NDRIMA NYA GIHEVBULO 40
NDZIMO 111 Sighelo sathu nya gu tsake
Jehovha ‘gunengeya gwathu nya gukhongolo’
“ Nyi na gwela . . . ga Nungungulu, a gu gunengela gwangu nya gukhongolo.” — NDZI. 43:4.
MAKUNGO NYA GIHEVBULO GEGI
Hi na wona esi si nga hi beyago litsako ni esi hi nga girago gasi hi li wusedza.
1-2. a) Vathu nya vangi va gu dzipwa kharini muhuno? b) Ginani hi na bhulago khigyo avba nya ndrima yeyi?
VATHU nya vangi muhuno va ngu gira satshavbo va si kodzago gasi va manega ni litsako. Ganiolu, ambari na va dzi garadza kharini avo kha va si kodzi gu manega ni litsako. Vathu nya vangi va ngu garadzega ngudzu nigu va ngu pimisa gu khavo silo gima kha si na nga tshukhwata. Nigu ambari vathu nyo khaguri va Jehovha va ngu emisana ni gudzipwa gogo. Kha nga olu hi vbanyago “matshigoni nya guhegise,” hi virede gu emisana ni siemo gumogo ni gudzipwa gu ‘garadzago gu emisana nago.’ — 2 Thim. 3:1.
2 Ga ndrima yeyi, hi na wona esi si nga hi beyago litsako lathu ni edzi hi nga li wusedzago khidzo. Ganiolu gupheya, hi na wona gu khethu khu mani gifefe nya litsako nya lisine.
GIFEFE NYA LITSAKO NYA LISINE
3. Sivangwa so hi hevbudza ginani khu Jehovha? (Wona dzifotu.)
3 Litsako la Jehovha gima kha li vbeyi. Nigu uye o vbweta gu khuye anethu hi tsaka. Khiso si nga mu gira a gira silo nya singi si hi ningago litsako. Khu giyeyedzo, hi ngu tsaka ngudzu tepo hi wonago dzikori nyo hambane-hambane omu nya litigo lathu, hi ngu tsaka gambe khu gu wona sirengo na si gu hagana, nigu hi ngu tsaka ngudzu khu gu hodza guhodza hi wu golago ngudzu. Nungungulu khu lisine a ngu hi haladza nigu o vbweta gu khuye hi dzi buza khu womi!
Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images
Edzi sirengo si haganago khidzo so yeyedza gu khiso Jehovha, Nungungulu nyo tsaki (Wona paragrafu 3)
4. a) Jehovha o si kodza kharini gu simama na tsakide ambari olu a wonago satshavbo sigaradzo si gomogo mafuni? b) Giningwa muni Jehovha a nga hi ninga? (Ndzimo 16:11)
4 Ambari olu Jehovha a gu “Nungungulu nyo tsake,” uye a ngu siti sigaradzo ni guvbisa vathu va mafuni va emisanago nago. (1 Thim. 1:11) Ganiolu, uye kha dzumeleyi gu khuye isoso si vbungula litsako laye. Uye a ngu dziti gu khuye gutshaniseka gwatshavbo kha gitepwana, nigu uye kamo vegiside litshigu a na vbedzago gwatshavbo gutshaniseka. Uye a ngu timiseya khu gulaphisa-monyo kala litshigu a na fuvisago gutshaniseka gwatshavbo kala gupindruga. Kala isoso si girega, Jehovha a ngu wona esi hi emisanago naso nigu a ngu dzina gu hi phasa. Ganiolu, uye o hi phasa khu ndziya muni? Khu gu hi ninga giningwa nya litsako. (Leri Ndzimo 16:11.) Hongoleni hi wona edzi Jesu a nga phasega khidzo khu giningwa gegi.
5-6. Khu ginani Jesu a gu na ni litsako?
5 Ga sivangwa satshavbo sa Jehovha, Jesu khuye nyo tsaki ga vatshavbo. Khu ginani? Wona sighelo sivili. 1) “Uye khuye gifananiso gya Nungungulu a si wonegigo” nigu uye a ngu yeyedza makhalelo ya Papayi waye khu gu vbeleya. (Kol. 1:15; 1 Thim. 6:15.) 2) Jesu vbedzide tepo nya yingi ni Papayi waye, a gu gifefe nya litsako.
6 Jesu a di gu si kodza gu manega ni litsako kholu tepo yatshavbo a di gu gira esi Papayi waye a nga ba a vbweta gu khuye a gira. (Mav. 8:30, 31; Joh. 8:29) Nigu khu kotani nya isoso, Jehovha a ngu dzipwa ngudzu matshandza khuye. — Mat. 3:17.
7. Hi nga si kodza kharini gu manega ni litsako nya lisine?
7 Anethu hi nga si kodza gu simama na hi tsakide ha gu engedzeya gu muti Jehovha. Tepo hiyago na hi gu engedzeya gu hevbula khu Jehovha ni gu mu pimedzeya, litsako lathu li na engedzeya. Hi nga si kodza gambe gu tsaka khu gu gira gugola ga Jehovha ni gu dziti gu khethu uye a ngu hi tsakeya.a (Ndzi. 33:12) Ganiolu, ahati ha gu dzipwa na hiri mwalo litsako khu gitepwana mwendro khu tepo nyo laphe? Ina isoso so thula gu khiso Jehovha kha hi tsakeyi? Ahihi! Kha nga hi dzitigo hi vathu nya mba vbeleya, khu kharato hi ngu emisana ni guvbisa, gugaradzega mwendro dhepresawu. Nigu Jehovha, a ngu siti isoso. (Ndzi. 103:14) Olu, hongoleni hi wona esi si nga hi beyago litsako ni edzi hi nga li wusedzago khidzo.
U NGA DZUMELEYI GILO GI GU BEYA LITSAKO
8. Sigaradzo sa womini si nga gu kuha kharini?
8 Gilo nyo pheye gi nga hi beyago litsako: Sigaradzo nya womi. Ina u ngu emisana ni giradzo nya gu wugedwe, dzimhango nya tumbunugo, wusiwana, madwali mwendro gu gumba? Si nga hi vbevbugeya gu luza litsako tepo hi emisanago ni sigaradzo, ngudzu-ngudzu sile hi gu mba si kodza gu si woneleya. Bhibhiliya yi ngu yeyedza isoso khu gu khiyo “monyo [wa gu] vbisega, hefemulo wa gu vbela tshivba.” (Mav. 15:13) Ndriyathu Babis a gu lidhota nigu a nga fedwa khu ndriyaye nya mwama, nigu hwane nya 4 myaga a fedwa khu vavelegi vaye a di khuye: “Nyi ngu dzipwa na nyi romo nyonga nigu nari mwalo muthu nya gu nyi phasi. Dzimbe dzitepo nyi ngu garadzega ngudzu kholu kha nya si kodza gu vbedza tepo nya yingi ni ndriyangu ni vavelegi vangu na va si gufi ambari olu nyi nga ba nyi si vbweta.” Sigaradzo sa womini khu lisine si nga hi vbedza tshivba khu nyamani ni liphuvboni.
9. Ginani gi nga hi phasago gu wusedza litsako lathu? (Jeremiya 29:4-7, 10)
9 Ginani gi nga hi phasago gu wusedza litsako lathu? Hi nga si kodza gu manega ni litsako ha gu ema gu garadzega khu silo hi gu mba si kodza gu si vbindrugedza, ganiolu hi yeyedza gubonga khesi hi gu naso. Litigo lo gira vathu va pimisa gu khavo va yede gu manega ni womi nyo vbeleye gasi va si kodza gu manega ni litsako. Ganiolu isoso khandri lisine. Khu giyeyedzo, Jehovha a di embeya Vajudha va nga yiswa wugumbini Bhabhiloni gasi va londrola womi wawe eyi. (Leri Jeremiya 29:4-7, 10.) Ginani hi gi hevbulago? Zama gu dzi pwananisa ni giemo gyago ni gu yeyedza gubonga khu silo nya sadi u gu naso womini gwago. Dundruga gu khuwe Jehovha kha na nga gu diga wenga, ganiolu a na gu phasa. (Ndzi. 63:7; 146:5) Ndriyathu Effie a nga emisana ni mhango yi nga mu gira a si si kodzi gu gimbiya a di khuye: “Nyi di hakha giphaso gya Jehovha, gya ndrangani gwangu ni libandla. Khu kharato, nyi di wona gu kheni nyi di hadzi gu mba yeyedza gubonga nya gu tsukula satshavbo. Nyo vbweta gu yeyedza gubonga gwangu ga Jehovha ni dzipari dzangu kholu dzi nga nyi phasa.”
10. Khu ginani hi nga si kodzago gu manega ni litsako ambari ha gu emisana ni sigaradzo?
10 Hi nga si kodza gu simama na hi tsakide ambari ethu mwendro valongo wathu va gu emisana ni sigaradzo womini.b (Ndzi. 126:5) Khu ginani? Kholu litsako lathu kha li seketedwi khu siemo hi emisanago naso. Ndriyathu Maria a gu piyonera a di khuye: “Wa gu simama nu tsakide tepo wu emisanago ni sigaradzo, kha si thuli gu khiso kha wu ninge lisima gudzipwa gwago. Vbavbandze nya isoso, so thula gu khiso kha wu divali situmbiso sa Jehovha. Papayi wathu a na hi phasa gu vhikeya litsako lathu.” Dundruga gu khuwe ambari gikatawu gyathu gya gu rama kharini olu, sigaradzo sathu kha gitepwana gu fana ni tepo hi lovago gilogyo fungoni. Nya mba hweya Jehovha a na fuvisa satshavbo si hi beyago litsako.
11. Giyeyedzo gya Pawulo gi nga gu tiyisa kharini?
11 Dzimbe dzitepo, hi nga pimisa gu khethu ho emisana ni sigaradzo kholu Jehovha a gu mba hi kategisa. Hi nga phasega khu gu dundrugeya khu sithumi sa Jehovha nyo tumbege sa gale si nga emisana ni sigaradzo nya singi. Dundrugeya khu giyeyedzo gya Pawulo. Uye a di hathwa khu Jesu kamo gasi gu tshumayela mahungu nya yadi “vanyamayigo, ga dzipfhumu ni ga sanana sa Israyeli.” (Mith. 9:15) Khu lisine, owu wu diri thumo nya lisima ngudzu! Ganiolu, Pawulo a di gu emisana ni sigaradzo nya singi womini gwaye. (2 Kor. 11:23-27) Ina sigaradzo esi Pawulo a nga emisana naso si di gu thula gu khiso kha nga ba a tsakedwa gambe khu Jehovha? Khu lisine ne vbadugwana! Gu hambana ni isoso, gu timiseya gwaye gu di gu yeyedza gu khugo a di gu kategiswa khu Jehovha. (Rom. 5:3-5) Olu nga dundrugeya vbadugwana khu giemo gyago. Uwe u ngu timiseya khu gu tumbega ambari olu u emisanago ni sigaradzo nya singi. Khu kharato, u nga tiyisega gu khuwe u ngu tsakedwa khu Jehovha.
12. Gu mba si kodza gu vboheya misuwo yathu si nga hi beya kharini litsako?
12 Gilo nya wuvili gi nga hi beyago litsako: Gu mba si kodza gu tadzisa misuwo yathu. (Mav. 13:12) Lihaladzo lathu khu Jehovha ni gu bonga gwathu si ngu hi kutsa gu dzi vegeya misuwo thumoni gwaye. Ganiolu, ha gu zama gu gira silo hi gu mwalo makodzelo nyo si tadzisi khu kotani nya giemo gyathu, hi nga vbeya tshivba. (Mav. 17:22) Piyonera moyo nyo pwani khu Holly a di khuye: “Nyi diri ni misuwo nya gu hongoli Xikwatuno nya Vavhangeli nya Mufumo, gu thuma ga limbe litigo mwendro gu thuma ga thumo nyo vbahe Ramapo. Ganiolu giemo gyangu gi di vbindrugedza nigu nyi di hadzi gu mba si kodza gu vboheya misuwo yeyi. Nyi di garadzega ngudzu. Si ngu vbisa ngudzu gu vbweta gu gira silo nya singi, ganiolu u si si kodzi.” Sithumi nya singi sa Jehovha si ngu dzipwa kharato tepo si gu mba si kodza gu gira esi si si vbwetago.
13. Sa gu tshuka siemo sathu si hi himbedzeya gu gira esi hi si vbwetago, misuwo muni nyo vbevbugi hi nga dzi vegeyago?
13 Ginani gi nga hi phasago gu wusedza litsako lathu? Dundruga gu khuwe Jehovha kha hi gurumedzi gu gira silo si gu mwalo tshivbani gwathu nigu uye kha hi ninge lisima khu kotani nya esi hi kodzago gu gira thumoni gwaye. Jehovha o vbweta gu khuye hi ninganiseya ni gu tumbega. (Mik. 6:8; 1 Kor. 4:2) Uye a ngu ninga ngudzu lisima edzi hi gu idzo khu ndrani nasiri esi hi si kodzago gu gira. Kha nga olu Jehovha a gu mba vireya silo nya sikhongolo gwathu, ina ethu hi yede gu gira isoso?c Khu lisine ne vbadugwana! Khu kharato, gya gu tshuka giemo gyago gi gu himbedzeya gu gira satshavbo u si vbwetago thumoni ga Jehovha, zama gu gira esi si gomogo tshivbani gwago. Khu giyeyedzo, u nga phasa gu trenari muphya nyo khaguri mwendro gu tiyisa ndriyathu nyo khaguri a dandridego khu tanga? Ina u nga dzi vegeya misuwo nya gu tiyise muthu nyo khaguri khu khovbe ni khovbe, khu telefoni mwendro khu mesaji? Jehovha a ngu tsaka tepo u girago silo si gomogo tshivbani gwago, nigu a na gu kategisa khu kotani nya isoso! Nigu dundruga gu khuwe nya mba hweya mafuni nya maphya, hi na manega ni mathomo nya mangi nya gu thumeyi Jehovha khu dzindziya hi gu mba dzi dundrugeya! Ndriyathu Holly a nga khumbugwa gupheyani o hegisa khu gu khuye: “Tepo nyi dzipwago na nyi vbede tshivba, nyo dundruga gu kheni nyi na vbanya kala gupindruga. Nigu nyi na si kodza gu gira satshavbo nyi si vbwetago mafuni nya maphya khu gu phaswa khu Jehovha.”
14. Ginani gambe gi nga hi beyago litsako?
14 Gilo nya wuraru gi nga hi beyago litsako: Gu vbweta gu dzi tsakisa basi. Vambe vathu va ngu thumisa dzisayiti nya mabhulo gasi gu gira vathu va pimisa gu khavo litsako nya lisine la gu manwa basi khu gu dzi tsakisa. Hi nga pheya gu pimisa gu khethu ha gu gira esi hi si golago, hi renga satshavbo hi si vbwetago ni gu endra ga malanga nyo hambane-hambane hi na manega ni litsako nya lisine. Kha sa vivba gu gira esi hi si golago. Jehovha o vbweta gu khuye hi dzi buza khu silo nyo mbure a nga si vanga. Ganiolu, vathu nya vangi va tugude gu khavo esi va nga ba va pimisa gu khavo si di hadzi gu va ninga litsako, si di hegisa khu gu va beya litsako. Ndriyathu Eva a gu piyonera a di khuye: “Tepo u dundrugago khu dzindziya nya gu dzi tsakise basi, gimwalo gi na gu tsakisago.” Ha gu zama tepo yatshavbo gu dzi tsakisa basi, hi na vbeledwa khu litsako hi bwe hi garadzega.
15. Gihevbudzo muni hi nga gi hevbula ga giyeyedzo gya Pfhumu Solomoni?
15 Hi nga hevbula nya singi khu giyeyedzo gya pfhumu Solomoni maningano ni wuyelo nya mba tsakisa wu reswago khu gu vbweta gu dzi tsakisa basi. Uye zamide gu mana litsako khu gu tadzisa gudogoreya gwaye, nya nga gu hodza guhodza nya gwadi, gu dzi buza khu dzindzimo nyo mbure gumogo ni satshavbo si nga ba si kodzega gu si renga khu dzitsapawu ga tepo yile. Ganiolu, silo sesi kha sa mu ninga litsako. A di khuye: “Maho kha kodwi khu gu wona, ni ndzeve niyo kha yi garali khu gu yingisa.” (Muh. 1:8; 2:1-11) Vathu nyo khaguri va ngu pimisa gu khavo va gu mana dzitsapawu ni gu renga esi va si vbwetago va na si kodza gu manega ni litsako. Ganiolu va gu dzi kalaveya , kholu silo sesi gima kha si resi litsako nya lisine.
16. Gu phasa vambe si nga hi phasa kharini gu manega ni litsako? (Wona dzifotu.)
16 Ginani gi nga hi phasago gu wusedza litsako lathu? Jesu a hi hevbudzide gu khuye “a ngu tsaka oyu a ningago guvbindra oyu a hakhago.” (Mith. 20:35) Lidhota limwedo nyo pwani khu Alekos li di khilo: “Nyo dzi garadzeya gu gireya silo nya gu vbevbugi vambe. Tepo nyi va phasago ni gu mba dundrugeya khesi nyi si vbwetago, nyi ngu mana litsako.” Silo mune u nga girago gasi gu phasa vambe? Khu giyeyedzo, wa gu wona muthu nyo khaguri na garadzegide, zama gu mu tiyisa. Adzina kha wu na nga si kodza gu lulamisa gigaradzo gyaye, ganiolu u nga mu tiyisa khu gu mu engiseya gwadi, u mu yeyedza wuwadi ni gu mu dundrugisa gu rinya sigaradzo saye ga Jehovha. (Ndzi. 55:22; 68:19) U nga mu phasa gu dundruga gambe gu khuye Jehovha kha mu diga. (Ndzi. 37:28; Isa. 59:1) U nga dzi ningedzeya gambe gasi gu mu phasa khu ndziya nyo kongome. Khu giyeyedzo, u nga mu phuleya guhodza nyo khaguri mwendro gu vbungadza naye. Mu kovhidhari gasi u tshumayela naye, isoso si na mu tiyisa ngudzu. Dzumeleya gu khuwe Jehovha a gu thumisa gasi gu tiyisa vambe. Tepo hi thumisago tepo yathu gasi gu phasa vambe, isoso si na hi ninga litsako nya lisine! — Mav. 11:25.
Vbavbandze nya gu vege gupima avba nya gudogoreya gwago, dzi garadzeye gu phasa vambe (Wona paragrafu 16)d
17. Ginani gi nga hi phasago gu manega ni litsako nya lisine? (Ndzimo 43:4)
17 Hi nga si kodza gu simama na hiri ni litsako nya lisine ha gu manega ni wupari nyo tiye ni Papayi wathu wa dzandzini. Bhibhiliya yi ngu tiyisegisa gu khiyo Jehovha ‘gunengela gwathu nya gukhongolo.’ (Leri Ndzimo 43:4.) Khu kharato, ambari ha gu emisana ni sigaradzo womini gwathu, hi nga si kodza gu manega ni litsako. Hongoleni hi simama gu hidzimeya vbafuvbi ga Jehovha a gu Gifefe nya gupindruge nya litsako lathu! — Ndzi. 144:15.
NDZIMO 155 Hi na tsaka kala gupindruga
a Wona kwadru “Tumba Jehovha gasi u mana litsako.”
b Khu giyeyedzo, wona omu nya jw.org entrevhista ya Dennis ni Irina Christensen omu nya Mubiko N.° 5 nya 2023 wa Huwo nya Guthangeye.
c Gasi gu mana mambe mahungu, wona ndrima yi gu khiyo, “Cultive expectativas razoáveis e sinta alegria” omu nya Mukhedziseyi nya 15 nya Julho nya 2008.
d TSHAMUSELO NYA FOTU: Ndriyathu nya nyamayi a hongolago aya dzi rengeya silo, ganiolu o mana litsako khu gu rengeya sifilori ndriyathu nya nyamayi a dandridego khu tanga a vbwetago gu tiyiswa.