Pimedzeya dzingilozi nyo tumbege

1-2. a) Khu gwevbini gu hambana hi gu nago ni dzingilozi? b) Ha gu fana ni dzingilozi khu ndziya muni?

TEPO Jehovha a nga gu rana gasi gu hevbula lisine, uye a di gu rana gasi guta gira gipandre nya ndranga nya vakhozeyi va gu na ni lihaladzo, nigu ndranga iyoyo ya gu pata dzimiliyoni nya dzingilozi nyo tumbege. (Dhan. 7:9, 10) Tepo hi dundrugeyago khu dzingilozi, hi nga dundrugeya khedzi dzi hambanidego khidzo ni ethu. Khu giyeyedzo, idzo dzi vangidwe myaga nya yingi hwane vathu na va si vangwi. (Joba 38:4, 7) Idzo dzi na ni tshivba guvbindra ethu. Nigu idzo dzi agide ni gu lulama ngudzu guvbindra ethu, kholu ethu hi vathu nya mba vbeleya. — Luka 9:26.

² Ambari olu hi nga hambana ni dzingilozi khu dzindziya dzodzo, ethu hi ngu fana nadzo khu ndziya nyo khaguri. Khu giyeyedzo, gu fana ni dzingilozi hi nga pimedzeya makhalelo nyo mbure ya Jehovha, hi nga dzi hungeya makungo yathu, hi na ni malina ni makhalelo nyo hambane-hambane ni mithumo nya yingi. Nigu gu fana ni dzingilozi, hi yede gu khozeya Muvangi wathu. — 1 Ped. 1:12.

3. Ginani hi nga gi hevbulago khu dzingilozi nya gutumbege?

³ Kha nga olu hi fanago ni dzingilozi khu ndziya nyo khaguri, giyeyedzo gyadzo gi nga hi tiyisa ni gu hi hevbudza silo nya singi nya lisima. Avba nya ndrima yeyi, hi na hevbula edzi hi nga pimedzeyago khidzo gudzinogisa nya dzingilozi nyo tumbege, edzi dzi haladzago khidzo vathu, gu timiseya gwadzo ni gudzigaradza gu dzi girago gasi gu agisa libandla.

DZINGILOZI DZI NGU DZI NOGISA

4. a) Dzingilozi dza gu dzinogisa khu ndziya muni? b) Khu ginani dzingilozi dzi dzi nogisago? (Ndzimo 89:7)

⁴ Dzingilozi nyo tumbege dzi ngu dzi nogisa. Ambari olu dzitigo silo nya singi, dzi gu na ni tshivba ni guti nya gungi, dzi ngu engisa sileletelo sa Jehovha. (Ndzi. 103:20) Tepo dzi girago mithumo dzi ningwago khu Jehovha, idzo kha dzi dzi khusedze khesi dzi girago mwendro gu thumisa tshivba dzi gu nadzo gasi gu dzi yeyedza. Idzo dzi ngu tsaka khu gu gira gugola ga Nungungulu ambari vathu va gu mba mati malina yadzo.a (Gen. 32:24, 29; 2 Dzipf. 19:35) Idzo kha dzi dzumeyi gu hakha wuzundzu wu yedwego gu ningwa Jehovha. Khu ginani dzingilozi dzi dzi nogisago? Kholu idzo dza gu haladza Jehovha ni gu mu ninga githawo. — Leri Ndzimo 89:7.

5. Ngilozi yi yeyedzide kharini gu dzinogisa tepo yi nga kawuka mupostoli Johane? (Wona fotu.)

⁵ Dundrugeya khu matimo ma ganeyago khu gu dzi nogisa nya dzingilozi. Khu 96 matshigoni yathu, ngilozi mweyo yi nga mba khumbugwa lina layo, yi yeyedzide silo nyo hlamadzisi mupostoli Johane. (Gutu. 1:1) Ginani egi Johane a giridego tepo a nga wona silo soso nyo hlamadzisi? Uye a di zama gu khozeya ngilozi. Ambari ulolo, ngilozi yi di dzegeya gu mu himbedzeya yi mu embeya gu khiyo: “Ne! U nga giri isoso. Eni nyi githumi nga uwe ni vandriyago . . . Khozeya Nungungulu.” (Gutu. 19:10) Nga wona gudzinogisa gogu! Ngilozi kha yi nga ba yi vbweta gu zundzwa mwendro gu khozedwa. Iyo yi di dzegeya gu embeya Johane gasi a khozeya Jehovha Nungungulu. Khu tepo yayimweyo, ngilozi kha ya nga ba yi woneya vbavbatshi Johane. Ambari olu ngilozi yi nga ba yi thumeya Jehovha khu myaga nya yingi, yi nga ba yiri ni tshivba nya yikhongolo guvbindra Johane, iyo yi dzi nogiside yi bwe yi embeya Johane gu khiyo aniyo githumi khwathu. Nigu tepo yi nga ba yi yede gu kawuka Johane, iyo kha ya gira isoso khu ndziya nya xapi. Wulangani nya isoso, yi di ganeya naye khu ndziya nya yadi. Ngilozi yi di gu dziti gu khiyo Johane a di yi khidzimeya khu kotani nya olu a nga ba a hlamadziswa khesi a nga si wona.

6. Hi nga pimedzeya kharini gu dzinogisa nya dzingilozi?

⁶ Hi nga pimedzeya kharini gudzinogisa nya dzingilozi? Anethu hi nga gira mithumo yathu nya mba vireya gu zundzwa mwendro gu vireya gu wonwa na hiri ni lisima khu kotani nya mithumo hi girago. (1 Kor. 4:7) Nigu gambe, ethu kha hi yeli gu vireya gu wonwa na hiri ni lisima guvbindra vambe khu gu ba hi thumeya Jehovha khu tepo nyo laphe mwendro khu gu ba hi khathaleya mithumo nyo khaguri. Khu lisine, khu gu ba hi gira mithumo nya yingi hengeledzanoni ya Jehovha, hi yede gu dzi wona na hiri vadugwana. (Luka 9:48) Gufana ni dzingilozi, ethu ha gu vbweta gu thumeya vambe. Ethu kha hi vbweti gu gira vathu va pimisa gu khavo hi na ni lisima guvbindra avo.

7. Hi nga yeyedza kharini gudzinogisa tepo hi ningago wusingalagadzi muthu nyo khaguri?

⁷ Hi nga yeyedza gambe gudzinogisa, tepo hi ningago wusingalagadzi muthu nyo khaguri, nya nga ndriyathu wa libandlani mwendro gyanana gyathu. Dzimbe dzitepo, hi yede gu ningeya wusingalagadzi nyo kongome. Gu fana ni ngilozi yi nga kawuka Johane khu ndziya nya yadi, anethu hi nga ningeya wusingalagadzi nyo kongome muthu nyo khaguri, ganiolu khu ndziya nya yadi. Ha gu mba dzi wona na hiri ni lisima guvbindra vambe, hi na ningeya wusingalagadzi wu seketedwago omu nya Bhibhiliya, wu yeyedzago githawo ni lihaladzo. — Kol. 4:6.

DZINGILOZI DZI NGU HALADZA VATHU

8. a) Guya khu Luka 15:10 dzingilozi dza gu yeyedza kharini gu khidzo dzi ngu haladza vathu? b) Dzingilozi dza gu hi phasa kharini thumoni nya gu tshumayele? (Wona fotu nya )

⁸ Dzingilozi kha dzi pfhurareyi vathu tepo va dugeledwago khu silo nyo khaguri mwendro gu pimisa gu khidzo avo va mwalo lisima. Wulangani nya isoso, idzo dzi ngu haladza vathu. Idzo dzi ngu tsaka tepo gighohi gi dzi layago gi bwe gi bweleya ga Jehovha mwendro tepo muthu a vbindrugedzago dzindziya dzaye a wuya lisineni. (Leri Luka 15:10.) Dzingilozi gambe dzi ngu hi phasa tepo hi tshumayelago. (Gutu. 14:6) Ambari olu dzi gu mba tshumayela khu gu kongoma, idzo dzi ngu hi phasa gu mana muthu a vbwetago gu hevbula maningano khu Jehovha. Lisine gu kha hi yeli gu ganeya khu gu tiyisega gu khethu dzingilozi dzi hi phaside gu mana muthu nyo khaguri thumoni nyo tshumayele. Kholu Jehovha a ngu thumisa dzimbe dzindziya, nya nga liphuvbo laye nyo age gasi gu phasa vathu gu muti mwendro gu phasa sithumi saye gu mana vathu va vbwetago gu hevbula khuye. (Mith. 16:6, 7) Ambari ulolo, uye a ngu thumisa dzingilozi dzaye gasi gu hi phasa tepo hi tshumayelago. Khu kharato, tepo hi tshumayelago mahungu nya yadi, hi nga tiyisega gu khethu dzingilozi dzi na hi seketeya. — Wona kwadru yi gu khiyo “Milombelo yawe yi hlamudwe.”

9. Hi nga pimedzeya kharini edzi dzingilozi dzi haladzago khidzo vathu?

⁹ Hi nga pimedzeya kharini edzi dzingilozi dzi yeyedzago khidzo lihaladzo vathu? Tepo hipwago muthu nyo khaguri na gu wuyisedwa libandlani, hi nga tsaka gufana ni dzingilozi. Hi nga tiyisegisa ndriyathu yoyo gu khethu hi ngu mu haladza nigu hi ngu tsaka gambe khu gu thumeya naye Jehovha. (Luka 15:4-7; 2 Kor. 2:6-8) Hi nga pimedzeya gambe dzingilozi, khu gu gira esi hi si kodzago thumoni nyo tshumayele. (Muh. 11:6) Nigu kha nga edzi dzingilozi dzi hi phasago thumoni nyo tshumayele, anethu hi nga vbwetedzeya dzindziya nya gu phase vandriyathu thumoni nyo tshumayele. Khu giyeyedzo, hi nga dzi ningedzeya gasi gu hongola thumoni nyo tshumayele ni muhuweleyi a gu muphya lisineni. Hi nga phasa vandriyathu va dandridego khu tanga mwendro vandriyathu va gu na ni gigaradzo nya madwali, khu gu duga navo thumo nyo tshumayele.

10. Ginani hi nga gi hevbulago khu giyeyedzo gya Sara?

¹⁰ Ganiolu, ginani hi nga girago giemo gyathu gya gu hi himbedzeya gu gira nya singi thumoni ga Jehovha? Hi nga tiyisega gu khethu dzingilozi dzi na hi phasa thumoni nyo tshumayele. Wona giyeyedzo gya ndriyathu nya nyamayi nyo pwani khu Sara,b a vbanyago Índia. Hwane nya gu ba a thumide kha nga piyonera khu 20 myaga, Sara a di dwala ngudzu nyo bwe a si si kodzi gu khuga khu vbakamani. Uye a di gu garadzega ngudzu. Ganiolu, Sara a si kodzide gu tsaka gambe khu gu phaswa khu vandriyathu va libandlani gwaye ni gu leri Bhibhiliya tshigu ni tshigu. Khu lisine, uye a si kodzide gu vbwetedzeya dzindziya gasi gu tshumayela ga giemo a nga ba ari ga igyo. Kha nga olu a nga ba a si kodzi gu khala gasi gu lova malangaliya, uye a di gu tshumayela basi khu telefoni. Khu kharato, uye a di gu gira maendro nyo bweleleye nigu sihevbuli saye si di gu mu bhuleya khu vambe va nga ba va vbweta gu hevbula Bhibhiliya. Khu wevbini handro wakone? Ndrani nya migima nyo khaguri, Sara a diri ni 70 sihevbuli nya Bhibhiliya, nigu kha nga ba a si kodza gu si khathaleya satshavbo. Khu kharato, a di gu ningeya simbe sihevbuli vambe vandriyathu libandlani. Sihevbuli nya singi sakone si ngu hongola mitshanganoni. Khu lisine, dzingilozi dzi ngu tsaka ngudzu khu gu thuma ni vandriyathu, nya nga Sara, va girago satshavbo va si kodzago thumoni nyo tshumayele.

DZINGILOZI DZI NGU TIMISEYA

11. Dzingilozi nya gutumbege dza gu yeyedza kharini gutimiseya nya gukhongolo?

¹¹ Dzingilozi nyo tumbege siyeyedzo nya sadi nya gu timiseye. Idzo dzi timisede wuvivbi ni gu mba lulama khu myaga nya yingi. Idzo dzi wonide Sathane gumogo ni dzimbe dzingilozi dzi nga ba dzi thumede Jehovha khu myaga nya yingi, na dzi gu wugeya Jehovha. (Gen. 3:1; 6:1, 2; Judha 6) Bhibhiliya ya gu ganeya khu ngilozi nyo tumbege yi nga dwana ni ngilozi nya gu vivbe khu matshigu nya mangi. (Dhan. 10:13) Gu diga isoso, gukhugeya dziteponi dza Adhamu ni Evha, dzingilozi dza gu wona vathu nya vadugwana na va gu hatha gu thumeya Jehovha. Ambari olu dzi emisanago ni satshavbo soso, dzingilozi nyo tumbege dza gu simama gu thumeya Jehovha na dzi tsakide nigu khu sighingi. Idzo dzi ngu dziti gu khidzo khu tepo yakone Jehovha a na dusa watshavbo wuvivbi.

12. Ginani gi nga hi phasago gu timiseya?

¹² Hi nga pimedzeya kharini gu timiseya nya dzingilozi? Gu fana ni dzingilozi hi ngu wona silo nya mba lulama mwendro gu wugedwa. Ganiolu, gu fana nadzo hi ngu dziti gu khethu khu tepo yakone, Jehovha a na dusa watshavbo wuvivbi. Nigu gambe gu fana ni dzingilozi nyo tumbege ethu kha hi “garali khu gu gira silo nya sadi.” (Gal. 6:9) Nigu Nungungulu a ngu hi tumbisa gu hi phasa gu timiseya. (1 Kor. 10:13) Hi nga gombeya ga Jehovha gasi a hi ninga liphuvbo laye nyo age, eli li na hi phasago gu laphisa monyo ni gu tsaka. (Gal. 5:22; Kol. 1:11) Ahati wa gu wugedwa? Tumba Jehovha khu gu vbeleya, nigu u nga thavi. Jehovha tepo yatshavbo a na gu phasa a bwe a gu ninga tshivba. — Hebh. 13:6.

DZINGILOZI DZI NGU PHASA GU AGISA LIBANDLA

13. I thumo muni nyo hathege dzi nga ningwa dzingilozi matshigoni yaya nyo hegise? (Matewu 13:47-49)

¹³ Matshigoni yaya nyo hegise, Jehovha a ningide thumo nyo hathege dzingilozi. (Leri Matewu 13:47-49.) Gu tshumayela gu ngu hi phasa gu mana dzimiliyoni nya vathu va gu na ni myonyo nya yadi. Vambe hi va manago thumoni nyo tshumayele, va ngu vbindrugedza mavbanyelo gasi gu vbanya guya khu gugola ga Nungungulu, ganiolu vambe ne. Khu kharato, dzingilozi dzi ningidwe thumo nya gu “dzita hambanisa va nya guvivba vbakari ga ava nya gu lulame.” Iso si thulago gu khiso idzo dzi di ningwa thumo nya gu agise libandla. Isoso kha si thuli gu khiso ni wevbini a nga ema guta tshangana ni ethu khu kotani nya gighelo nyo khaguri, a mwalo lithomo nya gu wuye gambe. Nigu kha si thuli gu khiso gima kha si na nga manega sigaradzo libandlani. Khu lisine, hi nga tiyisega gu khethu dzingilozi dzi ngu dzi garadza gasi dzi phasedzeya gu agisa libandla.

14-15. Hi nga pimedzeya kharini dzingilozi, nigu hi nga yeyedza kharini gu khethu hi dzi emisede gu simama gu agisa libandla? (Wona dzifotu.)

¹⁴ Hi nga pimedzeya kharini gudzigaradza gu girwago khu dzingilozi gasi gu agisa libandla? Khu gu gira gipandre gyathu gasi gu agisa libandla khu liphuvboni ni mavbanyeloni yathu. Gasi gu gira isoso, hi yede gu sayisa monyo wathu, khu gu hatha dzipari nya dzadi ni gu potsa mikutsedzelo yi na hi girago hi ghoha wupari wathu ni Jehovha. (Ndzi. 101:3) Hi nga phasa vandriyathu gu simama na va tumbegide ga Jehovha. Khu giyeyedzo, ginani hi yedego gu gira ha gu tugula gu khethu ndriyathu a giride gighoho nya gikhongolo? Khu kotani nya olu hi haladzago ndriyathu yoyo, hi na mu kutsa gasi gu ganeya ni madhota. Ndriyathu a gu mba gira isoso, ethu hi yede gu embeya madhota esi a giridego. Ethu ha gu vbweta gu khethu ndriyathu a nga vega wupari waye ni Jehovha mhangoni, a mana giphaso nya mba hweya. — Jak. 5:14, 15.

¹⁵ Nya mba tsakisa khu gu oyu a nga gira gighoho nya gikhongolo a nga duswa libandlani. Tepo si giregago isoso ethu ha gu “diga gu gira wupari” naye.c (1 Kor. 5:9-13) Malulamiselo yaya ma ngu phasa gasi hi simama gu agisa libandla. Ambari ulolo, ha gu hatha gu mba gira wupari ni oyu a dusidwego libandlani ha gu mu yeyedza wuwadi. Tepo hi tumbegago ga Jehovha hi diga gu gira wupari navo isoso si na va phasa gu gira esi si vbwetegago gasi va wuya ga Jehovha. Va gu tshuka va gira isoso, ethu hi na tsaka nigu Jehovha ni dzingilozi anavo va na tsaka. — Luka 15:7.

16. U dzi emisede gu pimedzeya dzingilozi khu ndziya muni?

¹⁶ Lithomo nya likhongolo ngudzu gu dzumeledwa khu Jehovha gu hevbula maningano khu dzingilozi ni gu thuma gumogo nadzo. Hongoleni hi pimedzeya makhalelo nya yadi ma gu nadzo, a gu: gudzinogisa, edzi va haladzago khidzo vathu, gutimiseya gwadzo ni gu dzigaradza dzi gu girago gasi gu agisa libandla. Ha gu pimedzeya dzingilozi nyo tumbege, anethu hi na gira gipandre nya ndranga nya vakhozeyi va Jehovha kala gupindruga.