Simama gu gimbiya khu gukhodwa

1. Khu ginani Mupostoli Pawulo a nga ba a tsaka khu womi a wu vbanyidego?

GA TEPO nyo khaguri, Mupostoli Pawulo a di gu dziti gu khuye a di hadzi gu songwa, ganiolu uye a diri ni sighelo nya singi nya gu tsake khu womi waye. Uye a di khuye: “Nyi dwanide litunga nya ladi, nyi tutumide mapalisana kala nyi vboha mahegiso, nyi vbanyide khu gukhodwa.” (2 Thim. 4:6-8) Pawulo hungide makungo nya yadi khu gu thumisa womi waye gasi gu thumeya Jehovha, nigu a di gu tiyisega gu khuye Jehovha a di gu tsaka khuye. Anethu ha gu vbweta gu hunga makungo ni gu tsakedwa khu Nungungulu. Ganiolu, hi nga si gira kharini isoso?

2. So thula ginani gu gimbiya khu gukhodwa?

² Pawulo ganede maningano khuye ni mambe Makristo, khuye: “Kholu ethu ha gu gimbiya khu gukhodwa nasiri khu gu wona.” (2 Kor. 5:7) Pawulo a di gu vbweta khuye ginani? Omu nya Bhibhiliya, “gu gimbiya” dzimbe dzitepo sa gu thula ndziya eyi muthu a hathago gu vbanya khidzo womi waye. Vathu va gu mwalo gukhodwa ga Jehovha va gu hunga makungo ma dzi seketeyago avba nya esi va si wonago, esi va sipwago ni gu dzipwa gwawe. Ganiolu, muthu a gu na ni gukhodwa ga Jehovha a ngu dundrugeya khesi uye a si vbwetago tepo a hungago makungo. Sigiro saye sa gu yeyedza gu khiso uye a ngu tiyisega gu khuye Nungungulu a na mu tshatshazeya, nigu uye a na wuyedwa khu gu landrisa wusingalagadzi wa Jehovha hi wu manago omu nya Lito Laye. — Ndzi. 119:66; Hebh. 11:6.

3. Ha gu wuyedwa khu ginani tepo hi gimbiyago khu gukhodwa? (2 Vakorinto 4:18)

³ Lisine gu dzimbe dzitepo hi ngu hunga makungo guya khedzi hi dzipwago khidzo. Ganiolu, ha gu tumba basi esi hi si wonago ni gu sipwa tepo hi hungago makungo nya lisima, adzina saye hi nga tshangana ni sigaradzo. Khu ginani? Kholu esi hi si wonago ni gu sipwa kha si tumbegi tepo yatshavbo. Ha gu hunga makungo ma dzi seketeyago basi avba nya esi hi si wonago, gu sipwa ni edzi hi dzipwago khidzo, hi na gira silo esi Jehovha a gu mba vbweta gu khuye hi gira. (Muh. 11:9; Mat. 24:37-39) Tepo hi vbanyago khu gukhodwa gwathu, hi nga hunga makungo ma “tsakisago Pfhumu.” (Efes. 5:10) Gu landra milayo ya Nungungulu si na hi ninga gurula monyoni ni gutsaka nya lisine. (Ndzi. 16:8, 9; Isa. 48:17, 18) Ha gu simama gu gimbiya khu gukhodwa gwathu, hi na vbanya kala gupindruga. — Leri 2 Vakorinto 4:18.

4. Muthu a nga giti kharini gighelo gi mu girago a hunga makungo yaye?

⁴ Hi nga dziti kharini gu khethu ha gu gimbiya khu gukhodwa mwendro guya khesi hi si wonago? Hatshavbo hi yede gu dzi wudzisa, gu khethu: “Ginani nyi gi tumbago tepo nyi hungago makungo? Ina nya gutumba basi esi nyi si wonago mwendro nya gu tumba wusingalagadzi wa Jehovha?” Hi na wona edzi hi nga simamago khidzo gu gimbiya khu gukhodwa ga siemo siraru nya lisima: tepo hi hathago thumo, tepo hi hathago oyu hi na tshadhago naye mwendro tepo hi hakhago sileletelo nya hengeledzano. Ga siemo sesi, hi na bhula khesi hi yedego gu si dundrugeya gasi gu hunga makungo nya yadi.

TEPO U HATHAGO THUMO

5. Ginani hi yedego gu dundrugeya khigyo tepo hi hathago thumo?

⁵ Hatshavbo hi na ni gudogoreya nya gu dzi khathaleye ni gu khathaleya ndranga yathu. (Muh. 7:12; 1 Thim. 5:8) Yimbe mithumo yi ngu livba gwadi gu vbindra yimbe. Yimbe mithumo yi ngu dzumeleya gu sithumi si dzi khataleya tshigu ni tshigu si bwe si vega dzimbe dzitsapawu gasi si dzi thumisa mindru wa tshigu. Nigu yimbe mithumo ya gu dzumeleya gu sithumi si hakha dzitsapawu nya gu eneye basi gu hodzisa dzindranga dzaso. Tepo hi hathago thumo, nya mba kanakana hi ngu pimisa khu dzitsapawu hi na hakhago. Abari gu ha gu pimisa silo sesi basi, ethu ha gu hunga makungo na hi dzi seketeya avba nya esi hi si wonago.

6. Hi nga vbanya kharini khu gu khodwa tepo hi hathago thumo? (Vahebheru 13:5)

⁶ Ha gu ba hi vbanya khu gukhodwa, hi na wona edzi thumo wu nga kuhago khidzo wupari wathu ni Jehovha. Hi nga dzi wudzisa gu khethu: ‘Ina thumo wowu wu ngu tsakedwa khu Jehovha mwendro wa gu pata silo a si nyenyago?’ (Mav. 6:16-19) ‘Ina thumo wowu wu na nyi gira nyi luza mitshangano, thumo nyo tshumayele, gu hevbula Bhibhiliya nigu wu na nyi gira nyi khala hwindzo ni ndranga yangu?’ (Filp. 1:10) Abari gu hlamulo nya siwudziso soso i ina, si na ba siri wugengeyi gu mba dzumeya thumo wowo, ambari sa gu ba si garadza gu mana thumo. Kholu ha gu ba hi vbanya khu gukhodwa, hi na hunga makungo ma na yeyedzago gu hi ngu tiyisega gu khethu Jehovha a na hi ninga esi hi si vbwetago. — Mat. 6:33; leri Vahebheru 13:5.

7-8. Ndriyathu moyo a vbanyago América do Sul yeyedzide kharini gu khuye a di gu gimbiya khu gukhodwa? (Wona fotu.)

⁷ Wona edzi ndriyathu a vbanyago América do Sul nyo pwani khu Javier,a a wonidego lisima nya gu vbanye khu gukhodwa. Uye wari, khuye: “Nyi di mana thumo wu nga hadzi gu nyi ninga dzitsapawu nya dzingi guvbindra dzitsapawu nyi nga ba nyi hakha ga thumo nyi nga ba nyi gira, nigu nyi nga hadzi gu tsaka khuwo.” Ganiolu, Javier a diri ni gudogoreya nya gu thume kha nga piyonero. A ngu engedzeya gu khuye: “Nyi di hathwa gasi gu ya gira entrevhista nya thumo. Na nyi nga si hongoli nyi ya gira entrevhista, nyi di gombeya ga Jehovha gasi a nyi phasa, kholu nyi di gu dziti gu kheni a ngu siti esi si gu sadi gwangu. Nyi di gu vbweta gu engedzeya malungelo yangu thumoni nyi bwe nyi hakha dzitsapawu nya dzingi, ganiolu nyi di hadzi gu mba gira thumo wowo wa gu nyi himbedzeya gu vboheya misuwo yangu.”

⁸ Javier wari, khuye: “Tepo nyi nga ba nyi girwa entrevhista, jerenti a di nyi embeya gu khuye nyi di yede gu engedzeya dziora avba nya thumo wangu tshigu ni tshigu. Khu ndziya nya githawo, nyi di mu embeya gu kheni kha nyi na nga si kodza khu kotani nya wukhozeyi wangu.” Javier, a di hunga gu mba dzumeya thumo wule. Hwane nya dzisemana dzimbili, uye a di pheya gu thuma kha nga piyonero. Ga mwaga wule kamo, uye a di mana thumo nya gu thume dziora nyo khaguri basi. Uye wari, khuye: “Jehovha a engisede milombelo yangu nigu nyi di mana thumo wu nga nyi dzumeleya gu thuma kha nga piyonero. Nyi tsakide ngudzu khu gu ba nyi manide thumo wu nyi dzumeleyago gu engedzeya thumo wangu ga Jehovha ni gu phasa vandriyangu.”

9. Ginani hi gi hevbulago khu giyeyedzo gya Trésor?

⁹ Ginani hi yedego gu gira ha gu tugula gu khethu thumo wathu kha wu hi dzumeleyi gu gimbiya khu gukhodwa? Wona giyeyedzo gya Trésor, wa Congo. Uye wari, khuye: “Thumo wangu nya wuphya wu diri thumo nyi nga ba nyi wu vbweta gukhugeya gale. Ga thumo wangu nya wuphya nyi di gu hakha dzitsapawu dzi nga ba dzi bhanya guraru edzi nyi nga ba nyi hakha ga thumo wangu wa gale, nigu vathu va di gu nyi wona nga muthu nya lisima.” Ganiolu, Trésor a di gu luza mitshangano khu kotani nyo thume tepo yatshavbo. Uye gambe a di gu kutsedzedwa khu sithumi khwathu gu lipheya vathu gasi va si tuguli esi nyo vivbe si giregago thumoni gwawe. Trésor a di gu vbweta gu diga thumo wule, ganiolu a di gu garadzega kholu a nga hadzi gu khala nya mba na thumo. Ginani gi mu phasidego? Uye wari, khuye: “Libhuku la Habhakuka 3:17-19 li nyi phaside gu pwisisa gu kheni ambari nya gu luza thumo wangu ni dzitsapawu, Jehovha a di hadzi gu nyi khataleya, khu kharato nyi di diga thumo wule.” Uye a gu hegisa khu gu ganeya gu khuye: “Vatholi nya vangi va gu pimisa gu khavo thumo wu ningago dzitsapawu nya dzingi wu nga gira gu muthu a dzi hiya ni gevbini gilo, si patago ndranga ni mithumo ya liphuvboni. Nyi ngu tsaka khu gu ba nyi vhikede wupari wangu ni Jehovha ni ndranga yangu. Hwane nya mwaga mowo, Jehovha a nyi phaside gu mana thumo wu nga nyi phasa gu vbanya khu ndziya nya yadi ni gu gira nya singi thumoni gwaye. Ha gu thangisa Jehovha womini gwathu, dzimbe dzitepo adzina saye hi na tshangana ni gigaradzo nya dzitsapawu, ganiolu Jehovha a na hi khataleya.” Khu lisine, ha gu tumba wusingalagadzi wa Jehovha ni situmbiso saye hi na simama gu gimbiya khu gukhodwa nigu uye a na hi kategisa.

TEPO U HATHAGO MUTHU NYA GU TSHADHE NAYE

10. Silo muni nya lisima hi yedego gu dundrugeya khiso tepo hi hathago pari nyo tshadhe naye, nigu hi yede gu dzi woneya ga ginani?

¹⁰ Mutshadho giningwa gitago khiyo ga Jehovha, nigu si olovelegide gu muthu a vbweta gu tshadha. Tepo ndriyathu nya nyamayi a dundrugeyago gu tshadha ni ndriyathu nyo khaguri, a yede gu dundrugeya khedzi a nga khala khidzo, edzi a pharago khidzo vambe, edzi a wonago khidzo dzitsapawu, edzi a pharago khidzo sivbango nya ndranga yaye ni gu wona gu khuye a ngu mu gira a tsaka.b Satshavbo sesi si na ni lisima. Ganiolu, a gu vega basi gupima ga silo sesi, a na ba a hunga makungo guya khesi a si wonago.

11. Hi nga vbanya kharini khu gu khodwa tepo hi hathago pari nya wugadzi? (1 Vakorinto 7:39)

¹¹ Jehovha a ngu tsaka ngudzu tepo a wonago vandriyathu nya vanyamayi ni ava nya vama va dzi garadzago gu landrisa wusingalagadzi waye tepo va vbwetago muthu nyo tshadhe naye! Khu giyeyedzo, avo va ngu thumisa wusingalagadzi nya Bhibhiliya wu ganeyago khu gu muthu a vireya kala a vidzwa gasi gu tshadha. (1 Kor. 7:36) Avo gambe va ngu hatha muthu va vbwetago gu tshadha naye, na va gu vega gupima avba nya makhalelo aya Jehovha a ganeyago gu khuye mwama mwendro mwangadzi nya wadi a yede gu manega nawo. (Mav. 31:10-13, 26-28; Efes. 5:33; 1 Thim. 5:8) Nigu avo kha va haladzani ni vathu va gu mba thumeya Jehovha, kholu va gu landrisa wusingalagadzi wu ganeyago khu gu “tshadha Pfhumuni”, kha nga edzi a ganeyago khidzo 1 Vakorinto 7:39. (Leri.) Avo va gu simama gu gimbiya khu gukhodwa, na va gu tiyisega gu khavo Jehovha a ngu siti esi va si vbwetago guvbindra ni wevbini muthu. — Ndzi. 55:22.

12. Ha gu hevbula ginani khu giyeyedzo gya Rosa?

¹² Wona giyeyedzo gya Rosa, a gu piyonera Colombia. Mwama moyo a thumago naye a gu siri Fakazi ya Jehovha, a di pheya gu mu wudza. Rosa a di pheya gu mu gola. Uye wari, khuye: “Si di gu wonega gu khatshi muthu nya wadi. Uye a di gu phasa vathu va gipandreni gwaye, nigu si di gu wonega gu khatshi muthu nya wadi. Nyi di gu tsakiswa khedzi a nga ba a nyi phara khidzo. Uye a diri ni satshavbo nyi nga ba nyi si vbweta avba nya pari nya wugadzi, ganiolu uye a di siri Fakazi basi.” Uye a gu simama gu ganeya gu khuye: “Si nyi garadzede gu mu embeya gu kheni kha nyi gu vbweti, kholu khu monyoni nyi di gu mu vbweta. Ga tepo yoyo, eni nyi di gu dzipwa nyonga, nigu nyi di gu vbweta muthu gasi gu tshadha naye, ganiolu nyi di si mane muthu nyo tshadhe naye hengeledzanoni.” Ambari ulolo, Rosa kha vega gupima ga esi a nga ba a si wona. Uye a dundrugede khedzi makungo yaye ma nga hadzi gu kuha khidzo wupari waye ni Jehovha. Khu gu landreya, uye a di ema gu bhula ni mwama wule a bwe a simama gu pharega thumoni ga Jehovha. Hwane nya tepo nyo khaguri, uye a di ranwa gasi guya kursari Xikola nya vavhangeli nya Mufumo, nigu olu a gu thuma kha nga piyonera nyo hathege. Rosa wari, khuye: “Jehovha a nyi ningide makategwa nya mangi ma nyi girago nyi tsaka ngudzu.” Khandri tepo yatshavbo si vbevbugago gu gira esi Jehovha a si vbwetago, ngudzu-ngudzu tepo hi gu na ni gudzipwa nya gukhongolo khu gilo nyo khaguri, ganiolu tepo hi girago silo khu magirelo ya Jehovha hi ngu wuyedwa ngudzu.

TEPO U HAKHAGO SILELETELO HI NINGWAGO KHU HENGELEDZANO

13. Adzina saye hi nga dzipwa kharini tepo hi hakhago sileletelo nya hengeledzano?

¹³ Madhota, vawoneleyi nya sirkwitu, xikritoriyu ya Bheteli ni Huwo nya Guthangeye, tepo yatshavbo va ngu hi ninga sileletelo si hi phasago gu thumeya Jehovha. Ganiolu, dzimbe dzitepo adzina kha hi pwisisi gu khethu khu ginani vandriyathu va hi ningago gileletelo nyo khaguri. Ethu hi nga kanakana gu khethu gileletelo gyogyo khyadi mwendro ne. Adzina hi nga pheya gu vega gupima avba nya gu mba vbeleya ga vandriyathu va nga hi ninga gileletelo.

14. Ginani gi na hi phasago gu engisa sileletelo hi ningwago khu hengeledzano? (Vahebheru 13:17)

¹⁴ Ethu hi ngu khodwa gu khethu Jehovha a ngu thangeya hengeledzano ni gu a ngu siti siemo sathu. Kha nga handro wakone, ethu ha gu dzegeya gu engisa hi bwe hi manega ni mawonelo nya yadi. (Leri Vahebheru 13:17.) Ethu hi ngu dziti gu khethu gu engisa gwathu gu ngu phasa libandla gu manega ni wumowo. (Efes. 4:2, 3) Ethu hi ngu tumba Jehovha nigu hi ngu dziti gu khethu ambari olu vandriyathu va hi thangeyago va nga mba vbeleya, ha gu va engisa, Jehovha a na hi kategisa. (1 Sam. 15:22) Ethu hi ngu khodwa gu khethu sa gu lombega gu gileletelo nyo khaguri gi vbindrugedzwa, Jehovha a na gira gu isoso si kodzega. — Mik. 7:7.

15-16. Ginani gi phasidego ndriyathu gu engisa gileletelo ambari olu a nga ba a gi kanakaneya? (Wona fotu.)

¹⁵ Wona giyeyedzo gi tshingisago wuyelo nya gu engise sileletelo hi ningwago khu hengeledzano. Ambari olu tigoni ga Péru, gu ganedwago lidimi nya Giespanhol, vathu nya vangi va gu ganeya malimi nya mavelego. Limwedo nya malimi yoyo Giquíchua. Khu myaga nya yingi, vandriyathu va vbwetedzede vathu va ganeyago lidimi lolo gipandreni gwawe. Ganiolu, gasi gu thumisana ni esi mifumo yi si vbwetago, gu di manega gu vbindrugedza nya ndziya va nga ba va yi thumisa gasi gu vbwetedzeya khiyo vathu. (Rom. 13:1) Kha nga handro wakone, vambe va dzi wudziside gu khavo isoso kha si na nga tsolopeteya thumo gipandreni gwawe gani. Ganiolu, tepo vandriyathu va nga engisa, Jehovha a kategiside gudzigaradza gwawe gasi gu mana vathu va ganeyago Giquíchua.

¹⁶ Kevin, a gu lidhota nya libandla nya lidimi nya Giquíchua, a di gu romo vbakari nya vathu vovo va nga ba va garadzega. Uye a gu tshamuseya gu khuye: “Nyi di dzi wudzisa gu kheni: ‘Hi na va mana kharini vathu va ganeyago lidimi nya Giquíchua?’” Ginani egi Kevin a giredego? Uye wari, khuye: “Nyi di dundrugeya khu Mavingu 3:5 nyi bwe nyi dundrugeya khu Mosi. Jehovha a di mu ninga gileletelo gi nga ba gi gira gu khatshi kha gi pwali. Uye a di embeya Mosi gasi gu dzega Vaisrayeli, a duga navo khu Egipto kala ga Yiphya nya gu Fuviye, avbo gu nga ba gu gira khatshi gu mwalo wulanga nyo dugi khavbo gasi gu pfhuka va Egipto va nga ba vava landra. Ambari ulolo, uye a engiside Jehovha ni gu uye a mu kategiside khu ndziya nya gu hlamadzise.” (Ekiso. 14:1, 2, 9-11, 21, 22) Kevin a di gu dzi emisede gu dzi pwananisa ni ndziya nya gu hambane nya gu tshumayele khiyo. Khu wevbini handro wakone? Uye wari, khuye: “Nyi hlamadzisidwe khedzi Jehovha a nga hi kategisa khidzo. Gale yoyo, tepo hi nga ba hi vbwetedzeya vathu va ganeyago lidimi nya Giquíchua hi di gu gimbiya ngudzu, ganiolu hi di gu mana muthu moyo mwendro vavili basi. Olu ha gu vega gupima omu nya sipandre gu gu na ni vathu va ganeyago basi lidimi nya Giquíchua. Kha nga handro wakone, hi ngu bhula ni vathu nya vangi, hi ngu gira maendro nyo bweleleye ni gu gimbidzisa sihevbulo nya singi nya Bhibhiliya. Nigu vathu nya vangi va nguta mitshanganoni yathu.” Khu lisine, tepo hi vbanyago khu gukhodwa, Jehovha a ngu hi tshatshazeya tepo yatshavbo.

17. Ginani u gi hevbudego ga ndrima yeyi?

¹⁷ Hi wonide siemo siraru nya lisima hi nga yeyedzago khidzo gu khethu hi ngu gimbiya khu gukhodwa. Hi yede gu simama gu vbanya khu gukhodwa ga siemo satshavbo womini gwathu, nya nga sivbungadzo hi na hathago, sihevbudzo hi na girago ni edzi hi nga sayisago khidzo sanana sathu. Nya mba khatadzisega makungo hi ma hungago, hi yede gu tiyisega gu khethu makungo hi ma hungago kha ma dzi seketeyi avba nya esi hi si wonago, ganiolu ma yede gu dzi seketeya avba nya wupari wathu ni Jehovha, wusingalagadzi waye ni gitumbiso gi gu khigyo uye a na hi khataleya. Ha gu gira isoso, ethu hi na si kodza gu “landra lina la [Jehovha] Nungungulu wathu, khavbo gu si vbeligo.” — Mik. 4:5.