Ha gu wuyedwa kharini khu lihaladzo la Jehovha?

1. Ginani hi nga girago gasi hi tsakisa Jehovha?

NGA DZI dundrugeya na wu ninga giningwa nyo hathege muthu nyo khaguri u mu haladzago. U di hadzi gu mba tsaka wa gu tugula gu khuwe muthu oyu u nga mu ninga giningwa kha gi thumise. Ganiolu, u di hadzi gu tsaka wa gu tugula gu khuwe oyu u nga mu ninga giningwa a ngu gi thumisa gwadi, nigu a ngu yeyedza gubonga. Giyeyedzo gegi gya gu yelana kharini ni giningwa nya dzegiso egi Jehovha a hi ningidego? Jehovha a hi ningide Gyanana gyaye gasi gu hi feya. Uye a di hadzi gu tsaka ngudzu ha gu yeyedza gubonga khu giningwa gegi nya lisima ni lihaladzo laye, li nga mu kutsa gu gira malulamiselo nya dzegiso! — Joh. 3:16; Rom. 5:7, 8.

2. Ginani hi na bhulago khigyo avba nya ndrima yeyi?

² Khu gu gimbiya nya myaga, adzina saye hi nga pheya gu mba wona dzegiso nga giningwa nya lisima ngudzu. Si di hadzi gu gira nga khatsi ho dzega giningwa gya Nungungulu hi gi vega. Ethu hi ngu tsaka khu gu ba hiri ni dzegiso, ganiolu ha gu mba ninga lisima dzegiso si di hadzi gu gira gu khatsi ho dzega giningwa egi Nungungulu a hi ningidego hi gi vega wulangani hi gu mba kodza gu gi wona. Ndrima yeyi, yi na hi phasa gu ninga lisima dzegiso. Hi na bhula khu wuyelo hi ngu nawo olu khu kotani nya dzegiso ni edzi hi na wuyedwago khidzo khuwo mindru wa tshigu. Nigu gambe, hi na bhula khedzi hi nga yeyedzago khidzo gubonga khu lihaladzo la Jehovha, ngudzu-ngudzu tepo nya Gidundrugiso ni hwane nya Gidundrugiso.

HA GU WUYEDWA KHARINI OLU KHU DZEGISO?

3. Khu yevbini mweyo nya dzindziya hi nga wuyedwago khiyo khu dzegiso olu?

³ Hatshavbo hi ngu wuyedwa khu dzegiso wa Jesu. Khu giyeyedzo, khu gu thumisa dzegiso, Jehovha a ngu divaleya sighoho sathu. Uye kha gurumedzegi gu hi divaleya, ganiolu uye a gu dzina. Muembi nya dzindzimo a di yeyedza gubonga ga Jehovha khu gu khuye: “Kholu uwe Pfhumu, u wadi u ngu tsetselela; u ngu hakha khu mandza mavili vatshavbo va gu khozelago.” — Ndzi. 86:5; 103:3, 10-13.

4. Jehovha ningede dzegiso va mani? (Luka 5:32; 1 Thimoti 1:15)

⁴ Vambe gwathu, adzina va nga dzipwa na va si fanedwi khu gu divaledwa khu Jehovha. Khu lisine, hatshavbo kha hi fanedwi. Mupostoli Pawulo a di gu pwisisa gu khuye ‘kha nga ba a yedwa gu ranwa mupostoli.’ Khu kharato, uye a di engedza gu khuye: “Nyi womo edzi nyi gu idzo muhuno khu kotani nya wuwadi nya wukhongolo ngudzu wa Nungungulu.” (1 Kor. 15:9, 10) Tepo hi dzi layago khu sighoho sathu, Jehovha a ngu hi divaleya. Khu ginani? Kha giri isoso khu gu ba si hi faneya, ganiolu kholu a hi haladzago. Wa gu dzipwa na wu phasi gilo, dundruga gu khuwe Jehovha a ningide dzegiso sighohi si dzi layidego nasiri vathu nyo vbeleye. — Leri Luka 5:32; 1 Thimoti 1:15.

5. Ina Jehovha a yede gu hi divaleya? Tshamuseya.

⁵ A mwalo muthu gwathu a yedego gu pimisa gu khuye a na ni fanelo nya gu hakhe wuhindzi wa Jehovha, ambari nari ni myaga nya yingi thumoni gwaye. Lisine gu Jehovha a ngu ninga lisima satshavbo hi mu giredego. (Hebh. 6:10) Uye a hi ningide Gyanana gyaye kha nga giningwa, nasiri gasi gu hi livba thumo hi mu giredego. Khu kharato, ha gu pimisa gu khethu hi yede gu divaledwa khu Jehovha kholu hi mu giredego silo nya singi, hi na ba hi ganeya gu khethu Jesu a difa mahala. — Fananisa ni Vagalatiya 2:21.

6. Khu ginani Pawulo a nga thuma khu gu dzigaradza thumoni ga Jehovha?

⁶ Pawulo a di gu dziti gu khuye kha nga ba a yedwa khu wuhindzi wa Nungungulu. Ganiolu, khu ginani a nga thuma khu gudzigaradza thumoni ga Jehovha? Uye giride isoso gasi gu yeyedza gu khuye a ngu bonga Jehovha khu wuwadi ni wuhindzi waye. (Efes. 3:7) Gu fana ni Pawulo, ethu hi ngu simama gu thuma khu sighingi na siri kholu hi yedwago khu wuhindzi wa Jehovha, ganiolu kholu hi yeyedzago gubonga khuwo.

7. Khu yevbini yimbe ndziya hi nga wuyedwago khiyo khu dzegiso olu? (Varoma 5:1; Jakobe 2:23)

⁷ Yimbe ndziya hi wuyedwago khu dzegiso olu, khu gu hi manega ni wupari nyo tiye ni Jehovha.a Kha nga hi si wonidego ga ndrima yi vbindridego, tepo hi nga velegwa, hi diri mwalo wupari wa vbafuvbi ni Jehovha. Ganiolu, khu kotani nya dzegiso, hi ngu dzi buza khu “gurula ga Nungungulu” nigu hi nga hidzimeya gwaye.— Leri Varoma 5:1; Jakobe 2:23.

8. Khu ginani hi yedego gu bonga Jehovha khu lithomo nyo gombeye?

⁸ Gu gombeya ga Jehovha gilo nya lisima gi kodzegago khu kotani nya wupari wa vbafuvbi hi gu nawo Naye. Jehovha khapwi basi milombelo eyi yi girwago mitshanganoni nya libandla, ganiolu a ngupwa gambe milombelo eyi moyo ni moyo wathu a yi girago nari enga. Milombelo yi ngu rudzisa myonyo yathu ni gu hi ninga gurula ga mapimoni, ganiolu milombelo kha yi hi ningi basi isoso. Iyo gambe, yi nga tiyisa wupari wathu ni Nungungulu. (Ndzi. 65:2; Jak. 4:8; 1 Joh. 5:14) Tepo a nga ba a romo mafuni, Jesu a di gu gombeya khu gu phindra-phindra kholu a di gu dziti gu khuye Jehovha a ngu mu engiseya, nigu milombelo yi di hadzi gu tiyisa wupari wawe. (Luka 5:16) Hi ngu bonga ngudzu, kholu khu kotani nya muphaso wa Jesu, hi nga khala dzipari dza vbafuvbi ni Jehovha nigu hi nga bhula naye khu nombelo!

HI NGA WUYEDWA KHARINI MINDRU WA TSHIGU KHU DZEGISO

9. Vakhozeyi nyo tumbege va Jehovha va na wuyedwa kharini khu dzegiso?

⁹ Vakhozeyi nyo tumbege va Jehovha va nga wuyedwa kharini khu dzegiso mindru wa tshigu? Jehovha a na va ninga womi nya gupindruge. Vathu nya vangi va ngu pimisa gu khavo isoso kha si na nga kodzega kholu vathu va ngufa tepo yatshavbo. Ganiolu, makungo ya Jehovha gu diri gu vathu va vbanya kala gupindruga. Nari khatsi Adhamu kha ghoha, vathu na va si pimisi gu khavo kha si kodzegi gu vbanya kala gupindruga. Ambari olu si garadzago gu dzi dundrugeya na hi vbanya kala gupindruga, hi nga khodwa gu khethu isoso si na girega kholu hi ngu dziti gu khethu Jehovha a livbide tengo nya wukhongolo ngudzu, a gu womi wa Gyanana gyaye, gasi isoso si kodzega. — Rom. 8:32.

10. Ava va todzidwego ni dzimbe dzinvuta va gu vireya ginani?

¹⁰ Ambari olu hi na wuyedwago khu womi nya mba vbeya mindru wa tshigu, Jehovha a gu vbweta gu khuye hi dundrugeya khuwo olu. Ava todzidwego va gu vireya khu maho nyo fuviye gu hongola dzandzini gasi vaya fuma mafu ni Kristo. (Gutu. 20:6) Dzimbe Dzinvuta, dza gu vireya khu maho nyo fuviye gu vbanya paradhesi mafuni, umo gu na ba guri mwalo gutshaniseka. (Gutu. 21:3, 4) Ina wa gu gira gipandre nya dzimbe dzinvuta dzi vireyago gu vbanya kala gupindruga mafuni? Tshatshazelo wowu, khandri wudugwana guvbindra womi nya gu vbanye dzandzini. Jehovha a vangide vathu gasi gu vbanya mafuni, khu kharato hi na tsaka ngudzu khu gu vbanya kala gupindruga omu mafuni.

11-12. Makategwa muni hi ma vireyago khu maho nyo fuviye gasi ma tadzisega mafuni? (Wona dzifotu.)

¹¹ Nga dundrugeya edzi womi wu na ba wuri idzo paradhesini mafuni. Kha wu na nga garadzega khu gu dwala mwendro gufa. (Isa. 25:8; 33:24) Jehovha a na gu ninga satshavbo silo nya sadi u si vbwetago. Ginani u gi dogoreyago gu gi hevbuleya? Ina u ngu dogoreya gu hevbula nya singi maningano ni sirengo? Ina u ngu dogoreya gu hevbula gu womba gilo nyo khaguri? Ina u ngu dogoreya gu hevbuleya gu dhezenyari? Nya mba kanakana, paradhesini gu na vbwetega vathu va kodzago gu dhezenyari ni gu vbaha dzinyumba. Nigu gu na vbwetega gambe vathu gasi va lima ni gu dongiseya guhodza, gu gira dziferameta ni gu yala dzijardim ni gu dzi khataleya. (Isa. 35:1; 65:21) Tepo u na vbanyago kala gupindruga, u na ba uri ni tepo nya yingi gasi gu gira satshavbo u si vbwetago.

¹² Si na tsakisa ngudzu gu hoyozeya ava va na wuswago khu gufani. (Mith. 24:15) Dundrugeya gambe edzi si na tsakisago khidzo gu hevbula nya singi khu Jehovha, khu gu hevbula silo nya singi a si vangidego. (Ndzi. 104:24; Isa. 11:9) Guvbindra satshavbo, gima kha wu na nga gira silo nyo vivbe si na vbwetegago gu u lomba divalelo, khu kharato u na si kodza gu thumeya Jehovha. U di hadzi gu luza womi u na manegago nawo paradhesini khu gu dzi buza “khu gighoho khu gitepwana?” (Hebh. 11:25) Khu lisine ahihi! Makategwa yaya khyadi ngudzu guvbindra ni gwevbini gudzigaradza hi gu girago olu. Dundruga gu khuwe, gitumbiso nya paradhesi mafuni, kha hi na nga gi wona basi kha nga gutumba gwathu, ganiolu yi na manega khu lisine nigu hi na vbanya umo tshigu ni tshigu. Isoso na si si kodzegi nari khatshi Jehovha kha hi haladza khu gu hi ninga giningwa, a gu Gyanana gyaye.

YEYEDZA GU KHUWE U NGU BONGA KHU LIHALADZO LA JEHOVHA

13. Hi nga yeyedza kharini gubonga khu lihaladzo eli Jehovha a hi yeyedzidego? (2 Vakorinto 6:1)

¹³ Hi nga yeyedza kharini gubonga khu dzegiso uwo Jehovha a hi ningidego? Khu gu hi tiyisega gu khethu gu mu thumeya gilo nya lisima ngudzu womini gwathu. (Mat. 6:33) Gu diga satshavbo, Jesu fede “vatshavbo gasi ava va vbanyago va si simami gu dzi vbanyeya vabune, ganiolu va vbanyeya wule a va fedego a bwe a wuswa.” (2 Kor. 5:15) Jehovha a hi yeyedzide wuwadi ni gu hi divaleya. Hi nga yeyedza gu khethu hi ngu bonga ni gu ninga lisima satshavbo a hi giredego khu gu hi gira satshavbo hi si kodzago gasi gu mu thumeya. — Leri 2 Vakorinto 6:1.

14. Hi nga yeyedza kharini gu khethu hi ngu tumba sileletelo sa Jehovha?

¹⁴ Hi nga yeyedza gubonga Jehovha khu lihaladzo a gu nalo khethu, khu gu tumba ni gu landrisa sileletelo saye. Khu ndziya muni? Ho ba hiri ni makungo gasi gu hunga, nya nga sihevbulo hi na girago ni thumo hi wu vbwetago, hi yede guti esi Jehovha a vbwetago gu khuye hi gira. (1 Kor. 10:31; 2 Kor. 5:7) Tepo hi yeyedzago gukhodwa gwathu khu sigiro, gyo girega gilo nyo hlamadzise ngudzu — gukhodwa gwathu ni wupari wathu ni Jehovha wa gu engedzeya gu tiya, nigu gutumba gwathu a nugo go tiya. — Rom. 5:3-5; Jak. 2:21, 22.

15. Hi nga yeyedza kharini gubonga gwathu tepo nya Gidundrugiso?

¹⁵ Yomo yimbe ndziya hi nga yeyedzago khiyo gubonga khu lihaladzo la Jehovha. Khu gu thumisa tepo nya Gidundrugiso gasi gu yeyedza Jehovha gu khethu hi ngu bonga khu dzegiso. Wulangani basi nya gu hi dzi dongiseya gasi gu manega Gidundrugisotuno, hi yede gu rana vambe gasi va ta patana ni ethu. (1 Thim. 2:4) Tshamuseya ava u na va ranago esi si na girwago Gidundrugisotuno. U nga va yeyedza dzivhidhyu dzi gu romo umo nya jw.org dzi gu khidzo Khu ginani Jesu a ngafa? ni Dundruga gufa ga Jesu. Madhota ma nga rana ava va digidego guta mitshanganoni. Nga dundrugeya khu litsako li manegago ndzadzini ni mafuni tepo nvuta ya Jehovha yi bweleyago tshambini gwaye. (Luka 15:4-7) Gidundrugisotuno, kha hi dusi tepo gasi hi losana khu gyathu basi, ganiolu hi yede gu losa a va vatago khu tepo nyo pheye mitshanganoni ni ava va gu na ni tepo nyo laphe nya mba ta mitshanganoni. Ho vbweta gu va hakha gwadi! — Rom. 12:13.

16. Khu ginani hi yedego gu gira nya singi thumoni nya gu tshumayele tepo nya Gidundrugiso?

¹⁶ U nga gira nya singi thumoni wa Jehovha teponi nya Gidundrugiso. Gu gira isoso, ndziya nya yadi gasi gu yeyedza gubonga khesi Nungungulu ni Kristo va hi giredego. Tepo hi girago silo nya singi thumoni nyo tshumayele hi na wona giphaso gya Jehovha, nigu gutumba hi gu nago khuye gu na tiya. (1 Kor. 3:9) Gu diga isoso, landra sasamedzo nya gu leri nya Bhibhiliya wu gomogo avba nya gibhukwana Gevisisa milowo tshigu ni tshigu mwendro umo nya Gibhukwana nya Mitshangano. U nga thumisa mavhesi yoyo nya Bhibhiliya kha nga projetu nya gihevbulo.

17. Ginani gi tsakisago Jehovha? (Wona kwadru yi gu khiyo “Dzindziya hi nga dzi thumisago gasi hi yeyedza gubonga khu lihaladzo la Jehovha.”)

¹⁷ Lisine gu, giemo gyago adzina saye kha gi na nga gu dzumeleya gu gira satshavbo si ganedwego avba nya ndrima yeyi. Dundruga gu khuwe, Jehovha kha fananise esi u girago ni esi vambe va girago, uye a ngu wona esi si gu romo monyoni gwago. Uye a ngu tsaka tepo a wonago gubonga gwago khu giningwa gegi nya lisima, a gu dzegiso. — 1 Sam. 16:7; Marko 12:41-44.

18. Khu ginani hi bongago Jehovha Nungungulu ni Jesu Kristo?

¹⁸ Hi ngu divaledwa sighoho sathu, gu manega ni wupari ni Jehovha ni gutumba nya gu vbanye kala gupindruga khu kotani nya dzegiso. Tepo yatshavbo, hongoleni hi yeyedza gubonga khu lihaladzo la Jehovha, li mu kutsidego gu hi ninga makategwa yatshavbo yaya. (1 Joh. 4:19) Nigu gambe hongoleni hi bonga Jesu, kholu a hi haladzago ngudzu nyo bwe a ningeya womi waye kotani yathu. — Joh. 15:13.