Ndziya nyo gire khiyo gihevbulo nya Bhibhiliya Gi phasago ngudzu ni gu tsakisa

Josuwa na gu leri nayo; mabhiyo ya Jeriko ma tshungunudwa, ndranga ya Rahabhe yi simama na yi tiyide; Josuwa a khusedza mandza yaye ndzadzini na gu gombeya

JOSUWA a di yede gu thangeya va na Israyeli a va yisa Tigoni nya Gitumbiso. Isoso si di hadzi garadza ngudzu. Ambari ulolo, Jehovha mu tiyiside khu gu mu embeya khuye tiya hwambo u manega ni tshivba. Uye a di embeya Josuwa gu khuye a gu leri ni gu engisa Nayo, a na hunga silo khu wugengeyi nigu a na dugeleya. — Josuwa 1:7, 8.

Ha gu vbanya omu nya “gikhati nya sigaradzo,” khu kharato guvbanya nugo gu na garadza. (2 Thimoti 3:1) Ha gu vbweta gu dugeleya nga Josuwa, gu vbwetega gu hi landreya wusingalagadzi owu Jehovha a mu ningidego. Gu vbwetega gu hi leri Bhibhiliya tshigu ni tshigu ni gu thumisa esi hi si hevbulago gasi gu hunga silo khu wugengeyi.

Ganiolu vambe vbakari gwathu adzina kha va dziti edzi va nga hevbulago khidzo, mwendro adzina kha va gu goli gu hevbula. Ambari ulolo, gihevbulo nya Bhibhiliya nya muthu khu abune gi na ni lisima ngudzu. Tepo u wonago gipandre yi gu khigyo “Nga yedza gu gira esi” u na mana dzindziya dzi na gu girago u phasega khu gihevbulo gyago u bwe u gi tsakeya ngudzu.

Muembi nya dzindzimo a di embeleya khuye: “Nyi gimbidzise khu ndzila nya sileletelo sago, kholu khiso si nyi tsakisago.” (Ndzimo 119:35) Anuwe u nga tsakiswa khu gu hevbula Lito la Nungungulu. U na tugula silo nya singi ngudzu nya sadi tepo u yago u hevbula Bhibhiliya.

Ambari olu u gu mba thangeya litigo nga Josuwa, u na ni sigaradzo sago nuwe. Khu kharato, hevbula ni gu engisa Lito la Nungungulu kha nga Josuwa. Wa gu gira isoso, u na hunga silo khu wugengeyi nigu u na dugeleya.

NGA YEDZA GU GIRA ESI

Gombeya nu si pheyi gu hevbula. Bhibhiliya yi na ni mapimo ya Jehovha, nigu ayo ma lovidwe gasi gu phasa uwe. Khu kharato tepo u lerigo Bhibhiliya, lomba Jehovha gasi a gu phasa gu pwisisa esi u lerigo, gu si dundruga, ni gu si thumisa gasi gu hunga silo khu wugengeyi guvbanyani. — Ezira 7:10.
Dzi gire siwudziso tepo u lerigo Bhibhiliya mwendro mabhuku ma seketedwago omu nya Bhibhiliya. Khu giyeyedzo: ‘Ginani nyi gi hevbulago khu Jehovba avba nya gipandre gegi? Esi sa gu yelana kharini ni hungo nya mahungo nya Bhibhiliya? Nyi nga si thumisa kharini gasi gu phasa vambe?’
Dundrugeya khesi u si hevbulago. Ema vbadugwana, u dundrugeya khesi u ngarigo gu leri. Dzi wudzise gu khuwe: ‘Sa gu nyi gira nyi dzipwa kharini? Khu ginani nyi dzi pwago kharato? Sa gu yelana kharini ni esi si nyi dugeledego, esi si nyi dugeleyago olu, mwendro esi si nga nyi dugeleyago mindru wa tshigu? Nyi nga thumisa kharini litshina leli nya nayo mwendro wusingalagadzi wowu guvbanyani gwangu?’ (Joba 23:5; Ndzimo 49:3) Tepo u dundrugeyago, zama gu wona gu khuwe u ngu kodza gu tshamuseya gighelo gi girago Jehovha a embeya vathu vaye gu potsa sigiro nyo khaguri. Mwendro gu dundrugeya khu mihandro yi nga hadzi manwa khu muthu nyo khaguri u ngarigo gu leri matimo yaye nari khatshi a di giride silo khu yimbe ndziya. — Dhewuteronome 32:28, 29.
Thumisa gudundrugeya gwago tepo u lerigo. Khu giyeyedzo, u nga dundrugeya khesi si nga dugeleya tepo vandruye va Josefa va nga mu rengisa ga va na Ismayeli? (Genesi 37:18-28) Ginani u gi wonago, u gi pwago, gi nungeyago? Dzi vege wulangani nya vathu vovo. Ginani va nga ba va gi pimisa ni gu gipwa? Wa gu thumisa gudundrugeya, gihevbulo gyago gi na phasa ngudzu.
Thumisa dziferameta nyo gevisise khidzo hi ningwago khu hengeledzano. Isoso si nga gira wugevisisi wago wu tsakisa. Hevbula gu thumisa dziferameta dzodzo khu lidimi lago, omu nya internet ni edzi nyo ghandlwe. U nga thavi gu lomba vambe gasi va gu phasa gu dzi thumisa gwadi. Khu giyeyedzo, Índice das Publicações da Torre de Vigia mwendro Guia de Pesquisa para Testemunhas de Jeová yi nga gu phasa gu mana esi si lovidwego maningano ni mahungu nyo khaguri yi bwe yi gu tshamuseya mavhesi nya mangi nya Bhibhiliya. Thumisa gambe apêndices nya Tradução do Novo Mundo da Bíblia Sagrada. Idzo dzi na ni mahungu ma phasago maningano ni dzimapa, sasamedzo nya sigiro, mipimo ni mitengo, ni simbe silo.
Wusedza sipandre nya lisima. Isoso si na gu phasa gu dundruga esi u si hevbudego. Gimbe gambe, bhuleya vambe esi u si hevbudego. Gyomo u nga gi thumisago thumoni gwago nyo tshumayele? Khu gu gira silo soso, u na kodza gu dundruga sipandre nya litshina nigu vambe navo va na phasega khu gihevbulo gyago.