NDRIMA NYA GIHEVBULO 30
NDZIMO 97 Lito la Nungungulu li ngu hi phasa guvbanyani
Sihevbudzo nya litshina nya Bhibhiliya si nga gu phasa muhuno
“Tepo yatshavbo nya gu vbweta gu mi dundrugisa khu silo sesi ambari olu mu si tigo ni olu mu tiyidego lisineni li gomogo gwanu.” — 2 PED. 1:12.
MAKUNGO NYA GIHEVBULO GEGI
Hi na wona edzi sihevbudzo nya litshina nya Bhibhiliya si nga simamago khidzo gu hi phasa muhuno.
1. Sihevbudzo nya litshina nya Bhibhiliya si gu kuhide kharini tepo u nga hevbula lisine?
SIHEVBUDZO nya litshina nya Bhibhiliya si vbindrugedzide womi wathu. Khu giyeyedzo, tepo hi nga hevbula gu khethu lina la Nungungulu khu Jehovha, hi di pheya gu khala dzipari dzaye. (Isa. 42:8) Tepo hi nga hevbula khesi si giregago tepo muthu afago, kha ya garadzega khu gu pimisa gu khethu sigodwa sathu si fudego si ngu tshaniseka. (Muh. 9:10) Nigu tepo hi nga hevbula gu khethu Nungungulu a ngu hi tumbisa paradhesi omu mafuni, hi di diga gu garadzega khu wumindru wathu. Hi ngu tiyisega gu khethu womi wathu wu na simama kala gupindruga, hi si vbanye basi 70 mwendro 80 myaga. — Ndzi. 37:29; 90:10.
2. 2 Pedro 1:12, 13 o yeyedza kharini gu khuye ambari Makristo ma vidzidwego ma nga wuyedwa khu sihevbudzo nya litshina nya Bhibhiliya?
2 Gima kha hi yeli gu divala khu lisima nya sihevbudzo nya litshina nya Bhibhiliya hi si hevbudego. Ga lidangaliya laye nya wuvili, mupostoli Pedro a di loveya Makristo ma nga ba ma ‘tiyide lisineni.’ (Leri 2 Pedro 1:12, 13.) Ganiolu, ga tepo yoyo gu di romo vathu nya gu vivbedwe khu myonyo libandlani va nga ba va vbweta gu ndreyisa vandriyathu lisineni. (2 Ped. 2:1-3) Pedro a di vbweta gu tiyisa vandriyaye gasi gu va phasa gu pala gilingo gyogyo. Gasi gu gira isoso, uye a di va dundrugisa khu sihevbudzo nya litshina va nga ba va si hevbude. Sihevbudzo soso, si di hadzi gu va phasa gu simama na va tumbegide kala mahegiso.
3. Khu ginani Makristo yatshavbo ma yedego gu simama gu dundrugeya khu sihevbudzo nya litshina nya Bhibhiliya va si hevbudego? Ninga giyeyedzo.
3 Ambari na hi romo khu tepo nya yingi lisineni, hi nga wuyedwa ngudzu khu sihevbudzo nya litshina nya Bhibhiliya. Khu giyeyedzo, muthu a kodzago gu phula gwadi ni oyu a hevbuleyago gu phula, va nga thumisa dziingredhiyenti nyo olovelege gasi gu phula guhodza nyo khaguri. Ganiolu, khu gu gimbiya nya tepo muphuli a gu na ni makodzelo a nga thumisa dziingredhiyenti dzodzo khu dzindziya nya gu hambane-hambane gasi gu phula guhodza nyo tshambe. Khu ndziya nyo fane, ava va gu na ni tepo nya yingi lisineni ni ava va gu vaphya lisineni, va nga pwisisa sihevbudzo nya litshina nya Bhibhiliya khu dzindziya nya gu hambane-hambane. Siemo sathu ni thumo hi gireyago Jehovha, adzina si vbindrugedzide gukhugeya hi nga bhabhatiswa. Tepo hi thumisago sihevbudzo hi si hevbudego gale ga giemo hi gomogo ga igyo olu, hi nga tugula sihevbudzo nya siphya si nga hi phasago. Hongoleni hi wona esi vale va thumeyago Jehovha khu tepo nya yingi va nga si hevbulago ga sihevbudzo siraru nya litshina nya Bhibhiliya.
JEHOVHA KHUYE MUVANGI
4. Gu hevbula gu khethu Jehovha Muvangi si hi kuhide kharini?
4 “Oyu a giridego silo satshavbo khu Nungungulu.” (Hebh. 3:4) Ethu hi ngu dziti gu khethu mafu yatshavbo ni satshavbo si gomogo umo si di vangwa khu Muvangi a gu na ni guti ni tshivba nya yikhongolo. Uye a hi vangide, khu kharato uye a ngu hiti khu gu vbeleya. Gu diga isoso, uye a ngu khathala khethu. Uye a ngu siti esi si gu sadi gwathu. Guti lisine leli nya litshina, li gu khilo Jehovha Muvangi, si hi kuhide ngudzu si bwe si hi phasa gu vbanyeya gilo nyo giti.
5. Lisine muni li nga hi phasago gu haguleya gudzinogisa? (Isaya 45:9-12)
5 Lisine li gu khilo Jehovha Muvangi li nga hi hevbudza gu dzi nogisa. Hwane nya gu ba Joba na vegide gupima avbo gwaye basi gumogo ni vambe vathu, Jehovha a mu dundrugiside gu khuye Uye Muvangi nya tshivba yatshavbo. (Joba 38:1-4) Isoso si phaside Joba gu pwisisa gu khuye Jehovha tepo yatshavbo a ngu gira esi nya sadi. Nigu khu gu gimbiya nya tepo muprofeti Isaya lovide gu khuye: “Ina libumba li ngu tshuka li ganedzisana ni muganyi walo, khilo: ‘Wa guvbweta gu wumba ginani?’” — Leri Isaya 45:9-12.
6. Lini ngudzu-ngudzu hi yedego gu dundrugeya khedzi Muvangi wathu a gu na ni guti khidzo ni tshivba? (Wona dzifotu.)
6 Tepo muthu nyo khaguri a thumeyago Jehovha khu tepo nya yingi, uye adzina saye a nga pheya gu dzi tumba vbavbandze nya gu tumbi Jehovha gasi a mu ninga sileletelo. (Joba 37:23, 24) Ganiolu, ahati muthu a dundrugeyago tepo yatshavbo khu guti ni tshivba ya Muvangi waye? (Isa. 40:22; 55:8, 9) Lisine leli nya litshina li na mu phasa gu simama gu dzi nogisa ni gu dziti gu khuye mawonelo ya Jehovha ma na ni lisima ngudzu guvbindra yaye.
Ginani gi na hi phasago gu dundruga gu khethu mawonelo yathu khandri ya tshukwana guvbindra aya ya Jehovha? (Wona paragrafu 6)d
7. Ginani ndriyathu Rahela a nga gira gasi gu dzi pwananisa ni mapwisiselo nya maphya?
7 Gu dundrugeya gu khuye Jehovha Muvangi wathu si phaside ndriyathu Rahela a vbanyago Eslovênia gu dzi pwananisa ni mapwisiselo nya maphya. Uye wari khuye: “Dzimbe dzitepo, kha si nyi vbevbugeyi gu dzumeya esi si hungwago khava va hi thangeyago. Khu giyeyedzo, ambari hwane nya gu ba na nyi wonide Mubiko N.º 8 nya 2023 wa Huwo nya Guthangeye, nyi di garadzega tepo nyi nga wona khu tepo nyo pheye ndriyathu a nga ba ari ni giledzu nya gikhongolo na gu gira ganelo. Khu kharato, nyi di gombeya ga Jehovha gasi a nyi phasa gu dzi pwananisa ni mapwisiselo nya maphya.” Ndriyathu Rahela, dzumede gu khuye Muvangi nya ndzandzi ni mafu, Jehovha, a na ni makodzelo nya gu gimbidzisi hengeledzano yaye khu ndziya nya yadi. Sa gu ba si gu garadzeya gu dzi pwananisa ni mapwisiselo nya maphya mwendro sileletelo nya siphya, khu gu dzi nogisa, wo si wona kharini gu dundrugeya khu guti ni tshivba nya yikhongolo ya Muvangi wathu? — Rom. 11:33-36.
KHU GINANI NUNGUNGULU A DZUMELEYAGO GUTSHANISEKA?
8. Ho wuyedwa kharini khu gu dziti gu khethu khu ginani Jehovha a dzumeleyago gutshaniseka?
8 Khu ginani Nungungulu a dzumeleyago gutshaniseka? Vambe va nga mba si kodza gu mana hlamulo nya giwudziso gegi, va di gorogeya Nungungulu mwendro gu ganeya gu khavo uye mwalo! (Mav. 19:3) Ganiolu, uwe u hevbude gu khuwe Jehovha a mwalo nandru nya gilo, ganiolu vathu va gu tshaniseka ni gufa khu kotani nya gighoho ni gu mba vbeleya. U hevbude gambe gu khuwe gulaphisa-moyo ga Jehovha, gu ngu gira vathu nya vangi va muti va bwe va wona khu vabune gu khavo Jehovha a na vbedza gutshaniseka khu gu vbeleya. (2 Ped. 3:9, 15) Lisine leli li ngu hi thaveleya nigu li ngu hi gira hi hidzimeya ga Nungungulu.
9. Ga siemo muni hi yedego gu dundrugeya khu sighelo si girago Jehovha a dzumeleya gutshaniseka?
9 Hi ngu pwisisa lisima nya gu hi laphisa-monyo na hi gu vireya Jehovha a vbedza gutshaniseka. Ganiolu tepo afago muthu hi mu golago, tepo khiyo nongo wathu mwendro ethu kamo hi emisanago ni sigaradzo, tepo hi pharwago khu ndziya nya mba yadi, hi nga garadzega kholu hi nga dzipwa nga khatshi Jehovha o hweya gu vbedza gutshaniseka. (Habh. 1:2, 3) Tepo hi dzipwago kharato, gwadi gu hi dundrugeya khu sighelo si girago Jehovha a dzumeleya gutshaniseka.a (Ndzi. 34:19) Hi nga dundrugeya gambe khu gitumbiso gyaye nya gu vbedze gutshaniseka khu gu vbeleya.
10. Ginani gi nga phasa ndriyathu Anne gu emisana ni gigaradzo nya gu fedwe khu mamayi waye?
10 Gu dziti gu khethu khu ginani Jehovha a dzumeleyago gutshaniseka si nga hi phasa gu timiseya sigaradzo. Ndriyathu Anne a vbanyago ga gidwani gya Mayotte, eyi Oceano Índico wari khuye: “Gu fedwa khu mamayi wangu si nyi giride nyi garadzega ngudzu. Ganiolu, nyi di gu khaleya gu dundruga gu kheni Jehovha khandruye a vangago gutshaniseka. Uye a si lambede ngudzu gu vbedza gutshaniseka gwatshavbo ni gu wusa sigodwa sathu khu gufani. Gu dundrugeya khu lisine leli si ngu nyi ninga gurula mapimoni ni gu nyi ninga tshivba.”
11. Khu ginani guti sighelo si girago Jehovha a dzumeleya gutshaniseka si hi phasago gu simama gu tshumayela?
11 Gu dziti gu khethu khu ginani Nungungulu a dzumeleyago gutshaniseka si ngu hi kutsa gu simama gu tshumayela. Hwane nya gu tshamuseyi gu khuye Jehovha a gu laphisa-monyo kholu o vbweta gu khuye vathu va dzi laya va bwe va vbulugiswa, Pedro a di lova gu khuye: “Dundrugeyani gwadi khedzi mu yedego gu khala khidzo. Mu yede gu khala vathu nya mavbanyelo nyo age, mu gira silo si na yeyedzago gu khiso mu ngu tumbega ga Nungungulu.” (2 Ped. 3:11) Gimwegyo nya silo si ‘yeyedzago gu khiso hi ngu tumbega ga Nungungulu,’ khu gu tshumayela vambe. Gu fana ni Papayi wathu, ethu hi ngu haladza vathu. Ho vbweta gu khethu va vbanya ga litigo nya gululame la Nungungulu. Jehovha a ngu ninga lithomo vathu va gipandreni gwago gasi va mu thumeya. Khu lisine, lithomo nya likhongolo gu thuma ni Nungungulu ni gu phasa vathu nya vangi gu hevbula khuye na ma si vbohi mahegiso! — 1 Kor. 3:9.
ETHU HA GU VBANYA “MATSHIGONI NYA GUHEGISE”
12. Ho wuyedwa kharini khu gihevbudzo gi gu khigyo ho vbanya “matshigoni nya guhegise?”
12 Bhibhiliya yi ngu yeyedza khu gu kongoma edzi vathu va na ba vari idzo “matshigoni nya guhegise.” (2 Thim. 3:1-5) Nigu kha sifi gu si wudzisa, kholu ethu hi ngu si kodza gu wona edzi giprofeto gegi gi tadzisegago khidzo muhuno. Tepo hi wonago mavbanyelo nya vathu na ma engedzeya guvivba, isoso so hi gira hi engedzeya gu khodwa gu khethu Lito la Nungungulu li tumbegide. — 2 Thim. 3:13-15.
13. Guya khu gipimaniso gi gu romo omu ga Luka 12:15-21, siwudziso muni hi nga dzi girago?
13 Guti gu khethu ha gu vbanya matshigoni nya guhegise, si ngu hi phasa gu vega gupima ga esi si gu na ni lisima ngudzu. Gipimaniso gya Jesu gi gu romo omu ga Luka 12:15-21 gya gu hi phasa gu wona gu khethu khu ginani si gu na ni lisima gu gira isoso. (Leri.) Khu ginani mwama wule nya gu ghanye a nga ranwa gu pwani “gipumbu?” Uye kha mu rana gipumbu kholu a nga ghanya, ganiolu kholu a nga ba a thangisa silo nya mba na lisima. Uye a di gu ‘dzi hengeledzeya dzithomba, ganiolu nari gisiwana ga Nungungulu.’ Khu gu thumisa tepo yaye khu ndziya nya mba yadi, a di gu gira gihoso nya gikhongolo kholu a diri mwalo matshigu nya mangi gasi gu vbanya. Nungungulu a di mu embeya gu khuye: “Muhuno wutshigu u nafa.” Tepo mafu yaya nyo vivbe ma hidzimeyago mahegisotuno, hi nga dzi wudzisa gu khethu: ‘Ina esi nyi hungago si ngu yeyedza gu khiso nyi ngu thangisa esi si gu na ni lisima ngudzu? Misuwo muni nyi phasago sanana sangu gu manega nayo? Ina nyi ngu thumisa tshivba yangu, tepo ni esi nyi gu naso gasi nyi dzi hengeledzeya dzithomba mwendro gasi gu hengeledzeya dzithomba ndzadzini?’
14. Giyeyedzo gya Miki gya gu hi phasa kharini gu wona lisima nya gu dundrugeye gu khethu ha gu vbanya matshigoni nya gu hegise?
14 Tepo hi dundrugeyago gwadi khu lisine nya gu khethu ha gu vbanya matshigoni nya guhegise, isoso si nga hi phasa gu wona edzi hi nga thumisago khidzo womi wathu. Khiso si nga giregeya ndriyathu nya nyamayi nyo pwani khu Miki. Uye wari khuye: “Gukhugeya tepo nyi nga ba nyi romo xikwatuno, eni nyi di gu vbweta thumo wu nga hadzi gu nyi dzumeleya gu hevbula khu sirengo. Nyi diri gambe ni misuwo nya gu thume kha nga piyonera nya tepo yatshavbo ni gu phasedzeya omu gu vbwetegago giphaso nya gikhongolo. Vandriyathu nyo khaguri libandlani, va di nyi embeya gasi nyi pimisa gwadi gu kheni nyi na si kodza gani gu gira thumo wowo na nyi gu vbweta gu vboheya misuwo yangu ya liphuvboni. Avo va di nyi dundrugisa gu khavo mahegiso nya mafu yaya momo vbafuvbi ni gu khavo mafuni nya maphya nyi na hevbula khu sirengo satshavbo nyi si vbwetago kala gupindruga. Khu kharato, nyi di hunga gu gira dzikursu dzi dzegago tepo nya yidugwana. Isoso si nyi phaside gu mana thumo gasi gu dzi sayisa na nyi gu thuma kha nga piyonera nya tepo yatshavbo, nigu khu gu gimbiya nya tepo nyi di fuluga nyi ya khala Equador omu gu nga ba gu vbwetega giphaso.” Miki ni mwama waye va gu thuma kha nga vawoneleyi nya sirkwitu tigoni momu.
15. Giyeyedzo gya Jakobe gya gu hi phasa kharini gu wona gu khethu kha hi yeli gu tsukula vathu va gu mba tsakeya mahungu nya yadi? (Wona dzifotu.)
15 Kha hi yeli gu vbeya tshivba vathu va gu mba tsakeya mahungu nya yadi gupheyani. Kholu vathu va ngu vbindrugedza. Wona giyeyedzo gya Jakobe, ndriye wa Jesu. Uye wonide Jesu na dandra, a khala Mesiya a bwe a hevbudza gwadi guvbindra ni wevbini muthu. Ambari ulolo, Jakobe kha landra Jesu.b Uye a di khala basi mupizane hwane nya gu ba Jesu a wusidwe khu gufani. Khu lisine, Jakobe a khade mupizane nya sighingi. Si na ni lisima gu mba tsukula valongo vago va gu mba yeyedza gu tsakeya, nigu tshumayela gambe ava va nga ba va bombide gu gu engiseya gale. Dundruga gu khuwe ha gu vbanya matshigoni nya gu hegise, khu kharato thumo wathu kha gi vbiredza. Esi u va embeyago muhuno, adzina saye si na va kuha mindru wa tshigu adzina kamo hwane nya gu ba yi phede tshanisa nya yikhongolo.c
Ginani gi na hi kutsago gu mba tsukula valongo vathu va gu mba yeyedza gu tsakeya? (Wona paragrafu 15)e
SIMAMA GU NINGA LISIMA SIGENGEDZO SA JEHOVHA
16. Wa gu wuyedwa kharini khu sidundrugiso sa Jehovha? (Wona kwadru “Thumisa lisine nya Bhibhiliya gasi gu phasa vambe.”)
16 Guhodza nyo khaguri ga liphuvboni hi hakhago, gwa gu dongiseledwa vale nya gu gima va sipwi lisine nya Bhibhiliya. Khu giyeyedzo, ganelo ya vbaguagani yi vegwago dzisemana dzatshavbo, dzindrima nyo khaguri ni dzivhidhyu dzi gu romo omu nya jw.org dza gu girwa ngudzu-ngudzu gasi gu phasa vale va gu siri Dzifakazi dza Jehovha. Ambari ulolo, anethu hi nga wuyedwa khu sidundrugiso soso. Iso si ngu engedzeya lihaladzo lathu khu Jehovha, gu tiyisa gukhodwa gwathu avba nya Lito laye ni gu hi phasa gu khala vahevbudzi nya vadi nya Bhibhiliya. — Ndzi. 19:7.
17. Ga siemo muni hi yedego gu dundrugeya khu sihevbudzo nya litshina nya Bhibhiliya?
17 Kha nga Dzifakazi dza Jehovha, hi ngu tsaka ngudzu tepo hi manago mapwisiselo nya maphya nya lisine nya Bhibhiliya. Ganiolu, hi ngu tsaka gambe khu sihevbudzo nya litshina nya Bhibhiliya hi si hevbudego gupheyani si hi phasidego gu khala dzipari dza Jehovha. Kha nga hi si hevbudego, lisine leli li nga simama gu hi phasa muhuno. Tepo hi hakhago sileletelo sitago khu hengeledzanoni, ganiolu hi pimisa gu khethu magirelo yathu nya silo khyadi, khu gu dzi nogisa, hi yede gu dundruga gu khethu Jehovha, Muvangi wathu nya tshivba ni guti, khuye a gimbidzisago hengeledzano yaye. Tepo ethu mwendro muthu hi mu haladzago a emisanago ni gilingo, hi nga laphisa-monyo hi bwe hi dundrugeya gu khethu khu ginani Jehovha a dzumeleyago gutshaniseka. Nigu tepo hi hungago edzi hi nga thumisago khidzo tepo yathu ni esi hi gu naso, hi yede gu dundruga gu khethu ha gu vbanya matshigoni nya gu hegise nigu yi tshade tepo nya yidugwana. Hongoleni hi simama gu dzumeleya sigengedzo sa Jehovha si hi tiyisa, si hi kutsa ni gu hi ninga guti.
NDZIMO 95 Guwonegeya ga guya gu engedzeya
a Wona ndrima yi gu khiyo “Por que todo o sofrimento acabará em breve?”, omu nya Mukhedziseyi nya 15 nya Maio nya 2007, dzipaj. 21-25.
c Wona ndrima yi gu khiyo “Ginani hi gitigo maningano khedzi Jehovha a na lamulago khidzo vathu mindru wa tshigu?” omu nya Mukhedziseyi nya Maio nya 2024, dzipaj. 8-13.
d TSHAMUSELO NYA FOTU : Lidhota nyo khaguri li ningago mawonelo ma gu mba dzumeledwa khu mambe madhota. Hwane nya gu ba li khedzide dzinyeledzi ndzadzini, ilo la gu dundrugeya edzi Muvangi a gu na ni guti ni tshivba li bwe li tugula gu khilo esi Jehovha a si vbwetago si na ni lisima ngudzu guvbindra esi uye a si vbwetago.
e TSHAMUSELO NYA FOTU: Ndrani nya gihevbulo gyaye, Fakazi ya gu gevesisa esi si yeyedzago gu khiso ha gu vbanya matshigoni nya gu hegise. Isoso sa gu mu kutsa gu ligareya ndriyaye a mu tshumayela.