Vathu va gu ba va nyi lemba ginani nyi yedego gu gira?

Khu ginani si vbisago ngudzu

Yimbe milembo yi vivbide ngudzu, nya nga yile yi tsundzisago lina nya muthu nyo khaguri. Ganiolu, ambari na siri silo nya sikhongolo iso si nga vbisa, ngudzu-ngudzu abari gu si di ganedwa khu muthu hi nga ba hi mu wona kha nga pari yathu. — Ndzimo 55:12-14.

“Nyi di tugula gu kheni pari yangu hi di gu ganeya guvivba kheni na nyi si dziti; iyo yi di gu ganeya gu khiyo kha nyi khathali khu vambe. Isoso si nyi vbiside ngudzu! Kha nya nga ba nyi pwisisa gu kheni khu ginani a nga ba a ganeya isoso kheni.” — Ashley.

Lisine: Gani pari yago yi nga ganeya malipha khuwe mwendro ne, uwe gima kha wu na nga tsaka khu gu dziti gu khuye muthu nyo khaguri ganede guvivba khuwe.

Khandri tepo yatshavbo u na si kodzago gu himbedzeya vathu gu ganeya khuwe

Vathu va nga lemba vambe khu sighelo nya singi, nya nga esi:

Gu khathala nya lisine. Vathu vatshavbo va ngu gola gu bhula ni vambe. Khu kharato, si olovegide gu hi bhula (ni gu bhula khu vambe). Khu lisine, Bhibhiliya ya gu hi kutsa gu vbweta esi si “tsakisago vambe.” — Vafilipi 2:4.

“Tepo yatshavbo, mabhulo ma gu tsakisa ngudzu tepo hi ganeyago khu vambe!” — Bianca.

“Nyi ngu dzumeya gu kheni nyi ngu gola gu siti esi si giregago womini nya vathu nyi bwe nyi bhula khu isoso ni vambe. Kha nyi dziti gu kheni khu ginani, ganiolu si ngu tsakisa.” — Katie.

Gu hamuga gilo nyo gire. Dziteponi nya Bhibhiliya, vathu “va di gu thumisa tepo va nga ba va si thumi gilo gasi gu ganeya ni gu engiseya mahungu nya maphya.” (Mithumo 17:21) Sasimweso si ngu girega muhuno!

“Dzimbe dzitepo gya mba girega gilo nyo tsakise, vathu va gu vbwetedzeya gilo nyo ganeye khigyo.” — Joanna.

Gu mba dzi tumba. Bhibhiliya yi na ni gighelo nya yadi nya gu hi gengedze gasi hi si manegi ni giolovedzo nyo dzi fananise ni vambe. (Vagalatiya 6:4) Nya mba tsakisa khu gu, gasi gu pala gigaradzo gegi nya gu mba dzi tumba vathu nyo khaguri va gu ganeya guvivba khu vambe.

“Milembo yi ngu ganeya nya singi khu mulembi wakone. Dzitepo nya dzingi so yeyedza gu khiso muthu yoyo a na ni lidiwo khu muthu a ganeyago khuye. Uye a gu swayela malipha gasi a dzipwa gwadi ni gu dzi wona nari tshukwana gu vbindra muthu yoyo.” — Phil.

Lisine: Gani u ngu si gola mwendro ne, vathu va na ganeya khu vambe gupata ni uwe.

U nga vbeyi tshivba khu kotani nya isoso

Adzina kha wu na nga si kodza gu himbedzeya muthu gu ganeya khuwe, ganiolu u nga hatha esi u nga girago. Wa gu tugula gu khuwe va gu ganeya khuwe, u nga hatha gu thumisa mawonelo yaya ya mavili.

MAWONELO NYO PHEYE: Gu si diga si vbindra. Dzitepo nya dzingi, gilo nya gyadi u nga hungago khu gu si diga si vbindra ngudzu-ngudzu abari gu esi va ganeyago khuwe khandri sikhongolo. Thumisa wusingalagadzi nya Bhibhiliya wu gu khuwo: “U nga vbiredzeli gu goroga, kholu, likhulo lomo myonyoni nya sipumbu.” — Muhevbudzi 7:9.

“Ga tepo nyo khaguri nyi dipwa gu kheni eni nyi di gu namorari ni lidzaha nyo khaguri nyi gu mba liti. Isoso si diri mapwala-ndzadzi, khu kharato nyi di hega nyi si diga si vbindra.” — Elise.

“Sihalo nya wukhongolo gasi gu pala milembo gu manega ni lina nya ladi. Ambari va gu ganeya silo nya mba sadi khuwe, vadugwana va na khodwago gwaso. Khu gu ba uri ni lina nya ladi isoso si na gu emeya.” — Allison.

Mawonelo: Lova (1) esi va nga ganeya khuwe ni (2) edzi u nga dzipwa khidzo. Hwane nya gu ba u ‘dundrugede khiso monyoni gwago,’ adzina u nga si wona nari tshukwana gu si diga si vbindra. — Ndzimo 4:4.

MAWONELO NYA WUVILI: Bhula ni muthu a nga pheya milembo yoyo. Ga siemo nyo khaguri, adzina u nga wona gu khuwe esi va ganeyago khuye sikhongolo ngudzu nyo bwe si vbwetega gu u bhula ni oyu a nga si pheya.

“Wa gu hongola u ya bhula ni oyu a gu lembago si na mu phasa gu wona gu khuye a tshuka a ganeya gambe khu vambe, silo soso kha si na nga lala ndziyani, si na vboha ga oyu a mu lembago. Esi si tsakisago khu gu adzina u na si kodza gu vbodzisa mwendro gu lulamisa gigaradzo.” — Elise.

Na wu si hongoli u ya bhudzisana ni oyu a nga swayela malipha khuwe, gevesisa matshina nya Bhibhiliya u bwe u dzi gira siwudziso si landreyago.

• “Uye a vbiredzelago gu hakha na si gu yingisi, a gu yeyedza wupumbu.” (Mavingu 18:13) ‘Ina nyi ngu siti satshavbo si pategago? Ina oyu a nga nyi embeya silo sesi a si pwisiside gwadi kamo?’

• ‘Vbiredzeya gupwa, ganiolu u si tutumeyi gu ganeya ambari gu goroga khu guvbiredza.’ (Jakobe 1:19) ‘Ina eyi tepo nya yadi gasi gu bhula ni oyu a nga nyi lemba? Ina nyi na si kodza gu bhula naye na nyi gu rude? Mwendro i tshukwana gu vireya tepo nya yadi gasi gu ganeya naye na nyi gu rude?’

• “Esi mu vbwetago gu khenu vathu va mi gireya, va gireyeni nenu.” (Matewu 7:12) ‘Nari khatshi kheni, nyi di gu tsakeya gu kheni muthu yoyo ata ganeya ni eni khu ndziya muni? Ga giemo muni nyi nga ba nyi tsakeya gu kheni ata bhula ni eni khu gigaradzo gyogyo? Malito muni nyi nga ba nyi vbweta gu kheni a ma thumisa?’

Mawonelo: Na wu si hongoli u ya bhula naye, lova esi u vbwetago gu ganeya. Khu gu landreya, vireya semana mweyo mwendro dzimbili, u leri gambe esi u lovidego u bwe u wona esi u vbwetago gu vbindrugedza. Nigu gambe, bhula ni nongo mwendro pari yago yi vidzidwego khesi u vbwetago gu gira u bwe u lomba wusingalagadzi.

Lisine: Gu fana ni silo nya singi si dugeleyago womini gwago, khandri tepo yatshavbo u na si kodzago himbedzeya vathu gu ganeya khuwe. Ganiolu, isoso kha si thuli gu khiso kha wu na nga si kodza gu dzi woneleya.