Sivbango sivili nya siphya sa Huwo nya Guthangeye

KHU 5 nya Outubro nya 2024, gu giridwe gitiviso nyo hathege omu nya tshangano nya mwaga gi gu khiyo: Ndriyathu Jody Jedele ni Jacob Rumph va hathidwe gasi gu thuma kha nga sivbango sa Huwo nya Guthangeye nya Dzifakazi dza Jehovha. Vandriyathu vava va di gu thumede Jehovha khu myaga nya yingi.

Ndriyathu Jedele velegidwe Missouri, Estados Unidos da América, nigu dandrisidwe lisineni. Ndranga yaye yi di gu vbanya vbafuvbi ni gipandre dzi nga ba dziri mwalo Dzifakazi nya dzingi. Khu kotani nya isoso, uye tivanide ni vandriyathu nya vangi va nga ba vata khu mayigo nyo hambane-hambane gasi vata phasedzeya gu tshumayela gipandreni mule. Uye a di samadziswa ngudzu khu lihaladzo lawe ni wumowo. A bhabhatisidwe khu 15 nya Outubro nya 1989. Uye a di gu tsakiswa ngudzu khu thumo nyo tshumayele, nigu hwane nya gu vbedze xikola a di pheya gu thuma kha nga piyonero nya tepo yatshavbo khu Setembro nya 1989.

Na ngari muphya, vavelegi va ndriyathu Jedele va di gu mu dzega gumogo ni ndriyaye nya nyamayi gasi gu wuseya Bheteli. Gu gira isoso si va kutside gu dzi vegeya misuwo nya gu hongole Bheteli, nigu vavili va si kodzide gu tadzisa misuwo yawe. Ndriyathu Jedele a di vboha Bheteli ya Wallkill khu Setembro nya 1990. Gupheya a di thuma ga Departamento de Limpeza nigu khu gu landreya a di thuma omu nya dzi Serviços Médicos.

Ga tepo yile, mabandla nya malimi nya giespanhol ya vbafuvbyana mule ma di gu dandra ngudzu nigu gu di gu vbwetega vandriyathu nya vama gasi va phasedzeya. Khu kharato, ndriyathu Jedele a di hongola ga limwedo nya mabandla yoyo nigu a di pheya gu hevbula giespanhol. Hwane nya gitepwana, a di tivana ni ndriyathu nya nyamayi nyo pwani khu Damaris a nga ba a thuma kha nga piyonera ga sirkwitu yayimweyo. Khu gu hegisa, va di tshadha va bwe va pheya gu thuma vatshavbo Bheteli kha nga patwa.

Khu 2005, va di duga khu Bheteli gasi vaya khathaleya vavelegi vawe nyo tumbege. Ndrani nya tepo yoyo, va di thuma kha nga vapiyonero nya tepo yatshavbo. Ndriyathu Jedele phasedzede kha nga muhevbudzi nya Xikola nya thumo nya wupiyonero nigu thumide omu nya Comitê de Ligação Hospitalar local ni Comitê de Construção Regional.

Khu 2013, Ndriyathu Jedele ni mwangadzi waye, va di kovhidharwi gasi va bweleya Bheteli vaya phasedzeya thumo nyo vbahe Warwick. Nigu kala olu, avo va thumide gambe Patterson ni Wallkill. Ndriyathu Jedele thumide omu nya Departamento Local de Projeto/Construção ni omu nya Serviços de Informações Hospitalares. Nigu khu Março nya 2023, a di hathwa gasi a thuma kha nga muphasedzeyi nya Kometi nya thumo. Na gu dundrugeya khu mithumo yaye, uye a di khuye: “Tepo u ningwago mithumo nya yiphya, dzimbe dzitepo u nga dzipwa na wu lemeledwa. Ganiolu, ga tepo yeyi u yede gu tumba Jehovha kholu khuye a girago satshavbo si kodzega.”

Ndriyathu Rumph a velegidwe Califórnia, Estados Unidos de América. Tepo a nga ba ari gyanana, mamayi waye kha nga ba a hongola mitshanganoni ni thumoni nyo tshumayele, ganiolu a dzi garadzede gu mu hevbudza lisine nya Bhibhiliya. Gu diga isoso, myaga yatshavbo a di gu wuseya vhovho waye nya nyamayi a gu Fakazi nyo tumbege. Vhovho waye a mu phaside gu gola lisine, nigu nari ni 13 myaga a di lomba gu gimbidzisedwa gihevbulo nya Bhibhiliya. Nigu a di bhabhatiswa khu 27 nya Setembro nya 1992. Egi gi tsakisago khu gu mamayi waye a di wuyeleya, nigu ndranga yaye yatshavbo yi di dzegeya gu dandra khu liphuvboni va bwe va bhabhatiswa.

Tepo a nga ba ari muphya ndriyathu Rumph, wonide edzi vapiyonero va nga ba va tsaka khidzo. Khu kharato, tepo a nga vbedza xikola a di pheya gu thuma kha nga piyonero khu Setembro nya 1995. Khu 2000 a di fuluga a hongola Equador aya phasedzeya omu gu nga ba gu vbwetega giphaso. Nigu eyi a di tivana ni ndriyathu nya nyamayi nyo pwani khu Inga a nga ba a thuma kha nga piyonera Canadá, nigu khu gu hegisa va di tshadha. Hwane nya gu ba va tshadhide, avo va di thuma ga lidhoropa nyo khaguri la Equador li nga ba liri ni vahuweleyi nya vadugwana. Muhuno, lomo libandla li dandrago ngudzu.

Khu gu gimbiya nya tepo, ndriyathu Rumph ni mwangadzi waye va di hathwa gasi va thuma kha nga vapiyonero nyo hathege, nigu khu gu gimbiya nya tepo kha nga vawoneleyi nya sirkwitu. Khu 2011, va di kovhidharwi gasi va gira gipandre nya turma 132 ya Gileyadhi. Hwane nya gu vbedze xikola yeyi, avo va di thuma ga sipandre nya singi sa mafuni nigu ga mithumo nyo hambane-hambane, nya nga gu thuma Bheteli, gu thuma kha nga vamisiyonaryu ni vawoneleyi nya sirkwitu. Ndriyathu Rumph manegide gambe ni lithomo nya gu khali muhevbudzi nya Xikola nya vavhangeli nya Mufumo.

Khu kotani nya tungo nya COVID-19, ndriyathu Rumph ni mwangadzi waye va di bweleya Estados Unidos. Va di kovhidharwi gasi va hongola ga Bheteli ya Wallkill, nigu ndriyathu Rumph a di mana trenamentu nya Dhepartamentu nya thumo. Khu gu hegisa, va di rumedwa gu bweleya ga Bheteli ya Equador, nigu ndriyathu Rumph a di gu thuma kha nga givbango nya Kometi nya litamo. Khu 2023, va di rumedwa Warwick. Khu Janeiro nya 2024, ndriyathu Rumph a di hathwa gasi gu thuma kha nga muphasedzeyi nya Kometi nya thumo. Na gu ganeya khu malanga a nga thuma, a di khuye: “Esi si girago thumo nyo khaguri wu khala gilo nyo hathege khandri wulanga u thumeyago avbo, ganiolu vathu u thumago navo.”

Hi ngu ninga ngudzu lisima thumo nyo dzi garadze vama vava va wu girago, nigu hi na ‘simama gu ninga lisima vama nya nga ava.’ — Filp. 2:29.