Phasa gihevbuli gyago nya Bhibhiliya gu hunga gu thumeya Jehovha

1-2. a) Khu ginani simbe sihevbuli nya Bhibhiliya si kanakanago gu vbanya guya khesi si si hevbulago? b) Ginani hi na gi wonago ga ndrima yeyi?

INA somo silo si nga ba si gu himbedzeya gu khala Fakazi ya Jehovha? Adzina u di gu thava gu wugedwa khu sithumi khwathu, dzipari mwendro valongo. Mwendro adzina u di gu pimisa gu khuwe u di hadzi gu mba si kodza gu engisa Jehovha ga satshavbo. Abari gu u dzipwide kharato, u ngu dziti edzi sihevbuli nyo khaguri si dzipwago khidzo nigu khu ginani si nga va garadzeyago gu hunga gu khala Dzifakazi dza Jehovha.

² Jesu a di gu dziti gu khuye silo nya nga esi si nga himbedzeya muthu gu thumeya Jehovha. (Mat. 13:20-22) Ganiolu, uye simamide gu phasa vale va nga ba va kanakana gu mu landreya. Uye yeyedzide vapizane vaye edzi va nga phasago khidzo vale si va garadzeyago gu hunga gu thumeya Jehovha khu gu 1) tugula esi si va himbedzeyago gu dandra khu liphuvboni, 2) gu engedzeya lihaladzo lawe khu Jehovha, 3) gu thangisa Jehovha womini gwawe ni 4) gu pala sigaradzo. Hi nga pimedzeya kharini edzi Jesu a nga ba a hevbudza khidzo tepo hi thumisago libhuku Vbanya nu tsakide kala gupindruga!, gasi gu phasa sihevbuli sathu nya Bhibhiliya gu hunga gu vbanya guya khesi si si hevbulago?

PHASA GIHEVBULI GYAGO NYA BHIBHILIYA GU TUGULA EGI GI GI HIMBEDZEYAGO GU DANDRA KHU LIPHUVBONI

3. Ginani adzina saye gi nga himbedzeya Nikodhemo gu khala mulandreyi wa Jesu?

³ Nikodhemo a nga ba ari ghovhernadhori nya lisima, Judha, emisanide ni gigaradzo nyo khaguri gi nga ba gi mu himbedzeya gu khala mulandreyi wa Jesu. Na gu vbindride 6 migima Jesu na phede thumo waye, khavbo Nikodhemo a nga dzumeya gu khuye Jesu a diri mu emeyi wa Nungungulu. (Joh. 3:1, 2) Ganiolu, uye a di hunga gu ya ganeya ni Jesu wutshigu ‘kholu a di gu thava Vajudha.’ (Joh. 7:13; 12:42) Adzina a di gu pimisa gu khuye a di hadzi gu luza silo nya singi a gu khala mulandreyi wa Jesu.a

4. Jesu phaside kharini Nikodhemo gu pwisisa esi Nungungulu a nga ba vbweta gu khuye a gira?

⁴ Nikodhemo a di gu wuti Nayo wa Mosi, ganiolu a di gu vbweta giphaso gasi a kodza gu pwisisa esi Jehovha a nga ba a si vbweta gwaye. Jesu mu phaside kharini? Uye a di gu dzi emisede gu ganeya ni Nikodhemo ambari olu gu nga ba guri wutshigu. Jesu a di mu embeya khu gu kongoma esi a nga ba a yede gu gira gasi a khala mulandreyi waye: dzi laye ga sighoho sago, u bhabhatiswa matini u bwe u khodwa ga Gyanana gya Nungungulu. — Joh. 3:5, 14-21.

5. Hi nga phasa kharini gihevbuli gyathu gu tugula esi gi gi himbedzeyago gu dandra khu liphuvboni?

⁵ Ambari gihevbuli nyo khaguri na gi pwisisa vbagudwana Milowo, adzina gi nga vbweta giphaso gasi gi tugula egi gi gi himbedzeyago gu dandra khu liphuvboni. Khu giyeyedzo, adzina gyo khala na gi pharegide khu kotani nya thumo wagyo mwendro adzina valongo vagyo kha va dzini gu khavo gi khala Fakazi ya Jehovha. Khu kharato, gufana ni Jesu dzi emiseye gu phasa gihevbuli gyago. Adzina u nga gi kovhidhari gita gaya gwago mwendro gu hongola phwani. Tepo u girago silo nya nga esi, adzina igyo gi nga gu bhuleya nya singi khu womi wagyo u bwe u wona sigaradzo gi emisanago naso. Kutsa gihevbuli gyago gu gira guvbindrugedza gu vbwetegago, nasiri gasi gu gu tsakisa, ganiolu gasi gu yeyedza lihaladzo lagyo khu Jehovha.

6. U nga phasa kharini gihevbuli gyago gu vbanya khesi gi si hevbulago? (1 Vakorinto 16:13)

⁶ Tepo gihevbuli nya Bhibhiliya gi khodwago gu khigyo Jehovha a na gi phasa gu vbanya guya khu gugola gwaye, igyo gyo mana tshivba nya gu thumise esi gi si hevbulago. (Leri 1 Vakorinto 16:13.) Muhevbudzi nya Bhibhiliya a ngu fana vbadugwana ni muhevbudzi nya xikola. Nga dundrugeya vbadugwana khu tepo u nga ba u hevbula xikola, muhevbudzi muni u nga ba u mu gola ngudzu? Adzina khu wule a nga gu phasa khu gulaphisa-monyo gu dzipwa gu khuwe u na si kodza gu gira gilo nyo khaguri. Khu ndziya nyo fane, muhevbudzi nya wadi nya Bhibhiliya kha hevbudzi basi esi Nungungulu a vbwetago gu khuye hi gira, ganiolu a ngu phasa gihevbuli gyaye gu khodwa gu khigyo khu gu phaswa khu Jehovha gi nga si kodza gu gira guvbindrugedza gu vbwetago womi gwagyo. Ganiolu u nga gira kharini isoso?

PHASA GIHEVBULI GYAGO GU ENGEDZEYA GU HALADZA JEHOVHA

7. Jesu phaside kharini vaengiseyi vaye gu engedzeya gu haladza Jehovha?

⁷ Jesu a di gu dziti gu khuye gu haladza Jehovha si di hadzi gu kutsa valandreyi vaye gu vbanya guya khesi va nga ba va si hevbula. Uye tepo yatshavbo a di gu hevbudza silo si nga hadzi gu phasa valandreyi vaye gu engedzeya gu haladza Jehovha. Khu giyeyedzo, uye a di fananisa Jehovha ni papayi a ningago silo nya sadi sanana saye. (Mat. 7:9-11) Vambe vaengiseyi va Jesu adzina kha va manega ni papayi a nga ba a khathala khavo. Nga dundrugeya edzi adzina saye va dzipwidego khidzo tepo Jesu a nga gira gipimaniso nya papayi a nga hakha khu mandza mavili gyanana gyaye gi nga ba gi hungide gu duga khu ndrangani. Avo va si kodzide gu pwisisa lihaladzo eli Jehovha a gu nalo khu sanana saye sa mafuni. — Luka 15:20-24.

8. U nga phasa kharini gihevbuli gyago nya Bhibhiliya gu engedzeya gu haladza Jehovha?

⁸ U nga phasa gihevbuli gyago nya Bhibhiliya gu engedzeya gu haladza Jehovha khu gu gi hevbudza makhalelo ya Nungungulu. Ndrani nya gihevbulo gyanu, gi phase gu pwananisa esi gi si hevbulago ni lihaladzo la Jehovha. Tepo mu bhulago khu dzegiso, gi phase gu pwisisa edzi wu thumago khidzo gwagyo. (Rom. 5:8; 1 Joh. 4:10) Tepo gihevbuli gi pwisisago edzi Jehovha a gi haladzago khidzo, isoso gi nga gi phasa gu engedzeya gu mu haladza. — Gal. 2:20.

9. Ginani gi nga phasa mwama nyo pwani khu Michael gu vbindrugedza womi waye?

⁹ Wona giyeyedzo gya Michael wa Indonésia. Uye dandrisidwe na liti lisine, ganiolu kha bhabhatiswa. Tepo a nga gira 18 myaga, uye a di hongola ga limbe litigo gasi aya thuma kha nga mugimbidzisi nya kamiyawu. Khu gu gimbiya nya tepo uye a di tshadha Indonésia, ganiolu a di simama gu thuma ga limbe litigo khu kharato a khala hwindzo ni mwangadzi waye ni sanana saye. Ga tepo yoyo, mwangadzi waye ni sanana saye, va di pheya gu hevbula Bhibhiliya va bwe va pheya gu dandra khu liphuvboni. Hwane nya gu ba mamayi waye a fude, Michael a di hunga gu bweleya gaya gasi guya sayisa papayi waye nigu dzumede gu hevbula Bhibhiliya. Tepo va nga ba va hevbula gipandre gi gu khigyo: “Gira wugevisisi nyo ete” avba nya gihevbulo 27 nya libhuku Vbanya nu tsakide kala gupindruga!, Michael a di kuhwa ngudzu khesi a nga ba a si hevbula. Tepo a nga dundrugeya edzi Jehovha a dzipwidego khidzo khu gu wona Gyanana gyaye na gi gu tshaniswa, isoso si mu giride a tenga marongo. Tepo a nga pwisisa gu khuye Jehovha ni Jesu va ngu mu haladza, isoso si mu giride a tsaka ngudzu a bwe a vbindrugedza womi waye a bwe a bhabhatiswa.

PHASA GIHEVBULI GYAGO GU THANGISA JEHOVHA WOMINI GWAGYO

10. Ginani Jesu a nga gira gasi gu phasa valandreyi vaye guvbindrugedza silo nyo khaguri gasi va engedzeya gu thumeya Jehovha? (Luka 5:5-11) (Wona fotu.)

¹⁰ Vambe Jesu a nga va tshumayela va di dzegeya gu tugula gu khavo uye khuye Mesiya, ganiolu a di yede gu va phasa gu pwisisa gu khavo gasi va thumeya Jehovha va di yede gu tshumayela mahungu nya yadi khu sighingi. Pedro ni Andreya va diri vapizane va Jesu khu tepo nyo laphe tepo khiyo a nga va kovhidhari gu beya thumoni nya tepo yatshavbo. (Mat. 4:18, 19) Avo va di gu gira thumo nya vagogi, adzina saye ni Jakobe ni Johane. (Marko 1:16-20) Tepo Pedro ni Andreya va nga “diga dzikhoga dzawe”, avo adzina saye va di gira malulamiselo nya gu sayise dzindranga dzawe na va gu landreya Jesu. Khu ginani va nga ba va dzi emisede gu diga thumo wawe? Matimo ma gomogo omu ga libhuku la Luka mo yeyedza gu khayo Jesu a di gira gilewugiso gasi gu va yeyedza gu khuye Jehovha a na ni makodzelo nya gu va sayise ni gu isoso si va giride va mu tumba. — Leri Luka 5:5-11.

11. Hi nga thumisa kharini matshango yathu gasi gu tiyisa gukhodwa ga gihevbuli gyathu?

¹¹ Lisine gu ethu hi mwalo makodzelo nya gu gire silewugiso gufana ni Jesu, ganiolu hi nga bhuleya vambe matshango nya edzi Jehovha a khataleyago khidzo vale va thangisago gugola gwaye. Khu giyeyedzo, ina u ngu dundruga edzi Jehovha a nga gu phasa khidzo tepo u nga pheya gu hongola mitshanganoni? Khu giyeyedzo, adzina u di bhula ni patrawu wago gasi gu mu tshamuseya gu khuwe kha wu na nga vbindrisa gambe tepo nyo dugi khiyo khu thumotuno gasi u si kodza gu honga mitshanganoni. Tepo u bhuleyago matshango yago gihevbuli gyago, gi tshamuseye edzi gu khodwa gwago gu nga tiyiswa khidzo khu gu wona edzi Jehovha a nga ba seketeya makungo yago nya gu mu thangise womini wago.

12. a) Khu ginani hi yedego gu kovhidhari vandriyathu nyo hambane-hambane gasi hi gimbidzisa navo gihevbulo? b) U nga thumisa kharini dzivhidhyu gasi gu phasa gihevbuli gyago? Ninga giyeyedzo.

¹² Gihevbuli gyago gi na phasega gambe gya gu engiseya matshango ya vambe vandriyathu, va nga vbindrugedza silo nyo khaguri gasi gu thangisa gugola ga Jehovha. Khu kharato, kovhidhari vambe vandriyathu gasi va gimbidzisa gihevbulo nago. Va lombe gasi gu ganeya edzi va nga dzumeya khidzo lisine ni esi va nga gira gasi gu thangisa gugola ga Jehovha womini gwawe. Vbavbandzi nya isoso, dzi ninge tepo nya gu sixitiri ni gihevbuli gyago dzivhidhyu nya gipandre “Gira wugevisisi nyo ete” ni “Hevbula simbe” avba nya libhuku Vbanya nu tsakide kala gupindruga! Khu giyeyedzo, tepo mu hevbulago gihevbulo 37 mu bwe mu wona vhidhyu yi gu khiyo Jehovha a na hi sayisa tepo yatshavbo, ganeya khu dzipontu nya vhidhyu yeyi gasi gu phasa gihevbuli gyago gu wona gu khigyo ha gu thangisa gugola ga Jehovha, uye tepo yatshavbo a na hi khathaleya.

PHASA GIHEVBULI GYAGO GASI GU EMISANA NI GU WUGEDWA

13. Jesu dongisede kharini vapizane vaye gasi va emisana ni gu wugedwa?

¹³ Jesu a di embeya vapizane vaye khu gu phindra-phindra gu khuye va di hadzi gu wugedwa khu vambe ambari khu valongo vawe. (Mat. 5:11; 10:22, 36) Na gu keneleya vbadugwana gasi Jesu afa, uye a di embeya vapizane vaye gu khuye va di hadzi gu songwa khu kotani nya olu va khozeyago Jehovha. (Mat. 24:9; Joh. 15:20; 16:2) Uye a di va gengedza gasi va dzi woneya thumoni gwawe. Khu giyeyedzo, uye a di va embeya gasi va si ganedzisani ni vale va wugeyago esi va si khodwago ni gu dzi woneya ni esi va ganeyago ni gu gira gasi va si kodza gu simama gu tshumayela.

14. Hi nga phasa kharini sihevbuli sathu gasi si dzi dongiseya gu emisana ni gu wugedwa? (2 Thimoti 3:12)

¹⁴ Gu fana ni Jesu, hi nga tshamuseya gihevbuli gyathu gu khethu gi nga wugedwa khu valongo vagyo, dzipari ni sithumi-khwathu kholu gi hevbulago Bhibhiliya. (Leri 2 Thimoti 3:12.) Simbe sithumi-khwathu si nga mu gozari kholu a vbanyago guya khesi Bhibhiliya yi hevbudzago. Nigu gambe, valongo vagyo va vbafuvbi adzina kha va na nga dzumeleyana ni esi gi si hevbulago omu nya Bhibhiliya. Ha gu dongiseya sihevbuli sathu na gu ngari dzimindru gu emisana ni gu wugedwa, si na ba si dongide gasi gu emisana nago sa gu tshuka si wugedwa.

15. Ginani gi nga phasago gihevbuli gyago nya Bhibhiliya gasi gu emisana ni gu wugedwa ndrangani?

¹⁵ Gihevbuli gyago gya gu ba gi wugedwa khu valongo vagyo, gi phase gu pwisisa gu khigyo khu ginani valongo vagyo nyo khaguri va gi wugeyago khu gu hevbula Bhibhiliya ni Dzifakazi dza Jehovha. Avo adzina va nga pimisa gu khavo gi di ndreyiswa khidzo mwendro kamo avo va gu nyenya Dzifakazi dza Jehovha. Ambari valongo nyo khaguri va Jesu kha va nga ba va tsaka khesi a nga ba a gira. (Marko 3:21; Joh. 7:5) Phasa gihevbuli gyago gu simama gu laphisa monyo ni gu ganeya khu ndziya nya yadi ni valongo vagyo ni vambe vathu.

16. Hi nga phasa kharini gihevbuli gyathu nya Bhibhiliya gu bhuleya vambe esi gi si khodwago khu ndziya nya yadi?

¹⁶ Ambari valongo vagyo va gu vbweta guti nya singi khesi gi hevbulago, si na ba siri wugengeyi gu mba va embeya satshavbo khu gumogo. Gya gu gira isoso, si nga tadza hungo valongo vagyo nigu kha nga handro wakone kha va na nga vbweta gu engiseya gambe esi gi si khodwago. Khu kharato, kutsa gihevbuli gyago gu ganeya esi gi si khodwago khu ndziya yi na girago gu valongo vagyo va manega ni gudogoreya nya gu hevbuli nya singi. (Kol. 4:6) Adzina gi nga va kutsa gu beya omu nya sayiti jw.org. Isoso si na va phasa gu hatha mahungu nya mangi gasi gu hevbula nya singi khu Dzifakazi dza Jehovha.

17. U nga trenari kharini gihevbuli gyago gu hlamula siwudziso adzina gi girwago khu vambe maningano khu Dzifakazi dza Jehovha? (Wona fotu.)

¹⁷ U nga thumisa gipandre gi gu khigyo “Siwudziso va talago gu gira maningano khu Dzifakazi dza Jehovha” omu nya jw.org, gasi gu phasa gihevbuli gyago gu dongiseya mihlamulo nyo role gasi gu hlamula siwudziso gi nga girwago khu valongo mwendro sithumi-khwathu. (2 Thim. 2:24, 25) Gu hegisani nya gihevbulo ni gihevbulo, u nga divali gu thumisa gipandre gi gu khiyo, “Vambe vari khavo” omu nya libhuku Vbanya nu tsakide kala gupindruga! Kutsa gihevbuli gyago gu dongiseya mihlamulo khu malito yagyo. U nga digi gu gi ninga mawonelo nya edzi gi nga tshukwadzisago khidzo hlamulo wagyo. Satshavbo sesi, si na gi phasa gu emeya gukhodwa gwagyo khu gu tumbega.

18. U nga kutsa kharini gihevbuli gyago gu bhuleya vambe esi gi si khodwago thumoni nyo tshumayele? (Matewu 10:27)

¹⁸ Jesu kutside vapizane vaye gu tshumayela mahungu nya yadi guagani. (Leri Matewu 10:27.) Tepo gihevbuli gi pheyago na gu ngari dzimindru gu bhuleya vambe esi gi si khodwago, isoso si na gi phasa gu tumba Jehovha. U nga phasa kharini gihevbuli gyago gu manega ni misuwo yoyo? Tepo gu tiviswago khu lidima nyo tshumayele libandlani gwanu, kutsa gihevbuli gyago gu wona esi gi nga girago gasi gu khala muhuweleyi. Gi bhuleye gu khuwe gu tala nya dzitepo si ngu vbevbuga gu tshumayela ndrani nya lidima. Igyo gambe gi nga wuyedwa khu trenamentu hi yi manago avba nya gipandre Dzi garadze thumoni nyo tshumayele, gi girwago avba nya mitshangano ya vbakari nya semana. Na gi gu vireya gu dinganedwa gasi gu vega dziganelo, igyo gi nga hevbula gu tshamuseya gwadi esi gi si khodwago.

YEYEDZA GU KHUWE U NGU TUMBA GIHEVBULI GYAGO

19. Jesu yeyedzide kharini gu khuye a di gu tumba vapizane vaye, nigu hi nga mu pimedzeya kharini?

¹⁹ Na si hongoli ndzadzini, Jesu a di embeya vapizane vaye gu khuye ga litshigu nyo khaguri va na tshangana gambe. Avo kha va pwisisa gu khavo Jesu a di gu ganeya khu gu hongola gwaye ndzadzini. Ambari olu vapizane vaye va nga ba va si pwisisi satshavbo, Jesu a di gu tiyisega gu khuye avo va di gu vbweta gu tsakisa Jehovha. (Joh. 14:1-5, 8) Uye a di gu dziti gu khuye si di hadzi gu dzega tepo gasi va pwisisa silo nyo khaguri nya nga gutumba gwawe nya gu vbanye ndzadzini. (Joh. 16:12) Gu fana ni Jesu, anethu hi nga yeyedza sihevbuli sathu gu khethu hi ngu dziti gu khethu si ngu dzina gu tsakisa Jehovha.

20. Ndriyathu nyo khaguri wa Malawi yeyedzide kharini gu khuye a di gu tumba gihevbuli gyaye?

²⁰ Hi si lambede ngudzu gu wona sihevbuli sathu na si gu gira silo nya sadi. Wona giyeyedzo gya ndriyathu moyo nya nyamayi nyo pwani khu Chifundo wa Malawi. Uye a di gu thumisa libhuku Vbanya nu tsakide kala gupindruga! gasi gu gimbidziseya gihevbulo nya Bhibhiliya muphya moyo nya mukatolika nyo pwani khu Alinafe. Tepo va nga vbedza gu hevbula gihevbulo 14, ndriyathu Chifundo a di wudzisa gihevbuli gyaye mawonelo yagyo khu gu thumisa sifananiso omu nya wukhozeyi. Alinafe a di goroga a hlamula gu khuye: “Eni nyi nga dzi hungeya gu thumisa sifananiso mwendro ne!” Hwane nya isoso uye pimiside gu khuye Alinafe, a na ema gu hevbula nya mba hweya. Ganiolu, uye a di laphisa monyo a bwe a simama gu hevbula naye, na vireya kala a pwisisa satshavbo. Hwane nya migima nyo khaguri, ndriyathu Chifundo a di mu gira giwudziso nya gihevbulo 34, gi gu khigyo: “Kala avba, esi u si hevbudego omu nya Bhibhiliya khu Jehovha si gu phaside kharini?” Ndriyathu Chifundo a di khuye: “Alinafe a khumbugide dzipontu nya dzingi nya dzadi, nigu ga mweyo yakone uye a di khuye Dzifakazi dza Jehovha kha dzi pategi ga sigiro si dwanisanago ni esi Bhibhiliya yi ganeyago.” Khu gu gimbiya nya tepo, Alinafe a di diga gu thumisa sifananiso a bwe a dzi hendzeledza a bhabhatiswa.

21. Hi nga phasa kharini gihevbuli gyathu gu hunga gu thumeya Jehovha?

²¹ Ambari olu a gu Jehovha a “dandrisago”, hi na ni thumo nya gu phasi gihevbuli nya Bhibhiliya gu dandra khu liphuvboni. (1 Kor. 3:7) Hi ngu gira nya singi vbavbandze nyo gi hevbudzi basi esi Jehovha a vbwetago gu khuye hi gira. Ganiolu, hi ngu gi phasa gu haguleya lihaladzo nyo tiye khu Jehovha. Nigu hi ngu gi kutsa gambe gu yeyedza lihaladzo lagyo khu gu gira guvbindrugedza gu vbwetegago womini gwagyo. Hi ngu gi hevbudza gambe gu tumba Jehovha gya gu emisana ni sigaradzo. Tepo hi yeyedzago gu khethu hi ngu tumba gu khethu gihevbuli gyathu nya Bhibhiliya gi ngu dzina gu tsakisa Jehovha, hi na gi phasa gu gira guvbindrugedza gu vbwetegago ni gu vbanya khesi gi si hevbulago.