ha gu simama na hi tumbegide, Papayi wathu nya lihaladzo wa ndzadzini a na hi ninga “tshivba nya yikhongolo” gasi hi “si kodza gu vbuluga . . . ni gu ema mbeli ga Gyanana nya muthu.” (2 Kor. 4:7; Luka 21:36) Gani hi na ni gutumba nya gu vbanye ndzadzini mwendro mafuni, hi na tsakisa Papayi wathu ha gu pwisisa sigengedzo hi si manago omu nya sipimaniso sa Jesu. Khu kotani nya wuwadi wa Jehovha, malina yathu mana lowa “omu nya libhuku” nya womi. — Dhan. 12:1; Gutu. 3:5.