Ginani gi giregago tepo muthu a fago?

Hlamulo nya Bhibhiliya

Bhibhiliya yari khiyo: “Vale va fudego kha va pimi gambe gilo, ambari gu mana tshatshazelo, kholu kha va dundrugi gambe.” (Muhevbudzi 9:5; Ndzimo 146:4) Khu kharato, tepo muthu a fago, o mwalalega. Ava va fudego kha va pimisi gilo, kha va giri gilo mwendro gupwa gilo.

‘U na khala gambe mafu’

Nungungulu tshamusede esi si giregago tepo muthu a fago tepo a nga ganeya ni Adhamu, muthu nyo pheye. Khu kotani nya olu Adhamu a nga diga gu engisa, Nungungulu a di mu embeya khuye: “Kholu uwe u kudzudzwane, u na bwelela gambe u gu khala kudzudzwane.” (Genesi 3:19) Nungungulu na si vangi Adhamu khu “kudzudzwane nya mafu,” Adhamu a diri mwalo. (Genesi 2:7) Khu kharato, tepo Adhamu a ngafa, a di bweleya a khala kudzudzwane a bwe a mwalalega.

Khiso sa simweso si giregeyago ava va fago muhuno. Na yi gu ganeya khu vathu ni sirengo, Bhibhiliya yari khiyo: ‘Vatshavbo va giridwe khu kudzudzwane nya mafu, khu guralo, vatshavbo va na bwelela mafuni.’ ​— Muhevbudzi 3:19, 20.

Gufa khandrayo mahegiso nya silo satshavbo

Bhibhiliya yo fananisa gufa ni gu lala. (Ndzimo 13:3; Johane 11:11-14; Mithumo 7:60) Muthu o ba lade ligovbe nya likhongolo kha sipwi esi si giregago vbafuvbi gwaye. Khu kharato, ava va fudego kha vati gilo. Ganiolu Bhibhiliya yo hevbudza khiyo Nungungulu a na wusa ava va fudego nga khatshi vo wuga khu ligovbeni gasi va vbanya gambe. (Joba 14:13-15) Ga vale va na wuswago khu Nungungulu, gufa khandri mahegiso nya silo satshavbo.