Dongiseya monyo wago

Tepo hi hevbulago Bhibhiliya, ethu ha gu vbweta gu khethu esi hi hevbulago khu Jehovha si kuha monyo wathu. Hi nga hevbula khu giyeyedzo gya Ezira, oyu a ‘dongisedego monyo waye a dzi ningela gu vbweta Nayo wa Pfhumu Nungungulu.’ (Ezira 7:10) Hi nga dongiseya kharini monyo wathu?

Nombelo. Pheya khu gu gombeya na wu si hevbuli. Lomba Jehovha gasi a gu phasa gu pwisisa ni gu thumisa esi u si hevbulago. — Ndzi. 119:18, 34.

Haguleya gudzinogisa. Nungungulu a ngu siheya lisine vale va dzi khusedzago ni gu dzi tumba avo mune. (Luka 10:21) Kha hi vbweti gu hevbula basi gasi gu yeyedza vambe guti hi gu nago. Mapimo yago ma gu ba ma si gimbileyani ni gugola ga Nungungulu, khu gu dzi nogisa vbindrugedza mapimiselo yago.

Engiseya dzindzimo nya Mufumo. Dzindzimo dzi ngu kuha myonyo yathu nigu dzi ngu hi dongiseya gasi gu gira gwadi wukhozeyi wathu. Gu engiseya ndzimo nyo khaguri nya Mufumo na wu si pheyi gu hevbula si nga dongiseya monyo wago.