Thumisa Bhibhiliya kha nga libona

Mupizane Jakobe fananiside Bhibhiliya ni libona li hi phasago gu wona edzi hi gu idzo khu ndrani. (Jak. 1:22-25) Hi nga thumisa kharini Bhibhiliya kha nga libona?

Leri gwadi. Ha gu dzi khedza khu gu vbiredza avba nya libona, si nga gira gu hi si woni gilo nyo khaguri gi nga hosega avba nya sombo sathu. Khu ndziya nyo fane, ha gu leri Bhibhiliya khu gu vbiredza, si nga gira hi si si kodzi gu wona esi hi yedego gu vbindrugedza. Ganiolu, gasi gu wona esi hi yedego gu vbindrugedza, hi yede gu leri Bhibhiliya khu gwadi.

Vega gupima ga esi u yedego gu tshukwadzisa nasiri gu vega gupima ga vambe. Dzimbe dzitepo, tepo hi dzi khedzago avba nya libona iyo yi nga refletiri vambe va gomogo vbafuvbi, nigu hi nga vega gupima ga silo nya mba sadi hi si wonago gwawe. Khu ndziya nyo fane, hi nga leri Bhibhiliya hi bwe hi dundrugeya khu silo nyo khaguri vambe va yedego gu tshukwadzisa. Ganiolu, isoso kha si na nga hi phasa gu tshukwadzisa esi si vbwetegago avbo gwathu.

Ninganiseya. Ha gu dzi khedza avba nya libona hi bwe hi vega gupima ga esi hi gu mba si gola avbo gwathu, hi na vbeya tshivba. Hi yede gu ninganiseya tepo hi lerigo Lito la Nungungulu, hi si vireyi nya singi avbo gwathu guvbindra esi Jehovha a si vireyago. — Jak. 3:17.