Ganeya lisine

1, 2. Ginani a gi thumisidego Sathane gasi gu pengisa vathu vatshavbo?

SIGIRO nyo khaguri nya nga dzitelefoni, dzimovha ni dzijilera, si ngu gira womi wu tsakisa. Simbe sigiro, nya nga siphisa, dzimina, dzisigari, ni dzibhomba, sa gu vega womi wathu mhangoni. Ganiolu gu na ni gimbe gilo nya mhango ngudzu guvbindra satshavbo sesi, gi vbedzago vathu nya vangi. Gilo muni? Malipha! Gulipha so thula gu ganeya gilo u dzitigo gukhuwe khandri lisine, gasi gu kanganyisa muthoyo. Khu mani a ganedego malipha nyo pheye? Khu Dhiyabhulosi! Jesu Kristo mu ranide gu khuye “babe nya malipha.” (Leri Johane 8:44.) Lini a ganedego malipha nyo pheye?

² Uye giride isoso magumi mazana myaga yi vbindridego thembweni ga Edheni. Adhamu ni Evha va di gu dzi buza khu womi nya wadi paradhesini va nga ba va ningidwe khu Jehovha. Nungungulu a di va embede gu khuye va gu hodza “handro nya simbo nya guti gu hambanisa silo nya sadi niso nyamba sadi,” va nafa. Ambari olu Sathane a nga ba a siti isoso, uye thumiside nyoga gasi guya embeya Evha, khiyo: “Khu lisine kha mu na ngafa gilo.” Ayoyo khayo malipha nyo pheye. Sathane a di bwe khuye: “Nungungulu a ngu dziti nya gukhuye, litshigu mu na gu wu hodzago, mu na tulega maho, mu khala kha nga Nungungulu; muti esi nya sadi ni esi nya guvivbe.” — Genesi 2:15-17; 3:1-5.

3. Khu ginani malipha ya Sathane ma vivbidego ngudzu, nigu khu yevbini mihandro nya malipha yoyo?

³ Malipha ya Sathane ma di vivbide ngudzu kholu a di gu dziti gu khuye Evha a gu khodwa gwaye a hodza handro wule, a di hadzi gufa. Nigu khiso kamo isoso si nga dugeleya. Evha ni Adhamu kha va engisa gileletelo gya Jehovha nigu va hegiside khu gufa. (Genesi 3:6; 5:5) Guvbindra isoso, khu kotani nya gighoho gya Adhamu, “vatshavbo va ghohide.” Khu lisine, “gufa gu fumide . . . ni ga vale va ngamba ghoha nga Adhamu a nga yeyisago NungunguIu.” (Varoma 5:12, 14) Khu gighelo gyogyo kha ha vbeleya nigu kha hi vbanyi kala gupindruga nga edzi Nungungulu a nga ba a si vbwetide khidzo. Wulangani nya isoso, ho vbanya basi gipimo nya “70 myaga avo va gu ni tshivba va gu vbohisa 80 myaga,” ni gu womi wathu wu “tade khu sigaradzo ni gu tshaniseka.” (Ndzimo 90:10) Satshavbo sesi so dugeleya khu kotani nya malipha ya Sathane!

4. a) Siwudziso muni hi yedego gu si hlamula? b) Guya khu Ndzimo 15:1, 2, khu mani basi a nga khalago pari ya Jehovha?

⁴ Jesu ganede esi, khu Sathane: “Gima a si gu emeli lisine, kholu gwaye limwalo Iisine.” Sathane kha vbindrugedza. Uye a ngari “mupembi nya litigo latshavbo” khu malipha yaye. (Gutuledwa 12:9) Ganiolu ethu kha hi vbweti gu kanganyiswa khu Sathane. Khu kharato gu vbwetega gu hiti mihlamulo nya siwudziso siraru. Sathane o pengisa kharini vathu muhuno? Khu ginani vathu va liphago? Nigu hi nga ganeya kharini lisine tepo yatshavbo gasi hi si luzi wupari wathu ni Jehovha, nga Adhamu ni Evha? — Leri Ndzimo 15:1, 2.

EDZI SATHANE A PENGISAGO KHIDZO VATHU

5. Sathane a gu kanganyisa kharini vathu muhuno?

⁵ Hi nga vhika gu pengiswa khu Sathane. Mupostoli Pawulo a di khuye: “Kha hi hangwi khu wugengeli waye.” (2 Vakorinto 2:11) Hi ngu dziti gu khethu khu Sathane a fumago litigo latshavbo, gupata ni wukhongeyi nya malipha, mifumu nya wukanganyisi, ni dzinogosi nya wukanganyisi. (1 Johane 5:19) Khu kharato kha si hi samadzisi tepo Sathane ni madhimoni yaye va khutsedzeyago vathu nya tshivba gu ganeya “malipha.” (1 Thimoti 4:1, 2) Khu giyeyedzo, vambe varengisi va gu ganeya malipha khu silo va rengisago gasi gu kanganyisa vathu, va va rengiseya silo si vegago mhangoni womi wawe mwendro gu va surubanya dzitsapawu dzawe.

6, 7. a) Khu ginani si vivbidego ngudzu gu vathangeyi nya wukhongeyi va lipha? b) Malipha muni u mapwago na ma ganedwa khu vathangeyi nya wukhongeyi?

⁶ Si vivbide ngudzungudzu ga vathangeyi nya wukhongeyi gu ganeya malipha. Khu ginani? Kholu o tshuka muthu nyo khaguri a khodwa sihevbudzo sawe nya malipha a gira silo si vengwago khu Nungungulu, a na luza lithomo nyo vbanye kala gupindruga. (Hoseya 4:9) Jesu a di gu dziti gu khuye vathangeyi nya wukhongeyi va matshiguni yaye va di gu kanganyisa vathu. A di tiya a va embeya khuye: “Libango gwanu, enu vapfhadzi, vahevbudzi nya Nayo ni Vafarisi, mu legalegago ni mayigo, mu khilela mataro mu gimbila mu vbweta mupizane moyo basi. Na mu mu mane, mwa gu mu nyenyezisa, . . . a gu fanedwa khu gu rinywa phalani nya nilo mwendro Ghehena,” ugogo gufuviswa nya pindrugedwa. (Matewu 23:15) Jesu a di khuye vathangeyi vale nya wukhongeyi va di gu fana ni papayi wawe Dhiyabhulosi, a gu “gighevenga.” — Johane 8:44.

⁷ Muhuno nugo gu na ni vathangeyi nya vangi nya wukhongeyi. Avo va gu ranwa pwani vapaderi, vaphasi nya mhamba, vabhispo, mwendro khu mambe malina. Gu fana ni vaFarisi, avo kha va hevbudzi lisine nya Lito la Nungungulu ganiolu “va digide gu landrisa lisine la Nungungulu, va gu landrisela malipha.” (Varoma 1:18, 25) Mambe nya malipha yoyo khayo nya nga aya: guvbya ndzadzini, gu mbafa nya hefemulo, guvelegwa nyaluphye, ni gu khavo Nungungulu a ngu dzumeya gutshadha nya vathu nya sivbango nya wuvelegi nyo fane.

8. Malipha muni ma na ganedwago khu vathangeyi nya politika nugunugu, ganiolu hi yede gu rini?

⁸ Vathu nya politika navo va ngu lipha gasi gu kanganyisa vathu. Limwedo nya malipha nya makhongolo va na ganeyago nugunugu khayo nyo pwani “litigo li lade, gu mwalo gilo.” Ganiolu “khavbo avbo gu natago, khu gipitipiti, gumbemba vbatshani gwawe.” Khu kharato hi nga khodwi ga vathangeyi vovo nya politika. Va ganeyago gu khavo silo si ngu tshukwata. Lisine kheli nya gu hi ngu dziti gu khethu “litshigu la Pfhumu li nata nga mbafa, vbakari nya wutshigu.” — 1 Vatesalonika 5:1-4.

KHU GINANI VATHU VA LIPHAGO?

9, 10. a) Khu ginani vathu va liphago, nigu khu yevbini mihandro yakone? b) Ginani hi yedego gu gi dundruga khu Jehovha?

⁹ Muhuno, khandri vathu nya tshivba basi va liphago. Ndrima nya revhista National Geographic yi gu khiyo “Khu ginani hi liphago,” yari khiyo “malipha mo tidwa nga giolovedzo guvbanyani nya vathu.” Khu mambe maganelelo, vathu va gu pimisa gu khavo gu lipha khandri gigaradzo. Gutala nya dzitepo vathu vo lipha gasi gu dzi vhikeya, adzina gasi gu siha gihoso mwendro gighoho nya gikhongolo va nga gira. Va ngu lipha gambe gasi gu mana dzitsapawu mwendro gu wuyedwa khu ndziya nyo khaguri. Ndrima yoyo yo ganeya gambe khiyo vambe va ngu tiya gu lipheya “vathu va si va tigo, sithumi-kwawe, dzipari, ni ava va va haladzago.”

¹⁰ Khu yevbini mihandro nya malipha yatshavbo yoyo? Vathu kha va ngo tumbana, nigu wupari nya wungi wo tshungunuga. Khu giyeyedzo, nga dundrugeya khedzi si mu vbisago khidzo mwama nyo tumbege a gu tugula gu khuye mwangadzi waye giride gilogyo, khavbovbo a mu lipheya gasi gu siha esi a giridego. Mwendro, nga dundrugeya khedzi si vivbidego khidzo gu mwama a tshanisa mwangadzi waye ni sanana saye ndrangani, ganiolu o ba ari vathuni a gira khatshi a ngu va haladza. Vathu vovo vo kanganyisa vambe vathu, ganiolu gu vbwetega gu hi dundruga gu khethu Jehovha kha hi mu kanganyisi. Bhibhiliya yari khiyo “satshavbo somo tendrelani mahoni ga Nungungulu.” — Vahebheru 4:13.

11. Ginani hi gi hevbulago ga giyeyedzo nyo vivbe gya Ananiya ni Safira? (Wona foto gupheyani nya ndrima.)

¹¹ Omu nya Bhibhiliya, gu na ni giyeyedzo nya patwa nyo khaguri nya maKristo wu nga kutsedzedwa gu lipheya Nungungulu khu Sathane. Ananiya ni Safira va zamide gu kanganyisa vapostoli. Avo va di rengisa gipeto gyawe, khavbovbo va ya ningeya basi gipandre nya dzitsapawu ga vapostoli. Ananiya ni Safira va di gu vbweta gu samadzisa vambe libandlani, khu kharato va di embeya vapostoli gu khavo va ningede dzitsapawu dzatshavbo. Ganiolu Jehovha a di gu dziti gu khuye va di gu lipha, nigu a va tsayiside khu isoso. — Mithumo 5:1-10.

12. Ginani gi na dugeleyago vale va ganeyago malipha nyo vivbe va gu mba dzi laya, nigu khu ginani?

¹² Jehovha o dzipwa kharini khu vathu va liphago? Vatshavbo va ganeyago malipha nyo vivbe, va bwe va si dzi layi va na rinywa “tsivani nya nilo,” nga Sathane. Khu mambe maganelelo, va na fuviswa kala gupindruga. (Gutuledwa 20:10; 21:8; Ndzimo 5:6) Khu ginani? Kholu Jehovha a gu wona valiphi vovo nga edzi a wonago khidzo vale va vbanyago nga “dzimbwa” a gu vale va girago silo nyo nyenyeze mahoni ga Jehovha. — Gutuledwa 22:15.

13. Ginani hi gi tigo khu Jehovha, nigu isoso so hi kutsa gu gira ginani?

¹³ Hi ngu dziti gu khethu Jehovha “kha liphi kha nga muthu” nigu “Nungungulu kha dzi kodzi gu hi senga.” (Mitengo 23:19; Vahebheru 6:18) Jehovha a ngu “venga . . . lidimi nya guganele malipha.” (Mavingu 6:16, 17) Ho ba hi vbweta gu mu tsakisa, hi yede gu ganeya lisine. Khu kharato kha hi ‘lipheyani khu gyathu.’ — Vakolosi 3:9.

HA GU ‘GANEYA LISINE’

14. a) Ginani gi hambanisago maKristo nya lisine ni va nya wukhongeyi nya malipha? b) Tshamuseya litshina nya nayo li gomogo omu ga Luka 6:45.

¹⁴ Makristo nya lisine ma hambanide ni va nya wukhongeyi nya malipha khu ndziya muni? Khu gu ‘ganeya lisine.’ (Leri Zakariya 8:16, 17.) Pawulo a di khuye: “Hi ngu dzi wonegisa gukhethu hi sithumi sa Nungungulu . . . khu mahungu yathu nya lisine.” (2 Vakorinto 6:4, 7) Nigu Jesu a di khuye vathu vo ganeya “iso si tadego monyoni.” (Luka 6:45) Isoso so thula gu khiso muthu nyo tumbege a na ganeya lisine. A na ganeya lisine ga vathu a si va tigo, sithumi-kwawe, dzipari, ni ava a va haladzago. Hongoleni hi ganeya khu siyeyedzo nyo khaguri nya edzi hi nga yeyedzago khidzo gu khethu ha gu zama gu tumbega siloni satshavbo.

15. a) Khu ginani si vivbidego gu manega ni mavbanyelo mavili? b) Ginani gi nga phasago vaphya gu pala kutsedzelo nya dzipari? (Wona tshamuselo wa vbavbatshi.)

¹⁵ Wa gu ba uri muphya, adzina u ngu vbweta gu tsakedwa khu dzipari dzago. Khu kotani nya gudogoreya gogo, vambe vaphya va na ni mavbanyelo mavili. Vo vbweta gu tidwa nga vathu va agidego vo ba vari ni dzindranga dzawe mwendro mitshanganoni, ganiolu vo ba va romo omu nya dzisayiti nya mabhulo mwendro ni vathu va gu mba thumeya Jehovha mavbanyelo yawe mambe. Avo va nga thumisa maganelelo nyo vivbe, va ambala sombo nya mba na githawo, va engiseya dzindzimo dzi ganeyago silo nyo vivbe, va leva, va daha, va namorari gusihalani, mwendro gu gira simbe silo nyo vivbe. Avo vo lipheya vavelegi vawe, vandriyathu libandlani, ni Jehovha. (Ndzimo 26:4, 5) Ganiolu Jehovha a ngu dziti ha gu ganeya gu khethu hi ngu mu thumeya, na hi gu gira silo a si vengago. (Marko 7:6) Gwadi ngudzu gu hi gira esi si ganedwago khu mavingu: “Monyo wago wu nga dogoreli sighohi, aholu uwe thava Nungungulu gikhati gyatshavbo.” — Mavingu 23:17.a (Wona tshamuselo wa vbavbatshi.)

16. Hi yede gu hlamula kharini siwudziso si gomogo avba nya petisawu nya thumo nya tepo yatshavbo?

¹⁶ Wo ba u vbweta gu thuma kha nga piyonero nya tepo yatshavbo mwendro gu beleya thumo nyo hathege nya tepo yatshavbo, nya nga gu thumeya Bheteli, gu vbwetega gu hi tadzisa petisawu. Khu kharato, gwadi ngudzu gu u ningeya mihlamulo nyo tumbege maningano ni womi wago, sivbungadzo u si hathago, ni mavbanyelo yago. (Vahebheru 13:18) Ganiolu ahati wo ba u giride gilogyo Jehovha a gi vengago mwendro gilogyo gi vetago livhalo lago, u nga mba gi ganeya ga madhota? Ma bhuleye gasi gu ma gu phasa gu thumeya Jehovha na wuri ni livhalo li agidego. — Varoma 9:1; Vagalatiya 6:1.

17. Ginani hi yedego gu gira tepo ava va hi wugeyago va hi girago siwudziso maningano ni vandriyathu?

¹⁷ Ginani u yedego gu gira wa gu ba thumo wathu na wu himbedzedwa omu u vbanyago, khavbovbo u modwa khu dzipfhumu dzi ya gu gira siwudziso maningano ni vandriyathu? Ina u yede gu va embeya satshavbo u sitigo? Ginani egi Jesu a giridego tepo a nga girwa siwudziso khu mufumeli nya muRoma? Jesu thumiside litshina nya nayo nya Bhibhiliya li gu khilo gyomo “gikhati nya gudegule, ni gikhati nya guganele,” nigu uye dzimbe dzitepo kha nga ba a ganeya gilo kamo! (Muhevbudzi 3:1, 7; Matewu 27:11-14) Ho ba hi romo ga giemo nyo fane ni igyogyo, gu vbwetega gu hi vegedza gwadi likana lathu hi bwe hi gengeya gasi gu hi si vegi vandriyathu mangoni. — Mavingu 10:19; 11:12.

18. Ginani hi yedego gu gira ho girwa siwudziso nyo khaguri khu madhota maningano ni vandriyathu?

¹⁸ Ahati wo ba u dziti gu khuwe muthu nyo khaguri libandlani giride gighoho nya gikhongolo? Madhota ma ningidwe thumo nyo agise libandla, khu kharato adzina ma nga gu wudzisa gilogyo khesi u sitigo. U na gira ginani, ngundzungudzu o ba ari pari yago mwendro nongo wago? Bhibhiliya yari khiyo: “Uye a ganelago lisine i fakazi nya yadi.” (Mavingu 12:17; 21:28) Khu kharato gu vbwetega gu u embeya madhota lisine latshavbo nya mba siha gilo. Gu vbwetega gu madhota mati lisine latshavbo, gasi gu ma mana ndziya nya tshukwana nyo phase khiyo muthu yoyo gu wusedza wupari waye ni Jehovha. — Jakobe 5:14, 15.

19. Ginani hi na ganeyago khigyo ga ndrima yi landreyago?

¹⁹ Dhavhidhe gombede ga Jehovha, khuye: “Uwe u ngu gola muthu nya lisine monyoni gwaye.” (Ndzimo 51:6) Dhavhidhe a di gu dziti gu khuye gilo nya lisima ngudzu khedzi hi gu idzo khu monyoni. Tepo yatshavbo, maKristo nya lisine mo ‘Ganeya lisine, muthu ni muthu ga muthu kwawe.’ Yimbe ndziya nyo yeyedze khiyo guhambana ni va nya wukhongeyi nya malipha khu gu hi hevbudza lisine nya Bhibhiliya. Avba nya ndrima yi landreyago, hi na ganeya khedzi hi nga girago khidzo isoso gutshumayelani.