VAPHYA VA NGU WUDZISA
Khu ginani hi yedego gu hongola mitshanganoni Salawuni nya Mufumo?
Dzifakazi dza Jehovha dzi ngu tshangana matshigu mavili khu semana Salawuni nya Mufumo. Khu ginani si gu na ni lisima gu uwe u manega omu nya mitshangano yoyo?
Ginani gi giregago Salawuni nya Mufumo?
Salawuni nya Mufumo, wulanga owu vathu nya vangi va tshanganago gasi gu hevbula Bhibhiliya nigu wona edzi yi nga va phasago khidzo tshigu ni tshigu. Mitshangano yeyi yi nga gu phasa:
Gu hevbula lisine khu Nungungulu.
Gu pwisisa gu khu ginani silo si garadzago khu ndziya yeyi muhuno.
Gu khala muthu nya wadi.
Ni gu mana dzipari nya dzadi.
U di gu dziti gu khuwe? Wulanga nya wukhozeyi nya Dzifakazi dza Jehovha go ranwa gu pwani Salawu nya Mufumo kholu gu ganedwago ngudzu ngudzu khu Mufumo wa Nungungulu. — Matewu 6:9, 10; 24:14; Luka 4:43.
Khu ginani u yedego gu manega?
Esi u na si hevbulago si na gu phasa ngudzu. Esi u na hevbulago omu nya mitshangano nya Dzifakazi dza Jehovha si na gu phasa gu “mana guti.” (Mavingu 4:5) Isoso sa gu thula gu khiso Bhibhiliya yi nga gu phasa gu hunga makungo nya yadi womini nigu gambe yi nga gu phasa gu mana mihlamulo nya siwudziso sesi nya lisima:
Wona mihungo nya mahungu nyo khaguri nya Dziganelo dzi girwago omu nya mitshangano nya gu vbeyani nya semana:
Khu ginani hi yedego gu kongomiswa khu Bhibhiliya?
Ginani gi na gu phasago wa gu ba uri ni sigaradzo?
Ginani egi mufumo wa Nungungulu wu hi gireyago muhuno.
“Litshigu limwedo nyi ranide pari yangu ya xikwatuno gasi yita mitshanganoni. Hi di khala gumogo naye nigu hi di gu wona hatshavbo mabhuku. Na yi gu vbede mitshangano uye a di nyi embeya gu khuye a yi tsakede ngudzu nigu phasegide khu mihlamulo eyi vandriyathu va nga yi ningeya a bwe a nyi embeya gu khuye tshetsheni gwawe kha va thumise mabhuku gu fana ni ethu.” — Brenda.
U di gu dziti gu khuwe: Omu nya mitshangano nya Dzifakazi dza Jehovha, wa gu beya mahala, kha wu livbe gilo.
U na tiyiswa khu vambe vathu. Bhibhiliya yo ganeya gu khiyo maKristo ma gu tshangana gasi gu ‘ma tiyisana khu gyawe.’ (Vahebheru 10:24, 25) Gu tshangana ni vathu va thangisago gu gola ga Nungungulu ni ogu ga vambe vathu si ngu tiyisana ngudzu ga mafu yaya gu ganedwago gu pwani vathu va yede gu thangisa esi sawe basi.
“Dzimbe dzitepo gu vbeyani nya litshigu nyi nga dzipwa na hi garade, Ganiolu, guya tshangana ni vambe vathu Salawuni nya Mufumo si ngu nyi phasa gu nyi dzipwa gwadi. Tepo nyi bweleyago gaya hwane nya mitshangano nyi ngu dzipwa na nyi tsakide ngudzu, na nyiri ni tshivba gasi guya thuma ga litshigu li landreyago’’ — Elisa
U di gu dziti gu khuwe: Mafuni gwatshavbo gu na ni tanga nya 120 000 mabandla ni gu vbindra nya Dzifakazi dza Jehovha dzi tshanganago omu nya 60 000 dzi Salawu nya Mufumo ni gu vbindra. Mwaga ni mwaga gu ngu vbahwa tanga nya 1 500 dzi Salawu nya Mufumo gasi si kodzega gu tshangana vathu nya vangi.a
a Gasi u mana Salawu nya Mufumo, beya umo nya phajina ”Reuniões da Congregação das Testemunhas de Jeová” beya avba va nga pwani ”Encontre um local perto de você.”