NDRIMA NYA GIHEVBULO 40
NDZIMO 30 Babe wangu, Nungungulu wangu ni pari
Jehovha a ngu ‘tangadzisa ava myonyo yawe yi khuvekidego’
“A ngu tangadzisa myonyo yi khuvekidego, a hungelela silondra sawe.” — NDZI. 147:3.
MAKUNGO NYA GIHEVBULO GEGI
Jehovha a ngu khathala ngudzu khava va garadzegago. Ndrima yeyi, yi na hi phasa gu wona edzi uye a hi thaveleyago khidzo ni edzi hi nga thaveleyago khidzo vambe.
1. Jehovha a gu wona kharini sithumi saye?
JEHOVHA a ngu wona satshavbo si dugeleyago sithumi saye muhuno. Uye a ngu hi wona tepo hi tsakago ni tepo hi garadzegago. (Ndzi. 37:18) Tepo Jehovha a wonago gu khuye ha gu gira satshavbo hi si kodzago gasi gu mu thumeya ambari ha gu ba hi garadzegide, uye a ngu tsaka ngudzu. Vbavbandze nya isoso, uye a gu khala na dongide gasi gu hi thaveleya ni gu hi phasa.
2. Ginani egi Jehovha a gireyago ava myonyo yawe yi garagedzidego nigu hi nga wuyedwa kharini khu isoso?
2 Ndzimo 147:3 yari khiyo Jehovha a ngu ‘hungelela silondra’ sa ava myonyo yawe yi garadzegidego. Lowo wowu wa gu tshamuseya gu khuwo Jehovha a ngu phasa vale myonyo yawe yi garadzegidego. Ganiolu, ginani hi nga girago gasi Jehovha a hi khathaleya? Wona giyeyedzo nyo khaguri. Dhogodheya a gu na ni guti nya gungi a nga phasa muthu a nga dzi bayisa gasi gu hawuluga. Gasi gu wuyedwa, oyu a nga dzi bayisa a yede gu landrisa sileletelo sa dhogodheya. Ga ndrima yeyi, hi na wona esi Jehovha a ganeyago ga vale va garadzegago, khu gu thumisa Lito laye Bhibhiliya ni gu wona edzi hi nga thumisago khidzo wusingalagadzi waye.
JEHOVHA A GU HI DUNDRUGISA GU KHUYE HI NA NI LISIMA GWAYE
3. Khu ginani vathu nyo khaguri va dzipwago na va si phasi gilo?
3 Nya mba tsakisa khu gu vathu nya vangi muhuno mafuni momu kha va haladzi vambe vathu. Kha nga handro wakone, avo va nga phara vambe khu ndziya nya mba yadi ni gu va gira va dzipwa na va si phasi gilo. Ndriyathu nyo khaguri nya nyamayi a ranwago gu pwani khu Helena wari, khuye: “Nyi dandrede ga ndranga li gu mwalo lihaladzo. Papayi wangu a diri ni maghilivindra nigu matshigu yatshavbo a di gu nyi embeya gu khuye kha nyi phase gilo.” Gufana ni Helen, adzina u di nga pharwa khu ndziya nya mba yadi khu muthu nyo khaguri, tepo yatshavbo a gu valeteya mwendro gu gu gira u dzipwa na wu si phasi gilo. Abari gu u di nga tshangana ni giemo gegi, adzina si nga gu garadzeya gu khodwa gu khuwe gu na ni muthu a gu haladzago ngudzu.
4. Guya khu Ndzimo 34:18, khu gevbini gitiyisegiso egi Jehovha a hi ningago?
4 Ambari vambe va gu phara khu ndziya nya mba yadi, u nga tiyisega gu khuwe Jehovha a ngu gu haladza nigu u na ni lisima gwaye. Uye “womo vbafuvbi ga vale myonyo yawe yi vbisegago.” (Leri Ndzimo 34:18.) Wa gu dzipwa na wu si phasi gilo, dundruga gu khuwe Jehovha a ngu wona makhalelo yago nya yadi nigu a ngu gu ndrindra gasi u hidzimeya gwaye. (Joh. 6:44) Uye dzitepo dzatshavbo dongide gu gu phasa kholu a ngu gu haladza.
5. Ethu hi nga hevbula ginani khu ndziya eyi Jesu a pharidego khiyo vathu vale va dzipwidego na va si phasi gilo?
5 Ethu hi nga hevbula edzi Jehovha a dzipwago khidzo khu gu wona giyeyedzo gya Jesu. Tepo Jesu a nga ba a romo mafuni, uye a di gu phara gwadi vale va dzi woneyago vbavbatshi khu gu va yeyedza wuwadi. (Mat. 9:9-12) Tepo nyamayi nyo khaguri a nga ba ari ni madwali nya makhongolo a nga ba a vireya gu hawuluga khu gu kuha sombo sa Jesu, Jesu a di mu tiyisa ni gu bwe a zundza gukhodwa gwaye. (Marko 5:25-34) Jesu a di gu pimedzeya makhalelo ya Papayi waye khu gu vbeleya. (Joh. 14:9) Khu kharato, tiyisega gu khuwe Jehovha a ngu wona makhalelo yago nya yadi, si patago gukhodwa gwago ni lihaladzo u gu nalo khuye.
6. Ginani hi nga girago ha gu dzi wona na hi si phasi gilo?
6 Ginani u nga girago wa gu simama gu dzipwa na wu si phasi gilo? Leri mavhesi nya Bhibhiliya ma gu tiyisegisago gu khuwe u na ni lisima ga Jehovha ni gu dundrugeya khayo.b (Ndzi. 94:19) Kha hi yeli gu dzi fananisa ni vambe, nigu kha hi yeli gu vega gupima ga esi hi gu mba si kodza gu gira. Jehovha kha vireyi gu khuye hi gira silo si gu mwalo tshivbani gwathu. (Ndzi. 103:13, 14) Wa gu ba u pharidwe khu ndziya nya mba yadi gale, khandri nandru wago. Dundruga gu khuwe Jehovha a na tsayisa ava va girago silo nya guvivbe nasiri ava va tshanisekago khu guvivba gogo. (1 Pedro 3:12) Sandra oyu a pharidwego khu ndziya nya mba yadi na ngari gyanana wari, khuye: “Eni tepo yatshavbo nyi ngu lomba Jehovha gasi a nyi phasa gu wona makhalelo nya yadi aya a ma wonago avbo gwangu.”
7. Esi si hi giregidego gale, si nga hi phasa kharini gu engedzeya gu thumeya Jehovha?
7 Dundruga gu khuwe Jehovha a nga gu thumisa gasi gu phasa vambe. Uye a gu ningide lithomo nya gu thume gumogo naye thumoni nya gu tshumayele. (1 Kor. 3:9) Khu kotani nya sigaradzo hi tshanganidego naso womini, si ngu hi vbevbugeya gu pwisisa ava va tshanisekago. Uwe u nga gira nya singi gasi gu va phasa. Helen oyu a khumbugidwego gupheyani, a hakhide giphaso nigu olu a ngu dzipwa nari ni makodzelo nya gu phase vambe. Uye wari, khuye: “Eni nyi di gu tala gu dzipwa na nyi si phasi gilo, ganiolu Jehovha a nyi yeyedzide lihaladzo laye, nigu a nyi thumiside gasi gu phasa vambe.” Nigu Helen olu a ngu tsaka khu gu thuma kha nga piyonero nya tepo yatshavbo.
JEHOVHA A GU VBWETA GU KHUYE HI DZUMEYA DIVALELO WAYE
8. Ginani egi Jehovha a hi embeyago omu ga Isaya 1:18?
8 Sithumi nyo khaguri sa Jehovha, si ngu garadzega khu kotani nya sihoso nyo khaguri si giridego na si si bhabhatiswe mwendro hwane nya gu ba si bhabhatisidwe. Ganiolu, dundruga gu khuwe Jehovha a ngu hi haladza ngudzu nigu hi ningide dzegiso gasi hi kodza gu divaledwa sighoho sathu. Nya mba kanakana, hi nga tiyisega gu khethu uye a gu vbweta gu khuye hi dzumeya giningwa gegi. Jehovha a gu hi tiyisegisa gu khuye hwanenyana nya gu ba ‘hi lulamiside mahungu yaya’c naye, uye a na hi divaleya khu gu vbeleya. (Leri Isaya 1:18.) Hi ngu bonga ngudzu kholu Nungungulu wathu nya lihaladzo Jehovha a divalago sihoso hi giridego. Khu tepo yayimweyo, uye gima kha divali silo nya sadi hi girago.— Ndzi. 103:9, 12; Hebh. 6:10.
9. Khu ginani hi gu mba yela gu vega gupima ga sihoso hi giridego gale?
9 Wa gu garadzega khu sihoso u giridego gale, gira satshavbo u si kodzago gasi gu vega gupima ga esi u girago olu ni esi u na si kodzago gu gira mindru wa tshigu. Wona giyeyedzo gya Mupostoli Pawulo. Uye a pharide Makristo khu ndziya nya mba yadi, nigu uye a dzi layide khu kotani nya isoso. Ganiolu, uye a di gu dziti gu khuye Jehovha a mu divalede. (1 Thim. 1:12-15) Ina uye a khalede gu dundrugeya khu sihoso a giridego gale? Nya mba kanakana, uye kha gira isoso. Pawulo kha vbedza tepo yaye na gu pimisa khu silo esi a giridego gasi gu ningwa githawo kha nga Mufarisi. (Filp. 3:4-8, 13-15) Gu diga isoso, Pawulo a di gu vega gupima avbo nya gu gire satshavbo a nga ba a si kodza thumoni nya gu tshumayele ni gu vega gupima ga iso a nga hadzi gu si mana mindru wa tshigu. Gu fana ni Pawulo, u mwalo makodzelo nya gu vbindrugedzi esi u giridego gale. Ganiolu, u nga dhumisa Jehovha ni gu mu tsakisa olu. Nigu u nga dundrugeya khu womi nya gu tsakise owu a gu tumbisidego.
10. Ginani hi nga girago abari gu esi hi giridego gale si kuhide vambe?
10 Adzina u nga garadzega khu kotani nya silo nya gu vivbe u giridego si nga kuha vambe. Ginani gi nga gu phasago? Gira satshavbo u si kodzago gasi gu lulamisa sigaradzo soso u bwe u lomba divalelo khesi u giridego. (2 Kor. 7:11) Lomba Jehovha gasi a phasa ava va kuhidwego khu sigiro sago. Uye a nga phasa uwe ni vale va kuhidwego khu sigiro sago gu simama gu mu thumeya ni gu wusedza gurula.
11. Ginani hi nga gi hevbulago khu giyeyedzo gya muprofeti Jona? (Wona fotu nya .)
11 Hevbula khu sihoso u giridego gale, nigu dzi emiseye gu thumiswa khu Jehovha khu ndziya a yi vbwetago khiyo. Wona giyeyedzo gya muprofeti Jona. Vbavbandzi nya gu hongole Ninivha, kha nga edzi Jehovha a nga ba a mu embede khidzo, Jona a di hongola gumbe wulanga. Jehovha kawukide Jona, nigu uye hevbude khu sihoso saye. (Jona 1:1-4, 15-17; 2:7-10) Jehovha kha ema gu thumisa Jona kha nga muprofeti. Nungungulu ningide limbe lithomo Jona nya gu hongole Ninivha, nigu ga tepo yeyi uye a di dzi emisede gu engisa. Uye kha dzumeya gu khuye sihoso a giridego gale si mu himbedzeya gu dzumeya thumo owu a ningidwego khu Jehovha. — Jona 3:1-3.
Hwane nya gu ba Muprofeti Jona a vbulugide girumbhuni nya ndzandzi nya yikhongolo, Jehovha a di mu embeya gambe gu khuye a hongola Ninivha gasi aya huweleya mahungu yaye (Wona paragrafu 11)
JEHOVHA A NGU HI NINGA LIPHUVBO LAYE NYA GUAGE GASI GU HI THAVELEYA
12. Jehovha a gu hi ninga kharini gurula tepo hi tshanganago ni sigaradzo nya sikhongolo? (Vafilipi 4:6, 7)
12 Khu gu thumisa liphuvbo laye nya guage, Jehovha a ngu hi thaveleya tepo hi tshanganago ni sigaradzo. Dundrugeya khu matshango ya Ron ni Carol. Nya mba si vireya, gyanana gyawe gi di dzi tshwedza. Avo vo ganeya gu khavo: “Hi di tshanganide ni sigaradzo nya singi, ganiolu egi gi diri gigaradzo nya gikhongolo ngudzu. Matshigu nya mangi kha ha nga ba hi si kodza gu lala, khu kharato hi di gombeya ga Jehovha nigu hi pwide gurula nya lisine gu tshamusedwago ga Vafilipi 4:6, 7.” (Leri.) Wa gu ba u garadzega khu kotani nya silo nya guvivbe si gu dugeledego, bhuleya Jehovha edzi u dzipwago khidzo nigu u nga gira isoso ni ga yevbini tepo u yi vbwetago. (Ndzi. 86:3; 88:1) Lomba liphuvbo nya guage la Jehovha khu gu phindra-phindra, uye tepo yatshavbo a na gu phasa. — Luka 11:9-13.
13. Liphuvbo nya guage li nga hi phasa kharini gu simama gu thumeya Jehovha khu gu tumbega? (Vaefeso 3:16)
13 Ina u di nga dugeledwa khu gigaradzo gi nga gu vbedza tshivba? Liphuvbo nya guage li nga gu ninga tshivba gasi u simama gu thumeya Jehovha khu gu tumbega. (Leri Vaefeso 3:16.) Wona matimo ya ndriyathu nya nyamayi a ranwago gu pwani khu Flora. Uye ni mwama waye va di gu thuma kha nga vamisionariyo tepo mwama waye a nga mba tumbega gwaye va bwe va tshula mutshadho. Uye wari, khuye: “Nyi garadzegide ngudzu khu gu mba tumbega gwaye, nigu kha nya nga ba nyi kodza gu pimisa gimbe gilo. Nyi gombede ga Jehovha gasi gu lomba liphuvbo nya guage gasi li nyi phasa gu timiseya. Jehovha a nyi ningide esi nyi nga ba nyi si vbweta gasi gu timiseya silo si nga ba si wonega gu khatshi kha si kodzegi gu si pala.” Flora a wonide edzi Nungungulu a nga mu phasa khidzo gu engedzeya gutumba gwaye, gu nga mu phasa tepo a nga ba a tshangana ni sigaradzo. Uye o ganeya gu khuye malito ma gu romo omu ga Ndzimo 119:32 mo tshamuseya gwadi edzi Jehovha a mu phasidego khidzo. Livhesi leli lari khilo: “Nyi na dzi garadza khu gu landra ndzila nya milayo yago, kholu yi ngu tadza khu gunengela.”
14. Hi nga diga kharini liphuvbo la Nungungulu li hi phasa?
14 Hwane nya gu ba u lombide Jehovha gasi a gu ninga liphuvbo laye nya guage, ginani u yedego gu gira? Gira silo si na gu phasago gu hakha gambe liphuvbo la Nungungulu, isoso sa gu pata gu manega mitshanganoni ni gu tshumayela vambe. Hevbula Lito la Jehovha tshigu ni tshigu, isoso si na gu phasa gu dundrugeya gwadi ndziya eyi Jehovha a pimisago khiyo. (Filp. 4:8, 9) Tepo u hevbulago, vega gupima ga vathu va khumbugwago umo nya Bhibhiliya va nga tshangana ni silingo nya singi ni gu dundrugeya edzi Jehovha a va phasidego khidzo gu timiseya. Sandra a khumbugidwego gupheyani a tshanganide ni siemo nya singi nyo garadze womini gwaye. Uye wari, khuye: “Matimo ya Josefa ma nyi tiyiside ngudzu. Uye kha dzumeya gu khuye gigaradzo ni gu mba lulama a nga ba a giredwa, gu vbodzisa wupari waye ni Jehovha.” — Gen. 39:21-23.
JEHOVHA A GU THUMISA VANDRIYATHU GASI GU HI THAVELEYA
15. Hi nga thaveledwa khu va mani, nigu va nga hi phasa khu ndziya muni? (Wona fotu.)
15 Tepo hi tshanisekago, vandriyathu libandlani va nga khala “gifefe nya guthaveleye nya gukhongolo.” (Kol. 4:11) Mweyo nya dzindziya Jehovha a yi thumisago gasi gu hi yeyedza gu khuye a ngu hi haladza, khu gu thumisa vandriyathu. Avo va nga hi thaveleya, va vbedza tepo nyo khaguri ni ethu ni gu engiseya tepo hi ganeyago edzi hi dzipwago khidzo. Avo va nga hi tiyisa khu gu thumisa livhesi nyo khaguri nya Bhibhiliya mwendro gu gombeya ni ethu.d (Rom. 15:4) Dzimbe dzitepo, vandriyathu va nga hi dundrugisa edzi Jehovha a pimisago khidzo ni gu isoso si ngu hi phasa gu timiseya. Vandriyathu va nga hi phasa khu dzimbe dzindziya, nya nga gu hi ninga gilo nya guhodze gasi hi dzipwa gwadi.
Dzipari nya dzadi dzi haladzago Jehovha dzi nga hi thaveleya ni gu hi seketeya (Wona paragrafu 15)
16. Ginani hi yedego gu gira gasi hi hakha giphaso gya vambe?
16 Dzimbe dzitepo, hi nga lomba vambe gasi va hi phasa. Vandriyathu va ngu hi haladza nigu va gu vbweta ngudzu gu hi phasa. (Mav. 17:17) Ganiolu, avo adzina kha va na nga dziti edzi hi dzipwago khidzo mwendro esi hi si vbwetago. (Mav. 14:10) Wa gu ba u garadzega, u nga bhuleya dzipari dzago nigu va embeyi edzi u dzipwago khidzo. U nga bhula ni lidhota limwedo mwendro mavili, ayo u dzipwago na wu tshulegide gu bhula navo. Vandriyathu nyo khaguri nya vanyamayi va dzipwide na va thaveledwe khu gu bhula ni mumbe ndriyathu nya nyamayi a vidzidwego khu liphuvboni.
17. Khu sevbini sigaradzo si nga hi himbedzeyago gu tiyiswa khu vandriyathu, nigu hi nga dwana kharini naso?
17 Vbedza tepo nya yingi ni vandriyago. Kholu wa gu ba u garadzega, si na gu garadzeya gu bhula ni vambe. Dzimbe dzitepo, vandriyago kha va na nga gu pwisisa mwendro va nga ganeya malito nya mba yadi. (Jak. 3:2) Ganiolu, u nga khale hwindzo ni vandriyago, Jehovha a nga va thumisa gasi gu gu tiyisa. Lidhota limwedo li ranwago gu pwani Gavin li gu na ni dhepresawu lari khilo: “Dzimbe dzitepo kha nyi vbweti gu ganeya mwendro gu vbedza tepo ni dzipari dzangu.” Ganiolu, Gavin a dzi garadzede gasi gu vbedza tepo ni dzipari dzaye, nigu idzo dzi mu phaside gu a dzipwa gwadi. Ndriyathu nya nyamayi a ranwago gu pwani khu Amy wari, khuye: “Khu kotani nya esi si nyi dugeledego gale, si ngu nyi garadzeya gu tumba vathu. Ganiolu, gufana ni Jehovha nyi ngu hevbuleya gu haladza ni gu tumba vandriyangu. Nyi ngu dziti gu kheni esi si ngu gira Jehovha a tsaka nigu si ngu nyi tsakisa neni.”
SITUMBISO SA JEHOVHA MANINGANO KHU WUMINDRU SI NGA HI THAVELEYA
18. Ginani hi gi vireyago mindru watshigu, nigu ginani hi nga girago olu?
18 Nya mba hweya, Jehovha a na fuvisa gwatshavbo gu garadzega ni guvbisa hi gupwago. (Gutu. 21:3, 4) Ga tepo yoyo, satshavbo silo nya guvivbe si hi dugeleyago kha hi na nga ‘si dundruga gambe.’ (Isa. 65:17) Ganiolu, ambari olu Jehovha a ngu hi khathaleya tepo hi tshanganago ni sigaradzo. Jehovha a ngu hi ninga silo nya singi gasi gu hi thaveleya ni gu hi phasa. Tiyisega gu khuwe u ngu dzumeya giphaso gyaye. Gima u nga kanakani gu khuwe Jehovha a ngu gu “khathaleya.” — 1 Ped. 5:7.
NDZIMO 7 Jehovha, tshivba yathu
a Mambe malina ma vbindrugedzidwe.
b Wona kwadru yi gu khiyo: “Jehovha a ngu gu ninga lisima.”
c Gasi ‘gu lulamisa mahungu yaya’ ni Jehovha, hi yede gu yeyedza gu khethu hi ngu dzi laya, hi mu lomba gu khethu a hi divaleya sihoso sathu hi bwe hi vbindrugedza mavbanyelo. Ha gu gira gihoso nya gikhongolo, hi yede gu vbwetedzeya giphaso gya madhota libandlani. — Jak. 5:14, 15.
d Khu giyeyedzo, wona mihungo nya mahungu yi gu khiyo: “Gugaradzega” ni “Guthaveleya” umo nya libhuku Milowo nya Bhibhiliya yi hi phasago gu vbanya kha nga Makristo.