Vbiredzeya gu phasa ava va vbwetago gu hevbula khu Nungungulu

1. Ginani vambe vathu adzina saye va nga girago tepo hi va tshumayelago? (Mithumo 13:47, 48; 16:14, 15)

VATHU nya vangi va lizana myaga nyo pheye va di dzegeya gu dzumeya lisine tepo va ngapwa mahungu ma nga ba ma ganeya khu Jesu. (Leri Mithumo 13:47, 48; 16:14, 15.) Khu ndziya nyo fane, vathu nya vangi muhuno va ngu tsaka ngudzu tepo vapwago mahungu nya yadi khu tepo nyo pheye. Ambari vale gupheyani va gu mba tsakiswa khu mahungu nya Mufumo, khu gu gimbiya nya tepo va nga ma tsakeya khu monyo wawe watshavbo. Ginani hi yedego gu gira tepo hi manago vathu va nga dzi ‘emiseya gu hakha’ mahungu hi ma tshumayelago?

2. Thumo wathu nyo gire vapizane wu ngu fana khu ndziya muni ni thumo nya mulimi?

² Wona gipimaniso gi landreyago. Thumo wathu nya gu gire vapizane wu nga fananiswa ni thumo wa mulimi. Tepo handro nya misimbo nyo khaguri wu vidzwago, mulimi a gu dzegeya gu wu hava ambari na gu lima ga wumbe wulanga mwendro gu yala yimbe misimbo omu nya lithembwe laye. Khu ndziya nyo fane, tepo hi manago muthu a nga dzi emiseya gu dzumeya mahungu hi ma tshumayelago, ho vbweta gu mu phasa gu khala mupizane wa Kristo khu gu vbiredza ngudzu. Ganiolu, hi na simama gu haguleya gutsakeya ga vale va vbwetago tepo gasi va wona lisima nya esi va si hevbulago. (Joh. 4:35, 36) Tepo hi si kodzago gu wona gu khethu muthu nyo khaguri a dzi emisede gu engisa mwendro ne, si na vbevbuga gu hatha ndziya nya yadi nyo mu phase khiyo. Olu, hongoleni hi wona esi hi yedego gu gira ga mabhulo yathu nyo pheye gasi hi si kodza gu phasa vale va nga dzi emiseya gu engiseya. Hi na wona gambe edzi hi nga va phasago khidzo gu dandra khu liphuvboni.

EDZI HI NGA PHASAGO KHIDZO AVA VA VBWETAGO GU HEVBULA KHU NUNGUNGULU NI BHIBHILIYA

3. Ginani hi yedego gu gira tepo hi manago vathu va yeyedzago gutsakeya thumoni nyo tshumayele? (1 Vakorinto 9:26)

³ Tepo hi manago vathu va yeyedzago gutsakeya thumoni nyo tshumayele, ho vbweta gu va phasa gu hevbula khu Jehovha ni gu hidzimeya gwaye. Khu kharato, ga mabhulo nyo pheye hi yede gu dzegeya gu va kutsa gu hevbula Bhibhiliya ni gu va kovhidhari gasi va hongola mitshanganoni. — Leri 1 Vakorinto 9:26.

4. Ganeya khu matshango nya muthu nyo khaguri a nga ba a dzi emisede gu dzegeya gu pheya gihevbulo nya Bhibhiliya.

⁴ Mu kutse gu hevbula Bhibhiliya. Vambe hi va tshumayelago va dzi emisede gu dzegeya gu hevbula Bhibhiliya. Khu giyeyedzo, khu Mana nyo khaguri, gyagadzyana gimwegyo gya Canadá gi di hidzimeya ga gikarinyana nya mabhuku gi dzega broxura Vbanya nu tsakide kala gupindruga! Ndriyathu nya nyamayi a nga ba a thuma avba nya gikarinyana a di mu tshamuseya gu khuye broxura yile yo thumiswa gasi gu gimbidzisa gihevbulo nya Bhibhiliya nya mahala. Gyagadzyana gile gi di tsakiswa khiso nyo bwe va ningana dzinumeru nya telefoni. Hwane nya dziora nyo khaguri, ga litshigu lile kamo, gyagadzyana gile gi di rumeya mesaji ndriyathu gi mu wudzisa gu khigyo lini va na pheyago gihevbulo. Tepo ndriyathu nya nyamayi a nga gi embeya gu khigyo a na hongola guvbeyani nya semana, igyo gi di khiyo: “Gu wani-wani mindru? Eni nyi na ni tepo.” Avo va di pheya gu hevbula khu Livbandre kamo. Nigu gyagadzyana gile gi di hongola ga mitshangano yagyo nyo pheye ga guvbeyani gule nya semana kamo, nigu gi di simama na gi gu dandra khu liphuvboni khu gu vbiredza ngudzu.

5. Ginani gi nga hi phasago gu yiti ndziya nya yadi nyo tule sihevbulo nya Bhibhiliya? (Wona dzifotu.)

⁵ Lisine gu khandri vatshavbo va na vbwetago gu dzegeya gu hevbula Bhibhiliya gu fana ni gyagadzyana gegi. Adzina saye si na lombega gu hi haguleya gutsakeya nya muthu nyo khaguri. Adzina si na lombega gu hi pheya mabhulo khu mahungu ma tsakisago muthu yoyo. Ambari ulolo, ha gu simama ni mawonelo nya yadi ni gu yeyedza gu khathala nya lisine, hwane nya tepo nya yidugwana hi nga si kodza gu pheya gihevbulo. Ginani hi nga ganeyago tepo hi kutsago muthu gu hevbula Bhibhiliya? Hongoleni hi wona esi si nga ganedwa khu vandriyathu nyo khaguri va si kodzago gwadi gu tula sihevbulo nya Bhibhiliya.

6. Hi nga ganeya ginani gasi gu phasa muthu nyo khaguri gu wona gu khuwe a na phasega khu gu hevbula Bhibhiliya?

⁶ Vandriyathu nyo khaguri va nga lombwa gasi gu hi bhuleya matshango yawe maningano khu gu pheya sihevbuli nya Bhibhiliya, va di khavo ga mayigo nyo khaguri tepo hi ganeyago khu gihevbulo nya Bhibhiliya gwadi gu potsa malito nya nga, “gu hevbula”, “kurso nya Bhibhiliya” mwendro “gu gu hevbudza.” Avo va wonide gu khavo va ngu si kodza gu dugeleya tepo va thumisa malito nya nga “gu bhula”, “gu bhudzisana” mwendro “guti Bhibhiliya.” U nga gira muthu a manega ni gudogoreya nya gu simame gu bhula nago khu gu mu embeya gu khuwe: “Si ngu samadzisa edzi Bhibhiliya yi si kodzago gu hlamula khidzo siwudziso nya singi nya lisima ngudzu” mwendro “Bhibhiliya khandri libhuku nya tshetshe basi, ganiolu iyo yi ngu hi phasa khu dzindziya nya dzingi.” Mwendro gu ganeya gu khuwe: “Kha si dzegi tepo nyo laphe, khu 10 mwendro 15 dzimeneti u nga si kodza gu hevbula silo nya lisima ngudzu.” Gasi hi si giri gu muthu a wona nga gigurumedza gu hevbula, kha hi yeli gu ganeya gu khethu hi na hevbula “semana yatshavbo.”

7. Vathu nyo khaguri va ngu dzumeya lisine tepo va girago ginani? (1 Vakorinto 14:23-25)

⁷ Mu kovhidhari gu hongola mitshanganoni. So wonegisa gu khatshi matshigoni ya mupostoli Pawulo, vathu nyo khaguri va dzumede lisine tepo va nga wona mitshangano nya Wukristo khu tepo nyo pheye. (Leri 1 Vakorinto 14:23-25.) Sasimweso si ngu girega matshigoni yathu. Vathu nya vangi va ngu haguleya wupari nyo tiye ni Jehovha khu gu vbiredza ngudzu tepo va hongolago mitshanganoni. Gihevbulo 10 nya libhuku Vbanya nu tsakide kala gupindruga! gi na ni konvhite nya yadi, ganiolu kha si hungi kala u vboha ga gihevbulo gegi gasi gu mu kovhidhari gu hongola mitshanganoni. Ga mabhulo yanu nyo pheye u nga kovhidhari mune ndranga gu hongola mitshanganoni nya guvbeyani nya semana, adzina u nga mu embeya hungo nya mahungu nya ganelo mwendro gu mu bhuleya khu gihevbulo nya Mukhedziseyi nya semana yoyo.

8. Ginani hi nga embeyago muthu nyo khaguri tepo hi mu kovhidharigo gu hongola mitshanganoni? (Isaya 54:13)

⁸ Tepo u kovhidharigo muthu a nga yeyedza gu tsakeya, mu tshamuseye gu khuwe mitshangano yathu yi hambanide ni eyi a nga oloveya gu hongola. Tepo gihevbuli nyo khaguri nya nyamayi gi nga wona khu tepo nyo pheye gihevbulo nya Mukhedziseyi gi di wudzisa muhevbudzi wagyo gu khigyo: “Mugimbidzisi a ngu mati malina ya vatshavbo?” Ndriyathu a di mu tshamuseya gu khuye, ethu hi ngu dzi garadzeya gu mati malina ya vatshavbo vandriyathu libandlani kholu hi ndranga mweyo. Gihevbuli gile gi di khigyo tshetsheni gwagyo vathu nya vangi kha va tivani khu malina. Ganiolu, hi nga tshamuseya gambe muthu nyo khaguri esi si girago mitshangano yathu yi hambana ni yimbe. (Leri Isaya 54:13.) Hi ngu tshangana gasi hi khozeya Jehovha, gu hevbula khuye ni gu tiyisana khu gyathu. (Hebh. 2:12; 10:24, 25) Khu kharato, mitshangano yathu yi giredwe ngudzu-ngudzu gasi yi hi hevbudza nigu iyo kha hi pati sihena. (1 Kor. 14:40) Gu diga isoso, malanga hi gireyago avbo mitshangano ma khadzisegide gwadi gasi gu hi phasa gu vega gupima ga esi hi si hevbulago. Kha hi ganeye khu mahungu nya dzipartidhu kholu kha hi dzi bedzedzeyi omu nya politika ni gu kha hi pategi omu nya sitereka. Nigu gihevbuli gyago gi na phasega wa gu gi yeyedza vhidhyu yi gu khiyo Ginani gi Giregago Salawuni nya Mufumo? Khu ndziya yoyo gi na siti esi gi na hongolago gi ya si wona.

9-10. Tepo hi kovhidharigo muthu nyo khaguri gu hongola mitshanganoni, ginani hi nga ganeyago gasi a si dzipwi na gurumedzwa gu patega gwayo? (Wona fotu.)

⁹ Vambe vathu kha va dzumeyi gu hongola mitshanganoni yathu kholu va gu thava gu khavo hi na va lomba gasi va khala Dzifakazi dza Jehovha. Gira muthu yoyo a tiyisega gu khuye ethu hi ngu tsaka khu gu hakha vambe vathu mitshanganoni gwathu, ganiolu kha hi gurumedzi muthu gu patega ga iyo. Ambari dzindranga hi ngu dzi hakha khu mandza mavili ambari ni vale va gu na ni sanana nya sidugwana. Mitshanganoni yathu, sanana kha si hambaniswi ni vavelegi vaso gasi si hevbudzwa ga wumbe wulanga. Gu diga isoso, sanana niso so khala ni vavelegi vaso gasi va hevbula vatshavbo. Khu ndziya yoyo, vavelegi va ngu si kodza gu woneleya sanana sawe tepo yatshavbo ni gu wona esi si hevbudzwago. (Dhet. 31:12) Kha hi henguli dzitsapawu mitshanganoni yathu. Vbavbandze nya isoso, hi ngu landra gileletelo gya Jesu gi gu khigyo: “Mu ningidwe mahala; anenu ningeyani mahala.” (Mat. 10:8) U nga embeya gambe muthu yoyo gu khuwe kha si lombegi kala a manega ni sombo nyo dhuri ngudzu gasi a hongola mitshanganoni. Kholu Nungungulu a gu wona monyo nasiri edzi muthu a gu idzo khu vbavbandze. — 1 Sam. 16:7.

¹⁰ A gu tshuka muthu yoyo ata mitshanganoni, gira satshavbo u si kodzago gasi a dzipwa na romo gaya. Mu phasi gu a tivana ni madhota ni vambe vandriyathu. A gu dzipwa na romo gaya, isoso si na mu gira a vbweta gu wuya gambe. Nigu a gu ba ari mwalo Bhibhiliya mitshanganoni, mu phasi khu gu thumisa eyi yago u bwe u mu phasa gu pwisisa ganelo yi vegwago ni edzi gihevbulo nya Mukhedziseyi gi girwago khidzo.

TEPO HI PHEYAGO GIHEVBULO NYA BHIBHILIYA NI MUTHU NYO KHAGURI

11. U nga yeyedza kharini gu khuwe u ngu ninga lisima tepo ni longoloko nya gihevbuli gyago?

¹¹ Ginani hi yedego gu gi dundruga tepo hi hevbulago ni muthu nyo khaguri? Hi yede gu ninga githawo ora ni longoloko wa mune ndranga. Khu giyeyedzo, wa gu dzumeya gu hongola uya gimbidzisa gihevbulo khu ora nyo khaguri, gira satshavbo u si kodzago gasi u vboha ga ora yoyo ambari vathu va gipandreni gwago na va si ninge lisima gu vboha khu ora yi nga vegiswa. Gu di ga isoso, u nga gira gu gihevbulo gyanu nyo pheye gi si dzegi tepo nyo laphe. Vandriyathu nyo khaguri va nga hevbula Bhibhiliya ni vathu nya vangi va di khavo gwadi gu mba vbedza tepo nya yingi na mu hevbula ambari gihevbuli gya gu vbweta gu hevbula simbe. Nigu u nga ganeye ngudzu. Diga gihevbuli gi ganeya esi gi sipwago ni gu pimisa. — Mav. 10:19.

12. Misuwo muni hi yedego gu manega nayo gukhugeya litshigu nyo pheye hi pheyago gihevbulo nya Bhibhiliya ni muthu nyo khaguri?

¹² Tepo hi pheyago gihevbulo nya Bhibhiliya ni muthu nyo khaguri, makungo yathu khu gu mu phasa guti Jehovha ni Jesu ni gu haguleya lihaladzo khavo. Gasi hi si kodza isoso, tepo yatshavbo hi yede gu mu yeyedza esi Bhibhiliya yi hevbudzago nasiri basi esi hi si pimisago. (Mith. 10:25, 26) Mupostoli Pawulo a hi vegede giyeyedzo nya gyadi. Tepo a nga ba a hevbudza, uye a di gu vega gupima ga Jesu Kristo, a gu wule Jehovha a nga mu rumeya gasi a hi phasa gu muti. (1 Kor. 2:1, 2) Khu kharato, Pawulo phaside vandriyaye gu wona lisima nya gu haguleye makhalelo nya yadi ma nga fananiswago ni oru, prata ni siwindri nya lisima. (1 Kor. 3:11-15) Makhalelo yaya nya lisima ngudzu mo pata gukhodwa, guti, guninganiseya ni gu thava Jehovha. (Ndzi. 19:9, 10; Mav. 3:13-15; 1 Ped. 1:7) Pimedzeya giyeyedzo gya Pawulo khu gu phasa sihevbuli sago gu haguleya gukhodwa nyo tiye ni wupari nyo tiye ni Papayi waso nya lihaladzo a gomogo ndzadzini. — 2 Kor. 1:24.

13. Hi nga yeyedza kharini gulaphisa monyo ni gupwisisa tepo hi phasago gihevbuli gyathu? (2 Vakorinto 10:4, 5) (Wona fotu.)

¹³ Pimedzeya mahevbudzelo ya Jesu khu gu yeyedza gulaphisa monyo ni gupwisisa. Potsa gu gira siwudziso si na girago gihevbuli gyago gi khala dzitshoni. Sa gu ba si mu garadzeya gu pwisisa mahungu nyo khaguri, kha si lombegi gu ema ga mahungu yoyo kala a ma pwisisa. Vbavbandze nya isoso, simamani ni gihevbulo nigu mu nga ganeya ga yimbe tepo khu mahungu yoyo. Vbavbandze nyo gi gurumedzi gu dzumeya gihevbudzo nyo khaguri na gi si gu dongi, gi ninge tepo gasi lisine litsitsa mikhamba monyoni gwagyo. (Joh. 16:12; Kol. 2:6, 7) Bhibhiliya yi ngu fananisa sihevbudzo nya malipha hi zamago gu si tshula gwaso ni ‘libhiyo nya gutiye’ hi yedego gu li “khungumula.” (Leri 2 Vakorinto 10:4, 5.) Vbavbandze nya gu khungumuli libhiyo la gihevbuli gyago vbatshani gwagyo, gi phasi gu wona Jehovha nga Wuthavelo wagyo. — Ndzi. 91:9.

EDZI HI NGA PHASAGO KHIDZO AVA VATAGO MITSHANGANONI KHU TEPO NYO PHEYE

14. Hi yede gu phara kharini ava vatago mitshanganoni yathu?

¹⁴ Jehovha o vbweta gu khuye hi phara vathu vatshavbo khu ndziya nya lihaladzo, kha si khatadzisegi omu va tago khumo, lifumbo lawe mwendro va na ni dzitsapawu mwendro ne. (Jak. 2:1-4, 9) Ina ka, hi nga yeyedza kharini lihaladzo ava vatago mitshanganoni khu tepo nyo pheye?

15-16. Hi nga phasa kharini ava vatago mitshanganoni yathu khu tepo nyo pheye gu dzipwa na va romo gaya?

¹⁵ Vambe vathu va ngata mitshanganoni yathu gasi va ta wona edzi yi gimbiyago khidzo mwendro khu gu ba na va kutsidwe khu muthu nyo khaguri wa gipandreni gwaye. Khu kharato, tepo u wonago muthu nya muphya mitshanganoni, u nga digi gu mu losa. Mu yeyedze lihaladzo, u si mu giri a khala dzitshoni. Mu lombe gu khala naye. Wona naye Bhibhiliya ni mambe mabhuku hi ma thumisago mwendro u mu vbweteya mabhuku yoyo. Vbavbandze nya isoso, pimisa khu dzimbe dzindziya nyo mu giri a dzipwa na romo gaya. Mwama moyo a nga hongola mitshanganoni khu tepo nyo pheye a di embeya ndriyathu a nga mu hakha gu khuye a di gu garadzega kholu a nga mba ambala gwadi gu fana ni vambe. Ndriyathu wule a di mu gira a dzipwa gwadi khu gu mu tshamuseya gu khuye Dzifakazi dza Jehovha vathu nyo olovelege gu fana ni vambe. Mwama wule khu gu gimbiya nya tepo a di dandra khu liphuvboni a bhabhatiswa, ganiolu kala ni muhuno kha divali esi a nga embedwa khu ndriyathu wule. Tepo yatshavbo hi yede gu dundruga esi: Tepo hi bhulago ni ava vatago mitshanganoni khu tepo nyo pheye, hi yede gu va yeyedza gu khathala nya lisine ganiolu hi si dzi bedzedzeyi womini gwawe. — 1 Ped. 4:15.

¹⁶ Hi nga gira gambe ava vatago mitshanganoni khu tepo nyo pheye va dzipwa na va romo gaya khu gu dzi woneya ni esi hi ganeyago ni gu yeyedza githawo tepo hi ningago mihlamulo yi ganeyago khu vathu va gu siri Dzifakazi dza Jehovha mwendro esi va si khodwago. Kha hi yeli gu thumisa malito ma na va girago va khala dzitshoni mwendro va si vbweti gu wuya gambe. (Tit. 2:8; 3:2) Khu giyeyedzo, kha hi yeli gu ganeya khesi va si khodwago khu ndziya nya mba yadi. (2 Kor. 6:3) Nigu vandriyathu va girago dziganelo va yede gu dzi woneya ngudzu ga mahungu yaya. Hi nga va yeyedza gambe lihaladzo ava va gu siri Dzifakazi va tago mitshanganoni khu gu tshamuseya malito mwendro mahungu ma nga va garadzeyago gu ma pwisisa.

17. Khu yavbini makungo yathu tepo hi manago muthu thumoni nyo tshumayele a ‘nga dzi emiseya’ gu hi engiseya?

¹⁷ Ga litshigu ni litshigu li vbindrago, thumo wathu nyo gire vapizane wu ngu engedzeya gu khala nya givbiredza ngudzu, nigu hi ngu simama gu mana vathu ‘va nga dzi emiseya gu hakha womi nya gupindruge.’ (Mith. 13:48) Tepo hi girago isoso, kha hi yeli gu gira mihuni gu va kutsa gu hevbula Bhibhiliya mwendro gu va kovhidhari vata mitshanganoni yathu. Khu gu gira isoso, hi nga va phasa gu veta lizambo nyo pheye li yisago ‘ndziyani nya womi nya gupindruge.’ — Mat. 7:14.