Diga milayo ni matshina nya milayo ya Nungungulu ma thangeya livhalo lago

1. Khu gevbini gilo gi hi hambanisago ni sirengo?

JEHOVHA ningide vathu gilo nyo hathege. Gu gu livhalo. Livhalo gilo gi hi girago hi hambana ni sirengo. Ho dziti kharini gu khethu Adhamu ni Evha va diri ni livhalo? Hwane nyo ba va ghohede Nungungulu, va di mu sihaleya. Va di vetwa khu livhalo lawe.

2. Livhalo lathu la gu fana ni lemi khu ndziya muni? (Wona foto vbatshani.)

² Livhalo gilo gi gomogo ndrani gwathu, gi hi phasago gu hambanisa silo nya sadi niso nyo vivbe, gi kodzago gu hi gimbidzisa guvbanyani gwathu. Muthu a gu na ni livhalo nya mba hevbudzwa gwadi a nga fananiswa ni paketi yi ghohekidego lemi. Mavimbi ni tshivba nya linene si nga pengisa paketi yoyo. Ganiolu lemi yi thumago gwadi yi nga phasa mugimbidzisi nya paketi gu yi gimbidzisa ndziyani nya yadi. Khu ndziya nyo fane, ha gu hevbudza gwadi livhalo lathu li nga hi thangeya gwadi.

3. Ginani gi nga hi dugeleyago ha gu mba hevbudza gwadi livhalo lathu?

³ Livhalo lathu lo mba hevbudzwa gwadi, kha li na nga hi tivisa ho ba hi vbweta gu gira silo nyo vivbe. (1 Thimoti 4:1, 2, NM) Li nga bwe li hi gira hi pimisa gu khethu “guvivba . . . khwadi.” (Isaya 5:20) Jesu a di embeya valandreyi vaye khuye: “Gi ngu vboha gikhati nya gu vatshavbo vale va na mi songago va na pimisa gukhavo va gu rungudza ni gu thumela Nungungulu.” (Johane 16:2) Isoso khiso va nga ba va pimisa vale va nga songa mupizane Sitefane. (Mithumo 6:8, 12; 7:54-60) Gukhugeya gale, vakhongeyi nya vangi va ngu gira wughevenga nyo thise nya nga gu songa, va bwe khavo vo gireya isoso Nungungulu. Ganiolu, khu lisine iso avo va girago, si ngu dwanisana ni milayo ya Nungungulu. (Ekisodha 20:13) Somo guagani gu khiso, livhalo lawe kha li va thangeyi gwadi!

4. Hi nga tiyisega kharini gu khethu livhalo lathu li ngu thuma gwadi?

⁴ Khu kharato hi nga tiyisega kharini gu khethu livhalo lathu li ngu thuma gwadi? Milayo ni matshina nya milayo ma gomogo omu nya Bhibhiliya ma “ngu phasa gu hevbudza ni gu kawuka ni gu luleka, ni gu dandrisa khu gululama.” (2 Thimoti 3:16) Hi yede gu hevbula Bhibhiliya tshigu ni tshigu, hi dundrugeya khu iso hi si hevbulago, hi bwe hi vbanya khiso. Khu ndziya yoyo, hi na hevbula gu pimisa khu ndziya eyi Jehovha a pimisago khiyo. Khavbovbo hi nga tiyisega gu khethu livhalo lathu li ngu hi thangeya gwadi. Hongoleni hi ganeya khu edzi hi nga thumisago khidzo milayo ni matshina nya milayo ya Jehovha gasi gu hevbudza livhalo lathu.

DIGA MILAYO YA NUNGUNGULU YI GU HEVBUDZA

5, 6. Milayo ya Nungungulu yo hi phasa kharini?

⁵ Ho ba hi vbweta gu phaswa khu milayo ya Nungungulu, hi yede gu gira simbe vbavbandze nyo yi leri mwendro gu yiti basi. Hi yede gu yi gola ni gu yi ninga githawo. Bhibhiliya yari khiyo: “Nyenyani guvivba, mu gola wuwadi.” (Amosi 5:15) Ganiolu hi nga si gira kharini isoso? Gu vbwetega gu hi hevbula gu wona silo khu ndziya eyi Jehovha a si wonago khiyo. Nga dundrugeya khesi: Dzi dundrugeye na wu si mani gwadi ligovbe, dhogodheya wago a gu ruma gu hodza guhodza nya gwadi, gu tiyisa mili, ni gu vbindrugedza silo nyo khaguri guvbanyani gwago. U landreya wusingalagadzi waye, si bwe si gu kata! Wa gu dzipwa kharini khu wusingalagadzi wa dhogodheya yoyo?

⁶ Khu ndziya nyo fane, Muvangi wathu a ngu hi ninga milayo gasi gu hi vikeya ga mihandro nyo vivbe nya gighoho ni gu tshukwadzisa womi wathu. Khu giyeyedzo, Bhibhiliya ya gu hi hevbudza gu khiyo kha hi yeli gu lipha, gu ndraga milayo, guba, gu gira wubhayi, gu manega ni maghilivindra mwendro gu gira ni gevbini gi gimbileyanago ni wudhemoni. (Leri Mavingu 6:16-19; Gutuledwa 21:8) Tepo hi wonago mihandro nya yadi nyo engise Jehovha, lihaladzo lathu khuye ni milayo yaye lo dandra.

7. Matimo nya Bhibhiliya ma gu hi phasa kharini?

⁷ Kha si lombi gu kala hi tshaniseka khu mihandro yi manwago khu gu ndraga milayo ya Nungungulu gasi guti iso nya sadi ni esi nyo vivbe. Hi nga hevbula khu sihoso si giridwego khu vambe teponi ya gale. Siyeyedzo soso si lovidwe omu nya Bhibhiliya. Mavingu 1:5 wari khuye: ‘Muthu nya guti a gupwa, a gu engedzela mapimo.’ Mapimo mwendro sihevbudzo soso sa guta khiyo ga Nungungulu nigu khiso sihevbudzo nya lisima ngudzu ga satshavbo! Khu giyeyedzo, nga dundrugeya khedzi Dhavhidhe a nga tshaniseka khidzo hwane nyo ba a ndragide nayo wa Jehovha a gira wubhayi ni Bheti-Sebha. (2 Samuweli 12:7-14) Tepo u lerigo matimo yoyo, dzi wudzise gu khuwe: ‘Dhavhidhe na si potside kharini sigaradzo soso? Nari khatshi kheni nyi gomogo ga giemo nya nga igyogyo, nyi di hadzi gira kharini? Nari khatshi nyo lingwa gu gira wubhayi, ina nyi di hadzi gira nga Dhavhidhe mwendro nga Josefa? (Genesi 39:11-15) Ha gu dundrugeya gwadi khu mihandro nyo vivbe nya gighoho, hi na ‘nyenya guvivba’ gambe ni gambe.

8, 9. a) Ginani egi livhalo lathu li hi phasago gu gira? b) Livhalo lathu la gu thumisana kharini ni matshina nya milayo ya Jehovha?

⁸ Hi ngu potsa silo si vengwago khu Nungungulu. Ganiolu ginani hi yedego gu gira ho ba hiri ga giemo gi gu mwalo nayo nyo kongome nya Bhibhiliya? Hi na siti kharini esi Nungungulu a vbwetago gu khuye hi gira? Ho ba hi dzumeya gu khethu Bhibhiliya yi hevbudza livhalo lathu, hi na hunga silo khu wugengeyi.

⁹ Kha nga olu Jehovha a hi haladzago, uye a gu hi ninga matshina nya milayo ma nga thangeyago livhalo lathu. Uye wari khuye: “Eni kheni [Jehovha, NM] Nungungulu wago, a gu hevbudzago ugo nya gwadi gu gu phasago, oyu a gu thangelago ga ndzila u yelago gu gimbila khiyo.” (Isaya 48:17, 18) Tepo hi dundrugeyago gwadi khu matshina nya milayo nya Bhibhiliya hi bwe hi dzumeleya gu khethu ma khuha monyo wathu, hi na si kodza gu hevbudza ni gu tshukwadzisa livhalo lathu. Isoso sa gu hi phasa gu hunga silo khu wugengeyi.

DIGA MATSHINA NYA MILAYO YA NUNGUNGULU MA GU THANGEYA

10. Ginani litshina nya nayo, nigu Jesu thumiside kharini matshina nya milayo guhevbudzani gwaye?

¹⁰ Litshina nya nayo lisine nya litshina li thangeyago gupima gwathu gasi gu hi phasa gu hunga gwadi silo. Guti matshina nya milayo ya Jehovha ga gu hi phasa gu pwisisa edzi a pimisago khidzo ni gighelo gi mu girago a hi ninga milayo nyo khaguri. Jesu thumiside matshina nya milayo gasi gu hevbudza vapizane vaye gu khuye mavbanyelo ni sigiro si na ni mihandro yaso. Khu giyeyedzo, uye hevbudzide gu khuye giviti gi nga wusa mayunga, ni gu khuye gu dundrugeya silo nyo vivbe gu nga yisa wubhayini. (Matewu 5:21, 22, 27, 28) Ha gu dzumeya gu thangedwa khu matshina nya milayo ya Jehovha, livhalo lathu li na hevbudzwa gwadi, nigu hi na gira silo si na reseyago wuzundzo Nungungulu. — 1 Vakorinto 10:31.

11. Livhalo nya muthu li nga hambana kharini ni la mumbe?

¹¹ Ambari olu maKristo ma hevbudzago livhalo lawe khu gu thumisa Bhibhiliya, ma nga tshuka ma manega ni mawonelo nyo hambane avba nya silo nyo khaguri. Giyeyedzo gimwegyo nya isoso, gu seya wadwa. Bhibhiliya kha yi ganeyi gu khiyo si vivbide gu seya wadwa, ganiolu iyo ya gu hi gengedza gu khiyo kha hi yeli gu seya ngudzu wadwa mwendro gu leva. (Mavingu 20:1; 1 Thimoti 3:8) Ina isoso so thula gu khiso kha si hungi gu khiso muKristo a dundrugeya khu simbe silo tepo a hungago gu khuye a na seya wadwa mwendro ne, o nga nga ne seya ngudzu basi? Ahihi. Ambari olu livhalo laye li mu dzumeleyago gu seya wadwa, gu ngo vbwetega gu a dundrugeya khu livhalo la vambe.

12. Malito ma gomogo omu ga Varoma 14:21 ma nga hi phasa kharini gu ninga githawo livhalo la vambe vathu?

¹² Pawulo yeyedzide gu khuye hi yede gu ninga githawo livhalo la vambe tepo a nga khuye: “Gwadi gumba hodza nyama, ni gumba sela wadwa, ni gumba gira gilo wa gu dziti gukhuwe gi na tshunganedzisa ndriyago a thega gighohoni.” (Varoma 14:21) Khu kharato, ambari olu hi dzumeledwago gu seya wadwa, hi na ba hi dzi emisede gu dzi hiya ho ba hi dziti gu khethu si na khunguvanyisa livhalo nya mumbe muKristo. Adzina saye womo ndriyathu a nga ba ari maleveni na si gu hevbuli lisine oyu a hungidego gu mba seya gambe wadwa. Kha hi vbweti gu gira gilo gi na mu girago a bweleleya mavbanyelo yaye ya gale. (1 Vakorinto 6:9, 10) Ahati ndriyathu yoyo o ba a hi endrede gaya gwathu, ina hi na zama gu mu gurumedza gu seya wadwa, ambari a gu ba a bomba? Ahihi!

13. Thimoti yeyedzide kharini githawo khu livhalo la vambe gasi gu va phasa gu dzumeya mahungu nya yadi?

¹³ Tepo Thimoti a nga ba ari lidzaha, a di dzumeya gu beleya wugwera ambari olu si nga ba si vbisa. A di gu dziti gu khuye gu hana wugwera gu diri ni lisima ga vaJudha a nga hadzi gu ya va tshumayela. Kha nga Pawulo, Thimoti kha nga ba a vbweta gu khunguvanyisa muthu. (Mithumo 16:3; 1 Vakorinto 9:19-23) U dzi emisede nuwe gu dzi hiya silo nyo khaguri gasi gu phasa vambe?

“HONGOLENI HI DANDRE HIYA MBELI”

14, 15. a) Hi nga vidzwa kharini khu liphuvboni? b) Makristo ma vidzidwego ma gu phara kharini vambe vathu?

¹⁴ Hatshavbo hi yede gu “tshiya hwane dzindrima nya guhegule nya sihevbulo nya wukristo” hi “dandre hiya mbeli.” (Vahebheru 6:1) Kha hi khali maKristo nyo vidzwe basi khu gu ba na hiri lisineni khu myaga nya yingi. Gasi gu hi vidzwa khu liphuvboni hi yede gu dzi garadza. Hi yede gu simama gu dandra khu guti ni mapwisiselo yathu. Khu kharato, gu vbwetega gu hi leri Bhibhiliya tshigu ni tshigu. (Ndzimo 1:1-3) Wa gu leri Bhibhiliya tshigu ni tshigu, u naya u yi pwisisa gwadi milayo ni matshina nya milayo ya Jehovha.

¹⁵ Khu wevbini nayo nya lisima ngudzu ga maKristo? Nayo nya lihaladzo. Jesu embede vapizane vaye khuye: “Khavbo vathu va na dzitigo nya gukhavo mu vapizane vangu, mwa gu golanani khu gyanu.” (Johane 13:35) Lihaladzo la gu ranwa pwani “nayo nya Wufumu” ni “gutadzisega nya nayo.” (Jakobe 2:8; Varoma 13:10) Kha si hi samadzise gu ba na lihaladzo liri ni lisima ngudzu, kholu Bhibhiliya yari khiyo “Nungungulu lihaladzo.” (1 Johane 4:8) Ga Nungungulu, lihaladzo khandri gudzipwa nyo khaguri basi. Uye a gu yeyedza lihaladzo laye khu mithumo yaye. Johane lovide gu khuye: “Khidzo kharato Nungungulu a nga yeyedza lihaladzo laye ga ethu. Nungungulu a di rumela Mwamana waye wa Moyo tigoni, gasi ethu hi mane guvbanya khu kotani yaye.” (1 Johane 4:9) Tepo hi yeyedzago lihaladzo lathu khu Jehovha, Jesu, vandriyathu ni vambe vathu, ha gu yeyedza gu khethu hi maKristo ma vidzidwego. — Matewu 22:37-39.

16. Khu ginani hi engedzeyago gu ninga ngudzu lisima matshina nya milayo tepo hi yago hi khala maKristo nyo vidzwe?

¹⁶ Tepo hi yago hi khala maKristo nyo vidzwe, ha guya hi ninga ngudzu lisima matshina nya milayo. Gutala nya dzitepo milayo yo thumiswa avba nya siemo nyo kongome, ganiolu matshina nya milayo ma nga hi phasa avba nya siemo nyo hambanehambane. Khu giyeyedzo, gyanana kha gi yi woni mhango nyo gire wupari ni vathu nyo vivbe, khu kharato vavelegi vagyo gu vbwetega gu va gi vegeya milayo gasi gu gi vikeya. (1 Vakorinto 15:33) Ganiolu tepo gyanana gi yago gi vidzwa khu liphuvboni, gya gu hevbula gu thumisa matshina nya milayo nya Bhibhiliya. Matshina yoyo ma na gi phasa gu hatha dzipari nya dzadi. (Leri 1 Vakorinto 13:11; 14:20.) Tepo hi yago hi dundrugeya khu matshina nya milayo nya Bhibhiliya, hi na manega ni livhalo nyo tumbege. Khu kharato, hi na si pwisisa gwadi esi Nungungulu a si vbwetago gu khuye hi gira ni ga gevbi giemo guvbanyani gwathu.

17. Khu ginani hi nga ganeyago gu khethu hi na ni satshavbo si vbwetegago gasi gu hunga silo khu wugengeyi?

¹⁷ Hi na ni satshavbo si vbwetegago gasi gu hunga silo si tsakisago Jehovha. Omu nya Bhibhiliya, hi ngu mana milayo ni matshina nya milayo ma hi phasago gu khala vathu nya ‘guvbeleye, hi kodza gu gira mithumo yatshavbo nya yadi.’ (2 Thimoti 3:16, 17) Matshina nya milayo nya Bhibhiliya ma gu hi phasa gu pwisisa edzi Jehovha a pimisago khidzo. Ganiolu hi yede gu dzi garadza gasi gu hi ma mana. (Vaefeso 5:17) Gasi gu hi phasa, hi na ni Índice das Publicações da Torre de Vigia, Guia de Pesquisa para Testemunhas de Jeová, Watchtower Library, BHIBLIYOTEKA ya Torre de Vigia omu nya interneti, ni JW Library. Ha gu thumisa sipandre sesi, hi na phasega avba nya gihevbulo gyathu habune ni avba nya wukhozeyi wathu nya ndranga.

LIVHALO LI HEVBUDZIDWEGO KHU BHIBHILIYA LI NGU RESA MAKATEGWA

18. Ginani gi na dugeleyago ha gu thumisa milayo ni matshina nya milayo ya Jehovha guvbanyani gwathu?

¹⁸ Womi wathu wu ngu tshukwata ngudzu tepo hi thumisago milayo ni matshina nya milayo ya Jehovha! Ndzimo 119:97-100 yari khiyo: “Idzo nyi wu golago khidzo nayo wago! Litshigu latshavbo nya gu alakanya uwo. Sirumo mwendro sileletelo sago si ngu nyi bangaladza gikhati gyatshavbo, si ngu nyi ninga guti guvbindra valala vangu. Nyi ngu pimisa gwadi guvbindra vahevbudzi vangu, kholu nyi ngu alakanyela sileletelo sago. Nyi nguti guvbindra madhota mwendro vathu va dandridego khu tanga, kholu nyi ngu vegisa sileletelo sago.” Ha gu dzi ninga tepo gasi gu dundrugeya gwadi khu milayo ni matshina nya milayo ya Nungungulu, hi na gira silo khu gu pwisisa ni wugengeyi. Nigu tepo hi thumisago milayo ni matshina nya milayo ya Nungungulu gasi gu hevbudza livhalo lathu, hi na “manela tanga ni giemo gya Kristo.” — Vaefeso 4:13.